Xana Vandla Leri Vuriwaka Nguva Leyintshwa I Yini?

A HI nhlangano, kambe minhlangano ya madzana yi seketela tidyondzo ta rona. A ri na huvo ya vakongomisi, kambe vativi va rona va filosofi ni vadyondzisi va kona va hlayiwa hi magidi. A ri na buku ya ximfumo ya tidyondzo kumbe vupfumeri bya yona, kambe valandzeri va rona va seketela dyondzo ya vona hi tilayiburari to tala ta mani na mani emisaveni hinkwayo. Ri hava xikwembu xa rona lexi ri nga xi gandzelaka, kambe hakanyingi ri seketela dyondzo ya leswaku xikwembu xi kumeka hinkwako-nkwako, kwihi na kwihi.

Xana i yini? I vandla ra Nguva Leyintshwa: ku nga mpfangano lowu nga tiyangiki wa mianakanyo ya vukhongeri, ndhavuko, minhlangano ya vanhu, tipolitiki ni vumbiwa, leswi hlanganeke ni mihivahivana ya le Vuxeni, mihlolo, vungoma hambi ku ri tinxaka tin’wana ta ntivo-miehleketo ya manguva lawa. Mpfangano wa kona wu katsa ku pfumela eka vungoma bya tinyeleti, ku tswariwa nakambe, ku tswariwa endhawini yin’wana handle ka le misaveni, hundzuluko ni vutomi bya le ndzhaku ka rifu. Swiphiqo swa mbangu ni rihanyo na swona i tidyondzo letikulu.

Un’wana ni un’wana a nga joyina vandla leri. Ku hava lexi munhu a faneleke a xi endla emahlweni ko amukeriwa, kumbe ku khuvuriwa. Naswona a swi lavi leswaku vanhu va tshika vukhongeri bya vona leswaku va ta va swirho swa rona. Hi tlhelo rin’wana, vo tala a va swi lavi ku hlanganisiwa ni vandla ra “Nguva Leyintshwa” hikuva vo pfumela ntsena tin’wana ta tidyondzo leti dyondzisiwaka hi vandlha ra Nguva Leyintshwa, kumbe vo tsakela swin’wana swa leswi vuriwaka vuswikoti kumbe vuyimbeleri bya vandla ra Nguva Leyintshwa.

A hi xitalo vaseketeri va tivula Swirho swa Nguva Leyintshwa. Kahle-kahle, xivulwa lexi nge “Nguva Leyintshwa” xi tirhisiwa ngopfu hi swihangalasi swa mahungu.

Masiku lawa, tibuku ta vandla ra Nguva Leyintshwa, switolo, mintlawa ya vukambisisi ni minongonoko yo dyondzisa hakanyingi a ti ri tirhisi vito leri. Library Journal yi hlamusela leswaku “swiviko leswi hundzeletiweke swa vahangalasi va mahungu swa le ku heleni ka va-1980 swi pfuxe ngundzungundzu mayelana ni matirhelo ya vandla ra Nguva Leyintshwa (ti-UFO, ku vulavula ni mimoya, maribye lama hatimaka ni swin’wana); leswi swi vonaka hi leswi tikhampani letikulu to tsala ni ku hangalasa tibuku . . . ku katsa ni vukandziyisi bya vandla ra Nguva Leyintshwa ti nga ri tirhisiki ngopfu vito leri ra Nguva Leyintshwa.” Kutani vanhu vo tala va nga ha tikuma va ri ehansi ka nkucetelo wa mavonelo ya vandla ra Nguva Leyintshwa handle ko swi xiya.

I Yini Lexintshwa Ha Rona?

