Vamabula-ndlela Eka Swa Vutshunguri

JOSÉ, wanuna wa le Belgium, la tshamaka exidorobanini xa Oupeye, loko a ri ni malembe ya 61, u byeriwe leswaku u fanele a nghenisiwa xivindzi. U ri: “Ndzi hlamale ku hlamala.” Emalembeni ya 40 lama hundzeke, vanhu a va nga ehleketi leswaku munhu a nga nghenisiwa xivindzi. Hambi ku ri emalembeni ya va-1970, nhlayo ya lava a va pona loko va nghenisiwe xivindzi a yi ri kwalomu ka 30 wa tiphesente ntsena. Kambe, namuntlha vanhu va nghenisiwa xivindzi nkarhi ni nkarhi, naswona vo tala va pona.

Kambe ka ha ri ni khombo rin’wana lerikulu. Tanihi leswi hakanyingi vanhu va lahlekeriwaka hi ngati yo tala loko va nghenisiwa xivindzi, hi ntolovelo madokodela ma va pompela ngati lava va handzuriwaka. José a a nga yi lavi ngati hikwalaho ka ripfumelo rakwe ra vukhongeri. Kambe a a swi lava ku nghenisiwa xivindzi. Xana a swi nga ta koteka? Van’wana va nga ha ehleketa tano. Kambe muhandzuri-nkulu un’wana u vone onge yena ni vatirhi-kulobye va nga swi kota ku endla vuhandzuri lebyi humelelaka handle ko tirhisa ngati. Naswona va endle tano! Endzhaku ka masiku ya 25 ntsena loko a handzuriwile, José u tlhelele ekaya eka nsati wakwe ni n’wana wakwe.a

Hi ku pfuniwa hi vutshila bya vanhu lava magazini wa Time wu va vulaka “tinghwazi ta vutshunguri,” sweswi, ku tlula hambi ku ri rini eku sunguleni, swa koteka ku tshungula ni ku endla vuhandzuri handle ko pompela ngati. Kambe, ha yini vanhu vo tala va nga swi lavi ku pomperiwa ngati loko va handzuriwa? Leswaku hi hlamula xivutiso lexi, a hi kambisiseni matimu ya mpompelo wa ngati, lama veke ni swiphiqo.

[Nhlamuselo ya le hansi]

[Xifaniso lexi nga eka tluka 3]

Emisaveni hinkwayo, sweswi ku ni madokodela lama tlulaka 90 000 lawa ma vuleke leswaku ma tiyimisele ku tshungula Timbhoni ta Yehovha handle ko tirhisa ngati