Ntsako Lowu Tisiwaka Hi Ku Hlalela Swinyenyana

MISAVA a yi ta va yi nga ri leswi yi nga xiswona loko a yi nga ri na swinyenyana! Miloti ya swona, tinsimu ta swona, mivala ya swona yo hambana-hambana ni vuswikoti bya swona byo haha—hinkwaswo swi hoxa xandla eka vuxongi byo hambana-hambana bya vutomi. Kambe i kangani hi yimaka hi swi yingisela kumbe ku swi hlalela? Loko u tshama edorobeni, u va u ri eka mphesamphesa wa vutomi bya siku ni siku ni mimovha leyi nga ni pongo, swi nga ha endleka u nga swi lemuki swinyenyana leswi nga endhawini ya ka n’wina. Hambiloko u tshama etindhawini ta le makaya, swa olova leswaku u nga swi tekeli enhlokweni. Kambe, xana u nga swi tsakela ku swi vonela ekusuhi swinyenyana swa ndhawu ya ka n’wina?

U nga swi vona hi ku veka ndyelo lowu u swi phamelaka eka wona ekusuhi ni fasitere ra wena. Kutani u fanele u va ni swivona-kule swin’we ni khamera leyi kotaka ku tshineta swilo ekusuhi—ivi u lehisanyana mbilu! Kutani vana ni tifilimi leti kotaka ku teka hi xihatla swin’we ni buku leyi ku kombisaka mixaka-xaka ya swona. Kutani u swi hlalele, u swi yingisela ni ku swi tsakela!