Vo tala va languta vandla ra Nguva Leyintshwa tanihi xihlamariso xa manguva lawa. Hi ku ya hi Profesa Carl Raschke wa Yunivhesiti ya Denver, mavonelo ya vandla ra Nguva Leyintshwa kahle-kahle i “masalela ya manyala ya malembe ya Vamakume-tsevu.” Mindzavisiso yin’wana yi kombetela eka va-1960, laha vatirhisi va swidzidzirisi a va lava ntshunxeko ni ntiyiso, tanihi masungulo ya vandla ra Nguva Leyintshwa. Vo tala lava khale a va ri vatirhisi va swidzidzirisi, lava sweswi va nga le xikarhi ka malembe ya va-40 na va-50, va ha lava ntiyiso wolowo lowu tumbeleke. Kambe ndzavisiso wa vona a wa ha langutiwi tanihi lowu cincaka vantshwa. Vo tala va vona i vatshila lava nga ni vutivi ngopfu, va hisekela timhaka ta tipolitiki naswona sweswi va langutiwa tanihi vaaki lava xiximekaka.

Hi va-1970 na va-1980, va tirhise vutlhari bya vona ni mali ya vona ku ya emahlweni ni ndzavisiso wa vona. Xana vuyelo byi ve byihi? Mpfangano wa vona wa vupfumeri wu amukeriwile ni ku xiximiwa hi vanhu vo tala. Vahangalasi va mahungu va swi lemuke hi xihatla, leswi endleke leswaku etindhawini to tala ku xiyiwa filosofi ya vandla ra Nguva Leyintshwa.

Kahle-kahle, swilo leswintshwa i switsongo ngopfu malunghana ni ripfumelo ra vandla ra Nguva Leyintshwa. Hi xikombiso, filosofi ya rona ngopfu-ngopfu yi sekeriwe eka vukholwa-hava bya le Vuxeni, lebyi nga ni magidi ya malembe hi vukhale. Xiya mavonelo ma nga ri mangani lamantshwa ya vandla ra Nguva Leyintshwa.

Ntshembo Wa Vandla Ra Nguva Leyintshwa

Tanihi leswi lembe ra 2000 ri tshineleke swinene, mianakanyo ya vumundzuku lebyi antswaka, mfumo wa gidi ra malembe lowu antswaka, yi ya yi hangalaka swinene. Lexi va xi pfumelaka ngopfu hi leswaku tiko ra sweswi ri ta siviwa hi tiko ra Utopia.a Hi ku ya hi vadyondzisi va vandla ra Nguva Leyintshwa, leswi swi ta endliwa hi mavonelo lama amukelekaka ni ku hetiseka hi ku tirhisa vutivi bya xihundla lebyi tumbetiweke kumbe lebyi honisiweke ku fikela emalembeni ya sweswinyana. Va vula leswaku nguva leyi leyintshwa ya ku twanana yi ta humesa vuswikoti bya vanhu naswona yi ta tisa ku rhula ka moya ka misava hinkwayo.

Ntshembo lowu wu tikomba wu titshege ngopfu hi vuvhumbhi bya vangoma va tinyeleti, lava kombetelaka esikwini ra hina tanihi le ndzelekanini exikarhi ka nguva leyi hundzaka ya nyeleti leyi va nge i Pisces ni nguva leyi taka ya nyeleti leyi va nge i Aquarius. Vaseketeri va mavonelo lawa va vula leswaku mfungho wa Pisces lowu humesiwaka hi bandhi ra tinyeleti wu ve ni vuyelo byo biha evanhwini ku ringana malembe ya kwalomu ka 2 000. Va hehla Vujagana tanihi byona lebyi nga ni nandzu lowukulu wa ku vumba vandla ra vanhu lava rhandzaka swilo leswi vonekaka ni leri nga hluvukiki. Vujagana byi hehliwa hi ku sivela nhluvuko wa ntiyiso. Kambe ku vuriwa leswaku namuntlha ntiyiso wolowo wu nga kumiwa eka vungoma naswona wu ta paluxiwa hi nguva leyi taka ya Aquarius, nguva ya ku voningeriwa emoyeni, nguva leyintshwa.

