I Yini Leswi Ndzi Nga Swi Endlaka Leswaku Ndzi Tiphina Hi Ku Hlaya Bibele?

Ha yini u hlaya Bibele? Anakanya hi leswi landzelaka:

Bibele yi nga ku pfuna leswaku u kuma ntsako. Buku leyi, leyi xavisiwaka ku tlula hinkwato yi nga

● Ku komba ndlela yo va ni vutomi lebyinene

● Ku byela swilo malunghana ni vumundzuku ni swilo swa nkarhi lowu hundzeke leswi a wu nga ta swi tiva

● Ku pfuna leswaku u titiva nileswaku u va ni vumunhu lebyinenea

KU DYONDZA Bibele swi lava matshalatshala kambe swa vuyerisa swinene! Xana wa swi lava ku tiva leswaku vantshwa van’wana va swi kotisa ku yini? Tsema tluka leri landzelaka kutani u ri petsa. U ta va ni matluka ya mune lama nga ta ku komba ndlela leyi tintangha ta wena ti swi hlulaka ha yona swihinga ni ndlela leyi ti vuyeriwaka swinene ha yona eka dyondzo ya tona vini ya Bibele.

“Ku ni swo karhi leswi vanhu hinkwavo va nga swi dyondzaka eBibeleni. Ku ni swilo swo tala leswi va nga hlayaka ha swona!”—Valerie.b

Swihloko swin’wana leswi nge “Vantshwa Va Vutisa” swi kumeka eka Web site leyi nge www.watchtower.org/ype

[Tinhlamuselo ta le hansi]

[Bokisi/Swifaniso leswi nga eka matluka 19, 20]

NDLELA YO HLAYA BIBELE

Xiphiqo: KU NGA SWI TSAKELI KU HLAYA

“Ndzi vona onge a ndzi nge swi koti ku heta awara ndzi ri eku hlayeni.”—Lena.

Leswi u faneleke u swi endla: TIVA XIVANGELO

Leswaku u tiphina hi ku hlaya Bibele, u fanele u hlamula xivutiso lexi, Ndzi ta vuyeriwa hi yini? Xana u nga swi tsakela ku va munghana wa Xikwembu? Xana u nga swi tsakela ku twisisa swilo leswi endlekaka laha misaveni? Xana u nga swi tsakela ku antswisa vumunhu bya wena? Bibele yi nga ku pfuna leswaku u tiva swilo leswi ni swin’wana swo tala!

“U nga ehleketi leswaku ku dyondza Bibele swi fana ni ku tirha kumbe ku dyondza xikolo. Ematshan’weni ya sweswo, teka dyondzo ya Bibele tanihi hi ndlela yo va u tshinela ekusuhi ni Munghana lonkulu ku tlula hinkwavo, ku nga Yehovha Xikwembu.”—Bethany.

“Nkarhi wo dyondza Bibele, i nkarhi wa wena na Yehovha Xikwembu. Loko u heta nkarhi ni munhu un’wana ntsena loko vatswari va wena va ri kona, xana u nga vula leswaku munhu yoloye i munghana wa wena? Loko u tihlayela Bibele, Yehovha u ta va munghana wa wena.”—Bianca.

Tsundzuka: “Hinkwaswo leswi nga eMatsalweni swi huma eka Xikwembu. Hinkwaswo swi pfuna ku dyondzisa, ku kongomisa vanhu, ku va lulamisa ni ku va komba ndlela leyi va faneleke va hanya ha yona.” (2 Timotiya 3:16, Contemporary English Version) Bibele yi nga ku pfuna hi tindlela teto!

“Ndzi ringeta ku ehleketa hi ndlela leyi ndzi nga ta vuyeriwa ha yona. Loko ku ri ni leswi ndzi faneleke ndzi antswisa eka swona, ku hlaya Bibele swi ndzi pfuna leswaku ndzi tiva laha ndzi siyekaka kona kutani ndzi antswisa.”—Max.

Xivutiso xo anakanyisisa ha xona:

I yini lexi nga ta ku susumetela ku hlaya Bibele?

Xiphiqo: KU PHIRHEKA

“Endzhaku ko heta khume wa timinete ndzi ri eku hlayeni, ndzi sungula ku karhala; endzhaku ka timinete ta 20, ndzi va se ndzi lava ku endla swin’wana; endzhaku ka timinete ta 30, ndzi va se ndzi phirhekile!”—Allison.

Leswi u faneleke u swi endla: TISUNGULELE SWILO

Tirhisa miehleketo ya wena, ku nga khathariseki leswaku swi katsa leswi u nga eku swi hlayeni, ndlela leyi u hlayaka ha yona kumbe laha u nga ta hlayela kona.

“Tinyike nkarhi wo endla ndzavisiso wa swivutiso leswi u nga na swona. Loko u hlaya hi mhaka yo karhi leyi ana se yi nga emiehleketweni ya wena, u va u enerisekile naswona u tsakile loko u heta.”—Richard.

