Ku Ringanisela Emhakeni Ya Dyondzo

MUENDLI wa swifaniso la nga ni vutshila wa swi kota ku humesa xifaniso hi leswi xi nga xiswona. U xongisa ngopfu nchumu wa risima eka xona ku tlula leswi fambisanaka na wona, ni leswi ngo engetela vuxongi. Swi tano ni hi leswi hi swi rhangisaka evuton’wini bya hina. Swin’wana swa swona i swa nkoka ngopfu ku tlula swin’wana.

Yesu Kreste u te: “Va tsaka lava va khathalelaka xilaveko xa vona xa moya, hikuva mfumo wa matilo i wa vona.” (Matewu 5:3, NW) Xisweswo, nkoka wa swilo swa moya wu fanele wu va wona wa le mahlweni. Hi laha ku hambaneke, swilo leswi vonakaka, swi fanele swi ta endzhaku.

Xana dyondzo yi nghena njhani emhakeni leyi? Kunene a ko va nchumu lowu nga pfuniki nchumu eka Mukreste. Hakanyingi dyondzo yo karhi ya ntirho wo tihanyisa i ya nkoka eku hetisiseni ka vutihlamuleri bya Matsalwa lebyi nyikeriweke hi muapostola Pawulo: “Loko munhu a nga pfuni maxaka ya yena, ngopfu-ngopfu lava va nga va ndyangu wa yena wa xiviri, ú landzurile vupfumeri, kutani ú tlula ni vamatiko hi ku biha.” (1 Timotiya 5:8) Ku tlula kwalaho, ntirho lowu Yesu a wu nyikeke valandzeri vakwe, wa ku endla vadyondzisiwa, wa ku “va dyondzisa ku hlayisa hinkwaswo leswi [a swi] leriseke” wu lava leswaku hi ‘va ni vutivi’ ivi hi dyondzisa van’wana hi laha ku humelelaka.—Matewu 28:19, 20; Yohane 17:3; Mintirho 17:11; 1 Timotiya 4:13.

Hambi swi ri tano, dyondzo yi fanele yi hlayisiwa yi ri endhawini ya yona. A yi fanelanga yi landzeleriwa hikwalaho ko lava ku huma emahlweni hi ta dyondzo kumbe ku lava ku kuma tidigri to hlamarisa. Ku landzelela dyondzo hi ndlela leyi nga fanelangiki swi vangela ku pfilunganyeka. I ntiyiso leswaku yi nga ha ku nyika swilo leswi vonakaka swa xinkarhana. Kambe tanihi laha Solomoni Hosi yo tlhariha a swi vuleke ha kona: “U tirhela nchumu wo karhi hi vutlharhi bya wena hinkwabyo, ni vutivi, ni hi vutshila, kutani u boheka ku swi siya hinkwaswo, u swi siyela munhu la nga swi tirhelangiki.”—Eklesiasta 2:21, Today’s English Version.

Timbhoni ta Yehovha ta yi tsakela dyondzo, ku nga ri ku yi kuma ntsena, kambe leswaku va tirha hi laha ku humelelaka entirhweni wa Xikwembu ni ku tihlayisa. Tanihi leswi ntirho wa vona wu nga bindzuriki, vo tala va boheka ku titshega hi mintirho ya ku tihanyisa evuton’wini bya vona. Leswi swi nga va ntlhontlho lowukulu eka vatirheli va nkarhi hinkwawo va Timbhoni ta Yehovha, lava vuriwaka maphayona. Va fanele va hlayisa xiyimiso xa nkarhi lowu engetelekeke evutirhelini, hi nkarhi lowu fanaka va tihlayisa vona ni mindyangu ya vona loko va nghenele vukati.a—Swivuriso 10:4.

