Langutelo Ra Bibele
Ndlela Yo Langutana Ni Gome
VANHU hinkwavo va va ni gome, hi mpimo wo karhi. Hambiswiritano, van’wana va hela matimba ngopfu lerova va vona swi antswa ku fa.
Bibele yi kombisa leswaku hambi ku ri malandza yo tshembeka ya Xikwembu a ma sirhelelekanga eka swiphiqo ni mintshikilelo leyi vangaka gome. Hi xikombiso, ehleketa hi Eliya na Yobo—havumbirhi bya vona a va ri ni vuxaka lebyinene ni Xikwembu. Endzhaku ka loko a balekile leswaku a nga dlayiwi hi Yezabele, Hosi ya Xisati leyo homboloka, Eliya ‘u kombele Yehovha leswaku moya-xiviri wakwe wu fa.’ (1 Tihosi 19:1-4) Yobo lowo lulama u langutane ni makhombo yo tala hi ku landzelelana, ku katsa ni vuvabyi byo nyangatsa, ni ku fa ka vana vakwe va khume. (Yobo 1:13-19; 2:7, 8) Gome rakwe ri endle leswaku a ku: “Ndzi nga hlawula rifu ku ri ni ku xaniseka ka mina hinkwako.” (Yobo 7:15, The New English Bible) Swi le rivaleni leswaku, vavanuna lava vo tshembeka va Xikwembu va karhatekile swinene.
Eka van’wana namuntlha, gome ri nga ha vangiwa hi ku dyuhala hi ndlela yo vava, rifu ra munghana wa vukati kumbe swiphiqo leswikulu swa timali. Van’wana va kuma leswaku ntshikilelo lowu nga heriki, mimbuyelo leyi nga heriki ya ntokoto lowu vavaka kumbe swiphiqo swa ndyangu swi va endla va vona onge va nwela exikarhi ka lwandle, laha gandlati rin’wana ni rin’wana ri endlaka leswaku swi va tikela ku fika eribuweni. Wanuna un’wana u te: “U titwa u ri xikangalafula—onge a nga kona loyi a nga ta ku kumbuka loko u ta va u nga ha ri kona. Minkarhi yin’wana xivundza lexi munhu a langutanaka na xona a xi tiyiseleleki.”
Minkarhi yin’wana swiyimo swa cinca, swi antswa, swi susa ntshikilelo lowu lowukulu. Kambe ku vuriwa yini hiloko xiyimo xa hina xi nga ta ka xi nga cinci? Xana Bibele yi nga hi pfuna njhani leswaku hi langutana ni gome?
Bibele Yi Nga Pfuna
Yehovha a a swi kota naswona a a ri ni matimba yo pfuna Eliya na Yobo emaxangwini ya vona. (1 Tihosi 19:10-12; Yobo 42:1-6) Mawaku ndlela leyi swi chavelelaka ha yona namuntlha ku tiva mhaka leyi! Bibele yi ri: “Xikwembu i vutumbelo ni ntamu wa hina, mpfuno lowu kumekaka hi ku hatlisa hi nkarhi wa maxangu.” (Pisalema 46:1; 55:22) Hambiloko swi vonaka onge gome ra hi tsanisa, Yehovha u tshembisa leswaku u ta hi khoma swi tiya hi voko rakwe ra xinene ro lulama. (Esaya 41:10) Xana hi nga wu kuma njhani mpfuno wakwe?
Bibele yi hlamusela leswaku hi xikhongelo “ku rhula ka Xikwembu loku tlulaka miehleketo hinkwayo ku ta rindza timbilu ta [hina] ni matimba ya [hina] ya mianakanyo ha Kreste Yesu.” (Vafilipiya 4:6, 7) Swi nga ha endleka hi nga yi voni ndlela yo tlhantlha xiphiqo xa hina hikwalaho ka maxangu lawa hi langutaneke na wona. Kambe, loko hi “phikelela exikhongelweni,” Yehovha u ta rindza timbilu ta hina ni miehleketo ya hina, a hi nyika matimba lawa ma lavekaka leswaku hi tiyisela.—Varhoma 12:12; Esaya 40:28-31; 2 Vakorinto 1:3, 4; Vafilipiya 4:13.
