Nkarhi Lowu Misava Leyintshwa Yi Nga Ta Fika Ha Wona

MISAVA leyintshwa ya Xikwembu yi ta fika endzhaku ka loko leyi nga kona sweswi yi hundzile. Kambe u nga ha vutisa, ‘Xana swa tshembisa leswaku misava leyi yi ta hela hakunene?’ Kambe, xiya leswi: Xana yi kona leyi nga hela enkarhini lowu hundzeke ke?

Ina, hi ku ya hi vumbhoni lebyi tiyeke, misava yi tshame yi hela. Bibele yi ri: “Misava leyi a yi ri kona enkarhini wolowo [wa Nowa], yi dyiwile hi mati ya ndhambi yi lova.” Xikwembu “a xi tsetselelanga misava ya khale, kambe xi hlayisile Nowa mutwarisi wa leswo lulama, swin’we ni vanhu van’wana va 7, enkarhini lowu xi nga nisa ndhambi emisaveni ya vanhu lava a va nga ri na mhaka na xona.”—2 Petro 2:5; 3:6.

Xiya leswaku a yi ri “misava ya vanhu lava a va nga ri na mhaka na Xikwembu,” kumbe mafambiselo yo biha ya swilo, lama loveke. A ku helanga pulanete ya Misava, matilo ya tinyeleti kumbe ndyangu wa vanhu. Loko vaponi va Ndhambi va andzile hi nhlayo, misava yin’wana (ya sweswi leya hina) yi ve kona. Ku ta humelela yini hi yona ke?

Endzhaku ka ku hlamusela leswaku misava ya le sikwini ra Nowa yi lovisiwile, Bibele yi ya emahlweni yi ku: “Kambe hi ro rito rero, matilo ni misava ya sweswi, swi hlayiseriwe ku tshwa hi ndzilo.” (2 Petro 3:7) Ndzilo wu fanekisela ku lovisiwa ka misava. “Misava [ya namuntlha] ya hundza” hakunene. (1 Yohane 2:17) Kambe rini?

Vaapostola va Yesu a va lava ku tiva, kutani va vutisile: “Hi byele, xana timhaka leti ti ta humelela rini xana? Xana xikombiso xa ku vuya ka wena ni xa ku hela ka [misava] xi ta va xihi ke?” (Matewu 24:3) Loko a hlamula, Yesu u nyike xikombiso lexi a xi ta pfuna vanhu lava hanyaka enkarhini wa ku hetiseka ka xona leswaku va tiva leswaku misava yi ta hela ku nga ri khale; ivi yi siviwa hi misava leyintshwa. A xi ri xihi xikombiso xa kona?

Xikombiso

Xikombiso xi katse swiphemu leswo tala, ina, swiendlakalo swo tala swi vhumbhiwile. Leswaku xikombiso lexi xi ta hetiseka, swiendlakalo leswi swi fanele ku humelela hi ndlela leyi xiyekaka hi nkarhi wun’we, eka rixaka rin’we. (Matewu 24:34) Hi swihi swiendlakalo leswi ke?

Swin’wana leswi vuriweke hi Yesu hi leswi nge: “Tiko rin’wana ri ta pfukela rin’wanyana, mfumo wun’wana wu ta lwa ni wun’wanyana; ku ta va ni ku tsekatseka ka misava; mintungu ni tindlala swi ta va kona ematlhelweni layo tala.” “Enkarhini wolowo [vanhu, NW] va ta mi nyiketa eku xanisiweni, va mi dlaya; mi ta vengiwa hi vanhu va matiko hinkwawo hikwalaho ka vito ra mina. . . . Kutani rirhandzu ra lavo tala ri ta sungula ku titimela, hikuva ku homboloka ku ta va ku andzile.”—Luka 21:10, 11; Matewu 24:7-9, 12.