Endzhaku ko pima-pima tinhla to hambana-hambana leti katsekaka, van’wana va Timbhoni ta Yehovha va hlawule ku nghenela dyondzo yo engetela. Ina, va boheke ku va ni vuxiya-xiya leswaku va ta hlayisa dyondzo yi ri endhawini ya yona. Xana i yini lexi va pfuneke ku endla tano? “Ndzi pfuniwe hi tinhla to hlayanyana,” ku vula muntshwa wa le Brazil la vuriwaka John. “Hambi loko ndzi boheka ku hlaya ni vusiku, kambe a ndzi hundziwi hi minhlangano ya Vukreste. Ndzi va byele kahle vanghana va mina va le tlilasini eku sunguleni leswaku ndzi un’wana wa Timbhoni ta Yehovha.”

Eric, loyi na yena a nga wa le Brazil, u yi tirhise kahle minkarhi leyi a yi kuma, a vulavula ni van’wana hi ripfumelo rakwe loko a ri karhi a engetela dyondzo yakwe. U ri: “A ndzi languta xikolo xi ri nsimu ya mina yo hlawuleka. Ndzi swi kotile ku dyondza Bibele ni vadyondzisi vo hlayanyana ni swichudeni, ntlhanu wa vona se va khuvuriwile sweswi, naswona vambirhi eka vona va tirha tanihi vakulu.”

Richard u tlhelele exikolweni a dyondza hi nkarhi wo karhi leswaku a ta kuma digri ya vumpfampfarhuti. U ri: “Ku ya ka mina exikolweni ku ndzi pfunile ku kuma ntirho wo hlayisa mina ni nghamu ya mina, kambe ku tlhele ku ndzi nyika malunghelo. Loko ndzi ri karhi ndzi ya entirhweni wo aka Holo ya Mfumo leyi akiwaka hi xihatla, kutani ndzi vulavula ni valanguteri va kona, ndzi xiye leswaku a ku ri ni xilaveko xa vampfampfarhuti.b Dyondzo ya mina yi tirhisiwa hi ndlela leyinene emintirhweni leyi. Ku tlula kwalaho, mina ni nghamu ya mina hi tshemba leswaku hi ta hetelela hi tirha eyindlu-nkulu kumbe emintirhweni yo aka ya matiko hinkwawo ya Timbhoni ta Yehovha.”

Hi nkarhi lowu fanaka, vo tala va Timbhoni ta Yehovha va swi kotile ku langutana ni ntlhontlho wo tihlayisa va tlhela va hlayisa ni mindyangu ya vona handle ko kuma dyondzo leyi engetelekeke. Mary wa hlamusela: “Ndza tihlayisa hi ku endla ntirho wa le kaya kambirhi hi vhiki. Lexi hlamarisaka, ndzi kuma mali yo tala hi awara ku tlula leyi kumiwaka hi vanhu van’wana lava ndzi va tirhelaka. Kambe ndzi languta ntirho wa mina tanihi ndlela yo kuma xo tihanyisa. Wu endla leswaku ndzi kota ku ya emahlweni ni ntirho wa vuphayona, naswona a ndzi tisoli.”

Steve u titwa hi ndlela leyi fanaka. U ri: “Loko ndzi sungula ku phayona, van’wana a va ku eka mina: ‘Xana u ta swi endlisa ku yini loko u nghenela vukati naswona loko u va ni ndyangu? Xana u ta hola mali yo ringana ku tihanyisa?’ Hi ku famba ka nkarhi, ndzi endle mintirho yo hambana-hambana leyi ndzi nga kuma ntokoto eka yona. Tanihi leswi sweswi ndzi nga ni nsati loyi ndzi faneleke ku n’wi hlayisa, ndzi kuma leswaku ndzi hola mali yo tala ku tlula leyi kumiwaka hi lava paseke ekholichi lava ndzi tirhaka na vona.”