Hi nga vuyeriwa loko hi kombela nchumu lowu hi wu lavaka eswikhongelweni swa hina. Hambileswi swi nga ha tikaka leswaku hi vula leswi nga emiehleketweni ya hina, kambe hi fanele hi ntshunxeka ku vulavula na Yehovha malunghana ni leswi hi vonaka onge hi swona swi hi vangelaka swiphiqo. Hi fanele hi kombela leswaku a hi nyika matimba ya ku langutana ni siku rin’wana ni rin’wana. Hi ni xitiyisekiso lexi: “[Yehovha] u ta enerisa ku navela ka lava va n’wi chavaka, naswona u ta ku twa ku rila ka vona va kombela ku pfuniwa, u ta va ponisa.”—Pisalema 145:19.
Ku tlhandlekela eka xikhongelo, hi fanele hi papalata ku tihambanisa ni vanhu van’wana. (Swivuriso 18:1) Van’wana va kume matimba loko va pfuna vanhu van’wana. (Swivuriso 19:17; Luka 6:38) Ehleketa hi wansati la vuriwaka Maria,a loyi a lweke ni vuvabyi bya khensa naswona a feriwa hi swirho swa ndyangu wakwe swa nhungu hi lembe rin’we. Maria u boheke ku tisindzisa a pfuka, a tlhela a endla ntirho wakwe wa ntolovelo. A a huma siku rin’wana ni rin’wana a ya dyondzisa van’wana hi Bibele, naswona a a tshama a ri kona eminhlanganweni ya Vukreste. Loko Maria a tlhelela ekaya, gome rakwe a ri vuya hi matimba. Kambe, hi ku yisa nyingiso eka tindlela to pfuna van’wana, Maria wa swi kota ku tiyisela.
Kambe, ku vuriwa yini hiloko swi hi nonon’hwela ku khongela kumbe hi tsandzeka ku tihlanganisa ni vanhu van’wana? Exiyin’weni xo tano hi fanele hi lava mpfuno. Bibele yi hi khutaza leswaku hi hundzukela eka “vakulukumba va vandlha.” (Yakobo 5:13-16) Wanuna loyi a a ri ni ntshikilelo lowukulu lowu hambetaka u te: “Minkarhi yin’wana ku vulavula ni munhu loyi u n’wi tshembeka swa pfuna ku rhurisa miehleketo ni ku mbuwetela moya, leswaku munhu a swi kota ku ehleketa kahle.” (Swivuriso 17:17) Ina, loko ku hela matimba nkarhi wo leha ku hundzuka vuvabyi, hi nga ha lava ni mpfuno lowu faneleke wa madokodela.b—Matewu 9:12.
Hambileswi ku nga riki na ntlhantlho wo olova, a hi fanelanga hi byi tekela ehansi vuswikoti bya Xikwembu bya ku hi pfuna leswaku hi swi kota ku langutana ni swiphiqo swa hina. (2 Vakorinto 4:8) Ku phikelela exikhongelweni, ku papalata ku tihambanisa ni ku kuma mpfuno lowu faneleke swi nga hi pfuna leswaku hi tlhela hi kuma matimba. Bibele yi tshembisa leswaku Xikwembu xi ta swi herisa hi ku helela swilo leswi hi vangelaka gome lerikulu. Vakreste va tiyimiserile ku titshega hi xona loko va ha yimele siku leri ha rona ‘swilo swo sungula swi nga taka swi nga ha tsundzukiwi.’—Esaya 65:17; Nhlavutelo 21:4.
[Tinhlamuselo ta le hansi]
a A hi vito rakwe ra xiviri.
b Xalamuka! a yi bumabumeli vutshunguri byo karhi. Vakreste va fanele va tiyiseka leswaku vutshunguri hinkwabyo lebyi va byi kumaka a byi lwisani ni misinya ya milawu ya Bibele. Leswaku u kuma rungula leri engetelekeke, vona Xihondzo xo Rindza xa October 15, 1988, matluka 25-9.