Vaseketeri va Nguva Leyintshwa a va twanani emhakeni ya loko vandla lerintshwa ri ta tisiwa hi matimba lawa ma nga riki ya vanhu kumbe hi matshalatshala ya vanhu. Dyondzo yin’wana yi vula leswaku “rixaka leri cincaka ra Vanhu ra Nguva Leyintshwa, leri humaka eka timbewu leti simekiweke hi tintlharhi ta khale, emalembeni ya 3 500 lama hundzeke, ri ta humelela ivi ri susa makwanga emisaveni.”—The Wall Street Journal, January 11, 1989.

Hambi swi ri tano, ntshembo wo tano wa nkarhi lowu tsakisaka, wa Utopia, kumbe misava leyintshwa, a hi wuntshwa. Ku lava ku ringana mintsheketo hinkwayo ya mindhavuko leyikulu yi ni ntshembo wa tiko ra Utopia. Mintsheketo ya Vasumer, Magriki, Varhoma ni Vaskandinavia yi katsa ntshembo lowu. Encyclopedia of Religion ya xiya: “Ku langutela utopia hi mahlo-ngati, laha vanhu va nga ta ka va nga ha pfumali, ni laha ku rhula ni ku humelela ku nga ta fuma kona hi xitalo, ku ve xiphemu xa risima xa vukhongeri bya Machayina ku sukela eminkarhini ya le mahlweni ka vukhongeri bya va-Ch‘in (emahlweni ka 221 BCE).” Buku yo kwetsima ya khale ngopfu ku nga Bibele, yi vulavula hi ku fuma ka gidi ra malembe, laha vanhu va nga ta endliwa lava hetisekeke, naswona nyimpi, vugevenga, ku vaviseka ni rifu swi ta herisiwa.—Nhlavutelo 21:1-4.

Vukhongeri Bya Wena N’wini

Eka bayiskopo ya matimu yakwe leyi nge Out on a Limb, mutlangi la tivekaka, tlhelo mutsari wa vandla ra Nguva Leyintshwa, Shirley MacLaine u yima eribuweni ra lwandle leri hungaka moya, a tshambulute mavoko yakwe, a huwelela a ku: “Ndzi Xikwembu! Ndzi Xikwembu!” Ku fana na yena, vaseketeri vo tala va vandla ra Nguva Leyintshwa va tiyisa ndzavisiso wo kuma tindlela to tikurisa ni miehleketo ya leswaku xikwembu xi le ndzeni ka munhu. Va dyondzisa leswaku swi lava ntsena leswaku vanhu va va ni vuxiyaxiya leswaku va ta vona vukwembu bya vona.

Va vula leswaku loko ku endliwe leswi, vuxaka bya swilo hinkwaswo swa vuako byi ta vonaka—hinkwaswo i xikwembu, naswona xikwembu xi hinkwaswo. Leswi a hi mavonelo lamantshwa nikatsongo. Vukhongeri bya khale bya le Mesopotamiya ni le Egipta a byi pfumela leswaku swiharhi, mati, moya ni xibakabaka i swikwembu. Ku vuriwa leswaku ku nga ri khale, Adolf Hitler u khutaze van’wana leswaku va va ni “ripfumelo lero tiya swinene eka Xikwembu xa Ntumbuluko, Xikwembu lexi nga evanhwini va hina, lexi hi kongomisaka ni lexi nga le ngatini ya hina.”

Ndhavuko wa vandlha ra Nguva Leyintshwa wu hlanganisiwa ni tibuku, mintlawa ya vakambisisi ni minongonoko yo letela leyi khutazaka ku humesa vuswikoti bya wena ni ku tiantswisa. “Ku twisisa vundzeni bya mina” i xihlambanyo lexi tolovelekeke. Vanhu va khutaziwa ku endla xin’wana ni xin’wana lexi kotekaka leswaku va ta kombisa vuswikoti bya vona. Tanihi laha mutsari un’wana a swi vekeke ha kona eka magazini lowu nge Wilson Quarterly, “dyondzo ya xisekelo ya vandla leri hi ‘leswaku a swi na mhaka leswaku u pfumela yini, ntsena loko swi tirha eka wena swi lulamile.’”

