Loko Mhangu Yi Hi Wela

LEMBE-XIDZANA ra vu-20 ri ve ni timhangu letikulu, naswona to tala ta tona ti vangiwe hi vanhu. Kambe, tin’wana a ti vangiwanga hi vona. Loko a vhumba hi masiku ya hina, Yesu Kreste u te: “Tiko rin’wana ri ta pfukela tiko rin’wanyana, mfumo wun’wana wu ta lwa ni mfumo wun’wanyana; ku ta va ni tindlala, ni ku tsekatseka ka misava ematlhelweni layo tala.” (Matewu 24:7) I ntiyiso, munhu hi yena muvangi wa tinyimpi ni ku pfumaleka ka swakudya, kambe a hi yena a vangaka ku tsekatseka ka misava. Hi laha ku fanaka, hambi leswi tindhambhi tin’wana leti onhaka ti vangiweke hi swiendlo swa munhu, a nge soriwi hikwalaho ka ku tsekatseka ka misava. Nakambe swidzedze ni ku buluka ka tivholkheno a swi vangiwi hi munhu.

Ku nga khathariseki leswaku timhangu ta ntumbuluko ti vangiwa hi yini, ti kombisa leswaku munhu a ngo va nchumu, a nga na matimba loko a langutane ni matimba lamakulu ya ntumbuluko. Misava leyi, kaya ra hina, hakanyingi yi vonaka yi sirhelelekile naswona yi lo tserhe. Kambe loko yi ninginingisiwa hi ku tsekatseka ka misava, kumbe yi khapakhapa hi mati ya ndhambhi, kumbe yi biwa hi mimoya leya matimba, leyi hungaka hi matimba yi nga tsetseleri onge ku na lexi bulukeke, mianakanyo leyi nga kona ya ku sirheleleka ya nyamalala.

Timhangu ta ntumbuluko ti onhile swinene ni ku herisa vutomi byo tala eka lembe-xidzana leri ra vu-20. Xana leswi a swi ta va swi papalatiwile? Xana ku na lexi nga endliwaka ku hunguta vuyelo lebyi byo biha? Hina vanhu, xana hi nga endla yini leswaku hi tisirheleta? Xana loko hi weriwa hi mhangu a hi na ndlela yo tipfuna hi laha ku heleleke? Xana vanhu va ta tshamela ku hlaseriwa hi ndlela leyi? Swihloko leswi landzelaka swi ta bula hi swivutiso leswi.