Matshalatshala Ya Swikombiso Swa Mavoko

KU SUKELA hi June 1995 ni ku ya emahlweni ximumu xexo, ensin’wini ya rhavi ra le United States, Timbhoni ta Yehovha ti khome 181 wa mintsombano ya muganga leyi nga ni xihloko lexi nge “Vadzunisi Lava Tsakeke.” Eka mimbirhi ya yona—wun’we evuxeni lowun’wana evupela-dyambu—nongonoko hinkwawo a wu nyikeriwa hi ku kongoma hi Ririmi ra Mavoko ra le Amerika. Hi ndlela yoleyo nongonoko wu endliwe wu twala kahle—hikuva ku vulavula ni lava nga twiki hi ririmi ra mavoko hi ku kongoma swi twala ku antswa ku tlula ku ri hundzuluxela ri suka eka ririmi leri vulavuriwaka hi nomu.

Vapfhumba a va huma emavandleni ya 11 ya ririmi ra mavoko ku katsa na kwalomu ka mintlawa ya 30 ya lava va ririmi ra mavoko va le United States hinkwaro. Nakambe a ku ri na vapfhumba vo huma eBritain, Canada, Denmark, Dominican Republic, Ecuador, Jarimani, Japani, Mexico, Norway, Puerto Rico, na Russia. Hikwalaho a ku ri ni vanhu vo huma ematikweni yo hambana-hambana.

A ku ri na tivhidiyo leswaku nongonoko wu kota ku voniwa hi fambiselo ra thelevhixini. Hambiswiritano, vapfhumba va nga ri vangani a va nga twi naswona a va ri mabofu. Xana vanhu lava a va ta vuyeriwa njhani hi nongonoko lowu? Kunene a swi khutaza ku vona ku tlula dzana ra lava hi ku tirhandzela a va cincana va va hlamusela nongonoko wa siku ha rin’we hi ku va tolokela hi endlelo ra (ku mbambela) ku khoma tintiho.

Eka mintsombano leyi mimbirhi, 36 va kombise ku tinyiketela ka vona eka Yehovha Xikwembu hi nkhuvulo. Yinhla-nkulu yin’wana a ku ri drama leyi nge Ku Xixima Lava Fanelekaka eMalembeni Ya Vona Ya Vudyuhari. Kunene a swi nyanyula ku vona drama leyi yi nyikeriwa hi ririmi ra mavoko, swi pfuna lavo fe tindleve leswaku va vuyeriwa swinene enongonokweni lowu!

Kutani ku huma buku-mpfuno yintshwa yo dyondza Bibele, leyi nge Vutivi Lebyi Yisaka eVuton’wini Lebyi Nga Heriki. Swi va tsakise ngopfu vatsombani ku twa leswaku ku karhi ku endliwa nkandziyiso wa buku leyi hi khasete ya vhidiyo! Vholomo 1, leyi humesiweke entsombanweni lowu, yi na tindzimana tinharhu to sungula. Ntlhanu wa tivholomu tin’wana ti le ndleleni. Mupfhumba un’wana wa le Ohio u te: “Kunene hi ba mandla hikwalaho ka vhidiyo leyi yintshwa. Yi ta hi pfuna ku hatlisisa ntirho emasin’wini ya lava nga twiki.”

Lava 2621 lava a va ri kona emintsombanweni leyi mimbirhi va ye ekaya va phyuphyisiwile emoyeni. Enkarhini lowu, ku hambana ni nkarhi wihi lowu hundzeke, a va tiyimisele ku phindha marito ya mupisalema lama nge: “Le’ŝi hefemulaka hikwaŝo a ŝi ḍunise Yehova. Ḍunisani Yehova!”—Pisalema 150:6.