Watchtower LAYIBURARI YA LE KA WEB SITE
Watchtower
LAYIBURARI YA LE KA WEB SITE
Xitsonga
  • BIBELE
  • MIKANDZIYISO
  • TINHLENGELETANO TA VANDHLA
  • w94 6/15 matl. 8-11
  • Xana Wa Yi Tsakela Dyondzo Ya Wena N’wini?

A ku na vhidiyo.

Hi khomele, ku ve ni xiphiqo loko hi tlanga vhidiyo leyi.

  • Xana Wa Yi Tsakela Dyondzo Ya Wena N’wini?
  • Xihondzo xo Rindza Xi Huwelela Mfumo Wa Yehovha—1994
  • Swihloko
  • Tinhlokomhaka Tin'wana Leti Yelana Na Yona
  • Va Pfuxete Matimba Ya Vona Hi Dyondzo Ya Vona Vini
  • Endla Vutirheli Byi Va Nsusumeto
  • Ku Tiwundla Hi Rito Ra Xikwembu Nkarhi Na Nkarhi
  • Mianakanyo Yin’wana Ya Vutlharhi
  • Hambeta U Hisekela Ku Dyondza
  • Landzela Xikombiso Xa Tihosi
    Xihondzo xo Rindza Xi Huwelela Mfumo Wa Yehovha—2002
  • Antswisa Ndlela Leyi U Dyondzaka Ha Yona!
    Xihondzo xo Rindza Xi Huwelela Mfumo Wa Yehovha (Nkandziyiso Wa Vandlha)—2019
  • Ku Vuyeriwa Hi Ku Hlaya Bibele Siku Na Siku
    Xihondzo xo Rindza Xi Huwelela Mfumo Wa Yehovha—1995
  • Ku Dyondza Ka Vuyerisa
    Buku Yo Letela Ya Xikolo Xa Vutirheli Bya Le Tilweni
Vona Swo Tala
Xihondzo xo Rindza Xi Huwelela Mfumo Wa Yehovha—1994
w94 6/15 matl. 8-11

Xana Wa Yi Tsakela Dyondzo Ya Wena N’wini?

NANDZA un’wana ni un’wana wo tshembeka wa Xikwembu wa swi tsakela ku tirhisa nkarhi wo tala edyondzweni ya yena n’wini ya Bibele. (Pisalema 1:1, 2) Kambe, hikwalaho ka leswi yi lavaka nkarhi wo tala ni matimba ya vona, vo tala va kuma swi nonon’hwa ku heta nkarhi wo tala ni matimba edyondzweni ya vona vini.

Hambi swi ri tano, leswaku va ta ya emahlweni va ri malandza lama gingiritekaka ya Xikwembu, hinkwavo va fanele ku lwela ku pfuxeta ntsako ni matimba ya vona siku na siku hi ku kuma timhaka letintshwa kumbe leti enteke ta ntiyiso wa Rito ra Xikwembu. Mintiyiso ya Bibele leyi ku khumbeke swinene malembe lama hundzeke yi nga ha va yi nga ha ku khumbi ngopfu namuntlha. Hikwalaho, i swinene, naswona i swa nkoka, leswaku hi endla matshalatshala lamakulu lama hambetaka yo kuma vutivi lebyinene bya ntiyiso leswaku hi ta tshama hi hanyile emoyeni.

Xana vavanuna va khale va ripfumelo va titiyise njhani emoyeni hi dyondzo ya vona vini ya Rito ra Xikwembu? Xana malandza man’wana ya Yehovha ya manguva lawa ma yi endla njhani dyondzo ya wona n’wini leswaku yi tsakisa swinene ni ku va ni mihandzu? Xana matshalatshala ya wona ma hakeriwe hi ndlela yihi?

Va Pfuxete Matimba Ya Vona Hi Dyondzo Ya Vona Vini

Hosi Yosiyasi wa Yuda u sungule tsima rakwe ro lwisana ni vugandzeri bya swikwembu swa hava hi ku hiseka lokukulu endzhaku ka loko ‘a hlayeriwe buku ya nawu wa Yehovha leyi tsariweke hi Muxe.’ A swi kanakanisi leswaku a ku nga ri ro sungula ku va a kambisisa xiphemu lexi xa Rito ra Xikwembu; kambe ku twa marungula lama humaka ematsalweni layo sungula hi ku kongoma swi n’wi susumetele ku lwela vugandzeri lebyi tengeke.—2 Tikronika 34:14-19.