Vatatana lava nga riki vapfumeri va nga ha lava leswaku vana va vona lavatsongo va nghenela tidyondzo to engetela, naswona Matsalwa ma va pfumelela ku endla tano. Kambe, ehansi ka swiyimo swo tano, naswona hi ku pfumelelana na Matewu 6:33, vantshwa va nga ha teka tikhoso leti nga ta va pfuna leswaku va va mpfuno entirhweni wa Yehovha kumbe hambi ku ri ku va pfumelela ku hlanganyela entirhweni wa nkarhi hinkwawo, hi nkarhi lowu fanaka loko va nghena xikolo.

Dyondzo Leyikulu Swinene

Timbhoni ta Yehovha hinkwato, ku nga khathariseki leswaku ti dyondze ku fikela kwihi, ti ni nchumu wun’we lowu fanaka. Ta swi xiya leswaku dyondzo ya nkoka swinene leyi nga kona namuntlha yi seketeriwe eRitweni ra Xikwembu, ku nga Bibele. Yohane 17:3 yi ri: “Vutomi lebyi nga heriki, hi leswaku va ku tiva, wena ntsena u nga Xikwembu xa ntiyiso, na Yesu Kriste loyi u n’wi rhumeke.” Ku nga khathariseki leswaku Mukreste u dyondze ku fikela kwihi, kambe ku tiva Yehovha ni N’wana wakwe, Yesu, ku fanele ku va ko rhanga.

Xikombiso lexi xi vekiwe hi Vakreste va lembe-xidzana ro sungula. Manaheme a a ‘dyondze swin’we na Heroda mufumi wa xifundzha xexo,’ kambe a ri kona exikarhi ka vaprofeta ni vadyondzisi va le vandlheni ra Antiyoka, naswona a hiseka. (Mintirho 13:1, NW) Hi laha ku fanaka, Pawulo a a kume dyondzo leyi namuntlha yi nga ringanisiwaka ni dyondzo ya le yunivhesiti. Hambi swi ri tano, endzhaku ka loko a ve Mukreste, u hlayise vuleteri byakwe byi ri endhawini ya byona. Ematshan’wini yo byi tirhisela ku tshikilela van’wana, u tirhise vutivi byakwe bya ntshamisano, nawu ni ntivo-matimu ku chumayela evanhwini va tinxaka hinkwato.—Mintirho 16:37-40; 22:3; 25:11, 12; 1 Vakorinto 9:19-23; Vafilipiya 1:7.

Vakreste va lembe-xidzana ro sungula a va nga tiviwi ngopfu hi xiyimo xa dyondzo ya vona. Vo tala a “va nga dyondzang[a],” hambi ku ri ku leteriwa eswikolweni swa vufundhisi. Kambe leswi a swi vuli swona leswaku a va nga tlharihanga. Ku hambana ni sweswo, vavanuna ni vavasati lava a va hlomele ku lwela ripfumelo ra vona—leswi nyikaka vumbhoni bya leswaku a va kume tidyondzo ta xisekelo.—Mintirho 4:13.

Xisweswo, Vakreste hinkwavo va yi tsakela swinene dyondzo. Hi nkarhi lowu fanaka, va endla matshalatshala ya ku “hlawula leswi nga swinene ku tlula swin’wana,” va hlayisa dyondzo—ni swin’wana leswi va swi lavaka—swi ri endhawini leyi faneleke.—Vafilipiya 1:9, 10.

[Tinhlamuselo ta le hansi]

[Bokisi leri nga eka tluka 22]

Dyondzo Yo Engetela

Xihondzo xo Rindza xa November 1, 1992, xi tsale leswi malunghana ni Timbhoni ta Yehovha ni vutirheli bya nkarhi hinkwawo: “Mboyamelo lowu nga mukhuva ematikweni yo tala, hi leswaku xikongomelo xo dyondzela ku kuma miholo leyi nyawulaka sweswi xi tlakuke ku tlula leswi a xi ri xiswona malembe ma nga ri mangani lama hundzeke. . . . Swa tika ku kuma mintirho ya miholo leyi nyawulaka loko u lo heta ntsena dyondza ya le xikolweni ya ntlawa lowu hi nawu u languteriwaka ku va u wu pasile . . .

