Vantshwa Va Vutisa . . .

Xana Xikwembu Xi Ta Swi Twa Swikhongelo Swa Mina?

“Ndzi boxa xin’wana ni xin’wana eswikhongelweni swa mina hikuva Yehovha i munghana wa mina, naswona ndza swi tiva leswaku u ta ndzi pfuna loko ndzi ri ni xiphiqo.”—Andrea.

MUNTSHWA la vuriwaka Andrea wa tiyiseka leswaku Xikwembu xa swi twa swikhongelo swakwe. Kambe a hi vantshwa hinkwavo lava titwaka hi ndlela yoleyo. Van’wana va vona onge va le kule ngopfu ni Xikwembu lerova a va nge swi koti ku vulavula na xona. Va nga ha ehleketa leswaku Xikwembu a xi khathali ngopfu ha vona lerova va nga khongela eka xona.

Hi xihi xihundla xa ku khongela? Ku vula ntiyiso, i ku va ni vuxaka bya xiviri ni Xikwembu. Mupisalema u khongele a ku: “Lava tivaka vito ra wena va ta ku tshemba.” (Pisalema 9:10) Ku vuriwa yini ha wena? Xana u xi tiva kahle Xikwembu lerova wa kholwa leswaku xi ta ku twa loko u khongela? U nga si ya emahlweni ni ku hlaya, hi kombela u hlamula swivutiso leswi nga ebokisini leri nge “U Xi Tiva Ku Fikela Kwihi Xikwembu?” I swingani swivutiso leswi u nga kotaka ku swi hlamula?

U XI TIVA KU FIKELA KWIHI XIKWEMBU? Tinhlamulo ti le ka tluka 14

1. Vito ra Xikwembu i mani, naswona ri vula yini?

2. Hi tihi timfanelo letikulu ta mune ta Xikwembu leti Bibele yi ti paluxaka?

3. A ku ri xihi xikombiso lexikulu xa rirhandzu ra Xikwembu eka vanhu?

4. Hi nga byi endla njhani vuxaka ni Xikwembu?

5. Hi fanele hi va ni langutelo rihi loko hi khongela?

Xana wa swi kota ku hlamula swin’wana swa swivutiso leswi sweswi, u nga si hlaya xihloko lexi hinkwaxo? Loko swi ri tano, ku ni swo tala leswi u swi tivaka hi Xikwembu ku tlula vanhu vo tala. Kambe, swi nga ha endleka tinhlamulo ta wena ti kombisa leswaku u fanele u nghenisa vutivi byo tala ha xona, leswaku u xi tiva kahle. (Yohane 17:3) U ri ni pakani yoleyo, xiya swilo swo hlayanyana leswi Bibele yi hi dyondzisaka swona hi “Mutwi wa xikhongelo.”—Pisalema 65:2.

Xikwembu I Munhu Wa Xiviri

Xo sungula, Bibele yi hi pfuna ku vona leswaku Xikwembu a hi matimba lama nga tivekiki. I munhu wa xiviri la nga ni vito, ku nga Yehovha. (Pisalema 83:18) Hi Xiheveru, vito rero ri vula leswaku “U Endla Leswaku Swi Hetiseka.” A nga ha va lexi a lavaka ku va xona leswaku a hetisisa xikongomelo xakwe. Matimba lama nga tivekiki a ma nge swi endli sweswo! Hikwalaho loko u khongela, tiyiseka leswaku a wu vulavuli ni matimba lama nga hlamuselekiki kumbe moya ntsena. U vulavula ni munhu wa xiviri loyi a nga yingisaka ni ku hlamula swikhongelo swa wena.—Vaefesa 3:20.

Hikwalaho, Diana lontsongo u ri: “Ndza swi tiva leswaku Yehovha wa ndzi twa kun’wana ni kun’wana laha ndzi nga kona.” Xikwembu xi fanele xi va xa xiviri eka wena leswaku u ta va ni ntshembo wo tano! Bibele yi ri: “La tshinelelaka Xikwembu u fanele a kholwa leswaku xi kona.”—Vaheveru 11:6.

Xihlovo Xa Vutlhari Ni Matimba

Xikwembu xi nga hi pfuna hakunene hikuva xi ni matimba lamakulu. Matimba wolawo a ma tsandziwi hi nchumu, hilaha ma vonakaka hakona evuakweni lebyi lebyikulu lebyi hlamarisaka. Bibele yi vula leswaku Yehovha u tiva vito ra nyeleti yin’wana ni yin’wana—hambileswi ti nga magidi ya timiliyoni ta ntsandza-vahlayi! Tlhandlakambirhi, hi yena xihlovo xa matimba hinkwawo lama kumekaka eka tinyeleti teto. (Esaya 40:25, 26) Xana a swi hlamarisi sweswo? Kambe, hambileswi sweswo swi hlamarisaka ngopfu, Bibele yi vula leswaku “leswi ko va swiphemunyana swa matimba ya xona”!—Yobo 26:14, Today’s English Version.