Margot Adler, gqweta-nkulu ra vandlha ra Nguva Leyintshwa, u hlamusela leswaku vavasati vo tala lava joyinaka mavandla ya Nguva Leyintshwa va swi endla hi “swivangelo swa munhu hi xiyexe. . . . Va venga mimiri ya vona, va tivenga. Va ta eka mintlawa leyi kahle-kahle yi vulaka leswaku, ‘U Xikwembu-kati, wa hlamarisa.’”

Magazini wa New York wu hlamusela torha ra ntlawa wun’wana ro va exiyin’weni xa le henhla: “Wansati wa huwelela a ku, ‘Hi vadyondzisi va Ku Vonakala Lokuntshwa. Hi hina Vanhu Va Nkoka.’ Van’wana lava hlanganyelaka, va ambale swihuku leswi nga ni timhondzo, swipfala-nghohe leswi nga ni tinsiva ni tinguvu to vevuka va cina enhoveni, va huwelela ni ku tshuka-tshukisa miri, va kolola ni ku konya.”

Vungoma Lebyi Amukelekaka

Tidyondzo tin’wana ta vandla ra Nguva Leyintshwa ti seketela mavonelo lamantshwa, lama hlantswekeke ya vungoma. Vugandzeri bya Sathana a bya ha hlanganisiwi ni vungoma emianakanyweni ya vaseketeri vo tala va vandla ra Nguva Leyintshwa. Mutsari wa magazini lowu nge Free Inquiry u vula leswaku: “Ku ni nhlayo leyi engetelekaka ya vanhu lava endlaka vuloyi kambe a nga kona ni un’we eka vona loyi vupfumeri byakwe byi hlanganisaka vugandzeri bya Sathana.”

Vukambisisi bya sweswinyana bya le Jarimani byi kombe leswaku a ku ri na 10 000 wa valoyi lava hisekaka etikweni rero. Hambi ku ri vana va kokiwa hi vungoma lebyi hi ndlela leyi tumbeleke. Buku ya le Jarimani leyi nge Der Griff nach unseren Kindern (Mukhomi Wa Vana Va Hina) yi hlamusela leswaku hi ku tirhisa “tikhasete ta drama ta vana, vana va tolovelana ni xifaniso lexintshwa xa noyi ku fana ni wansati la tolovelekeke la endlaka mihlolo hi swikongomelo leswinene.” Buku yoleyo ya engetela: “Swihlangi na swona swi kokisiwa xisweswo hi endlelo ra vandla ra Nguva Leyintshwa leri nga endlaka leswaku swi endla mihlolo.”

Ebukwini yakwe, Shirley MacLaine u seketela mianakanyo ya leswaku vungoma i vutivi lebyi tumbetiweke naswona ku tumbetiwa ka byona a ku byi endli mavunwa. Filosofi leyi yi endle leswaku vanhu va ntsandza vahlayi va hlanganyela eka swiendlo swa vungoma leswi nga tolovelekangiki, swo tanihi ku hlahluva, vungoma bya tinyeleti, mbulumeto, ni ku vulavurisana ni mimoya. Hi magidi ya malembe ku vulavurisana ni mimoya a swi tiviwa tanihi vungoma. Kambe vaseketeri va vandla ra Nguva Leyintshwa va swi vula ndlela yo vulavurisana. Dyondzo ya vona yi vula leswaku mimoya ya lava feke yi hlawula vanhu vo karhi leswaku va va vahlanganisi va mimoya ni vanhu.

Tindlela leti ta vanhu to vulavurisana leti ku ehleketiwaka leswaku ti kona, ti nga ha tshika ku tirha ivi ti vula kumbe ku tsala marungula ya “ku voningeriwa” lawa ku vuriwaka leswaku ma huma eka vafi, kumbe eka swivumbiwa swin’wana leswi nga hanyiki kona laha misaveni. Mimoya ya lava feke yi langutiwa tanihi tintlharhi letikulu leti yimeleke nkarhi lowu faneleke leswaku ti tswariwa nakambe. Hi nkarhi lowu fanaka, ku vuriwa leswaku yi kongomisa vanhu eka nguva leyintshwa.

