Lexi Endlaka Vo Tala Va Pfumela Leswaku Misava Yi Ta Hela

KUNENE misava yi le xiyin’weni lexi twisaka ku vava, hi laha vo tala namuntlha va hatlisaka va swi xiya ha kona. Muchumayeri Billy Graham u tsarile: “Ndzi vutise vanhu va le swiphen’wini swo hambana-hambana swa misava leswaku va anakanya yini hi vumundzuku. Vo tala va vona va vona khombo ntsena. . . . Minkarhi hinkwayo, marito ‘Armagedoni’ na ‘Apokalipsi’ ya tirhiseriwa ku hlamusela swiendlakalo swa misava.”

Ha yini marito “Armagedoni” na “Apokalipsi” hakanyingi ya tirhiseriwa ku hlamusela xiyimo xa namuntlha? Xana ya hlamusela yini?

Masungulo Ya Wona eBibeleni

Bibele yi vulavula hi ‘nyimpi ya siku lerikulu ra Xikwembu xa Matimba Hinkwawo’ naswona yi hlanganisa nyimpi leyi ni ndhawu “leyi va nge i Armagedoni hi ririmi ra Xiheveru.” (Nhlavutelo 16:14-16) Webster’s New Collegiate Dictionary yi hlamusela Armagedoni tanihi “nyimpi yo hetelela ni yo gimeta exikarhi ka mavuthu yo lulama ni yo biha.”

Hambi leswi “apokalipsi” ri humaka eka rito ra Xigriki leri vulaka “nhlavutelo,” kumbe “ku paluxa,” ri ni nhlamuselo yin’wana. Buku ya Bibele ya Nhlavutelo, kumbe Apokalipsi, yi kandziyisa ndzoviso wa Xikwembu wa lavo biha ni Ku Fuma Ka Gidi Ra Malembe ka N’wana wa xona, Yesu Kreste. (Nhlavutelo 19:11-16; 20:6) Hikwalaho Webster’s New Collegiate Dictionary yi hlamusela “apokalipsi” tanihi “ndzoviso lowu nge kusuhi wa vuako laha Xikwembu xi nga ta herisa mimfumo yo biha leyi fumaka ivi xi pfuxa lavo lulama emfun’weni wa vumesiya.”

Loko namuntlha vanhu va vulavula hi misava ni xiyimo xa yona, swi le rivaleni leswaku va kuceteriwa hi leswi swi vuriwaka eBibeleni. Xana kahle-kahle Bibele yi ri yini hi ku hela ka misava?

Bibele Ni Ku Hela Ka Misava

Bibele yi vhumbha ku hela ka misava hi ndlela leyi nge rivaleni. Yesu Kreste ni vadyondzisiwa vakwe va vulavule hi nkarhi wa makumu. (Matewu 13:39, 40, 49; 24:3; 2 Timotiya 3:1; 2 Petro 3:3; King James Version) Hambi swi ri tano, a va nga vuli leswaku ku ta herisiwa misava hi yoxe. Mayelana ni misava ya xiviri, Bibele yi ri: “Yi nga ka yi nga ṭekaṭeki ni siku riṅwe.” (Pisalema 104:5) Xiga lexi nge “ku hela ka misava” hi ku olova xi vula “ku hela ka mafambiselo ya swilo.”—New World Translation.

Muapostola Petro u vulavule hi misava ya le mahlweni ka Ndhambi esikwini ra Nowa ivi a ku: “Misava [ku nga vanhu lava nga chaviki Xikwembu] leyi a yi ri kona enkarhini wolowo, yi dyiwile hi mati ya ndhambi, yi lova.” Kutani Petro u ye emahlweni a vula leswaku misava ya hina ya sweswi yi “yimele siku ra ku avanyisiwa ni ra ku lovisiwa ka vanhu lava nga riki na mhaka na Xikwembu.” (2 Petro 3:5-7) Muapostola Yohane u tlhele a tsala a ku: “Misava ya hundza, ni ku navela ka yona, kambe loyi a endlaka ku rhandza ka Xikwembu, ú tshama hilaha ku nga heriki.”—1 Yohane 2:17.

Eku heleni ka misava leyi, mufumi wa yona la nga vonakiki la nga chaviki Xikwembu na yena u ta pfaleriwa. (Nhlavutelo 20:1-3) Muapostola Pawulo u tsale hi mufumi loyi wo biha a ku: “Xikwembu xa misava leyi xi pfarile miehleketo ya vanhu lava va nga pfumeriki.” Yesu loko a vulavula ha yena u te: “Kutani mufumi wa misava leyi [Sathana Diyavulosi] ú ta hlongoriwa sweswi.”—2 Vakorinto 4:4; Yohane 12:31.

Xana a ku nge vi nkateko ku susiwa ka mufumi lowo biha laha misaveni? I khale Vakreste va khongelela leswaku leswi swi endleka, va kombela Mfumo wa Xikwembu leswaku wu ta ni leswaku ku rhandza ka xona ku endliwa. Va khongelela Yesu Kreste leswaku a yingisa xileriso xa Tata wakwe xa ku susa vubihi hinkwabyo laha misaveni!—Pisalema 110:1, 2; Swivuriso 2:21, 22; Daniyele 2:44; Matewu 6:9, 10.