Muprofeta Daniyele u kume ‘nhlayo ya malembe ya ku hetiseka ka ku lovisiwa ka Yerusalema’ ni ku tiyiseka ka kona hayi ebukwini ya Yeremiya ntsena, kambe ni le ‘tibukwini’ tin’wana. Leti ti fanele ti katsa tibuku to tanihi ya Levhitika (26:34, 35), Esaya (44:26-28), Hosiya (14:4-7) na Amosi (9:13-15). Leswi tiyisekisiweke hi dyondzo yakwe yo chivirika ya tibuku ta Bibele swi endle wanuna loyi wo hiseka a lava Xikwembu hi xikhongelo xa mbilu hinkwayo. Ku phikelela ka yena a kombela ku hlamuriwe hi ku paluxiwa loku engetelekeke ni ku tiyisekisiwa malunghana ni muti wa Yerusalema kun’we ni vanhu va wona.—Daniyele, ndzima 9.

Yosiyasi, loyi a a endla “le’ŝo lulama e mahlweni ka Yehova,” na Daniyele, loyi ‘a a rhandzeka’ emahlweni ka Xikwembu entiyisweni a va nga hambananga na hina namuntlha. (2 Tihosi 22:2; Daniyele 9:23) Matshalatshala ya vona vini lawa a ma va susumetela ku dyondza Matsalwa lama a ma kumeka hi nkarhi wolowo ma endle leswaku va kula emoyeni ni ku va pfuna leswaku va va ni vuxaka lebyikulu ni Xikwembu. Leswi swi nga ha vuriwa ni le ka malandza man’wana yo tala ya khale ya Yehovha, yo tanihi Yefta, mupisalema wa va yindlu ya Asafa, Nehemiya na Stefano. Hinkwavo ka vona va nyike vumbhoni bya dyondzo ya vona vini ya vukheta ya xiphemu xa Bibele lexi a xi kumeka enkarhini wa vona.—Vaavanyisi 11:14-27; Tipisalema 79, 80; Nehemiya 1:8-10; 8:9-12; 13:29-31; Mintirho 6:15–7:53.

Endla Vutirheli Byi Va Nsusumeto

Malandza yo tala ya Yehovha namuntlha lama n’wi tirheleke malembe yo tala ma ni xiyimiso xa dyondzo ya vona vini ya Bibele. Va vone leswi swi ri swa ntikelo leswaku va ta tshama va xalamukile emoyeni ni ku hlangavetana kahle ni vutihlamuleri bya vona bya Vukreste. Hambi swi ri tano, vo tala va vona va pfumela leswaku a hi minkarhi hinkwayo swi olovaka ku ringanisela ku tirhisa nkarhi wa vona ni matimba edyondzweni ni le ka timhaka tin’wana leti nga fanelangiki ku honisiwa.

Hambi swi ri tano, ku tshama u xalamukile emoyeni hi ku pfuniwa hi dyondzo yo tiyimisela ya wena n’wini swa fanela leswaku u ta kota ku langutana ni swilaveko swa vutirheli bya Vukreste exiyin’weni lexi xa ntirho wo chumayela hi Mfumo emisaveni hinkwayo. Lava susumetiwaka hi vutivi lebyintshwa ni lebyi enteke bya Rito ra Xikwembu va nga langutana ni mphikamakaneta yo khumba timbilu ta vanhu lava nga ni ndlala ya moya. Leswi swi tano hambi loko munhu a averiwe laha a nga phasaka tinhlampfi leto tala hi tlhelo ra moya kumbe a hambeta a tirha emasin’wini lama hlanganisiwaka kahle laha hi ntolovelo ku nga riki na ku tsakela.

