Yesu Kreste A A Ri Mani?

Ematikweni yo tala enkarhini lowu wa lembe emisaveni hinkwayo, ku ni minkhuvo ya Khisimusi. Vanhu va madzana ya timiliyoni va pfumela leswaku Yesu Kreste u velekiwe hi December 25 kwalomu ka malembe ya 2000 lama hundzeke. Swifaniso swo hambana-hambana swi n’wi kombisa loko a ha ri n’wana a ri exidyelweni. Kambe, u kurile a va wanuna naswona a hanya emisaveni ku ringana malembe ya 33 na hafu.

XANA u tshame u tivutisa leswaku loko Yesu a kurile a languteka njhani? Xana a ri ni muvala wa njhani wa nhlonge? Xana a ri ni matimba naswona a sasekile, kumbe a tsanile naswona a languteka onge wa vabya, hilaha a kombisiweke hakona hi vampfampfarhuti vo hambana-hambana hi malembe-xidzana yo tala? Xana a nga ri na malepfu kumbe a ma fuwile? Xana a ri ni misisi yo leha?

Naswona, xana Yesu a ri ni xiyimo xa ku kwetsima, tanihi ku vonakala loku rhendzeleke nhloko ya yena hilaha vampfampfarhuti van’wana va n’wi kombisaka hakona? Kumbe xana ntiyiso wa kona a wu hambanile—leswaku a nga ri na swivumbeko leswi n’wi hlawulaka kambe a swi nga koteki ku n’wi hlawula entshungwini?

Van’wamatimu ni vampfampfarhuti va misava hi malembe yo tala va vule mavonelo lama hambaneke malunghana ni xivumbeko xa Yesu. Ku engetela kwalaho, ku tlhele ku nyikeriwa vumbhoni lebyi tshembekaka eka marungula lama vulavulaka hi yena, ya timbhoni leti swi voneke hi mahlo lama tsariweke hi vatsari va Bibele lava hanyeke eka lembe-xidzana ro sungula ni lava a va ri vanghana va yena.

Hambiswiritano, swivutiso leswi landzelaka i swa nkoka swinene ku tlula ndlela leyi a a languteka ha yona: Xana Yesu Kreste a ri mani? Xana u ni ntirho wihi exikongomelweni xa Xikwembu? Xana u wu hetisisile ntirho wa kona? Xana namuntlha u le xiyin’weni xihi, naswona u le kwihi? Xana u ni xikhundlha xa nkoka swinene lexi nga ta khumba vanhu hinkwavo, hambi ku ri vo tala lava nga fa?

Xo sungula, a hi kambisiseni vumbhoni bya malunghana ni xivumbeko xa Yesu. Xana a languteka njhani?