Xana Vutomi Bya Wena Bya Phirhwa? U Nga Byi Cinca!

HI MUYIMERI WA XALAMUKA! WA LE SPAIN

MARGARET na Brian a va ri emalembeni ya vona ya le henhla ka 50 loko va weriwa hi njombo: ku hatla va tshika ntirho va kuma ni mudende lowunene. Hiloko va anakanya hi ku ya edzongeni laha ku nga ni masana ni timbuwa ta Mediteraniya. A va nga ha khathali hi nchumu, a va nga ha vileli ha nchumu—vutomi byo olova a byi va yimerile endlwini ya vona ya rikupakupa ya le tlhelo ka lwandle.

Endzhaku ka malembe mambirhi, xiyimo xi sungule ku phyama. Brian u hlamuserile: “Hinkwaswo swi sungule ku vonaka swi nga ha pfuni nchumu—siku na siku ku ri hava xo xi endla. Kavula a ndzi ta hlambela, ndzi tlanganyana golufu kumbe ndzi tlanganyana thenisi, ivi ndzi jakatseka ni munhu wihi na wihi a a yingisela. Mayelana na yini? Hi swilo leswi nga riki swa nkoka.”

Gisela, manana la nga ni malembe lama tlulakanyana 20, u na xinhwanyatana xa yena xo saseka. Ni ndzhenga manana ni xinhwanyatana xa yena hi ntolovelo va ya ephakini, laha xinhwanyatana xi fikaka xi tlangela ekheleni ra sava, xi vumba tiphayi ni makhokholo ya sava. Hi nkarhi wolowo, manana u tshame kwala kusuhi ebenceni ra le phakini a hlalela n’wana wakwe hi vukheta. Xana u langute n’wana wa yena hakunene? Laha a tshameke kona u tiyingiselela xiya-ni-moya xa yena lexi rhwalekaka. Hikwalaho ka musi wa fole, a nga ha n’wi voni kahle n’wana wa yena. U phirhweke lerova a nga pfanga no rila.

Peter, xichudeni xa malembe ya 17 hi vukhale lexi nga exikolweni xa le henhla, u tshame ekamareni ra yena, u rhendzeriwe hi swilo leswi swa ha ku endliwaka swa eleketroniki leswi endliweke hi vutlharhi. U pfulela wun’wana wa mintlango ya yena ya vhidiyo, kambe u kuma leswaku a wa ha n’wi tsakisi nikatsongo. Kavula se u wu tlange ko tala ngopfu, naswona sweswi u tiva ni tindlela to dya muchini. Xana a nga yingisela vuyimbeleri? Kambe, ku hava vuyimbeleri lebyi a nga na byona lebyi a nga si byi yingiselaka ko tala. Hikwalaho ko phirhweka ngopfu, u phofula marito yo hlomula mbilu a ku: “A ndzi tivi leswaku ndzi nga endla yini.”

Xana U Fambisa Nkarhi Ntsena?

Entiyisweni, a hi siku ra un’wana ni un’wana leri nga tsakisiki. Hambi swi ri tano, vo tala va hanya vutomi lebyi tsakisaka ni lebyi nga ni xikongomelo, va kuma ku eneriseka hi ku dyondza swilo leswintshwa, ni ku enerisa rintumbuluko ra vona, naswona va hlakulela vunghana lebyinene ni vanhu van’wana—naswona va byi hlakulela ni Xikwembu.

Hambi swi ri tano, ku phirhweka ku khumba vanhu va swiyimo hinkwaswo swa vutomi—munhu un’we eka vanharhu va le Jarimani, hi ku ya hi nkambisiso wa sweswinyana. Vantshwa lavo fumanyana lava tshamaka va ri etindhawini hinkwato ta vuhungasi ta le dorobeni, vantshwa lava nga tirhiki lava fambisaka nkarhi ntsena hi vuyimbeleri lebyi pfuleriweke henhla ni byala lebyi xavekaka, vatirhi lava nga ni malembe ya le xikarhi lava tirhaka ntirho wa mavoko lava hetaka mahelo-vhiki ya vona va hlalele thelevhixini, mulanguteri loyi a twaka a nga titshembi loko a kala a suka ehofisini ya yena—hinkwavo va xanisiwa hi xivilelo lexi tolovelekeke: ku phirhweka.