Ku Tiwundla Hi Rito Ra Xikwembu Nkarhi Na Nkarhi

Leswi van’wana va swi endlaka swi nga ku pfuna leswaku u kota ku tsakela swinene ndlela ya wena yo dyondza kumbe ndlela leyi wena ni ndyangu wa wena mi nga tirhisaka nkarhi wo dyondza ha yona hi mukhuva lowu vuyerisaka swinene. Xin’wana lexi nandza wa Xikwembu a nga fanelangiki ku xi honisa i ku hlaya Rito ra Xikwembu hi roxe nkarhi na nkarhi. Vo tala va endle pakani yo hlaya tindzima leti nga riki ehansi ka tinharhu kumbe mune ta Bibele evhikini. Xana wa swi lava ku hlaya Bibele hinkwayo hi lembe rin’we? Kutani u ta tsakela ku heta nkarhi wo tala u ri karhi u yi hlaya, kumbexana hafu ya awara hi siku.

Xana u hlaye Bibele hinkwayo ku tlula kan’we? Ha yini u nga tivekeli pakani yintshwa nkarhi lowu taka? Wansati un’wana wa Mukreste se a a hlaya tibuku ta Bibele hi ku landzelelana ka tona. U kume vuxokoxoko byo tala, lebyi sekeriweke ematin’wini ya ku landzelelana ka minkarhi, lama a nga ma xiyangiki eku sunguleni. Wansati un’wana wa Mukreste u hlaye Bibele ku sukela eku sunguleni ku fika eku heteleleni ka ntlhanu emalembeni ya ntlhanu lama hundzeke, nkarhi wun’wana ni wun’wana a tirhisa ndlela leyi hambaneke. Eku sunguleni, u yi hlaye ku sukela eku sunguleni ku ya fika emakumu. Loko a hlaya ra vumbirhi, u katsakanye rungula ra ndzima yin’wana ni yin’wana hi ntila wun’we kumbe mimbirhi ebukwini ya tinotsi. Ku sukela elembeni ra vunharhu ku ya emahlweni, u sungule ku tirhisa nkandziyiso lowukulu wa tinhlamuselo, a sungula hi ku kamba tinhlamuselo ta le tlhelo ha yin’we-yin’we leti nga emajinini kutani a xiyisisa tinhlamuselo ta le hansi kun’we ni rungula leri nga eka xita-ndzhaku. Ra vuntlhanu, u tirhise mimepe ya Bibele ku engetela ku twisisa ka yena rungula ra ntivo-misava. U ri: “Ku hlaya ka mina Bibele ku sungule ku tsakisa ku fana ni ku dya swakudya.”

Swichudeni swin’wana leswi gingirikaka swa Bibele swi kume swi pfuna ku va ni kopi ya Bibele leyi tirhiseriwaka dyondzo ya munhu hi xiyexe ntsena, swi tsala tinotsi to koma etimajinini ta yona ni swifaniso leswi tlhontlhaka mianakanyo kumbe tinomboro ta matluka ya tibuku tin’wana leti swi nga endlaka vulavisisi eka tona endzhaku. Mutirheli un’wana wa nkarhi hinkwawo u kuma swi tsakisa loko eku heleni ka n’hweti yin’wana na yin’wana a tsala tinhla letintshwa ebukwini yakwe yo dyondza ha yona, leti a ti dyondzeke en’hwetini yoleyo. U ri: “Ku langutela tiawara leti ta mina ta nkoka, swi ndzi pfuna leswaku ndzi hatla ndzi fikelela tipakani tin’wana ta n’hweti.”

Mianakanyo Yin’wana Ya Vutlharhi

Xana u vona onge xiyimiso xa wena xi tele hi swilaveko leswi bohaka swa siku na siku kumbe swa vhiki na vhiki ni leswaku u lava swiringanyeto swo karhi leswi nga ta endla leswaku u tirhisa nkarhi wa wena lowu hikiweke hi ndlela yo antswa? Hikwalaho, tshama u ri ni leswi u lavaka ku swi hlaya, kutani u tirhisa minkarhi ya wena ya ku tihungasa. Ekaya kumbe laha u toloveleke ku dyondzela kona, loko swi koteka hlengeleta tibuku ni switirho swin’wana swo dyondza ha swona leswaku u ta swi kumela ekusuhi. Endla ndhawu ya wena yo dyondzela eka yona yi tsakisa kambe u nga yi lunghiseleli ku tlula mpimo lerova u khomiwa hi vurhongo. Xana u ni xiavelo xa nkulumo? Hlaya mhaka hinkwayo ka ha sele nkarhi wo tala, kutani u anakanyisisa ha yona loko u wisile kumbe loko u ri eku endleni ka mintirho yin’wana.