“Xana ku vuriwa yini hi ‘muholo lowu nyawulaka’? . . . Miholo ya vona yi nga ha vuriwa leyi ‘ringaneke,’ kumbe leyi ‘eneleke,’ loko yi va endla va kota ku hanya hi ndlela leyi enerisaka, hi hala tlhelo, yi va nyika nkarhi lowu eneleke ni matimba ya ku endla vutirheli bya vona bya Vukreste.”

Kutani Xihondzo xo Rindza xi te: “Hikokwalaho, ku nga vekiwi milawu ya nsindziso ya ku engetela dyondzo kumbe ya ku alela ku yi engetela.”

[Bokisi leri nga eka tluka 7]

Xibumabumelo Lexi N’wi Faneleke

Matthew, ka ha sele lembe leswaku a heta exikolweni xa le henhla, u ehleketisise hi vuenti malunghana ni ndlela leyi a nga ta tihlayisa ha yona loko a ta va a nghenele ntirho-vutomi wa ku va mutirheli wa nkarhi hinkwawo wa Timbhoni ta Yehovha. Endzhaku ka loko a anakanyisise hi mhaka leyi hi vuenti, Matthew ni vatswari vakwe va vone leswaku dyondzo leyi engetelekeke yi ta va ya nkoka eka yena leswaku a ta fikelela xikongomelo xakwe. Kutani u endle xikombelo xa mali yo n’wi pfuna exikolweni. Mutsundzuxi wa Matthew wa le xikolweni u hoxe papila ra xibumabumelo, a ku:

“Emalembeni mambirhi na hafu lama hundzeke, ndzi tsakele ku va mutsundzuxi ni munghana wa Matt. Matt i munhu la nga ni xisekelo lexi tiyeke . . . U ni ripfumelo leri enteke ni ku chivirika lokukulu, leswi fambisanaka ni vunghana ni mintirho yakwe.

“Emalembeni yo tala lama hundzeke, Matthew a a tilunghiselela vutirheli. Mutirheli wa vukhongeri byakwe a nga holi. Entiyisweni i ntirho wa rirhandzu. Matt, i muntshwa la nga riki na vutianakanyi, u tiyimiserile naswona wa anakanyela. Mali leyi a yi kombelaka ya xikolo yi nga n’wi pfuna munhu loyi wa ripfumelo ku ya emahlweni ni dyondzo ni ntirho wakwe wo tirhandzela.

“Loko hi vulavula hi ntirho wakwe wo tirhandzela ni wo pfuna vanhu, Matt u hete tiawara to tala hi mahelo-vhiki, endzhaku ka xikolo ni hi minkarhi yo wisa, a chumayela hi yindlu ni yindlu. U tirha kwala ndhawini ya ka hina ni vanhu vo hambana-hambana. Matt u kombise vuswikoti byakwe byo rhangela ni vutshila hi ku fambisa tidyondzo ta Bibele eka lavatsongo ni le ka lavakulu hi ku fanana. . . . Wa swi kota ku susumetela vanhu ni ku va pfuna leswaku va fikelela vuswikoti bya vona lebyinene. Etlilasini, vadyondzisi va vule leswaku nkarhi hinkwawo u ni nkucetelo lowunene. I mufambisi wa mabulo ya le tlilasini naswona u ni vuswikoti lebyikulu byo vulavula. . . .

“Matt hi un’wana wa vantshwa lavanene lava ndzi tsakelaka ku va nyika switsundzuxo. U rhandziwa ni ku xiximiwa hi vanghana ni vadyondzi-kulobye. Ku tshembeka kakwe ku xiyeka swinene.”

[Swifaniso leswi nga eka tluka 9]

Timbhoni ta Yehovha ta yi tsakela dyondzo, ngopfu-ngopfu leswaku ti ta va malandza ya Xikwembu lama humelelaka