Ntshembo Wa Xiviri Hi Vana

“A ku nga ha v̌i na ŝihlangi le’ŝi v̌elekiweleke masiku ma nga ri mangani . . . V̌a nga ha tikarateli ŝa hav̌a v̌a nga ha v̌eleki v̌ana, [lava ngo velekeriwa maxangu, New International Version] hikuv̌a v̌a ta v̌a rišaka le’ri katekisiweke i Yehovha.”—Esaya 65:20, 23.

KU NGA khathariseki matshalatshala lawa ma bumabumeriwaka hi munhu ya ku antswisa swilo, timiliyoni ta vana lava ha ku velekiwaka va ha “velekeriwa maxangu.” A swi nge tshamisi sweswo hi masiku. Vuprofeta bya Esaya a byo hi tiyisekisa ntsena leswaku siku rin’wana n’wana un’wana ni un’wana u ta va ni vumundzuku lebyi sirhelelekeke kambe byi tlhela byi hlamusela leswaku xana pakani yoleyo yi ta fikeleriwa njhani.

Eka Esaya 65:17, Xikwembu xi ri: “Nḍi v̌umba matilo la’mantŝha, ni misav̌a le’yintŝha; timhaka ta khale a ti nga ha ṭunḍukiwi, ti nga ka ti nga ha tlheleri meehleketweni.” Leswaku vana va misava va khathaleriwa hi ndlela leyi faneleke, ku laveka “matilo la’mantŝha” ni “misav̌a le’yintŝha.”

“Misav̌a le’yintŝha” i vanhu lavantshwa lava namarhelaka misinya ya milawu leyi Yesu Kreste a yi dyondziseke. Wun’wana wa misinya leyi ya milawu, lowu Yesu a wu hlamuseleke, hi lowu nge “Loyi a amukelaka un’wana wa vana lava hi vito ra mina, ú amukela mina.” (Marka 9:37) Vanhu lava va khomeke n’wana un’wana ni un’wana onge i Kreste hi byakwe hakunene va ta va “misav̌a le’yintŝha”! Ana se, vanhu va timiliyoni va karhi va lwela ku endla sweswo, naswona va humelerile eku nyikeni ka vana van’wana va misava ntshembo.

Vana Lava Sweswi Va nga Ni Ntshembo

Tshepo, swin’we ni mune wa tihosi takwe ta xinuna ni ta xisati, a va tshama eswidakanini eAfrika Dzonga. Loko a ri na lembe hi vukhale, ana se a ri na khwiri lerikulu, xikombiso xa ku nga dyi kahle. Vatswari vakwe a va heta xiphemu xa muholo wa vona lowutsongo ebyaleni va ringeta ku rivala hi maxangu ya vona. Tshepo o tshika a kume swakudya leswi hisaka, naswona a tshikiwa a tlanga ethyakeni leri nga ni swithinana swa byala leswi hangalakeke ekaya ra ka vona.

Vumundzuku bya Tshepo a byi vonaka byi dzwiharile ku kondza ku humelela xin’wana lexi nga hundzula mianakanyo ya vatswari vakwe. Muakelani la vitaniwaka George u va nyike dyondzo ya mahala ya Bibele. Vuyelo bya kona byi ve lebyinene—xiphiqo xa ku nwa xi nyamalarile, kaya ri basisiwile, ndyangu wu dya swakudya leswi hisaka siku na siku, naswona Tshepo ni tihosi takwe ta xinuna ni ta xisati va sungule ku tshama va basile, va ambale kahle, naswona va tsakile.

George u pfune ndyangu wa ka va Tshepo hikuva, tanihi un’wana wa Timbhoni ta Yehovha, u titwa a ri ni vutihlamuleri eka vanhu hinkwavo, ku katsa ni lava nga swisiwana naswona va nga dyondzanga ku ya kule. Entiyisweni, swi teke nkarhi wo leha naswona a ku laveka ku lehisa mbilu ku pfuna ndyangu leswaku wu cinca mahanyelo ya wona, ku va dyondzisa swilo leswintshwa leswi nga swa nkoka leswi sekeriweke eRitweni ra Xikwembu. Kambe George u vona leswaku matshalatshala a ma nga ri ya hava, ngopfu-ngopfu loko a vona ku cinca loku veke kona eka vana lava.

Le dorobeni ra Mexico ra San Salvador Atenco a ku ri na xisiwana lexi vitaniwaka José, tatana wa vana va kaye. A a ri munwi lonkulu, naswona vana vakwe a va n’wi chava hikuva loko a pyopyiwile a a kariha. Kaya ra vona a ri tshama ri thyakile, naswona rivala ra muti a ri ri tshanga ra timbhongolo ni tinguluve ta laha ndyangwini, leti a ti nghena ti huma endlwini hi ku tirhandzela. Hikwalaho ka sweswo vana va ve ni mavabyi ya khwiri, naswona minkarhi yin’wana mimiri ya vona a yi funengetiwe hi swilondza leswi humaka mati.

