Ku Va La Pfumelelanaka Ni Swiyimo Kambe U Namarhela Mimpimanyeto Ya Xikwembu

“VANHU lava lehisaka mbilu a hi swihunguki, naswona vanhu lava nga swihunguki a va lehisi mbilu,” ku vula xivuriso xa Xichayina. Xivuriso lexi a xo va ntiyiso ntsena, tanihi leswi ku lehisa mbilu ku nga ntlhontlho lowu lavaka xiboho xa mimpimanyeto leyinene ya mahanyelo. Kambe xana hi fanele hi tinyiketela eka mimpimanyeto yihi? Xana a swi nga ta twisiseka ku landzelela mimpimanyeto leyi vekiweke hi Muvumbi wa vanhu, hilaha swi hlamuseriweke hakona eRitweni ra yena, ku nga Bibele yo Kwetsima? Xikwembu hi xoxe xi veka xikombiso lexinene ngopfu xa ku hlayisa mimpimanyeto ya xona.

Muvumbi—Xikombiso Xa Hina Lexikulu

Xikwembu xa Matimba Hinkwawo, Yehovha, xa ringanisela hilaha ku heleleke eku lehiseni ka mbilu, a xi lehisi ngopfu kumbe katsongo. Hi magidi ya malembe, xi lehisele vanhu lava sandzaka vito ra xona mbilu, lava onhaka vanhu ni lava tirhisaka misava hi ndlela yo biha. Muapostola Pawulo u tsarile, hilaha swi vikiweke hakona eka Varhoma 9:22, leswaku Xikwembu “xi vile ni mbilu leyo leha ngopfu, xi lehisela swibya leswi a swi vumberiwile ku kariheriwa ni ku fayeteriwa.” Ha yini Xikwembu xi lehise mbilu hi nkarhi lowu wo leha? Hikuva ku lehisa ka xona mbilu ku ni xikongomelo.

Xikwembu xi lehisela vanhu mbilu “[hikuva] a [xi] lavi leswaku ni un’we . . . a lova, kambe [xi] lava leswaku hinkwavo va ta eku hundzukeni.” (2 Petro 3:9) Muvumbi u nyike vanhu Bibele naswona u lerise malandza ya yena leswaku ma tivisa mimpimanyeto ya yena ya mahanyelo kun’wana ni kun’wana. Vakreste va ntiyiso va tinyiketerile eka mimpimanyeto leyi. Kambe xana leswi swi vula leswaku malandza ya Xikwembu ma fanele ma sihalala eswiyin’weni hinkwaswo?

Ku Yima U Tiyile, Kambe U Pfumelelana Ni Swiyimo

Yesu Kreste u khutaze lava lavaka vutomi lebyi nga heriki leswaku va “nghe[na] hi nyangwa leyo khuma.” Kambe ku nghena hi nyangwa leyo khuma a swi vuli ku pfumala ku anakanyela. Loko hi ri ni mboyamelo wa tihanyi kumbe wa ku sindzisa loko hi ri ni van’wana, entiyisweni swi ta endla un’wana ni un’wana a tsakela vutomi loko hi lawula mboyamelo lowu. Kambe hi ndlela yihi?—Matewu 7:13; 1 Petro 4:15.

Theofano, xichudeni xa Mugriki lexi hlamuseleke leswaku ku heta nkarhi ni vanhu va mindhavuko yo hambana-hambana swi endleke leswaku xi va twisisa ku antswa, xi te: “I swa nkoka leswaku hi ringeta ku titoloveta ndlela ya vona yo anakanya ematshan’weni yo va sindzisa leswaku va tekelela ya hina.” Hikwalaho, hi ku tiva munhu un’wana ku antswa, hi nga ha kuma leswaku nantswo wa yena wa swakudya hambi ku ri mpfumawulo wa rito ra yena a hi leswi nga tolovelekangiki hilaha a hi ehleketa hakona. Ematshan’weni yo va nkarhi hinkwawo hi va ni swo tala swo swi vula kumbe hi sindzisa ku vula rito ro hetelela, hi dyondza swilo swo tala leswi pfunaka hi ku yingisela mavonelo ya yena. Hakunene, vanhu lava amukelaka mianakanyo yin’wana ni yin’wana va kuma vutomi byi vuyerisa.

Loko se nantswo wa munhu wu katseka, hi fanele hi pfumelelana ni swiyimo hi tlhela hi pfumelela van’wana leswaku va tsakela leswi va nga swi hlawula. Kambe loko hi fanele hi yingisa Muvumbi etimhakeni ta mahanyelo, hi fanele hi yima hi tiyile. Xikwembu xa Matimba Hinkwawo a xi amukeli mixaka hinkwayo ya mahanyelo. Xi kombise leswi hi ndlela leyi xi tirhisaneke ha yona ni malandza ya xona ya nkarhi lowu hundzeke.

Xirimbana Xa Ku Lehisa Mbilu Ku Tlula Mpimo

Heli, muprista lonkulu wa le tikweni ra khale ra Israyele, a a ri nandza wa Xikwembu loyi a phasiweke hi xirimbana xa ku lehisa mbilu ku tlula mpimo. Vaisrayele a va nghene evuxakeni bya ntwanano ni Xikwembu, va pfumela ku yingisa milawu ya xona. Kambe vana vambirhi va Heli, Hofini na Finiyasi, a va ri ni makwanga ni mahanyelo layo biha naswona a va delela Lowa Matimba Hinkwawo. Hambileswi Heli a wu tiva kahle Nawu wa Xikwembu, u lo va holovelanyana ntsena naswona a debyise voko eka ku tshinya ka yena. U endle xihoxo xo ehleketa leswaku Xikwembu xi ta tiyiselela vubihi. Muvumbi u hambanisa ku tsana ni vubihi. Hikwalaho ka ku tlula Nawu wa Xikwembu hi vomu, vana va Heli lavo homboloka va xupuriwe swinene—naswona a swi fanerile.—1 Samuwele 2:12-17, 22-25; 3:11-14; 4:17.

