Xana Misava Yi Ta Kala Yi Va Ni Vun’we?

EMALEMBENI ya sweswinyana, vanhu va timiliyoni va le Yuropa Vuxa ni va le matikweni man’wana va langutane ni mimbuyelo yo biha leyi vangiwaka hi tinyimpi. Kambe, hambiloko tinyimpi teto ta tihanyi ta ha ya emahlweni, vanhu va magidi lava tshamaka ematikweni lawa ma hlaseriweke hi nyimpi a va ri karhi va hlakulela ni ku hlayisa vun’we exikarhi ka vona. Ehleketa hi swikombiso swi nga ri swingani.

Hi 1991 ntshungu wa vanhu va kwalomu ka 15 000 lava humaka ematikweni yo hambana-hambana va hlanganile eZagreb, le Croatia. Phorisa leri a ri ri kwalaho ri susumeteleke ku vula ri ku: “Swi nga va swinene ku kombisa vahaxi va mahungu leswi humelelaka eka xitediyamu lexi, kona kwala, laha hi vonaka Maserbia, Macroatia, Maslovenia, Mamontenegrin ni van’wana va tshamisane hi ku rhula.” I yini lexi tisaka vun’we byo tano lebyi nga tolovelekangiki?

Hi 1993, le Kiev, entsindza wa Ukraine, a ku khomiwe ntsombano wun’wana lowu a wu ri wukulu ngopfu wa matiko hinkwawo, lowu a wu ri ni xihloko lexi nge “Dyondzo Ya Xikwembu.” Vanhu lava veke kona a va ri kwalomu ka 65 000. Tluka ro sungula ra phepha-hungu leri nge Evening Kiev ri vikile: “Timbhoni ta Yehovha . . . a ti na vun’we ntsena hikwalaho ka tibeji ta rihlaza leti tsariweke ‘Dyondzo ya Xikwembu’ kambe ni hikwalaho ka ripfumelo ra ntiyiso.”

Dyondzo Ya Xikwembu—Yi Ni Matimba Yo Tisa Vun’we

Xana wa tivutisa leswaku ha yini Timbhoni ta Yehovha ti ri ni vun’we kasi laha ti tshamaka kona a ku na vun’we? Profesa wa le Poland, Wojciech Modzelewski, u nyikela xivangelo xa kona hi ku vula leswi malunghana ni Timbhoni: “Xilotlelo xa ku va ni moya wa ku rhula hi leswi ana se ti landzelaka misinya ya milawu leyi paluxiweke eBibeleni.” Kunene, Timbhoni ti ni vun’we emisaveni hinkwayo hikwalaho ka Dyondzo leyi humaka eka Xikwembu, lexi nga Muvumbi, Yehovha. Hi yihi dyondzo yoleyo?

Yesu Kreste u kombetele eka nsinya wa nawu lowu nga wa nkoka lowu nga endlaka leswaku ku va ni vun’we loko a vula leswi hi valandzeri vakwe: “Vona a hi xiphemu xa misava, tanihi leswi mina ndzi nga riki xiphemu xa misava.” Ina, xiyimo lexi tekiwaka hi Timbhoni ta Yehovha emisaveni hinkwayo xi ti endla ti va ni vun’we. Leswi swi fambisana ni marito ya Yesu loko a khongela a ku: “[Ndzi endla xikombelo] . . . leswaku hinkwavo va va un’we, tanihi leswi wena, Tatana, u nga ni vun’we na mina ni leswi na mina ndzi nga ni vun’we na wena, leswaku na vona va va ni vun’we na hina.”—Yohane 17:16-21.

Xiyimo lexi xa vukala-tlhelo hi xona xi nga ni matimba ya ku tisa vun’we hikuva xi susumetela Timbhoni etindhawini hinkwato ta misava leswaku ti hanya hi ku pfumelelana ni leswi muprofeta Esaya a swi vuleke malunghana ni hinkwavo lava Xikwembu ‘xi nga ta va letela tindlela ta xona.’ Esaya u vule leswaku vanhu volavo va fanele va “fula mabanga ya vona ma va swikomu ni mafumu ya vona ma va swikhutulo.” Muprofeta loyi u ye emahlweni a ku: “Tiko a ri nge tlakuseli tiko rin’wana banga, naswona a va nge he dyondzi nyimpi.”—Esaya 2:2-4.

Vun’we ni ku rhula loku vonakeke emintsombanweni ya Timbhoni ta Yehovha eYuropa Vuxa eka ka khume wa malembe lama hundzeke ku kombisa leswaku vuprofeta bya Esaya ana se bya hetiseka hi mpimo lowutsongo. EYuropa ni le matikweni man’wana, hi ndlela yo fanekisela Timbhoni ti fule mabanga ya tona ma va swikomu ni matlhari ya tona ma va swikhutulo. Hikwalaho ka sweswo, namuntlha ti hanya hi ku rhula ni vun’we emisaveni leyi nga riki na vun’we. A swi hlamarisi leswi mutsari wa phepha-hungu rin’wana a tshameke a ku: “Loko misava hinkwayo a yi hanya hi dyondzo ya [Bibele] ya Timbhoni [ta Yehovha] ku halatiwa ka ngati ni rivengo a swi ta hela, naswona rirhandzu a ri ta fuma”! Xana sweswo swi ta kala swi humelela?