Swilo swi hundzuke loko José a sungule ku dyondza Bibele ni Timbhoni ta Yehovha. U tshike ku nwa ngopfu ivi a va tatana wa xiviri eka vana vakwe. “Sweswi hi kota no tlanga na papa!” ku vula un’wana wa vana lavatsongo hi ku tibuma. Kaya ra vona sweswi ri base ku basa—ematshan’wini yo va ri ri rona leri thyakeke ku tlurisa—edorobeni rero. Tinguluve ni timbhongolo ti tshama le tshangeni, naswona nkarhi na nkarhi ndyangu wu virisa mati yo nwa. Ku antswisiwa ka nsivela-mavabyi swi vule rihanyo leri antswaka eka vana ni ku tsaka swinene.

Hi laha swikombiso leswi swimbirhi swi kombisaka ha kona, hakanyingi xilotlelo xa ku pfuna vana i ku pfuna vatswari. Xiboho xa Ntsombano wa Misava wo Yimela Vana xi vule leswaku “ndyangu wu ni vutihlamuleri lebyikulu eku kuriseni ni ku sirhelela vana.” Kutani leswaku mindyangu ya va kurisa ni ku va wundla vana va yona ni ku va sirhelela kumbe a yi endli tano swi nga ha titshega ngopfu emhakeni ya dyondzo ku nga ri emhakeni ya muholo.

Ku Hundzula N’wana Wa Le Xitarateni

Le Brazil, Domingos a ri na kaye wa malembe ntsena loko tata wakwe a fa. Loko mana wakwe a tlhela a tekiwa, u rhumeriwe le tindhawini ta vana lava nga riki na vatswari. Hikwalaho ka ku khomiwa hi tihanyi le ndhawini ya vana lava nga riki na vatswari u ehlekete ku joyina ntlawa wa lava kunguhateke ku baleka. Hambi leswi mana wakwe a nga tlhela a n’wi teka loko a twa hi ta makungu ya yena, leswi tata wakwe wa vumbirhi a a n’wi ba minkarhi yo hlayanyana swi n’wi endle a vona swi antswa ku suka ekaya. U ve un’wana wa magidi ya vana va le switarateni le São Paulo lava hatimisaka tintanghu, va xavisa malekere, kumbe va tirha ku heleketa swidzidzirisi leswi nga riki enawini lomu swi lavekaka kona leswaku va kota ku hanya.

Loko Domingos a fika ro sungula eHolweni ya Mfumo ya Timbhoni ta Yehovha, a nga va tshembi naswona a nga ri na mahanyelo—a swi hlamarisi ngopfu loko u tiva ta vutsongwana byakwe. Ku nga khathariseki sweswo, vanhu lavakulu lava nga Timbhoni va endle leswaku a va tshemba, naswona hi nkarhi wa dyondzo ya Bibele, va n’wi pfune leswaku a va ni mimpimanyeto leyintshwa. Eku heteleleni, u dyondze leswaku a nga tshemba Xikwembu ni vanhu van’wana. Timbhoni ti n’wi pfune ku kuma ntirho, ro sungula a pfuneta hi ku aka ivi endzhaku a tirha etihofisini. Sweswi, malembe ma nga ri mangani endzhaku, u tirha tanihi mutirheli wa nkarhi hinkwawo wa Mukreste.

Swikombiso leswi swi kombisa leswaku vanhu lava khathalelaka va nga hungutela vana lava nge misaveni maxangu man’wana. I ntiyiso, Timbhoni ta Yehovha ta swi xiya leswaku maxangu a ma nge heli hi laha ku heleleke hi matshalatshala ya vanhu. Ntlhantlho wa xiviri wa swiphiqo swa vana va misava wu ta lava matimba lama tlulaka ya munhu, nseketelo lowu nga ni matimba lama heleleke, ni vulawuri bya misava hinkwayo.

“Matilo La’mantŝha” Leswaku Ku Va Ni Misava Leyi Antswaka

I Xikwembu ntsena xi nga tisaka ntlhantlho lowu heleleke. Hikwalaho ka leswi, vuprofeta bya Esaya byi hlamusela leswaku “misav̌a le’yintŝha” yi ta fambisana ni “matilo la’mantŝha.” Minkarhi yo hlayanyana Bibele yi tshembisa leswaku “tilo lerintshwa” kumbe “matilo la’mantŝha” ma ta va kona. (Esaya 65:17; 2 Petro 3:13; Nhlavutelo 21:1) Eka khamba rin’wana ku simekiwa ka “matilo la’mantŝha” ku kombisiwa tanihi goza ra nkoka eku herisiweni ka maxangu ni ku tisa misava ya ku lulama. Kahle-kahle wona “matilo la’mantŝha” lama i yini?