“Loko u hlaya hi xiendlakalo xo karhi, tianakanye u ri eka xona. Endla onge hi wena ximunhuhatwa-nkulu kumbe muhlaleri. Ringeta ku vona xiendlakalo xexo hi mahlo ya mianakanyo.”—Steven.

“Tiphine loko u ri eku hlayeni. Ntshunxeka naswona u tikumela swo nwa. Ndzi rhandza ku dyanyana swo karhi loko ndzi ri eku dyondzeni. A ku na loyi a nga swi rhandziki.”—Alexandra.

Tsundzuka: Ku phirheka swi le ka munhu naswona a swi vuli swona leswaku vanhu hinkwavo va phirheka. Ematshan’weni yo vula leswaku “ku hlaya swa phirha,” u fanele u ku, “swa ndzi phirha.” U fanele u va ni vutihlamuleri malunghana ni leswi u swi hlayaka. Leswi swi ta ku pfuna leswaku u tilawula naswona u endla swo karhi hi xiyimo xexo.—Swivuriso 2:10, 11.

“Dyondzo ya munhu hi yexe a yi fanelanga yi phirha. Yi nga va leswi wena u tsakelaka leswaku yi va xiswona.”—Vanessa.

Xivutiso xo anakanyisisa ha xona:

I yini leswi u nga swi endlaka leswaku dyondzo ya wena yi tsakisa?

Xiphiqo: KU NGA VI NA NKARHI

“Ndzi nga swi tsakela ku hlaya swo tala eBibeleni, kambe leswi ndzi tshamaka ndzi khomekile, a ndzi na wona nkarhi wo endla tano!”—Maria.

Leswi u faneleke u swi endla: RHANGISA SWA NKOKA

Nchumu wun’wana lowu kombisaka leswaku wa kula i ku va u “tiyiseka hi swilo swa nkoka swinene.”—Vafilipiya 1:10.

“Manana u ndzi pfunile ku xiya leswaku a ndzi nge pfuki ndzi ve ni nkarhi lowu engetelekeke. Ndzi fanele ndzi tixavela nkarhi. Endzhaku ko hlakulela ku rhandza ku hlaya, ndzi swi kotile ku tixavela nkarhi.”—Natanya.

“Loko ndzi kula, ndzi dyondze leswaku ndzi fanele ndzi tixavela nkarhi wo hlaya naswona ndzi fanele ndzi swi endla hambi ko ba lexi dumaka.”—Yolanda.

“Loko u rhangisa dyondzo ya munhu hi yexe ku ri ni ku tihungasa, ndza ku tiyisekisa leswaku u ta yi tsakela swinene naswona loko se u tihungasa a wu nge kingindziwi hi ripfalo.”—Diana.

Tsundzuka: Loko u nga rhangisi swilo swa nkoka, a wu nge swi koti ku lawula nkarhi wa wena naswona a wu nge vi na nkarhi lowu eneleke. Kutani i swa nkoka ku tixavela nkarhi wo hlaya.—Vaefesa 5:15, 16.

“Tanihi xichudeni xa le sekondari, swa olova leswaku ndzi tikuma ndzi khomekile hi swilo swin’wana. Kutani eka xiyimiso xa mina, dyondzo ya munhu hi yexe ya Bibele hi yona ya nkoka swinene.”—Jordan.

Xivutiso xo anakanyisisa ha xona:

Hi xihi xiyimiso xo hlaya lexi u nga tivekelaka xona?

[Bokisi/Swifaniso leswi nga eka tluka 19]

SWITSUNDZUXO LESWI HUMAKA EKA TINTANGHA TA WENA

Zachary—U nga hlayi ntsena leswi hlayiwaka hi vatswari va wena kumbe hi vanhu van’wana. Leswi u swi hlayaka swi va dyondzo ya munhu hi yexe loko u ta vuyeriwa eka swona.

Kaley—U nga heti nkarhi wo tala. Loko u lava ku hlaya, kumbexana u nga sungula hi ku tirhisa timinete ta ntlhanu naswona u hlaya masiku hinkwawo. Hi ku famba ka nkarhi u nga engetela nkarhi wa wena wu ya eka khume kumbe 15 wa timinete . . . Naswona u ta ya u swi tsakela!

Daniela—Vuxokoxoko byitsongo byi nga ku pfuna swinene. Kuma swo tsala ha swona leswi nga ni mihlovo yo hambana-hambana ni buku yo tsalela eka yona kumbe u tiendlela fayili eka khompyuta ya wena ivi u yi thya, Dyondzo Ya Munhu Hi Yexe.

Jordan—Loko ndzi hlawula xihloko lexi ndzi xi tsakelaka, ndzi kota ku dyondza nkarhi wo leha. Nakambe ndzi tsakela ku dyondza endhawini leyi nga riki na pongo. A ndzi swi koti ku dyondza loko ku ri ni huwa.

[Dayagramu leyi nga eka tluka 18]

(Leswaku u vona rungula leri hleriweke hi ku helela, vona nkandziyiso wa kona)

Tsema

Petsa