Vativi va filosofi va khale a va ku vitana taedium vitae (hi Xilatini, ku phirhweka hi vutomi). Hi Xijarimani i Langeweile (nkarhi wo leha). Nkarhi lowu fambaka hi ku nonoka, ntirho lowu vonakaka wu nga ri na xikongomelo, ku lava “ku huma eka wona” hinkwaswo leswi i swikombiso leswi tolovelekeke swa ku phirhweka.

Hambi ku ri lava fuweke a va sawutisiwanga. Endzhaku ko hlamusela mahanyelo ya vulovolovo ya swigwili leswikulu, Roger Rosenblatt wa magazini lowu nge Time u xiyile: “Endzhaku ko kuma yindlu leyikulu ni ntanga lowukulu ni swifuwo leswikulu, endzhaku ko ya eminkhubyeni ni ku tivana ni vanhu va le henhla, i yini lexi swigwili swo tala swa misava swi xi vulaka ke? Va vula leswaku va phirhwekile. Ku phirhweka.”

Nkarhi wun’wana ku tshame ku ehleketiwa leswaku ku engeteleka ka ku tiphyuphyisa ku nga va murhi wa ku phirhweka. A ku vuriwa leswaku swiyimo swa ntirho swa vumunhu, leswi hetaka ntirho lowu phirhwaka wo phindha-phindha swilo wa nkarhi lowu hundzeke, ni nkarhi wo tala wo tiphyuphyisa swi nga endla vutomi byi vuyerisa eka munhu la tolovelekeke. Khombo ra kona, a swi olovi hi ndlela yoleyo. Ku ehleketa leswi u nga swi endlaka hi nkarhi lowu wo ntshunxeka swi tikombe swi tika swinene ku tlula ndlela leyi swi ehleketiweke ha yona. Vo tala vhiki hinkwaro, hi mahlo-ngati, va langutela mahelo-vhiki lama tsakisaka, kambe loko ma fika va kuma leswaku a ma tsakisi hi ndlela leyi a va ehlekete ha yona.

Vuyelo Byo Biha Bya Ku Phirhweka

Van’wana va lava ku balekela ku phirhweka hi ku tshama va ri karhi va endla xo karhi. Van’wana va kale va godzomberiwa hi ntirho hi mhaka ya leswi a va nga tivi lexi va nga xi endlaka hi nkarhi wa vona loko va nga ri entirhweni. Van’wana va hlule ku phirhweka ka vona hi ku tirhisa xihoko hi ndlela yo biha kumbe va lava ntsako hi ku ringeta ku tirhisa swidzidzirisi. Vatlangi vo tala lava hanyaka vutomi byo tshama va khomekile ni lebyi onhakeke va pfala vangwa ro titwa va nga pfuni nchumu hi swidzidzirisi swo tanihi khokheyini loko va hete minkombiso ya vona. Ku phirhweka ku hlamuseriwe tanihi xin’wana xa swivangelo swa nhlayo leyi kulaka swinene ya vamanana va kondlo-a-ndzi-dyi lava nga tekiwangiki, lava vo tala va vona va nga ha vaka va ehlekete leswaku n’wana u ta endla vutomi bya vona byi va ni xikongomelo.

Ku anakanyiwa ni leswaku ku phirhweka ku fambisana ni ku andza ka vugevenga. Magazini lowu nge Time wu xiye leswaku vana vo hlaya va tshika xikolo va ri ni malembe ya 16 naswona va ri hava xo xi endla, na leswaku lava nga tirhiki va le Yuropa Vupela-dyambu loko va ringanisiwa ni tintangha ta vona leti tirhaka, va “tala ku tisunga, va tirhisa swidzidzirisi hi ndlela yo biha, va tala ku tika handle ka xiboho xa vukati naswona va tala ku tlula nawu.” Leswi nakambe swi tikomba swi tiyisa xivulavulelo xa khale xa leswaku “Sathana u kumela lavo tshama hi mavoko vubihi byo karhi byo byi endla.”—Ringanisa Vaefesa 4:28.