Nyimpi Yo Lwa Ni Timhangu Yi Hela

MATSHALATSHALA ya Nhlangano wa Matiko ni ya tihulumendhe to hambana-hambana yo hunguta vuyelo bya timhangu ta ntumbuluko kunene ya nkhenseka. Makungu yo kota International Decade for Natural Disaster Reduction ya kombisa leswaku vanhu a va fanelanga va heleriwa hi ntshembo loko va langutane ni timhangu to tano. Loko munhu ha un’we, kumbe loko va hlanganile, ni tihulumendhe, vo teka magoza lama faneleke, vutomi byi nga ponisiwa.

Leswi swa tsakisa swinene, hikuva Bibele yi hi byela leswaku ku nga ri khale hulumendhe leyi fumaka vanhu yi ta hundzuka. Ku sukela emasikwini ya Yesu, Vakreste va khongele Xikhongelo xa Hosi (xa “Tata wa Hina”), lexi katsaka xiga lexi nge: “A ku te ku fuma ka wena; ku rhandza ka wena a ku endliwe misaveni, tanihi loko ku endliwa tilweni.” (Matewu 6:9, 10) Mfumo wa Xikwembu i hulumendhe ya xiviri. Hi ku ya hi vuprofeta bya Bibele, ku nga ri khale yi ta “seletela ni ku herisa ku fuma kuloku [ka vanhu] hikwako, kambe kona ku ta v̌a kona hi laha ku nga riki na makumu.” (Daniyele 2:44) Anakanya vanhu hinkwavo va ri ehansi ka hulumendhe yin’we leyi hetisekeke. Kunene swilo swi ta va swi hundzukile hakunene!

Loko tihulumendhe ta namuntlha ti vona xilaveko xo teka magoza leswaku swilo leswi nga vangaka makhombo ya ntumbuluko swi nga hundzuki timhangu ta ntumbuluko, hi nga tiyiseka leswaku hulumendhe ya Xikwembu yi ta tiyisekisa leswaku vafumiwa va yona a va xaniseki hi ndlela leyi. Mfumo wa Xikwembu wu ta tisa ku rhula loku nga heriki ro sungula laha pulanetini leyi hi mpfhuka Kayini a dlaya Avele. Ehansi ka Mfumo wolowo, “v̌a musa v̌a ta fuma misav̌a, v̌a ta tiṭakela e ku ruleni lo’kukulu ka v̌ona.” (Pisalema 37:11) Mfumo wu ta dyondzisa vanhu lerova hi xiviri ‘vanhu hinkwavo va ta dyondzisiwa hi Yehovha, naswona ku rhula ka vona ku ta andza.’—Esaya 54:13.

Namuntlha, vanhu vo tala lava hlaseriwaka hi timhangu ta ntumbuluko hi lava nga swisiwana. Hambi swi ri tano, loko ku ri ni vulawuri lebyi hetisekeke ni dyondzo leyi faneleke, ehansi ka Mfumo wa Xikwembu, vanhu a va nge xanisiwi hi vusweti. Loko a vhumba swiyimo swo tano hi ndlela leyi vanhu va le nkarhini wakwe a va ta kota ku yi twisisa, muprofeta Esaya u tsarile: “Yehova wa tinyimpi o ta lungisela matiko hikwawo e nṭhav̌eni leyi, e ŝakudya ŝa tinyama le’ti noneke, ni ŝakunwa ŝa tivinyo le’ti tengeke, le’ti kumiwaka henhla ka šisese; ti ri tinyama le’ti noneke, le’ti teleke, ni mafura, ni tivinyo ta khale le’ti tengisiweke.” (Esaya 25:6) Ina, nkhuvo wa swilo leswinene! Loko a ya emahlweni a hlamusela vutomi ehansi ka Mfumo, mupisalema u tsarile: “Ku ta v̌a ni nḍalo ya koro la misav̌eni ni le tihlohlorini ta tinṭhav̌a, miṭheṭho ya rona yi ta hlakahla kukotisa miri ya Lebanon; la’v̌a akeke mitini v̌a ta rumbuka kukotisa byanyi bya misav̌a.”—Pisalema 72:16.

Entiyisweni, nyimpi ya munhu yo lwa ni timhangu ta ntumbuluko yi ta va yi herile. Hi nkongomiso wa moya wa Xikwembu ni vulawuri bya Mfumo wa Xikwembu, vanhu lava chavaka Xikwembu va ta va va hlurile enyimpini yoleyo. Kunene va ta va va wisisiwile!