Vanhu Lava Lavaka Ku Pfuna Va Kumeka Hinkwako-nkwako
BAXTER, xichudeni xa le xikolweni xa le henhla lexi nga ni malembe ya 15 hi vukhale, u ni ndlela yo tsakisa yo tirhisa nkarhi wakwe wa nindzhenga hi Migqivela. U endzela ntlawa wa vanhu lava kuleke endhawini ya yo hlayisa vadyuhari, a va tlangela vuyimbeleri a tlhela a va yimbelerisa. Mudyondzisi wa Baxter, u ri: “U hlekisa lava tshamaka kona, u va tisela mafenya ni ku va endla va tsakela vutomi.” Lucille, la nga ni malembe ya 78, u kombisa malwandla hi ndlela leyi fanaka. U avela vapfumari swakudya ni ku endzela vavabyi lava nga ni xivundza exibedlhele. Munghana wa Lucille u vula leswi ha yena: “Loko ku ri ni xilaveko naswona a ta swi kota ku pfuna, wa ya a ya pfuna.”
Nhlamuselo Ya Ntirho Wa Ku Tirhandzela
Ku languta vutomi hi ndlela leyi—‘Vana kona loko ku ri ni xilaveko’—i ndlela leyi vanhu va timiliyoni va titwaka ha yona emisaveni hinkwayo. Va pfuna laha ku akiwaka kona ni le tihofisini, etifektri, emakaya ya swigono ni vadyuhari, emakaya ya vanhu lava vabyelaka ku fa, etikampeni ta nxaniso, etindhawini ta vanhu lava nga riki na makaya, eka tindzawulo to tima ndzilo, etindhawini ta nchavelelo, laha swifuwo swi hlayisiwaka kona ni le tindhawini tin’wana. Va kumeka kun’wana ni kun’wana! Va tirhisa vuswikoti bya vona ku sukela eka ku akelana tindlu ku ya eka ku hlengelana timali ni ku suka eku vukarheni ka tincece ku ya eku khathaleleni ka vanhu lava vabyelaka ku fa. I vatirhi va ku tirhandzela—vanhu lava pfunaka laha ku nga ni xilaveko.
Ntirho wa ku tirhandzela wu hlamuseriwe tanihi “ku endla swilo leswinene leswi munhu a swi ehleketeke.” Swi katsa timfanelo to kota ku tiyimisela ku endla nchumu wo karhi, moya wa ku tinyiketela, ku ka u nga lavi hakelo, ni ku kombisa leswaku a wu na vutianakanyi nikatsongo. Vanhu van’wana vambirhi lava endleke ntirho wa ku tirhandzela malembe yo tala va ri: “Ntirho wa ku tirhandzela [i] ku tinyiketela: ku nyiketela hi nkarhi wa hina, mavoko ni milenge ya hina, mavonelo ya hina, vuswikoti bya hina byo pfuna munhu un’wana, vuswikoti bya hina byo tlhantlha swiphiqo ni vutivi bya hina.” Lexi tsakisaka, ku nyika ko tano ku pfuna na vona vatirhi va ku tirhandzela.—Vona bokisi leri nge “Vatirhi Va Ku Tirhandzela Na Vona Va Pfuneka.”
Nhlayo Leyi Engetelekaka —Xilaveko Lexi Kulaka
EUnited States, vanhu lava ringanyeteriwaka eka 100 wa timiliyoni va endla ntirho wa ku tirhandzela—naswona va karhi va engeteleka. Kathleen Behrens, mukongimisi-nkulu wa nhlengeletano ya vatirhi va ku tirhandzela eNew York Cares, wa ha ku byela Xalamuka! a ku: “Nhlengeletano ya hina yi ya yi kula hi xihatla lexikulu. N’wexemu ntsena, ku ve ni vatirhi va ku tirhandzela lava tlulaka 5 000 lava joyineke ntlawa wa hina.” Mintlawa ya vatirhi va ku tirhandzela va le Yuropa yi engeteleka hi ndlela leyi fanaka. Hi xikombiso, eFurwa, nhlayo ya vatirhi va ku tirhandzela a yi ri karhi yi engeteleka hi tiphesente ta tsevu lembe ni lembe eka makume ya malembe mambirhi lama hundzeke. Nilokoswiritano, xa ha ri kona xilaveko xa vatirhi va ku tirhandzela lava engetelekeke. Hilaha tlhelo, (xirho xa Nhlangano wa Matiko xa) Vatirhi va ku Tirhandzela va Nhlangano wa Matiko xi vula leswaku hi ku ya hi xiyimo xa misava hinkwayo, “namuntlha ku ni xilaveko lexikulu xa vatirhi va ku tirhandzela ku tlula hambi ku ri rini eku sunguleni.” Mulanguteri wa le muziyamu u ri: “Hi tshembele eka vatirhi va ku tirhandzela.”
Kambe, ku ni nchumu wo hlamarisa. Hambileswi vakongomisi vo tala, vamininjhere ni vafambisi lava tirhaka ni vatirhi va ku tirhandzela va swi vonaka leswaku vatirhi volavo i “va nkoka swinene,” kambe ntirho wa vona wo tala a wu tekeriwi enhlokweni. Leswaku ku cinciwa xiyimo lexi, Nhlangano wa Matiko wu endle xiboho xa ku tirhisa lembe ra 2001 tanihi nkarhi wa ku yisa nyingiso eka vatirhi va ku tirhandzela. Bokisi leri nge “Lembe Ra Misava Hinkwayo Ra Vatirhi Va Ku Tirhandzela” ri hlamusela tipakani tin’wana leti Nhlangano wa Matiko wu lavaka ku ti fikelela.