Wa nga vona ndlela leyi swi nga vaka ni khombo ha yona eka hina loko hi lehisa mbilu ku tlula mpimo endyangwini wa hina, hi honisa swiendlo swa vudyoho swa vana va hina leswi phindha-phindhiwaka! Wa nga vona ndlela leyi swi antswaka swinene ha yona ku va kurisa “hi ku va laya ni ku va dyondzisa ta Hosi”! Leswi swi vula leswaku hi fanele hi namarhela mimpimanyeto ya Xikwembu ya mahanyelo ivi hi yi byala eka vana va hina.—Vaefesa 6:4.

Hi ku fanana, vandlha ra Vukreste a ri nge byi tiyiseleli vubihi. Loko xirho xa rona xi tshamela ku endla xidyoho lexikulu ivi xi ala ku hundzuka, xi fanele xi susiwa. (1 Vakorinto 5:9-13) Hambiswiritano, Vakreste va ntiyiso a va ringeti ku hundzula vanhu hinkwavo, lava nga riki swirho swa ndyangu ni swa vandlha.

Vuxaka Lebyi Tiyeke Na Yehovha

Ximbilwambilwana xi vangiwa hi moya wa ku vilela. Hambiswiritano, loko hina hi hexe hi ri ni vuxaka lebyikulu ni Xikwembu, hi kuma ni nsirhelelo wo karhi lowu hi pfunaka ku hlayisa ku ringanisela loku faneleke. Ha hlaya eka Swivuriso 18:10: “V̌ito ra Yehova i khokholo ro tiya, l’a lulameke o tšhav̌ela ka rona, o ṭhama e ku tlakukeni.” Entiyisweni Muvumbi u ta herisa ku vaviseka loku hina kumbe varhandziwa va hina hi veke na kona, hi nkarhi wa yena lowu faneleke.

Munhu un’wana la vuyeriweke swinene eka vuxaka lebyikulu ni Xikwembu a ku ri muapostola Pawulo. Tanihi Muyuda la tivekaka hi vito ra Sawulo, u xanise valandzeri va Yesu Kreste naswona a ri ni nandzu wa ku halata ngati. Kambe Sawulo u ve Mukreste, naswona endzhakunyana ka loko se a thyiwe muapostola Pawulo, u sungule ku va muevhangeli wa nkarhi hinkwawo. Pawulo u kombise langutelo ra ku amukela mianakanyo yin’wana ni yin’wana loko a chumayela eka vanhu hinkwavo, “[eka] Vagriki ni lava nga riki Vagriki, lavo dyondza ni lava nga dyondzangiki.”—Varhoma 1:14, 15; Mintirho 8:1-3.

Xana u swi kotise ku yini ku hundzuka? Hi ku kuma vutivi lebyi kongomeke bya Matsalwa na hi ku va ni rirhandzu lerikulu eka Muvumbi, la nga yiki hi nghohe. Pawulo u dyondze leswaku Xikwembu xi lulamile hikwalaho ka leswi xi avanyisaka munhu un’wana ni un’wana, ku nga ri hi ku ya hi ndhavuko kumbe rixaka, kambe hi ku ya hi leswi a nga swona ni leswi a swi endlaka. Ina, eka Xikwembu mintirho i ya nkoka. Petro u swi xiyile leswaku “Xikwembu a xi yi hi nghohe; kambe, ematikweni hinkwawo, loyi a xi chavaka a vuya a endla leswi lulameke, xa n’wi tsakela.” (Mintirho 10:34, 35) Xikwembu xa Matimba Hinkwawo a xi na xihlawuhlawu. Xi hambanile ni varhangeri van’wana va misava, lava nga ha vaka ni xihlawuhlawu hi vomu hikwalaho ka swikongomelo swa vona vini.

Minkarhi Ya Cinca

Hi ku ya hi John Gray, wa Yunivhesiti ya Oxford ya le Nghilandi, ku lehisa mbilu i “mfanelo leyi masiku lawa yi kalaka.” Kambe leswi swi ta cinca. Ku lehisa mbilu loku ringaniseriweke hi vutlhari bya le tilweni ku ta hlula.

Emisaveni leyintshwa ya Xikwembu leyi tshineleke, ximbilwambilwana xi ta va xi nga ha ri kona. Swivangelo swa ximbilwambilwana lexikulu, swo tanihi xihlawuhlawu ni ku vengana, swi ta va swi nga ha ri kona. Ku pfumala ku anakanyela a ku nge he kamanyeti ku tiphina hi vutomi. Kutani, ku ta va ni paradeyisi yo saseka swinene leyi tlulaka Nkova wa Kashmir.—Esaya 65:17, 21-25.

Xana u langutele ku hanya emisaveni yo tano? Mawaku lunghelo ronghasi ni ndlela leyi swi nga ta nyanyula ha yona!

[Xifaniso lexi nga eka tluka 26]

Muapostola Pawulo u kombise ku ringanisela lokunene hikuva a a ri ni vuxaka ni Xikwembu