Ntiyiso Malunghana Ni Tintsumi

HILAHA hi voneke hakona, minkarhi yin’wana timhaka to tala ni switori leswi vulavulaka hi tintsumi a swi pfumelelani ni leswi Bibele yi swi dyondzisaka. Xana ku hambana loku a hi ka nkoka? Xana ri kona khombo ro amukela tidyondzo leti dumeke malunghana ni tintsumi? Ri kona hakunene.

Hi xikombiso, ehleketa hi langutelo leri khutaziwaka hi “vumoya lebyintshwa.” Tibuku leti vulavulaka hi tintsumi ta manguva lawa ti lava leswaku u fana ni n’wana, u nga ehleketi. A hi kanyingi vahlayi va khutaziwa leswaku va tlhantlha swiphiqo swa vona kumbe va ringeta ku twisisa Bibele ni vutivi bya Xikwembu. Tibuku leti vulavulaka hi tintsumi ti hi byela leswaku hi hanya ni ntsumi leyinene leyi nga ni rirhandzu nileswaku ku hava xivangelo xo chava, tanihi leswi hi hanyaka emisaveni leyi tsakeke laha swilo hinkwaswo swi endlekaka hilaha swi faneleke swi endleka hakona. Loko ku pfuka xiphiqo, hi fanele hi rindzela leswaku ntsumi yi nghenelela. Hambiswiritano, loko swi yime hi ndlela yoleyo, ha yini Bibele yi hi byela leswaku hi ‘lwela ripfumelo hi matimba’?—Yudha 3.

Tibuku to tala leti vulavulaka hi tintsumi ti enerisa vutikukumuxi ni vuhava bya vanhu. Ti khutaza vutianakanyi. Hi ku ya hi tibuku ta kona, tintsumi ta manguva lawa ti lava ku tiva ndlela leyi hi sasekeke ni ku dzuneka ha yona. Hambileswi swi nga swinene leswaku u va ni langutelo lerinene ha wena n’wini, mhaka leyikulu eka “vumoya lebyintshwa” i ku tirhandza handle ka swipimelo. Mutsari un’wana u vula leswaku xileriso xo sungula ni lexikulu i ku “Tirhandza onge u Hosi.” Kunene leswi swi kanetana ni marito ya Yesu! U te: “‘U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.’ Lexi hi xona xileriso lexikulu ni xo sungula eka hinkwaswo.” (Matewu 22:36-39) Hi ta tsaka ngopfu evuton’wini loko hi rhangisa swilo leswi Xikwembu xi swi rhandzaka emahlweni ka leswi hina hi swi rhandzaka.

Ku endla tintsumi ti va nchumu wa nkoka ku tlula hinkwaswo evuton’wini bya hina swi hambanile ni Vukreste bya ntiyiso. Muapostola Pawulo u swi sorile ku gandzela tintsumi. (Vakolosa 2:18) Ku gandzela swi vula ku “xixima kumbe ku kombisa xichavo tanihi munhu wa vukwembu kumbe matimba lama nga tolovelekangiki.” Kambe, ku xixima ni ku nyika tintsumi xichavo hi swona leswi tibuku to tala leti dumeke leti vulavulaka hi tintsumi ti swi khutazaka vahlayi va tona. Kambe, tsundzuka leswi humeleleke loko Sathana a kombela Yesu leswaku a n’wi endlela xiendlo xin’we ntsena xa vugandzeri. Yesu u hlamurile: “U fanele ku gandzela Yehovha Xikwembu xa wena, naswona u fanele ku endlela yena ntsena ntirho wo kwetsima.” (Luka 4:8) Endzhakunyana, loko muapostola Yohane a wele emahlweni ka ntsumi, ntsumi yi te: “Tivonele! U nga endli sweswo! Mina ndzo va hlonga-kuloni swin’we ni vamakwenu lava nga ni ntirho wa ku nyikela vumbhoni hi Yesu. Gandzela Xikwembu.” (Nhlavutelo 19:10)

Ndlela Leyi Tintsumi Ti Nga Ku Pfunaka Ha Yona

Loyi hi faneleke hi ya eka yena leswaku hi kuma nkongomiso ni mpfuno i Xikwembu, ku nga ri tintsumi. Xa swi tsakela naswona xa swi rhandza ku kombisa rirhandzu ra xona eka hinkwavo lava landzelaka swilaveko swa xona leswo lulama. Muapostola Yohane u tsalele Vakreste-kulobye: “Ku tiyiseka loku hi nga na kona ha xona, i ka leswaku, ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa. Ku tlula kwalaho, loko hi tiva leswaku xa hi twa malunghana ni xin’wana ni xin’wana lexi hi xi kombelaka, ha swi tiva leswaku hi ta swi kuma swilo leswi hi swi kombelaka tanihi leswi hi swi kombelaka eka xona.”—1 Yohane 5:14, 15.

Swi tele leswi hi nga swi tiviki hi tintsumi leto tshembeka ta Xikwembu. Hambiswiritano, ha swi tiva leswaku ti endla ntirho wa Xikwembu, hi ku pfumelelana ni xikongomelo ni nkongomiso wa xona. Ti hisekela ku endla leswaku ntiyiso hi Xikwembu wu ya emahlweni. (Nhlavutelo 14:6, 7) A ti swi naveli leswaku hi ti gandzela. Tanihi leswi hi nga swi kotiki ku ti vona, a hi swi tivi leswaku Xikwembu xi ti tirhisa hi mpimo wo tanihi kwihi ku pfuna vanhu va xona etimhakeni ta siku ni siku. Kambe ha swi tiva leswaku Yehovha Xikwembu wa va sirhelela ni ku va kongomisa vanhu vakwe tanihi ntlawa.

Mawaku xikombiso lexinene swonghasi lexi tintsumi ti hi vekelaka xona! Ti kwetsimisa ni ku dzunisa Xikwembu. (Pisalema 148:2) Hambileswi ti nga ni matimba lamakulu ya mianakanyo ni ya moya, ti byi xixima ngopfu vuhosi bya Yehovha. (Yudha 9) Ti tsakela ngopfu leswaku swikongomelo swa Xikwembu swi hetiseka. (1 Petro 1:11, 12) Swilo leswi hinkwaswo hi swi dyondza eRitweni ra Xikwembu, ku nga Bibele. Ina, Bibele i buku leyi hi byelaka ntiyiso malunghana ni tintsumi.

[Marito lama tshahiweke exihlokweni lama nga eka tluka 30]

Tintsumi ti hisekela ku endla leswaku ntiyiso hi Xikwembu wu ya emahlweni

[Xifaniso lexi nga eka tluka 29]

Loko muapostola Yohane a ringeta ku gandzela ntsumi, ntsumi yi te: “U nga endli sweswo!”