Mintungu —Xana I Xikombiso Xa Makumu?
XANA mintungu ya siku ra hina yi kombisa leswaku makumu ya misava ma le kusuhi? Hi nga si hlamula xivutiso lexi, a hi kambisiseni leswi xiga lexi nge “ku hela ka misava,” xi vulaka swona.
Vanhu vo tala va anakanya leswaku ku hela ka misava swi vula leswaku Xikwembu xi ta herisa misava-ntshuri ni hinkwaswo leswi hanyaka eka yona. Hambiswiritano, Rito ra Xikwembu ri vula leswaku xi yi “endlile [misava-ntshuri] leswaku yi akiwa.” (Esaya 45:18) Xikongomelo xa xona i ku tata pulanete leyi hi vanhu lava nga ni rihanyo lerinene, lava tsakeke naswona lava hisekelaka ku hanya hi ku pfumelelana ni milawu ya xona leyo lulama. Hikwalaho ku hela ka misava a swi vuli ku herisiwa ka misava-ntshuri ni vaaki va yona hinkwavo. Ematshan’weni ya sweswo, swi vula ku herisiwa ka mafambiselo ya sweswi ya swilo ni lava nga eka wona lava alaka ku endla ku rhandza ka Xikwembu.
Leswi swi kombisiwe hi muapostola Petro, loyi a tsaleke a ku: “Misava [ya siku ra Nowa] yi dyiwile hi mati ya ndhambi, yi lova.” Loko misava yi herisiwa enkarhini wa Nowa, lava herisiweke a ku ri lavo homboloka. Misava-ntshuri a yi herisiwanga swin’we na Nowa lowo lulama ni ndyangu wakwe. Tanihi laha Petro a yaka emahlweni a hlamusela, Xikwembu xi ta teka goza nakambe enkarhini lowu taka leswaku xi ‘lovisa vanhu lava nga riki na mhaka na Xikwembu.’—2 Petro 3:6, 7.
Tindzimana tin’wana ta Bibele ti seketela langutelo leri. Hi xikombiso, Swivuriso 2:21, 22 yi ri: “La’v̌a lulameke v̌a ta aka misav̌eni, la’v̌o tenga v̌a ta siyiwa kona; kambe la’v̌o biha v̌a ta susiwa la misav̌eni, ni timbabv̌a ti ta ṭhuv̌uriwa ka yona.”—Nakambe vona Pisalema 37:9-11.
Mintungu Ni Ku Hela Ka Misava
Kambe, xana leswi swi ta endleka rini? Mune wa vadyondzisiwa va Yesu va n’wi vutise xivutiso lexi. Va vutisile: “Xana xikombiso xa ku vuya ka wena ni xa ku hela ka [mafambiselo ya swilo, NW] [kumbe tanihi laha vuhundzuluxeri byin’wana bya Bibele byi vulaka hakona, ‘ku hela ka misava’] xi ta va xihi ke?” Yesu u hlamule a ku: “Tiko rin’wana ri ta pfukela tiko rin’wanyana, mfumo wun’wana wu ta lwa ni mfumo wun’wanyana; ku ta va ni tindlala, ni ku tsekatseka ka misava ematlhelweni layo tala.” (Matewu 24:3, 7, xiitaliki i xerhu.) Hi ku ya hi rungula leri fanaka leri nga eka Luka 21:10, 11, Yesu u engeterile: “Ku ta va ni . . . mintungu . . . , ematlhelweni layo tala; ku ta humelela ni swilo leswi chavisaka ngopfu, ni masingita lamakulu lama humaka etilweni.”—Xiitaliki i xerhu.
Xiya leswaku Yesu a nga vulanga leswaku mintungu ntsena yi ta kombisa leswaku makumu ma kusuhi. Ematshan’weni ya sweswo u vulavule hi tinyimpi letikulu, ku tsekatseka ka misava ni ku pfumaleka ka swakudya. Eka vuprofeta bya yena lebyi tlhontlhaka miehleketo lebyi kumekaka eka Matewu 24 na 25, Marka 13 swin’we na Luka 21, Yesu u vhumbe swilo swo tala leswi a swi ta humelela. Hinkwaswo swi fanele ku humelela enkarhini wun’we emahlweni ko va Xikwembu xi teka goza ro herisa vubihi emisaveni. Ku ni vumbhoni lebyi tiyeke bya leswaku sweswi hi hanya enkarhini wolowo.
Paradeyisi Leyi Taka
Enkarhini lowu taka a ku nga ha dlayiwi vanhu, hambi ku ri hi ntungu kumbe hi voko ra Xikwembu. Yehovha Xikwembu u tshembisa ku endla misava leyi yi va paradeyisi. (Luka 23:43) Xin’wana xa swilo leswi xi nga ta swi endla, i ku susa mavabyi lama hlaselaka vanhu.
Hi nga tiyiseka emhakeni leyi loko hi anakanya hi vutirheli bya Yesu Kreste, loyi a kombiseke timfanelo ta Tata wakwe hi ku hetiseka. Hi ku nyikiwa matimba hi Tata wakwe, Yesu u hanyise lava a va ri swilema, lava vavisiweke, mabofu ni timbheveve. (Matewu 15:30, 31) Nakambe u hanyise lava karhatiwaka hi nhlokonho. (Luka 17:12-14) U hanyise wansati loyi a a karhatiwa hi vuvabyi bya switlhandla, wanuna la khwanyaleke swirho ni wanuna la nga ni xirhumbe-rhumbe. (Marka 3:3-5; 5:25-29; Luka 14:2-4) U hanyise lava nga ni “rihuhe . . . ni lava nga lamala.” (Matewu 4:24) Eka swiendlakalo swinharhu u pfuxe hambi ku ri vafi!—Luka 7:11-15; 8:49-56; Yohane 11:38-44.
Masingita lawa ya ku hanyisiwa ka vanhu ma tiyisa xitshembiso xa Xikwembu enkarhini lowu taka wa ku lawula ka xona xa leswaku, “a ku nga v̌i na munhu . . . l’a nga ta ku: nḍa v̌abya!” (Esaya 33:24) A swi nge he endleki ni siku na rin’we leswaku ntungu wu onha rihanyo ni vutomi bya vanhu. Hi nga tlangela swonghasi leswi Muvumbi wa hina wa rirhandzu a nga ni vuswikoti ni ku tiyimisela ku herisa vuvabyi ni ntungu hi ku helela, hi laha ku nga heriki!—Nhlavutelo 21:3, 4.
[Xifaniso lexi nga eka tluka 9]
Xikwembu xi nyike Yesu matimba ya ku hanyisa lava vabyaka
[Xifaniso lexi nga eka tluka 10]
EParadeyisini leyi taka ya laha misaveni, Yehovha u ta herisa vuvabyi ni ntungu