Langutelo Ra Bibele
Ripfumelo Ra Ntiyiso—I Yini?
“HANDLE KA RIPFUMELO A SWI KOTEKI KU XI TSAKISA KAHLE, HIKUVA LA TSHINELELAKA XIKWEMBU U FANELE A KHOLWA LESWAKU XI KONA NI LESWAKU HI XONA MUHAKERI WA LAVA VA XI LAVAKA HI MBILU HINKWAYO.”—VAHEVERU 11:6.
RIPFUMELO i yini? Van’wana va hlamusela leswaku ripfumelo i dyondzo ya vukhongeri ya leswaku Xikwembu xi kona handle ka vumbhoni lebyi tiyeke. Mutsari wa maphepha-hungu wa le Amerika H. L. Mencken u hlamusele ripfumelo tanihi “ku kholwa nchumu lowu nga riki ntiyiso, lowu nga twisisekiki.” Xana leri i ripfumelo ra ntiyiso hilaha ri hlamuseriweke hakona eBibeleni? I swinene ku twisisa kahle leswaku ripfumelo i yini, hikuva, hilaha swi tshahiweke hakona laha henhla, ‘handle ka ripfumelo a swi koteki ku tsakisa Xikwembu.’
Bibele yi ri: “Ripfumelo i ku tiyiseka hi swilo leswi hi swi tshembeka.” (Vaheveru 11:1, The New Testament in the Language of Today) Hikwalaho, ripfumelo ri sekeriwe evutivini lebyi kongomeke, eka tinhla leti swiboho leswi faneleke swi nga sekeriwaka eka tona. A swi lavi leswaku munhu a kholwa ntsena, kambe swi lava a va ni xivangelo xa ku kholwa.
Hi xikombiso: Kumbexana u ni munghana loyi u nga vulaka leswi ha yena: “Ndza n’wi tshemba munhu loyi. Ndza tshemba leswaku u ta hanyela rito rakwe. Ndza swi tiva leswaku loko ndzi ri ni xiphiqo, u ta ndzi pfuna.” A hi kanyingi u nga vulaka sweswo hi munhu loyi ku nga hundza siku rin’we kumbe mambirhi ntsena u n’wi tivile, a swi tano ke? Ku fanele ku ri munhu loyi a kombiseke ko tala leswaku wa tshembeka. Swi fanele swi va tano ni hi ripfumelo ra vukhongeri, leri faneleke ri humesa ntshembo ni ripfumelo leri sekeriweke eka vumbhoni lebyi tiyeke, lebyi tshembekaka.
Xana I Ripfumelo Kumbe I Ku Tekeka?
Namuntlha vanhu vo tala lava vulaka leswaku va ni ripfumelo vo tekeka—ku nga ku tshama u lunghekele ku pfumela handle ka swisekelo kumbe swivangelo leswi twalaka. Hakanyingi ku tekeka ku sekeriwe emintlhavekweni ni le ka vukholwa-hava lebyi cinca-cincaka. Leri a hi ripfumelo leri sekeriweke ri tiya hikuva a ri na xisekelo lexi tshembekaka xa ku kholwa.
Ku tekeka swi nga endla munhu a tsutsumela ku endla swiboho leswi nga pfumelaniki ni ntiyiso wa Bibele. Hikwalaho, Bibele ya hi lemukisa malunghana ni ripfumelo leri pfumalaka xisekelo: “Un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.” (Swivuriso 14:15) Muapostola Pawulo u tsarile: “Tiyisekani hi swilo hinkwaswo; khomelelani swi tiya eka leswinene.” (1 Vatesalonika 5:21) Bibele a yi ku khutazi ku tekeka. Yi khutaza ripfumelo leri sekeriweke eka vumbhoni byo karhi.
I swa nkoka ku hambanisa ripfumelo ra ntiyiso ni ku tekeka. Munhu a nga ha rhandza vukhongeri, kambe a nga ri na rona ripfumelo ra xiviri. Pawulo u te: “Ripfumelo a hi ra vanhu hinkwavo.” (2 Vatesalonika 3:2) Kambe vanhu van’wana va na rona ripfumelo leri sekeriweke eBibeleni naswona ri khumba vutomi bya vona.
