Nchumu Wa Risima Ngopfu Ku Tlula Mali

HI MUYIMERI WA XALAMUKA! LE CANADA

“[U] nyike n’wana wakwe wa nhwanyana nyiko ya risima ngopfu ku tlula ntsengo wihi ni wihi wa mali,” ku vule nhlamuselo ya phepha-hungu ra le Bridgetown, eNova Scotia leri nge The Monitor. A ku ri yini nyiko ya kona? A ku ri “xikombiso xakwe lexinene xa ku tshembeka.”

Anna ni n’wana wakwe Tanya va fike va yima emutini wun’wana laha a ku xavisiwa swiambalo kutani va xava nkwama wo basa wo tamela Bibele ya Tanya. Loko va fika ekaya, Tanya u pfule zipi leyi nga le ndzeni ka nkwama lowu kutani a hlamarisiwa hi ku kuma mali ya maphepha leyi ringanaka R4 200. Hi ku hatlisa manana loyi ni n’wana wakwe va tlhelele emutini lowuya kutani va tlherisela mali leyi eka wansati loyi a va xaviseleke nkwama. Handle ko kanakana nkwama lowu a wu ri wa mhani wakwe laha ku faka, loyi a a khomiwe hi xifo xa Alzheimer, naswona a wu nga sechiwanga kahle loko wu nga si xavisiwa. Wansati loyi a nga tsakanga ro vuya la, u te: “Swi endla leswaku ndzi tlhela ndzi tshemba vanhu . . . Swa khutaza ku tiva leswaku va ha ri kona vanhu lava tshembekaka.”

Xihloko lexi nga exifunengetweni xa phepha-hungu ra kwalaho xi tshahe Anna a vula leswi malunghana ni mhaka leyi: “Tanihi leswi hi nga Timbhoni ta Yehovha, a hi fanele hi endla tano. Hi ni [ripfalo] leri sekeriweke eBibeleni. Naswona hi lava ku dyondzisa Tanya leswinene.” Eka Tanya, nkwama lowuntshwa wu ta va xitsundzuxo lexinene xa ku tshembeka.