Hambi swi ri tano, leswi swi pfuxa xivutiso lexi nge: Xana ku vhumbha ka mavunwa, loku hoxeke, ka ku hela ka misava ku vangiwe hi leswi vanhu va vhumbheke siku ra xiendlakalo lexi hikwalaho ka ku nga twisisi, kumbe, xana va hlamusele vuprofeta bya ntiyiso bya Bibele hi ndlela leyi hoxeke? A hi voneni.

Ku Nga Twisisi Hi Lembe-xidzana Ro Sungula

Xiya leswi humeleleke hi lembe-xidzana ro sungula. Loko Yesu a ri kusuhi ni ku tlhandlukela etilweni, hi ku hiseka vaapostola vakwe va vutisile: “Hosi, xana hi wona nkarhi lowu u nga ta pfuxa mfumo wa lsraele ke?” A va lava ku tiphina hi mikateko hinkwayo ya Mfumo ha wona nkarhi wolowo, kambe Yesu a ku: “A swi mi fanelanga ku tiva tinguva, hambi yi ri minkarhi leyi Tatana a nga tihlawulela yona hi vukulukumba bya yena.”—Mintirho 1:6, 7.

Masiku manharhu ntsena emahlweni ka rifu ra yena, Yesu a a vulavule hi ndlela yoleyo: “Hitekani ke, hikuva a mi tivi siku leri Hosi ya n’wina yi nga ta ta ha rona.” U engeterile: “Loko ri ri siku ra kona ni nkarhi wa kona, a ku na loyi a swi tivaka, hambi ti ri tintsumi ta le tilweni, hambi a ri N’wana, swi tiviwa hi Tatana ntsena. Tlharihani mi hiteka, hikuva a mi tivi leswaku nkarhi wu ta va rini.” (Matewu 24:42, 44; Marka 13:32, 33) Tin’hweti ti nga ri tingani emahlweninyana, Yesu a a va khutaze ni hi leswi: “Tshamani mi tilunghisile, hikuva N’wana-wa-Munhu ú ta ta hi nkarhi lowu mi nga wu ehleketiki.”—Luka 12:40.

Ku nga khathariseki switsundzuxo sweswo swa Yesu, Vakreste vo sungula, hikwalaho ko langutela hi mahlo-ngati vukona bya Kreste ni mikateko leyi a a ta yi tisa, va sungule ku anakanyela nkarhi lowu switshembiso swa Mfumo a swi ta hetiseka ha wona. Xisweswo, muapostola Pawulo u tsalele Vatesalonika a ku: “Loko ti ri ta ku ta ka Hosi ya hina Yesu Kriste, ni ta ku hlengeletana ka hina, hi ya eka yena, ha mi kombela hi matimba vamakwerhu: Mi nga hatlisi ku pfilunganyisiwa emiehleketweni ya n’wina, ni ku tshukisiwa, hambi ku ri hi moya wun’wana, kumbe hi ku vulavula kun’wana, kumbe hi papila rin’wana leri ri nga vuriwaka leswaku ri huma eka hina, ku tiyisa leswaku siku ra Hosi sweswi ri fikile.”—2 Vatesalonika 2:1, 2.

Marito ya Pawulo ma kombisa leswaku Vakreste van’wana vo sungula va langutele swilo leswi hoxeke. Hambi leswi kumbexana Vakreste va le Tesalonika va nga vhumbhangiki siku leri kongomeke ra ku ‘hlengeletiwa eka Kreste etilweni,’ hi ndlela leyi nge rivaleni va anakanye leswaku xiendlakalo xexo a xi ri ekusuhi. Langutelo ra vona a ri fanele ku lulamisiwa, naswona papila ra Pawulo ri endle sweswo.

Van’wana Na Vona Va Fanele Ku Ololoxiwa

Hi laha hi swi xiyeke ha kona exihlokweni xo sungula, endzhaku ka lembe-xidzana ro sungula, van’wana a va anakanya ni leswaku ku hetiseka ka switshembiso swa Xikwembu a ku ta ta hi nkarhi wo karhi. Van’wana va vhumbhe ni leswaku loko ku hela gidi ra malembe, ku sukela eku velekiweni kumbe eku feni ka Yesu, makumu ya misava a ma ta fika. Kambe hi laha ku fanaka ku vhumbha ka vona ku tikombe ku ri mavunwa, kumbe ku hoxile.

Leswi swi tlakusa swivutiso: Xana swihoxo mayelana ni ku hetiseka ka switshembiso swa Bibele swi vula leswaku switshembiso hi swoxe swi hoxile? Xana switshembiso swa Xikwembu swi tiyile? Naswona xana Vakreste va manguva lawa va amukele ku ololoxiwa emhakeni leyi hi ndlela yihi?