Vaseketeri vo tala va vandla ra Nguva Leyintshwa va hlangana nkarhi na nkarhi leswaku va yingisela leswi tintlharhi ti nga ta swi vula hi ku tirhisa vahlanganisi va kona. Naswona vapfumeri va tihlawulela leswaku va nga vulavula ni mimoya yihi. Exikarhi ka leyi ku ehleketiwaka leswaku ya vulavula namuntlha ku ni mimoya ya John Lennon na Elvis Presley, vanhu lava nga hanyiki kona laha misaveni, lava nga ni mavito yo fana na Attarro na Rakorczy, ni nghwazi leyi nga ni malembe ya 35 000 hi vukhale leyi va nge i Ramtha, leyi humaka endhawini ya ntsheketo leyi vuriwaka Atlantis.

Nguva Leyintshwa Ni Rihanyo

Nhlayo leyi engetelekaka ya tin’anga yi tshemba leswaku vavabyi a va fanelanga va khomiwa ku fana ni michini leyi tshovekeke, ni leswaku va fanele va khathaleriwa emianakanyweni ni le moyeni. Endlelo leri ri tiviwa tanihi ku tshungula miri hinkwawo, naswona kahle-kahle a ri fambisani ni mavonelo ya vandla ra Nguva Leyintshwa. Hambi swi ri tano, vaseketeri vo tala va vandla ra Nguva Leyintshwa va amukele vutshunguri bya miri hinkwawo hi ku hiseka. Buku leyi nge The Cosmic Self yi hlamusela leswaku handle ko ala matshungulelo lama nga kona sweswi, vaseketeri va vandla ra Nguva Leyintshwa va bumabumela leswaku muvabyi a tshunguriwa miri hinkwawo, “xivumbiwa lexi hanyaka xi vumbiwa hi miri, miehleketo ni moya.”

Vaseketeri va vandla ra Nguva Leyintshwa va vula leswaku rihanyo lerinene ri nga kumeka ehandle ka vutshunguri lebyi tolovelekeke. Phepha-hungu ra le Britain leri vuriwaka The Herald ri ri: “Ndhawu yo sungula laha vanhu va kumaka tidyondzo ta vandla ra Nguva Leyintshwa hi laha ku nga ni vutshunguri lebyi nga tolovelekangiki.” Naswona ku kambisisiwa tidyondzo leti hlamarisaka swinene. Hi xikombiso, mutshunguri wa swifuwo tlhelo mutsari Ian Gawler wa le Australia u ringanyeta leswaku vuvabyi bya khensa byi nga tshunguriwa hi ku anakanyisiwa. Tindlela tin’wana to tshungula ta vandla ra Nguva Leyintshwa ti katsa ku kambela hi ku tirhisa vungoma bya tinyeleti, ni ku vonakala loku humaka emirini, ku humba miehleketo, ku endla vuhandzuri handle ko tirhisa tinsingo, ni ku hanyisa hi ku landza hanyelo ra munhu ra khale. Hakanyingi tindlela leti to tshungula ti bumabumeriwa eka timagazini to hlawuleka leti vulavulaka hi rihanyo, mirhi yo tshungula ya ntumbuluko, tivhithamini, vutiolori ni swakudya.

Vandla Ra Nguva Leyintshwa Ni Tikristali

Ndlela yin’wana leyi tolovelekeke yo hanyisa ya vandla ra Nguva Leyintshwa yi katsa ku tirhisiwa ka tikristali ni tindzalama, to fana ni kwatso, ametista, topaza, rubis, opal, na emeralda. Uma Silbey, mutshila wa swin’wetsin’wetsi wa Nguva Leyintshwa u ri: “Ematin’wini hinkwawo u ta kuma swikombiso swa vanhu va tinxaka lava a va pfumela leswaku kwatso yi nga antswisa matimba ya psychic ni matimba yo hanyisa.” Wa engetela: “Vasumer, Vamaya ni tinxaka tin’wana va tirhise tikristali ta kwatso hi xikongomelo xo tshungula.”