Van’wana va nga tirhisana na wena ku endla leswaku nkarhi wa n’wina wu mi vuyerisa hinkwenu. Hi xikombiso, u nga ha kombela un’wana leswaku a ku hlayela mhaka leyi olovaka hi rito leri tlakukeke loko u ri karhi u endla mintirho yin’wana kumbe loko u ri karhi u endlela muhlayi wa wena lonene tiya. Ku vuriwa yini hi ku va hinkwavo ekaya va twanana hi nkarhi wo tshika ku ba huwa leswaku ku endliwa dyondzo ya munhu hi xiyexe? “Xana a wu tiphina hi ku hlaya yini sweswinyana?” Minkarhi yin’wana u nga ha kota ku twa leswi vanghana va wena va swi dyondzeke hi ku sungula bulo hi ndlela leyi.

Xana u tsakela ku nghenisa mianakanyo leyintshwa exiyimisweni xa wena xo dyondza? U nga tivekela pakani yo dyondza yo fana ni leyi van’wana va tivekelaka yona yo vulavula ni van’wana hi Bibele. Muhuweleri un’wana wa nkarhi hinkwawo (phayona) u tivekela pakani ya tiawara to dyondza n’hweti na n’hweti leti a nga kotaka ku ti fikelela a tlhela a ti hundza, naswona wa tsaka loko a vona leswaku chati yakwe yi kombisa leswaku u ta fikelela pakani yakwe. Van’wana va hunguta nkarhi wo hlalela thelevhixini, kutani hi ndlela yoleyo va londzovota nkarhi wo dyondza. Vo tala va hlawula nhloko-mhaka-nkulu leyi va nga ta fambisana na yona hi nkarhi wo karhi, yo tanihi mihandzu ya moya, masungulo ya tibuku ta Bibele kumbe vutshila byo dyondzisa. Van’wana va tsakela ku endla tichati ta matimu, to tanihi leti kombisaka vuxaka exikarhi ka tihosi ta Vaisrayele ni vaprofeta,a kumbe Mintirho ya Vaapostola ni mapapila ya Pawulo.

Vantshwa, ma ri lava ripfumelo leri tiyeke xana? Ha yini mi nga hlawuli buku yin’wana leswaku mi yi dyondza hi nkarhi lowu taka wa ku wisa ka xikolo? Xichudeni lexi khuvuriweke xa xikolo xa le henhla xi hlawule Ku Lavisisa Ka Vanhu Xikwembu, ku nga buku leyi humesiweke hi Sosayiti ya Watch Tower. U endle nkatsakanyo wo koma wa leswi a swi dyondzeke ndzima hi ndzima ebukwini ya tinotsi. A swi nonon’hwa ni ku teka nkarhi wo tala ku tlula leswi a a ehleketise xiswona. Hambi swi ri tano, loko a heta buku hinkwayo, u tsakisiwe hi ntiyiso wa rungula ra Bibele.

Hambeta U Hisekela Ku Dyondza

Vunyingi bya malandza yo tshembeka ya Yehovha ya manguva lawa ana se byi ni ‘swo tala swo swi endla entirhweni wa Hosi.’ (1 Vakorinto 15:58) Hambi loko u ri ni xiyimiso lexi pfuxetiweke ni matshalatshala ya xiviri, endlelo leri u ri landzelaka evhikini a ri nge cinci swo tala. Kambe ku hambeta ka wena u hisekela ku kuma ku twisisa loku enteke ka ntiyiso ni ku fambisana ni ku paluxeka ka swikongomelo swa Yehovha swi ta ku pfuna leswaku u antswisa mikhuva ya wena yo dyondza hi laha ku humelelaka.

