Timbewu Leti Vekeke Mihandzu Endzhaku Ka Malembe Yo Tala

Papila leri landzelaka ri kumiwe endzhaku ka loko munhu un’wana a hlaye xihloko lexi nge “Mintlhontlho Ni Mikateko Ya Ku Kurisa Vana Va Vafana Va Nkombo,” eka “Xalamuka!” ya January 8, 1999.

Eka Makwerhu wa xinuna ni wa xisati Dickman,

Ndza ha ku heta ku hlaya mhaka ya n’wina, kutani ndzi boheke ku mi tsalela papila. Ndyangu wa n’wina ndzi wu tive emalembeni yo tala lama hundzeke le Mississipi [1960-61]. Kahle-kahle, ndzi nghene xikolo ni vana va n’wina, naswona a ndzi tala ku ta endlwini ya n’wina ndzi ta tlanga ni vana va n’wina minkarhi yo tala. Kambe sweswo a ndzi swi tekelanga enhlokweni loko ndza ha ri muntshwa. Niloko ndza ha ri ntsongo, a ndzi tsaka ngopfu loko ndzi lemuka leswaku vafana lava a va nga wu losi mujeko exikolweni hikwalaho ka ripfalo ra vona ra Vukreste. Hambileswi a ndzi nghena Kereke ya Grandview Baptist, loko un’wana wa vana va n’wina a ndzi hlamusele xiyimo xa yena, a ndzi swi tiva leswaku swi lulamile.

Un’wana wa vona u ndzi nyike buku leyi nge From Paradise Lost to Paradise Regained,a kumbe ndzi yi yivile. A ndza ha tsundzuki leswaku ku endleke yini, kambe ndzi yi hlaye hinkwayo. Enkarhini wolowo, eka mina a yo va buku leyinene ya mintsheketo. A ndzi swi xiyanga leswaku timbewu ta ntiyiso se ti byariwile, hambileswi ti tshameke malembe yo tala ti nga mili.

Ndyangu wa ka hina wu rhurhele eN’walungwini hi 1964, kutani ndzi tshike ku ya ekerekeni. Vukanganyisi bya vukhongeri byi ndzi pfilunganyile, kutani ndzi tshame malembe yo tala ndzi nga lavi ku katseka eka vukhongeri byo karhi.

Endzhaku ka malembe yo tala, loko ndzi sungule ku ehleketa swinene hi xikongomelo xa vutomi, ndzi swi xiyile leswaku a ndzi lava vuxaka ni Muvumbi. A ndzi lava vuxaka byo tano lebyi nga riki na vukanganyisi bya vukhongeri. Timbewu toleto ta ntiyiso leti byariweke malembe yo tala lama hundzeke a ti sungula ku mila; a ndzo ka ndzi nga swi xiyi.

A ndzi karhatiwa hi mhaka ya leswaku a ndzi swi lavi ku ya etilweni; a ndzi lava ku hanya laha emisaveni. A ndzi ehleketa leswaku pulanete leyi a yi ri ntumbuluko wo hlamarisa lowo saseka, kutani ha yini Xikwembu xi ta yi herisa? Nakambe a ndzi nga swi ehleketi leswaku Yesu i Xikwembu. Loko a a ri xona, kutani gandzelo ra yena a ri ta va ri ri vukanganyisi. Mianakanyo leyi, vonelo leri ni ripfumelo leri, loko swi ri tano, a swi nga hlangani ni leswi ndzi swi dyondzeke eKerekeni ya Baptist. Kutani ndzi sungule ku khongela, ndzi khongela swinene, kutani Yehovha u ndzi hlamule hi xihatla. Ku nga si hela masiku ma nga ri mangani, Timbhoni ti tile ekaya ka mina ivi xikan’we-kan’we ku sunguriwa dyondzo ya Bibele. Hambileswi a ndzi nga si tshama ndzi hlangana ni Timbhoni ta Yehovha ku sukela loko ndzi tolovelane ni ndyangu wa n’wina kukondza ndzi sungula ku dyondza, a ndzi tshikanga ku xixima vana va n’wina ni ku xixima xivindzi xa vona xa ku yimela leswi lulameke. Swilo leswi a swi twala ku sukela loko ndzi sungule ku dyondza ni ku nghenisa vutivi. Swi ndzi teke lembe ni hafu leswaku ndzi ololoxa mahanyelo ya mina. Eku heteleleni ndzi khuvuriwe hi 1975.

Nkarhi wun’wana ni wun’wana loko hi kambisisa rungula leri vulavulaka hi ndlela leyi ku tikhoma ka hina ku nga nyikelaka vumbhoni ha yona handle ko swi xiya, ndzi anakanya hi ndyangu wa n’wina. Loko hi kambisisa nkoka wa ku byala mbewu yo tala ya Mfumo hikwalaho ka leswi minkarhi hinkwayo hi nga swi tiviki leswaku yi ta mila kwihi kumbe rini, sweswo ndza swi twisisa hikwalaho ka mhaka leyi humeleleke eka mina.

Ndzi lava ku mi nkhensa hi ku va mi ve exikarhi ka vanhu va Yehovha ni hi ku namarhela tidyondzo ta n’wina hi nkarhi wolowo. Mi pfune un’wana leswaku a kuma ntiyiso mi nga swi tivi. Ku tikhoma ka n’wina ni ripfumelo ra n’wina, xikan’we ni ra vana va n’wina, swi endla leswaku ntiyiso wu voninga. A ndzi anakanya leswaku a ndzi nge swi tivi leswaku ku humelele yini ha n’wina kumbe a ndzi nge swi koti ku mi nkhensa. Nakambe ndzi ri, ndza nkhensa.

Rirhandzu ro tala ra Vukreste,

L. O.

[Nhlamuselo ya le hansi]