Xana tikristali ti tirhisiwa hi ndlela yihi? Muongori la tirhisaka kristali u vula leswaku vuvabyi bya miri ni bya miehleketo byi nga tshunguriwa hi ku vekela kwatso ni tindzalama tin’wana etindhawini to karhi ta miri. Katrina Raphaell, mudyondzisi wa kristala wa vandla ra Nguva Leyintshwa, u hlamusela leswaku tikristali “ti nga vekiwa ehansi ka xikhigelo loko munhu a etlele leswaku ti n’wi endla a lorha milorho leyikulu ni ya vuprofeta. Ti nga ha tirhisiwa loko ku tshunguriwa leswaku ti hunguta mintlhaveko leyi nga riki yinene, ti chavelela mianakanyo leyi karhatekeke ni ku pfuna ku tshungula ku nga ringaneli ka miri. Ti nga ha tirhisiwa hi nkarhi wa ku veleka leswaku ti engetela matimba.”

Nguva Leyintshwa Ni Mbangu

Vandla ra Nguva Leyintshwa ri “tengile, naswona ri tiyimisele ku hlayisa mimbangu, i rinene,” ku vula TSBeat, magazini wa le Britain wa vantshwa. Ku hlanganyela hi ku hiseka eku seketeleni ka mahlayiselo ya ndhawu ni swivumbiwa swi endle leswaku mavandla ya Nguva Leyintshwa ma langutiwa hi ndlela leyinene, naswona mahungu lawa ya ku khathaleriwa ka mbango ma endle leswaku vanhu vo tala va namarhela eka tidyondzo ta wona. Hambi swi ri tano, ndlela leyi vandla ra Nguva Leyintshwa ri khathalelaka ha yona mbango hakanyingi yi vuriwa ku gandzela ntumbuluko hi ku kongoma, laha mihivahivana ya kona yi fambisanaka ni minkhuvo ya khale leyi a yi endleriwa xikwembu-kati xa misava.

Xana xikombiso xa manguva lawa xa ku pfumela eka swihundla swa khale i ntlhantlho wa swiphiqo swa hina? Xana planete leyi yi ta ponisiwa hi vutlharhi bya valoyi ni bya swilo leswi nga hanyiki laha misaveni? Xana nguva leyintshwa ya ku rhula ni ku humelela yi ta kondza yi fika?

[Nhlamuselo ya le hansi]

[Bokisi leri nga eka tluka 6]

MacLaine, Nguva Leyintshwa Na Ramtha

“MPIMO wa xivono a wu ri kona hambi leswi a hi nga xi voni kumbe ku pima ku leha ka xona. Ku na swilo leswikulu ku tlula leswi hina hi kotaka ku swi ‘vona.’ Leswi hi leswi swi vitaniwaka nguva leyintshwa ya miehleketo. Nguva Leyintshwa ya vutivi. . . .

“Ndzi endzele swivumbiwa swa moya swa le nawini leswi kongomisaka valeteri va moya etikweni ra mimoya. Ndzi ake vuxaka ni ‘swivumbiwa sweswo swa moya.’ . . . Xin’we a xi tlharihile swinene ku tlula leswin’wana. Vito ra xona a ku ri . . . Ramtha La Voningeriweke. . . . Xi ri a xi ri munhu hi nkarhi lowu a ku ri ni xihlala xa Atlantis naswona xi kume vutivi hi nkarhi wolowo. . . . Loko ndzi languta ematihlweni ya Ramtha, ndzi titwe hi ndzexe ndzi ku, ‘Xana a wu ri makwerhu wanga hi nkarhi wa xihlala xa Atlantis?’

“. . . Mihloti yi xiririka emahlweni ya yena. A ku, ‘Ee, murhandziwa, naswona wena a wu ri makwerhu.’”

MacLaine u ya emahlweni a ku: “Dyondzo leyi yakwe ya moya, eka mina a ku ri ku byela van’wana leswaku a hi ri Xikwembu. A hi ri ni vutivi byo tanihi bya xona.”—Dancing in the Light, hi Shirley MacLaine.