Swa khutaza ku twa vuyelo bya lava antswiseke mukhuva wa vona wo dyondza. Wanuna un’wana wa Mukreste, loko a xiye leswaku a a ri karhi a lahlekeriwa hi langutelo lerinene malunghana ni ku lava ku twisisa loku enteke ka ntiyiso, u hlele vutomi byakwe leswaku a ta tinyiketela ku tirhisa tiawara to tala leti a nga ti tirhisiki nchumu eka dyondzo ya yena n’wini. U ri: “Swi ndzi tisele ntsako lowu a ndzi nga ri na wona eku sunguleni. Hikwalaho ka ku tiyiseka loku yaka emahlweni hi buku ya Xikwembu ya Bibele, ndzi kume ndzi swi kota ku vulavula ni van’wana hi ripfumelo ra mina hi ku hiseka lokukulu. Ndzi titwa ndzi wundleke kahle, ndzi hanyile emoyeni ni ku eneriseka siku rin’wana ni rin’wana.”

Mulanguteri la famba-fambaka wa Timbhoni ta Yehovha, loyi a endzelaka mavandlha yo tala, u hlamusela mimpfuno yin’wana hi ndlela leyi: “Lava gingiritekaka edyondzweni ya vona vini hi ntolovelo va hiseka ni ku veka mhaka erivaleni loko va vulavula. Va hanyisana kahle ni van’wana, naswona a va khunguvanyisiwi hi ku olova hi mavulavulelo ya van’wana lama nga riki manene. Loko va ri evutirhelini bya nsimu, va pfumelelana ni swiyimo ni ku xalamukela swilaveko swa vanhu lava va hlanganaka na vona.”

U tlhela a kombisa yinhla leyi van’wana va nga navelaka ku yi tsundzuka loko va xopaxopa mukhuva wa vona vini wo dyondza. “Eminhlanganweni yo burisana hi Matsalwa, vo tala va ni mukhuva wo hlaya kunene loko va hlamula. A va ta vuyeriwa swinene loko va anakanyisisa hi ndlela leyi mhaka yi fambelanaka ha yona ni leswi va swi dyondzeke eku sunguleni kumbe hi ndlela leyi yi khumbaka vutomi bya vona vini ha yona.” Xana u vona onge u nga antswisa emhakeni leyi?

Muprofeta Daniyele, endzhaku ka ku hanya malembe yo tlula 90, a nga titwanga a ti twisisa hi ndlela leyi eneleke tindlela ta Yehovha. Emalembeni yakwe yo hetelela, u vutisise timhaka leti a a nga ti twisisi kahle: “Hosi ya nga, timhaka teto ti ta helela kwihi?” (Daniyele 12:8) A swi kanakanisi leswaku ku hiseka loku ku nga hundzukiki ko dyondza leswi engetelekeke hi ntiyiso wa Xikwembu a ku ri xilotlelo xa vutshembeki endleleni yakwe yo hlawuleka evuton’wini.—Daniyele 7:8, 16, 19, 20.

Nandza un’wana ni un’wana wa Yehovha u ni vutihlamuleri lebyi fanaka byo yima a tiyile tanihi un’wana wa Timbhoni Takwe. Hambeta u hisekela ku dyondza leswaku u ta tshama u tiyile emoyeni. Ringeta ku engetela nchumu wun’we kumbe yimbirhi exiyimisweni xa wena xa vhiki na vhiki, n’hweti na n’hweti kumbe xa lembe na lembe xa dyondzo ya wena n’wini. Vona ndlela leyi Xikwembu xi nga ta katekisa ha yona matshalatshalanyana hinkwawo lawa u ma endlaka. Ina, tsakela dyondza ya wena n’wini ya Bibele ni vuyelo bya yona.—Pisalema 107:43.

[Nhlamuselo ya le hansi]

a Leswaku u ta anamisa dyondzo ya wena, u nga ha tsakela ku tirhisa chati leyi kumekaka eka “Matsalwa Hinkwawo Ma Huhuteriwe Hi Xikwembu Naswona Ma Pfuna,” leyi humesiweke hi Watchtower Bible and Tract Society of New York, Inc., matluka 294-7.

    Minkandziyiso Ya Xitsonga (1987-2025)
    Huma
    Nghena
    • Xitsonga
    • Rhumela
    • Leswi u swi tsakelaka
    • Copyright © 2025 Watch Tower Bible and Tract Society of Pennsylvania
    • Swipimelo Swo Tirhisa Website Leyi
    • Milawu Yo Sirhelela Rungula Ra Xihundla
    • Seta Swa Xihundla
    • JW.ORG
    • Nghena
    Rhumela