Ripfumelo Ra Xiviri Ri Tshineta Munhu Eka Xikwembu
Ripfumelo ri nga fanisiwa ni nketani leyi endliweke hi ntshembo ni ku kholwa, leswi tshinetaka munhu eka Xikwembu. Kambe ripfumelo ra muxaka lowu ra hlakuleriwa; a hi nchumu lowu hi velekiwaka na wona. Xana u nga ri hlakulela njhani ripfumelo ra ntiyiso? Bibele ya hlamusela: “Ripfumelo ri landzela leswi twiweke. Hilaha ku fanaka, leswi twiweke swi huma eritweni ra Kreste.”—Varhoma 10:17.
Hikwalaho, u fanele u tinyika nkarhi wa ku tiva Xikwembu ni tidyondzo ta N’wana wa xona, Yesu Kreste. Vutivi lebyi a wu byi kumi u khondle mavoko. (Swivuriso 2:1-9) U fanele u tirha hi matimba leswaku u ta kuma leswi Bibele yi swi vulaka leswaku u ta kholwa ku tshembeka ka yona.
Hambiswiritano, ripfumelo ra xiviri a hi mhaka ntsena ya ku kuma vutivi kumbe ku kholwa leswaku nchumu wo karhi i ntiyiso. Ri khumba mbilu—ku nga yona yi susumetaka munhu ku endla swo karhi. Varhoma 10:10 yi ri: “Munhu u kombisa ripfumelo hi mbilu.” Xana leswi swi vula yini? Loko u ri karhi u anakanya hi swilo swa vukwembu, u sungula ku swi tlangela, u endla leswaku rungula ra Bibele ri nghena embilwini ya wena. Ripfumelo ra kula naswona ri va ni matimba loko u ri karhi u susumeteleka ku xalamukela switshembiso swa Xikwembu naswona u vona vumbhoni bya mikateko ya xona.—2 Vatesalonika 1:3.
Kunene ripfumelo i nchumu wa risima! Loko hi tshembe Xikwembu, ha vuyeriwa hikuva ha swi kota ku langutana ni swiyimo swo tika, hi tshemba vuswikoti bya xona byo kongomisa milenge ya hina ni ku tiyimisela ka xona ku khathalela swilaveko swa hina. Tlhandlakambirhi, Yesu Kreste, N’wana wa Xikwembu u vulavule hi mimbuyelo leyi nga ta tshama hi masiku ya ku va ni ripfumelo eka Xikwembu: “Xikwembu xi rhandze misava swinene xi kala xi nyikela hi N’wana wa xona la tswariweke a ri swakwe, leswaku un’wana ni un’wana loyi a kombisaka ripfumelo eka yena a nga lovisiwi kambe a va ni vutomi lebyi nga heriki.” (Yohane 3:16) Vutomi lebyi nga heriki—mawaku nyiko leyinene swonghasi eka lava va nga ni ripfumelo!
Ku va ni ripfumelo eka xitshembiso xa Xikwembu xa leswaku xi ta hakela malandza ya xona swi nyika munhu mianakanyo leyintshwa hi vutomi. Vaheveru 11:6 yi vula leswaku ripfumelo ra ntiyiso ri katsa ku kholwa leswaku Xikwembu xi ta swi kota ku hakela “lava va xi lavaka hi mbilu hinkwayo.” Kutani, swi le rivaleni leswaku ripfumelo ra xiviri a hi ku tekeka, naswona a ko va ntsena ku kholwa leswaku Xikwembu xi kona. Ri katsa ku pfumela leswaku Xikwembu xa swi kota ku hakela lava va xi lavaka hi mbilu hinkwayo. Xana wa swi lava ku tiva Xikwembu hakunene ni hi mbilu hinkwayo? Loko u swi lava, kuma vutivi lebyi kongomeke lebyi humaka eritweni ra Xikwembu ku nga Bibele, naswona ripfumelo ra wena ri ta hakeriwa.—Vakolosa 1:9, 10.
[Laha Xifaniso Xi Humaka Kona eka tluka 20]
Drawings of Albrecht Dürer/Dover Publications, Inc