Muapostola Pawulo u vule swiyimo swin’wana leswi a swi ta fungha ‘masiku ya makumu’ ya misava leyi. U tsarile: “Tiva leswaku emasikwini ya makumu, ku ta fika minkarhi yo nonon’hwa. Hikuva vanhu va ta va lava tirhandzaka, va ta va lava rhandzaka mali ngopfu, . . . va ta va lava nga yingisiki vatswari va vona, lava nga riki na ku nkhensa, [lava nga tshembekiki, NW], lava nga riki na ku tsetselela, . . . lavo leva, lava nga ni manyunyu, lava rhandzaka ku tiphina ku tlula ku rhandza Xikwembu, va ta tiendla wonge hi loko va [chava Xikwembu, NW] kambe va ta ala matimba ya [ko]na.”—2 Timotiya 3:1-5.

Entiyisweni u tshama u vona kumbe ku twa hi swilo leswi hinkwaswo—madzolonga ya misava lama tlulaka tinyimpi leto sungula, ku tsekatseka lokukulu ka misava, mintungu leyi hangalakeke na ku pfumaleka ka swakudya, rivengo ni ku xanisiwa ka valandzeri va Kreste, ku andza ka vuhomboloki, na minkarhi yo nonon’hwa ku tlula mpimo. Hambi swi ri tano, Bibele yi vhumbhe leswaku Xikwembu xi ta “herisa lava herisaka misava.” (Nhlavutelo 11:18) Naswona vanhu va karhi va herisa misava ni sweswi!

Hi November la hundzeke, maphepha-hungu a a ma tamele tinhloko-mhaka to fana na leyi nge: “Vativi-nkulu Va Sayense Va Tsundzuxa Hi Ku Lovisiwa Ka Misava.” Dok. Henry Kendall, muamukeri wa sagwadi ra Nobel, tlhelo mutshama-xitulu wa Huvo leyi ya Vativi va Sayense lava Khumbekaka u te: “Xitsundzuxo lexi a xi hundzeletiwangi naswona a hi xa ku chavisa vanhu.” Xihloko xin’wana xa phepha-hungu xi vike leswaku: “Nxaxamelo wa vativi va sayense va 1 575 lava tsaleke xitsundzuxo lexi, wu vonaka wu ri wa mavito ya vativi va sayense lava dumeke emisaveni hinkwayo.” Xitsundzuxo xa vona xa ku herisiwa loku heleleke ka misava a xi fanelanga xi honisiwa!

A swi kanakanisi nikatsongo. Swiphemu hinkwaswo swa xikombiso swa hetiseka, ku katsa ni xilotlelo xa Yesu xa vuprofeta lexi nge: “Evhangeli leyi ya Mfumo yi ta twarisiwa emisaveni hinkwayo, leswaku yi va vumbhoni eka vanhu va matiko hinkwawo; kutani hi kona makumu ma nga ta fika,” ina, makumu ya misava leyi. (Matewu 24:14) Yesu u te ma ta fika loko mahungu lamanene ya Mfumo wa Xikwembu ma chumayeriwile emisaveni hinkwayo. Naswona ku chumayela loku ka karhi ka endliwa hi Timbhoni ta Yehovha hi laha swi vhumbhiweke ha kona!

Leswi U Faneleke Ku Swi Endla

Hikwalaho, vumbhoni hinkwabyo byi kombisa leswaku misava leyintshwa ya Xikwembu yi kusuhi ngopfu. Kambe u fanele ku endla swin’wana leswaku u ta pona ku hela ka misava leyi ivi u tiphina hi vutomi emisaveni leyintshwa. Endzhaku ko vula leswaku “misava ya hundza,” Bibele yi kombisa leswi lavekaka eka wena loko yi ku: “Loyi a endlaka ku rhandza ka Xikwembu, ú tshama hi laha ku nga heriki.”—1 Yohane 2:17.

Hikwalaho ku laveka leswaku u dyondza ku rhandza ka Xikwembu naswona u ku endla. Timbhoni ta Yehovaha ti nga tsakela ku ku pfuna ku endla tano. Kutani u nga pona ku hela ka misava leyi ivi u tiphina hi mikateko leyi nga heriki ya misava leyintshwa ya Xikwembu.

[Laha Xifaniso Xi Humaka Kona eka tluka 31]

NASA photo

[Xifaniso lexi nga eka tluka 31]

Nkarhi wa nhlomulo lowukulu wu ta rhangela misava leyintshwa