Enkarhini lowu, ku ni ku cinca ko karhi emhakeni ya vatirhi va ku tirhandzela loku tisaka ntlhontlho eka vatirhi va ku tirhandzela ni lava va kongomisaka ntirho wa vona. Nilokoswiritano, ka ha ri ni vanhu vo hlayanyana emisaveni lava lavaka ku pfuna van’wana. I yini lexi va susumetelaka ku endla tano? Xana va endla yini? Naswona va nga byi khumba njhani vutomi bya wena?
[Bokisi/Xifaniso lexi nga eka tluka 14]
Vatirhi Va Ku Tirhandzela Na Vona Va Pfuneka
“Ku endla matshalatshala ya ku pfuna van’wana swi ndzi tisele ntsako lowukulu, lowu fuweke ku tlula ntsako lowu a ndzi ta va ndzi wu kumile loko a ndzi lo namarhela ntsena entirhweni wa mina wa ku tihanyisa,” ku vula Michael, loyi nkarhi wun’wana a tirhaka tanihi mutirhi wa ku tirhandzela. A hi Michael ntsena la titwisaka xileswi. Sharon Capeling-Alakija, muungameri-nkulu wa Vatirhi va ku Tirhandzela va Nhlangano wa Matiko, u ri: “Emisaveni hinkwayo, vanhu lava . . . endlaka ntirho wa ku tirhandzela va swi lemuka leswaku va kuma ntokoto lowukulu.” Dok. Douglas M. Lawson, la nga ni ntokoto entirhweni wa ku tirhandzela, wa tiyisekisa leswaku valavisisi va kume leswaku “hakanyingi endzhaku ka tiawara ti nga ri tingani munhu a sungule ntirho wa ku pfuna van’wana, mahanyelo ni vumunhu bya loyi a n’wi pfunaka swi antswa lerova vanhu va n’wi teka onge loyi a n’wi pfuneke u n’wi dyise swidzidzirisi.” Kutani ku vonaka ka yena onge u dyisiwe swidzidzirisi hi loyi a n’wi pfuneke a hi nchumu wa xinkarhana. Valavisisi va le Yunivhesiti ya Cornell eUnited States va kambisise ntlawa wa vanhu van’wana malembe lama tlulaka 30 kutani va kuma leswaku “lava hlanganyelaka entirhweni wa ku tirhandzela a va tsakile ni ku va ni rihanyo lerinene ku tlula lava va nga hlanganyelangiki eka wona.” Lexi tsakisaka, Bibele yi ri: “Ku nyika swi tisa ntsako lowukulu ku tlula ku amukela.”—Mintirho 20:35; Swivuriso 11:25.
[Bokisi/Xifaniso lexi nga eka tluka 15]
Lembe Ra Misava Hinkwayo Ra Vatirhi Va Ku Tirhandzela
Hi November 20, 1997, Nhlengeletano ya Mani na Mani ya Nhlangano wa Matiko yi vule leswaku lembe ra 2001 ri ta va “Lembe ra Misava Hinkwayo ra Vatirhi va ku Tirhandzela, [International Year of Volunteers,” (IYV 2001)]. Hi ku ya hi Nhlangano wa Matiko, ku fanele ku fikeleriwa tipakani ta mune elembeni leri.
Ku tekeriwa enhlokweni swinene Tihulumendhe ti khutaziwa ku lemuka nkoka wa vatirhi va ku tirhandzela hi ku dyondza ni ku tsala ehansi leswi va swi endleke ni ku va nyika masagwadi emintirhweni ya vona leyinene.
Nawu wu fanele wu ku khutaza Matiko ma komberiwa leswaku ma khutaza ntirho wa ku tirhandzela, hi xikombiso, hi ku pfumela leswaku loko munhu a nga lavi ku dyondzela nyimpi, a nga endla ntirho wa ku tirhandzela kumbe hi ku pfumela leswaku lava va endlaka ntirho lowu va nga hakerisiwi swibalo swin’wana.
Ku avelana rungula Va hlengeleti va mahungu va komberiwa ku hoxa xandla swinene hi ku hangalasa timhaka leti vulavulaka hi mintirho leyinene leyi endliweke hi vatirhi va ku tirhandzela. Xisweswo, mintirho yoleyo yi nga ha endliwa hi ndlela leyi fanaka etindhawini tin’wana, “ku endlela leswaku ximutana xin’wana ni xin’wana xi nga dyi nkarhi xi ringeta ndlela yin’wana yo endla nchumu lowu fanaka.”
Vunavetisi Tinhlengeletano ta vatirhi va ku tirhandzela ti khutaziwa ku hlela minkombiso leyi eka yona ti nga ta byela vaaki hi mimpfuno leyi va yi kumaka hikwalaho ka vatirhi va ku tirhandzela.
Nhlangano wa Matiko wu kholwa leswaku IYV 2001 yi ta endla leswaku vanhu va lava ku endleriwa mintirho yo tala hi vatirhi va ku tirhandzela, vo tala va nghenela ntirho wa ku tirhandzela, ni ku kuma mali ni tindhawu ta tinhlengeletano leti nga ta tirhisiwa hi vatirhi va ku tirhandzela, leswaku va pfuna vanhu hi leswi va lavaka ku endleriwa swona. Tihulumendhe ta 123 ti joyinile leswaku ti ta seketela makungu ya xiboho lexi endliweke hi Nhlangano wa Matiko.