Ndlela Leyi Vun’we Bya Misava Hinkwayo Byi Nga Ta Ta Ha Yona

Leswaku ku va ni vun’we emisaveni hinkwayo, ku laveka leswi tlulaka ntlawanyana wa vanhu lava hanyaka hi ndlela leyinene. Ku fanele ku va ni hulumendhe ya misava leyi nga ni matimba ya ku herisa nkucetelo wa lava va lwaka ni vun’we ni ku rhula. Entiyisweni, Yesu u dyondzise valandzeri vakwe leswaku va khongelela hulumendhe yoleyo: “Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.” (Matewu 6:10) Ina, Yesu u kombise leswaku i hulumendhe ya Xikwembu ntsena, “mfumo wa matilo,” leyi nga tlhantlhaka swiphiqo swa misava—ku katsa ni xiphiqo xa ku pfumaleka ka vun’we.—Matewu 4:17.

Yesu Kreste i Hosi ya Mfumo lowu wa matilo. Ehansi ka vulawuri byakwe, vanhu lava nga emisaveni va ta hanya enkarhini wa ku rhula ni vun’we lowu nga si tshamaka wu va kona. Vun’we lebyi bya misava hinkwayo a byi nge tisiwi hi ku cinca ka ikhonomi loku endliweke hi vanhu. Ku ta tisiwa hi hulumendhe ya misava leyi nga emavokweni ya “Hosana ya ku Rhula.”—Esaya 9:6, 7.

Ku pfumaleka ka vululami loku nga kona sweswi, loku hakanyingi ku vangiwaka hi vusweti ni ku tirhisiwa ka matimba hi ndlela yo biha, a ku nge amukeriwi hi Hosana ya ku Rhula. Bibele ya tshembisa: “Tihosi hinkwato ti ta tiwisela eka yona; loko ku ri matiko hinkwawo, ma ta yi tirhela. Hikuva yi ta kutsula xisiwana lexi kombelaka ku pfuniwa, ni la xanisekaka ni hinkwavo lava nga riki na mupfuni. Yi ta kutsula moya-xiviri wa vona eku tshikileriweni ni le madzolongeni . . . Ku ta va ni mavele yo tala emisaveni; ma ta khapakhapa etinhlohlorhini ta tintshava.”—Pisalema 72:11, 12, 14, 16.

Ni ku pfumaleka ka mintirho a ku nge he vi kona ehansi ka vulawuri bya Kreste. Muprofeta Esaya u ri: “A va nge aki kutani ku tshama un’wana; a va nge rimi kutani ku dya un’wana. Hikuva masiku ya vanhu va mina ma ta fana ni masiku ya murhi; ni ntirho wa mavoko ya vona, vahlawuriwa va mina va ta wu tirhisa hi xitalo.” (Esaya 65:22) Mawaku, nkarhi lowu un’wana ni un’wana emisaveni a nga ta va a endla ntirho lowunene, lowu enerisaka!

Vun’we Bya Ntiyiso—Byi Ta Ta Rini?

Kambe, xana Kreste u ta sungula rini ku fuma ehenhla ka misava? Loko a hlamula xivutiso xexo, Yesu Kreste u kombetele eka nkarhi lowu ha wona ku nga ta va ku ri ni tinyimpi, swiviko swa tinyimpi, swifo, ku tsekatseka ka misava ni swiendlakalo swin’wana. Kambe, u tlhele a vulavula hi swilo leswinene—ku nga ku chumayeriwa ka mahungu lamanene ya Mfumo wa Xikwembu emisaveni hinkwayo. (Matewu 24:3-14; Luka 21:11) Yesu u vule leswaku swiendlakalo leswi swi ta hetelela swi sungule “nhlomulo lowukulu,” lowu nga ta landzeriwa hi ku cinca loku heleleke ka vulawuri bya misava. (Matewu 24:21) Hlaya nkulumo yakwe leyi tsariweke eka Matewu ndzima 24 na Luka ndzima 21. Ringanisa swiyimo leswi a vulavuleke ha swona ka ha ri emahlweni ni leswi u swi vonaka emisaveni. Swo namba swi ku dlaa, leswaku sweswi hi hanya ekusuhi swinene ni nkarhi lowu Xikwembu xi nga ta nghenelela ha wona eka vulawuri bya vanhu. Mfumo wa xona, lowu Yesu Kreste a nga ta va a ri Hosi ya wona, wu ta teka vulawuri. Misava leyi nga ni vun’we yi kwala nyongeni!

Ku sala xivutiso lexi nge, Xana u fanele u endla yini leswaku u vona ku hetiseka ka xitshembiso lexi? Tanihi leswi Bibele yi nga ni xiphemu xa nkoka eka ku langutela ka vanhu vumundzuku, i vutlhari ku endla matshalatshala ya ku tiva Bibele ku antswa. Hikwalaho, Timbhoni ta Yehovha ti ta tsakela ku ku endzela ekaya ka wena ti ta dyondza Bibele na wena mahala.a Loko u amukela mpfuno lowu, u ta swi vona hi ku hatlisa leswaku vun’we bya misava byi nga fikeleriwa nileswaku na wena u nga hoxa xandla eka byona!

[Nhlamuselo ya le hansi]

[Swifaniso leswi nga eka tluka 16, 17]

Emisaveni hinkwayo, Timbhoni ta Yehovha ti ni vun’we lebyi hlamarisaka

Kiev, eUkraine

Zagreb, eCroatia

[Xifaniso lexi nga eka tluka 18]

Xikongomelo xa Xikwembu hileswaku vanhu va va ndyangu wun’we wa misava hinkwayo, lowu nga ni vun’we