Vandla Leri Dumeke Leri Vuriwaka Nguva Leyintshwa

HI HANYA enguveni yo nonon’hwa. Mimpimanyeto ni mahanyelo ya vanhu swa kanakanisa minkarhi hinkwayo. Ku hlanganisiwa ka vukhongeri ni tipolitiki hi ndlela leyi cincacincaka swa hi kayakayisa. Sayense ni thekinoloji a swi yi tisanga mintlhantlho leyi tiyeke eka swiphiqo swa vanhu. Vo tala va khorwiseka leswaku xiyimo xo tano a xi nge tlhantlhiwi handle ka loko ko fika mafambiselo ya misava leyintshwa lama heleleke.

Kambe nguva yo tano yi ta tisa ku yini? Xana yi ta ta hi ku nghenelela ka Xikwembu? Loko swi ri tano, xana hi fanele ku hambeta hi rindza? Kumbexana hi nga endla swo karhi hi hexe emhakeni leyi? Xana hi nga yi tisa nguva leyintshwa leyi laviwaka ngopfu? Vanhu va timiliyoni emisaveni hinkwayo, va swiyimo hinkwaswo, va tshemba leswaku va nga endla xiphemu xa nkoka eku tiseni ka nguva leyintshwa ya ku rhula ni ya vumakwerhu. I swirho swa vahundzuri lava vuriwaka vandla ra Nguva Leyintshwa, naswona va lava leswaku u va joyina!

Vandla Ra Misava Hinkwayo

Xana u tshama u twa hi vandla ra Nguva Leyintshwa? Ematikweni yo tala nhlamuselo leyi nge “Nguva Leyintshwa” a yi tirhisiwa hi ku olova eka tinxaka to karhi ta tibuku, vuyimbeleri ni vutshila lebyi dumeke. Leswi hlamarisaka, ku tlhela ku va ni switolo swa Nguva Leyintshwa! Tinghwazi ta mintlango ni vatlangi va Hollywood va kondletela vandla leri. Swirho swa rona swi va ni mintsombano ni minkombiso nkarhi na nkarhi. Vito “Nguva Leyintshwa” ri tlhela ri hlanganisa swinene ni swilo leswi xaviwaka hi vanhu, swo tanihi switolwa, tivhithamini ni swilo swo hlayisa rihanyo. Tibuku ta Nguva Leyintshwa ti xavisiwa hi timiliyoni. Switolo swin’wana swi ni tindhawu ta tona ntsena. To tala ta tibuku leti ti ni nkucetelo lowukulu wa vukhongeri eka vahlayi.

Ebukwini yakwe leyi nge The Cosmic Self—A Penetrating Look at Today’s New Age Movements, mutsari Ted Peters u vula leswaku vandla leri ri “fana ni bomo ya hayidirojeni leyi se yi nga ni malembe ya kwalomu ka makume manharhu yi ri karhi yi buluka yi nga yimi.” U engetela leswaku “vaprofeta va nguva leyintshwa va hundzula vanhu; naswona tidyondzo ta vona ta amukeriwa . . . hi Maprotestente, Marhoma Khatoliki, Vayuda, ni lava nge Xikwembu a xi kona, ku katsa ni nhlayo leyi engetelekaka ya Mabudha ni Mahindu eAmerika N’walungu.”

The Times ya le London yi vika leswaku: “Dyondzo ya Nguva Leyintshwa . . . sweswi yi tikomba yi ri vupfumeri lebyi kulaka hi ku hatlisa swinene eVupela-dyambu. Ku ringanyetiwa leswaku ku nga ri khale, 25 wa tiphesente ta vaaki va le Amerika va ta va va amukele dyondzo ya Nguva Leyintshwa hi xitalo.” Magazini wa le Switzerland lowu nge Fundamentum wu xiye leswaku le Netherlands, vafundhisi va kwalomu ka dzana a va hlangana nkarhi na nkarhi “ku vulavula hi ndlela leyi mavonelo ya vandla ra Nguva Leyintshwa ma nga nghenisiwaka ha yona emahanyelweni ya kereke ni le tinkulumeni ta vafundhisi.” Magazini wun’wana wu vika leswaku “matiko ya misava hinkwayo ma ni tindlela to hambana to tirhisa dyondzo ya Nguva Leyintshwa, kambe ya tsakeriwa emisaveni hinkwayo.”

Minhlangano ya mabindzu yi tirhise timiliyoni ta tirhandi eka vahlanganisi va vandlha ra Nguva Leyintshwa ni le ku tsariseni ka vatirhi va yona eminongonokweni ya vuleteri bya Nguva Leyintshwa. San Francisco Chronicle yi vika leswaku “mavonelo ya vandla ra Nguva Leyintshwa ma nghenele ni le ka minhlangano-nkulu ya mabindzu ya le Amerika.” Phepha-hungu leri ri engetela hi ku vula leswaku vukambisisi byin’wana eka tikhampani ta 500 byi paluxe leswaku ku tlula 50 wa tiphesente ta tikhampani leti ti nghenelerilenyana eka mavonelo ya vandla ra Nguva Leyintshwa.

Kambe hi xihi xikongomelo xa vandla ra Nguva Leyintshwa, naswona xi tise ku yini? Xana ri ta tisa ku rhula ni ntwanano emisaveni hakunene? Xana ri dyondzisa yini, naswona swi ku khumbisa ku yini?