Ringanisa Genesa 3:5, laha Nyoka (Sathana) yi hambeteke yi ku ka Evha: “Šikwembu ši tiv̌a leŝaku siku mi nga ta dya, mahlo ya ṅwina ma ta pfuleka, mi ta kotisa Šikwembu, mi tiv̌a ŝo saseka ni ŝo biha.” Lava navelaka ku amukeriwa hi Xikwembu va fanele va papalata ku hlangana ni swivumbiwa swa moya leswo biha, leswi xisaka. Nawu wa Muxe wu vula leswi: “Mi nga ṭhuki mi ya v̌angomeni ni ka la’v̌a hlahluv̌aka, mi nga ṭhuki mi v̌a v̌utisisa e timhaka leŝaku mi nga tinyamisi ha v̌ona: hi mina Yehova, Šikwembu ša ṅwina.”—Levhitika 19:31.

[Bokisi leri nga eka tluka 9]

“Xidzidzirisi Xin’wana Eka Vanhu Lava Ana Va Fumiwaka Hi Swidzidzirisi”?

“VANDLA ra Nguva Leyintshwa—xiphemu xa sweswinyana ematin’wini yerhu yo leha ya swilo leswi hlongorisiwaka ngopfu swa moya ni swihlula-mavabyi—ri tivangela ku vungunyiwa ngopfu ni ku tshwukiseriwa mahlo. Ku nga ri hi leswi ri lahlekeriweke hi ndzhuti ntsena, kambe ni hi ku hlongorisa ka rona mali, loku vangaka swisolo swa leswaku ri dyelela vukhongeri. . . .

“Vandla ra Nguva Leyintshwa ri ringeta ku hlanganisa ku anakanyisisa, vonelo lerinene, ku hanyisa hi ripfumelo, . . . ku pfumela eka swihundla, yoga, ku hanyisa hi mati, ku tlhavela, mirhi ya risuna, vungoma bya tinyeleti, ntivo-miehleketo wa Jung, ntitivato, ku famba, ku vulavula ni vafi, . . . dyondzo ya hundzuluko, murhi wa rimbewu wa Reichian, mintsheketo ya khale, . . . vuloyi ni nhlayo yihi na yihi ya vuswikoti byo xalamukisa, ku katsa ni swilo leswi tekiweke eka mikhuva ya vukhongeri lebyikulu. . . .

“Nguva Leyintshwa leyi yimelaka vukhongeri yi ntshunxa ripfalo ematshan’wini yo ri khumba hi ndlela leyi hoxeke. Xikongomelo xa dyondzo ya vona hi leswaku a swi na mhaka leswaku u tshembela eka yini, ntsena loko swi ku pfuna. ‘Swi lulamile loko u swi tshemba’: xiga xa Nguva Leyintshwa. . . .

“Mhaka a hi leswaku vutshunguri bya Nguva Leyintshwa bya tirha kumbe a byi tirhi, kambe hi leswaku xana vukhongeri byi fanele byi siviwa hi vutshunguri kumbe e-e. Loko byi nga ku nyiki xo antswa ku tlula moya wo titwa u tsakile, vukhongeri byi hundzuka xidzidzirisi xin’wana eka vanhu lava ana va fumiwaka hi swidzidzirisi.”—“The New Age Movement: No Effort, No Truth, No Solutions, Notes on Gnosticism—Part V,” hi Christopher Lasch, Watson Profesa wa Matimu eYunivhesiti ya Rochester, New York, U.S.A.

[Xifaniso lexi nga eka tluka 7]

Vugandzeri bya vandla ra Nguva Leyintshwa byi tirhisa nkambisiso wa vungoma bya tinyeleti, mbulumeto, ku anakanyisisa, tikristali ni swilo swin’wana

[Xifaniso lexi nga eka tluka 8]

Matshungulelo ya vandla ra Nguva Leyintshwa ma katsa ku tirhisiwa ka tikristali