Nakambe, ehleketa hi vutlhari bya Yehovha lebyi nga pimekiki. Bibele yi vula leswaku miehleketo yakwe yi “entile swinene.” (Pisalema 92:5) Hi yena la endleke vanhu, hikwalaho u hi tiva ku tlula ndlela leyi hina hi titivaka ha yona. (Pisalema 100:3) Tanihi leswi a nga kona “ku suka enkarhini lowu nga riki na makumu ku ya enkarhini lowu nga riki na makumu,” u ni ntokoto lowukulu ngopfu. (Pisalema 90:1, 2) A xi kona xilo lexi a nga xi tiviki.—Esaya 40:13, 14.

Xana Yehovha u ma tirhisa njhani matimba ni vutlhari byebyo hinkwabyo? Tikronika ta Vumbirhi 16:9 ti ri: “Loko ku ri Yehovha, mahlo yakwe ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” A xi kona xiphiqo ni xin’we lexi u nga vaka na xona lexi Xikwembu xi nga tsandzekaka ku xi tlhantlha kumbe ku ku pfuna ku langutana na xona. Kayla lontsongo u ri: “Sweswinyana, loko mina ni ndyangu wa ka hina hi koka exilogweni, ndzi khongele Yehovha, naswona ndzi vona leswaku u hi pfunile ku langutana ni swiyimo, swiphiqo ni mintlhaveko leswi a hi nga ta swi kota ku langutana na swona handle ka mpfuno wakwe.” Loko u vulavula ni Xikwembu, u ya exihlobyeni xa vutlhari. A yi kona ndlela yin’wana leyi u nga pfunekaka ha yona leyi tlulaka yoleyo!

Xikwembu Xa Vululami Ni Rirhandzu

Kambe, u nga swi tivisa ku yini leswaku Xikwembu xi lava ku ku pfuna? Hikuva Yehovha u hlawule leswaku hi n’wi tiva, ku nga ri hi matimba yakwe lamakulu kumbe vutlhari byakwe lebyi nga pimekiki hambi ku ri hi vululami byakwe lebyi nga hundzukiki. Kambe, Yehovha u tiviwa ngopfu hi mfanelo yakwe ya rirhandzu. Yohane wo Sungula 4:8 yi ri: “Xikwembu i rirhandzu.” Naswona rirhandzu rero lerikulu hi rona leri endlaka leswaku hi khongela eka xona. Ndlela leyikulu leyi a kombiseke rirhandzu ra xona ha yona i ku nyikela hi N’wana wa xona leswaku a va gandzelo ra nkutsulo hi xikongomelo xa leswaku hi kuma vutomi lebyi nga heriki.—Yohane 3:16; 1 Yohane 4:9, 10.

Leswi Xikwembu xi nga rirhandzu, a wa ha fanelanga u chava leswaku xi ta ku honisa kumbe ku ku khoma hi ndlela yo biha. Deteronoma 32:4 yi ri: “Tindlela takwe hinkwato i vululami.” Ndlela leyi Xikwembu xi ku rhandzaka ha yona i xitiyisekiso xa leswaku xi ta ku twa. Leswi swi hi endla hi titwa hi ntshunxekile ku xi byela leswi hi swi anakanyaka ni ndlela leyi hi titwaka ha yona.—Vafilipiya 4:6, 7.

Vunghana Ni Xikwembu

Entiyisweni, Yehovha wa hi rhamba leswaku hi vulavula na yena. A nga lavi leswaku a va munhu wumbe eka hina. Ku hambana ni sweswo, ematin’wini hinkwawo, Yehovha u rhambe vanhu leswaku va va vanghana vakwe. Van’wana lava va veke ni vunghana ni Xikwembu, lava a va tsakisa mbilu ya xona, a ku ri vavanuna ni vavasati, lavatsongo ni lavakulu. Exikarhi ka vona a ku ri na Abrahama, Hosi Davhida na Mariya mana wa Yesu.—Esaya 41:8; Luka 1:26-38; Mintirho 13:22.

Na wena u nga va munghana wa Yehovha. Ina, vunghana byebyo a byi vuli swona leswaku u fanele u languta Xikwembu tanihi xivumbiwa xa moya lexi talaka ku tihundzula munhu wa nyama loyi u vulavulaka na yena ntsena loko u lava swo karhi kumbe u ri ni xiphiqo. Swikhongelo swa hina a swi fanelanga swi vulavula ntsena hi swilaveko swa hina. Loko hi lava ku va vanghana va Xikwembu, hi fanele hi anakanya hi ku rhandza ka xona—ku nga ri hi ku rhandza ka hina ntsena—entiyisweni, hi fanele hi endla ku rhandza ka Xikwembu. (Matewu 7:21) Hikwalaho, Yesu u dyondzise vadyondzisiwa vakwe ku boxa swilo swa nkoka eka Xikwembu loko va khongela. U te: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni.’” (Matewu 6:9, 10) Swikhongelo swa hina swi fanele swi tala hi ku dzunisa ni ku nkhensa Xikwembu!—Pisalema 56:12; 150:6.

