Ku Dlaya Hi Vito Ra Xikwembu

HI MUYIMERI WA XALAMUKA! EFURWA

“Hi Vito Ra Xikwembu, Ha Dlaya Naswona Hi Ta Ya Emahlweni Hi Dlaya”

EHANSI ka nhloko-mhaka leyi nga laha henhla, International Herald Tribune yi te: “Lembe-xidzana leri, vanhu lava nga ni ntshembo minkarhi yin’wana va tsakela ku tekiwa tanihi tintlharhi, ku fana ni lawa ri ma landzelaka ri thyakisiwile hi mboyamelo wa vanhu lowu chavisaka wa ku dlayetelana hi vito ra Xikwembu.”

Mutsari u boxe swikombiso swa ku dlayetelana ka swirho swa vukhongeri eka malembe-xidzana yo sungula. Kutani loko a kombetela eka ku dlayetelana loku humeleleke eka lembe-xidzana ra vu-20, u gimete hi ku: “Leswi hi swi vonaka i ku tsandzeka ku tiyiselelana ka vuharhi byo chavisa lebyi yaka emahlweni, lebyi sunguleke minkarhi leyi nga hundza. Vukhongeri bya ha ri nchumu wa ku tiyimelela ha wona eka madzolonga ya tipolitiki ni ku lwela ndhawu.”

Van’wana va ringeta ku yimelela tinyimpi ta vukhongeri ta namuntlha hi ku vula leswaku Xikwembu xi pfumelele ku dlayiwa ka Vakanana hi Vaisrayele va khale. Kambe, lexi a hi xivangelo xa ku tiyimelela ha xona eka lava va tivulaka Vakreste leswaku va nghenela nyimpi namuntlha. Ha yini? Hikuva Xikwembu xi lerise Vaisrayele hi ku kongoma leswaku va tirha tanihi vadlayi va ku avanyisa ka xona loku lulameke eka vanhu lava gandzelaka madimona, lava vugandzeri bya vona a byi katsa ku tikhoma ka manyala ka rimbewu ni ku endla magandzelo hi vana.—Deteronoma 7:1-5; 2 Tikronika 28:3.

Vumbhoni bya leswaku tinyimpi ta Israyele wa khale a ku nga ri madzolonga lama tolovelekeke i ndlela ya singita ya ku hlula loku Xikwembu xi ku nyikeke tiko rero. Hi xikombiso, Vaisrayele va khale va tshame va lerisiwa ku tirhisa tinanga, timbita ni swisa swa ndzilo—entiyisweni lawa i matlhari lawa ma nga tolovelekangiki ya nyimpi! Eka xiendlakalo xin’wana swiyimbeleri a swi rhangisiwe emahlweni ka vuthu ra Vaisrayele leri a ri langutane ni vandla leri tsemaka nhlana ra mavuthu ya matiko yo hlayanyana lawa a ma ri karhi ma hlasela.—Vaavanyisi 7:17-22; 2 Tikronika 20:10-26.

Tlhandla-kambirhi, loko Vaisrayele minkarhi yin’wana va lwa tinyimpi leti va nga lerisiwangiki tona hi Xikwembu, a xi nga va katekisi naswona a va hluriwa. (Deteronoma 28:15, 25; Vaavanyisi 2:11-14; 1 Samuwele 4:1-3, 10, 11) Hikwalaho, tinyimpi ta Israyele, a ti nge tekiwi tanihi xivangelo xo yimelela tinyimpi leti lwiweke eVujaganini.

Hi vito ra vukhongeri, Mahindu na wona ma lwe ni Mamoslem ni Masikh; Mamoslem ya Mashia ma lwe ni Mamoslem ya Masunni; naswona le Sri Lanka, Mabudha ni Mahindu ma yayarhelanile.

Xikombiso xa ku dlayetela hi vito ra Xikwembu xi a ti ri tinyimpi leti endlekeke le Furwa hi lembe-xidzana ra vu-16. Mhaka ya tinyimpi leti yi katsa swin’wana swa swiendlakalo swa ku halatiwa ka ngati lokukulu ematin’wini ya vukhongeri bya Rhoma Khatoliki ni bya Protestente le Yuropa. A hi kambisiseni tinyimpi leti, ivi hi vona leswaku hi nga dyondza yini eka tona.

[Picture Credit Line on page 3]

U.S. Army photo