Hakanyingi Bibele yi tirhisa rito “matilo” tanihi mavizweni wa vulawuri, ku nga ha va bya Xikwembu kumbe bya vanhu. (Ringanisa Daniyele 4:25, 26.) Hulumendhe leyi leyintshwa i Mfumo wa le tilweni, Mfumo wa Xikwembu—wona lowu Yesu a dyondziseke valandzeri vakwe leswaku va wu khongelela. (Matewu 6:10) Mfumo wa Xikwembu wu ta va ni matimba ya ku herisa maxangu lama xungetaka vana va misava, naswona wu ta tiyimisela ku swi endla sweswo.

I yini lexi nga hi tiyisekisaka leswaku swi ta va tano? Hikuva hulumendhe yi kombisa leswi valawuri va yona va nga swona. Xisweswo Mfumo wa Xikwembu, wu ta fuma hi ku twanana ni mimpimanyeto ya Xikwembu ni liya ya N’wana wa xona, Yesu Kreste, Hosi leyi vekiweke hi Xikwembu. Ha vambirhi va kombise ku tsakela vuhlayiseki bya vana.—Pisalema 10:14; 68:5; Marka 10:14.

Loko ha ha yimele Mfumo lowu wu tshembisiweke hi mahlongati, kumbe “matilo la’mantŝha,” hi nga tirhela ku antswisa swiyimo swa vana lava nga endhawini ya ka hina. Hi laha Ntsombano wa Misava wo Yimela Vana wu heteke hi ndlela leyinene wu ku: “A ku na ntirho lowu xiyekaka swinene ku tlula ku endlela n’wana un’wana ni un’wana vumundzuku byo antswa.”

[Bokisi leri nga eka tluka 11]

Xiyimiso Lexi Tirhaka Xa Ku Pfuna Vana

Ntirho wa Timbhoni ta Yehovha wo dyondzisa wu pfuna vana hi ndlela leyi tirhaka naswona ya hi laha ku nga heriki. Swin’wana swa swiphemu swa xiyimiso lexi hi leswi:

Dyondzo ya lavakulu. Leswi swi katsa tidyondzo to dyondzisa ku hlaya ni ku tsala eka vatswari lava nga kotiki ku hlaya ni ku tsala, xikan’we ni ndzetelo wa Bibele lowu lunghiseleriweke ku va dyondzisa mimpimanyeto leyi lavekaka eku khathaleleni ka vana hi ndlela leyi faneleke.

Ku letela ndyangu. Bibele yi khutaza vatswari—hambi lava va nga swisiwana—leswaku va khathalela vana va vona hinkwavo ematshan’wini yo rhumela van’wana va ya tshama ni maxaka. Buku leyi nge Ku Endla Vutomi Bya Ndyangu Wa Wena Byi Tsakisa yi tikombe yi ri mpfuno emindyangwini leyi nga ni swiphiqo leswikulu.a

Ku katsa vana ni ku va toloveta. Loko vana hi voxe va katsiwa edyondzweni, eku hlayiseni ka rihanyo ni le ka mbhasiso, vuyelo bya kona bya antswa swinene. Hakanyingi Timbhoni ti dyondza Bibele ni vana, ti tirhisa tibuku leti endleriweke vona to tanihi Buku Yanga Ya Timhaka Ta Bibele na Swivutiso Leswi Vantshwa Va Swi Vutisaka—Tinhlamulo Leti Tirhaka leswaku va va pfuna ku langutana ni swiphiqo swa le kaya ni ku antswisa nsivela-mavabyi wa vona vini.b

Ndzetelo wa nsivela-mavabyi ni ku hlayisa rihanyo. Timbhoni ta Yehovha ti kandziyisa magazini wa Xalamuka! hi tindzimi ta 74, naswona nkarhi na nkarhi magazini lowu wu humesa swihloko swa ku hlayisa rihanyo.

Ntirho wo phalala. Hi nkarhi wa mphalalo, Timbhoni ta Yehovha ti lunghiselela xiyimiso xa xihatla xa mphalalo lowu pfunaka hi ku kongoma endhawini leyi weriweke hi khombo.

[Tinhlamuselo ta le hansi]

[Swifaniso leswi nga eka tluka 10]

Ntlhantlho wa xiviri wa swiphiqo swa vana va misava wu ta lava matimba lama tlulaka ya munhu. Ntlhantlho wolowo wu nga tisiwa hi Xikwembu ntsena