Langutelo Ra Bibele

Vutshunguri Lebyi U Byi Hlawulaka—Xana Byi Na Mhaka?

VUVABYI ni ku vaviseka swo va tshamela maxelo eka vanhu. Loko vanhu va hlaseriwa hi valala lava, vo tala va balekela evutshungurini. Yesu Kreste u xiye vuyelo lebyi nga ni matimba bya ku endla matshalatshala yo tano, u vule leswaku “lava hanyeke a va lavi n’anga, kambe yi laviwa hi lava va vabyaka.”—Luka 5:31.

Mutsari wa Bibele loyi a tsaleke marito wolawo, ku nga Luka, a a ri n’anga. (Vakolosa 4:14) Kumbexana loko muapostola Pawulo a ri karhi a famba na Luka hi nkarhi wa mapfhumba yakwe, u pfunekile hi vutshila lebyi a a ri na byona byo tshungula. Xana Matsalwa ma nyika swiletelo malunghana ni vutshunguri lebyi amukelekaka eka Vakreste? Xana vutshunguri lebyi u byi hlawulaka byi na mhaka?

Swiletelo Swa Matsalwa

Bibele yi nga kongomisa munhu leswaku a endla swiboho swa vutlhari loko swi ta emhakeni ya vutshunguri. Hi xikombiso Deteronoma 18:10-12 yo swi dlaa, leswaku ku hanya hi ku hlahluva ni masalamusi i swilo leswi “nyenyetsaka” eka Yehovha. “Xiendlo xa vungoma,” lexi Pawulo a lemukiseke ha xona, xi katsa mintirho yoleyo leyi nga lavekiki. (Vagalatiya 5:19-21) Hikokwalaho, Vakreste va ntiyiso va papalata tindlela ta vutshunguri leti swi ngo va erivaleni leswaku ti katsa vungoma.

Bibele yi tlhela yi paluxa nkoka lowu Muvumbi a langutaka ku kwetsima ka vutomi ni ngati ha wona. (Genesa 9:3, 4) Leswi ti tiyimiseleke ku yingisa xileriso xa ku ‘papalata ngati,’ Timbhoni ta Yehovha ti tirhisa vutshunguri lebyi nga taka byi nga tluli xileriso xa Bibele xa ku papalata ngati. (Mintirho 15:28, 29) Leswi a swi vuli swona leswaku ti ala vutshunguri byin’wana ni byin’wana. Ematshan’weni ya sweswo, ti lava nkhathalelo lowu nga wunene eka tona ni le ka vana va tona. Hambiswiritano, ti kombela va vutshila bya rihanyo leswaku va ti pfuna hi vutshunguri lebyi fambisanaka ni ripfumelo ra tona ra vukhongeri.

Xiya Magoza Ya Wena

Hosi Solomoni u tsundzuxe leswaku “un’wana ni un’wana la nga riki na ntokoto u pfumela rito rin’wana ni rin’wana, kambe lowo tlhariha u xiyisisa magoza yakwe.” (Swivuriso 14:15) Hambiloko xiboho xa vutshunguri xi nga lwisani ni misinya ya milawu ya Bibele hi ku kongoma, munhu u fanele ku “xiyisisa magoza yakwe.” A hi tindlela hinkwato ta vutshunguri leti pfunaka. Loko Yesu a vule leswaku ‘lava va vabyaka va lava n’anga,’ a nga lerisi ku ya eka vutshunguri hinkwabyo lebyi a byi ri kona hi nkarhi wakwe. A a swi tiva leswaku tindlela tin’wana ta vutshunguri a ti ri tinene kasi tin’wana a ti hoxile.a