Nilokoswiritano, a hi fanelanga hi ehleketa leswaku swilaveko swa hina kumbe swilo leswi hi karhatekeke ha swona a hi nchumu kumbe i switsongo lerova a hi fanelanga hi swi boxa loko hi khongela. Steve u ri: “Hambileswi ndzi ringetaka ku ntshunxeka loko ndzi vulavula na xona, minkarhi yin’wana ndzi vona onge a ndzi fanelanga ndzi karhata Xikwembu hi swilo leswi nga vuliki nchumu.” Loko u sungula ku titwa hi ndlela yoleyo, titsundzuxe leswi Yesu a swi dyondziseke vadyondzisiwa vakwe: “Ntlhanu wa swindzingiri swi xavisiwa hi timali timbirhi ta nsimbi ta risima leritsongo, a hi swona ke? Kambe ku hava ni xin’we xa swona lexi rivalekaka emahlweni ka Xikwembu. . . . Mi nga chavi; mi ni risima ro tlula swindzingiri swo tala.” (Luka 12:6, 7) Xana sweswo a swi hi tiyisi nhlana?

Kutani, swa olova ku vona leswaku loko u tiva swo tala hi Yehovha, u ta susumeteleka ngopfu ku ya eka yena hi xikhongelo naswona u ta khorwiseka ngopfu leswaku Yehovha a nga ku pfuna naswona u ta ku pfuna. Hikwalaho, xana u fanele u va ni langutelo rihi ra mianakanyo loko u khongela Xikwembu? U fanele u kombisa xichavo, u titsongahata naswona u pfumala vutianakanyi. Xana u ehleketa leswaku u kona munhu hambi a ri wihi la nga exikhundleni lexi tlakukeke laha misaveni loyi a nga ta ku yingisa loko u endla xikombelo hi ndlela ya ku tikukumuxa kumbe leyi nga kombisiki xichavo? Hikwalaho swi nga ku hlamarisi leswi Yehovha a languteleke leswaku u n’wi xixima naswona u xixima milawu yakwe a nga si hlamula swikhongelo swa wena.—Swivuriso 15:29.

Vantshwa va magidi va dyondze ku boxa ta le mbilwini ya vona eka Xikwembu. (Pisalema 62:8) Brett u ri: “Loko Yehovha a hlamula swikhongelo swa mina, swa ndzi khutaza ku lemuka leswaku wa ha ri munghana wa mina.” Ku vuriwa yini hi wena? U nga byi kuma njhani vuxaka byo fana ni byebyo eka Xikwembu? Vantshwa vambirhi lava nga Vakreste va vule leswi landzelaka:

Rachel: “Leswaku ndzi va ekusuhi ni Yehovha, ndzi vona swi fanerile ku dyondza Rito rakwe hi vuenti, naswona ndzi ringeta ku hlakulela ku navela ku dyondza hi ndlela yoleyo.”—1 Petro 2:2.

Jenny: “Ndzi vona leswaku loko u hiseka ngopfu evutirhelini bya Yehovha, u titwa u ri ekusuhi ngopfu na yena.”—Yakobo 4:8.

Xana u tshame u swi lemuka leswaku swi pfuna njhani ku khongela? Muntshwa un’wana la nga Mukreste u ri: “Ndzi nga titwa ndzi ri ekusuhi ni Xikwembu loko xo vulavula na mina kumbe xo ndzi rhumela rungula.” Tanihi leswi Yehovha a nga hlamuliki hi rito leri twalaka loko hi khongela, kahle-kahle, xikhongelo xi hi pfuna njhani? Xivutiso lexi hi ta xi tlhuvutsa exihlokweni lexi landzelaka.

[Bokisi leri nga eka tluka 14]

Tinhlamulo ta swivutiso leswi nga eka tluka 12

1. I Yehovha. Ri vula leswaku “U Endla Leswaku Swi Hetiseka.”

2. I rirhandzu, matimba, vululami ni vutlhari.

3. U rhumele N’wana wakwe la nga swakwe, Yesu, leswaku a ta hi fela.

4. Hi ku nga karhateki ntsena hi swilaveko swa hina kambe hi anakanya ni hi ku rhandza ka Xikwembu naswona hi ku endla.

5. Hi fanele hi titsongahata, hi kombisa xichavo ni ku pfumala vutianakanyi.

[Swifaniso leswi nga eka tluka 12, 13]

Ku dyondza Bibele ni ku dyondza eka ntumbuluko swi nga hi pfuna ku tiva Xikwembu ku antswa