Hilaha ku fanaka ninamuntlha, matshungulelo man’wana ma nga ha va ku tlanga hi nkarhi, ma tlhela ma va ni vukanganyisi. Ku hluleka ku endla xiboho lexinene ku nga peta munhu emaxangwini. Naswona swi fanele ku tekeriwa enhlokweni leswaku vutshunguri lebyi pfunaka eka munhu wo karhi, swi nga endleka byi nga pfuni—byi ri ni khombo—eka munhu un’wana. Loko munhu la xeke ematihlweni a langutane ni xiboho xa vutshunguri, hambiloko a nyikiwa xitsundzuxo hi vanghana va yena lavakulu, u ta kambisisa ku hlawula kakwe hi vurhon’wana, ematshan’wini yo ‘pfumela rito rin’wana ni rin’wana.’ U ta kombisa “mianakanyo yo hluteka” hi ku lava rungula leri tshembekaka hi ku hlawula loku sekeriweke evutivini.—Tito 2:12.

Vana Ni Langutelo Lerinene Naswona U Ringanisela

A swi bihanga ku karhateka hi xiyimo xa rihanyo ra wena. Ku nyikela nyingiso lowu ringaniseriweke hi miri wa wena swi kombisa ku tlangela nyiko ya vutomi swin’we ni Xihlovo xa byona ku nga Xikwembu. (Pisalema 36:9) Hambiloko va lava vutshunguri lebyi va fanelaka, Vakreste va fanele ku ringanisela etimhakeni ta rihanyo. Hi xikombiso, loko munhu loyi a hanyeke kahle a khomeka ku tlurisa hi rihanyo rakwe, leswi swi nga n’wi endla leswaku a lahlekeriwa “hi swilo swa nkoka swinene.”—Vafilipiya 1:10; 2:3, 4.

Wansati loyi a a vabya ngopfu esikwini ra Yesu, “[u] tirhisa xuma xakwe hinkwaxo” a lava mpfuno eka tin’anga leti nga ta n’wi tshungula vuvabyi byakwe lebyi a byi nga tshunguleki. Vuyelo byi ve byihi? Ematshan’wini ya leswaku a hanyisiwa, xiyimo xa yena xi lo nyanya, swi nga leswi swi faneleke swi pfilunganye miehleketo yakwe. (Marka 5:25, 26) U ringete ku wa a pfuka leswaku a ta ntshunxeka, kambe a ku balekanga nhlanga yo huma ngati. Ntokoto wa yena wu kandziyisa ndlela leyi vutshila byo tshungula a byi kala ha yona hi nkarhi wakwe. Hambi ku ri namuntlha, ku nga khathariseki nkambisiso wa vutshunguri ni thekinoloji, vanhu vo tala va tikuma va ri eka xiyimo lexi fanaka. Kutani i swa nkoka leswaku hi va ni langutelo lerinene mayelana ni leswi vutshila bya vutshunguri byi nga swi hetisisaka. Vutomi lebyi hetisekeke a byi kumeki eka nkarhi wa sweswi. Vakreste va xiya leswaku nkarhi wa Xikwembu wa “ku hanyisa matiko” wa ha ta. (Nhlavutelo 22:1, 2) Hikwalaho, hi fanele hi va ni langutelo leri ringaniseriweke hi vutshunguri.—Vafilipiya 4:5.

Swi lo dla erivaleni, leswaku minhlawulo leyi hi yi hlawulaka yi na mhaka. Xisweswo, loko hi hlangavetana ni swiboho swa vutshunguri, ku hlawula ka hina ku fanele ku kombisa ku navela ku va ni rihanyo lerinene ni ku navela ku hlayisa vuxaka lebyinene ni Xikwembu. Loko hi endla tano, hi nga hambeta hi langutela hi ku tiyiseka eku hetisekeni ka xitshembiso xa Yehovha xa leswaku emisaveni leyintshwa yo kwetsima leyi taka, “ku hava munhu la tshamaka kona la nga ta ku: ‘Ndza vabya.’”—Esaya 33:24.

[Nhlamuselo ya le hansi]

[Xifaniso lexi nga eka tluka 30]

“The Doctor,” 1891, by Sir Luke Fildes

[Xihlovo Xa Kona]

Tate Gallery, London/Art Resource, NY