Ku Kombisa Rirhandzu—Ntirho Wo Tika Wo Phalala

RICHARD VARA muhleri wa phepha-hungu ra Houston Chronicle la nga ni ntokoto, u vula leswaku hambileswi swi nga oloviki leswaku a tsakisiwa hi nchumu wo karhi kambe wu kona lowu n’wi tsakiseke n’wexemu. U te: “A ndzi si tshama ndzi swi vona swo fana ni leswi. A ndzi si swi kholwa.” Lee P. Brown meyara ya le Houston, eTexas, le United States of America na yena u titwe hi ndlela leyi fanaka. U te: “Ndzi navela onge vanhu hinkwavo va le Houston va nga vona leswi mi swi endleke. Swi ndzi tsakisile swinene.” Xana a va vulavula ha yini? Muhleri wa phepha-hungu ni meyara a va vulavula hi ntirho wo phalala lowu endliweke hi Timbhoni ta Yehovha eHouston. I yini leswi a swi endliwa eka mphalalo lowu? Xana ha yini a wu laveka? Ha yini u khumbe vanhu van’wana? Leswaku hi kuma nhlamulo a hi sunguleni mhaka leyi eku sunguleni.

Ndhambi Leyikulu Swinene

Eku sunguleni ka June 2001 ku ve ni xidzedze lexikulu lexi vuriwaka Allison, lexi hlaseleke ndhawu ya dzonga-vuxa bya Texas. Hi Ravuntlhanu, June 8, eka tiawara ta 24 se a ku halake mpfula leyi tsakamiseke misava hi mitara yin’we ku ya ehansi eHouston—ku nga doroba ra vumune lerikulu.a Hi xinkarhana, mati lama a ma ri karhi ma tlakuka ma nghene emavhengeleni, etihofisi ni le mitini ya magidi. Magondzo lamakulu a ma hundzuke milambu, ma khukhula mimovha ni tilori letikulu leti a ti yime kwalaho. Mapato man’wana a ma lo mphaa, hi mati lerova tilori leti timelaka ndzilo ni mimovha ya xilamulela-mhangu a swi nga swi koti ku famba eka wona. Ku vitaniwe swihaha-mpfhuka-phatsa ni tilori ta masocha leswaku swi ta ponisa vanhu.

Eku heteleleni, loko mapapa ma hangalaka hi Musumbhunuku June 11, a swi ri erivaleni leswaku Allison yi dlaye vanhu ni ku onha ndhawu. Ku fe vanhu va 22 ku katsa ni Timbhoni ta Yehovha timbirhi: Jeffrey Green, nkulu la nga Mukreste, muhariva ni sivara wakwe Frieda Willis.b Tlhandlakambirhi, ku onhake tiyindlu ta 70 000, leswi endleke leswaku ndhambi leyi yi va yikulu ku tlula hinkwato leti tshameke ti hlasela ndhawu leyi. Entiyisweni, ku onhake nhundzu leyi hlayeriwaka eka magidi-ntlhanu wa timiliyoni ta tidolara, Allison yi ve ndhambi leyi koxeke mali yo tala ku tlula hinkwato leti tshameke ti hlasela United States.

Ku Khitikana Ka Vatirhi Va Ku Tirhandzela

Vanhu a va tsemeke nhlana. Mutirhi un’wana wa mphalalo u te: “Mibedo a yi tsakama. Mimete ya vona a yi tsakama. Swifaniso swa vana va vona a swi khukhuriwe hi mati.” Eka Timbhoni ta Yehovha leti tlulaka 16 000 ta le Houston, to tala a ti lahlekeriwile. Tiholo ta Mfumo ta nhungu ni tindlu ta madzana ta Timbhoni a ti onhakile. Tin’wana ta tindlu leti a ti mbombomele ematini hi tisentimitara to hlayanyana; kasi tin’wana a ku sele katsongo ti nyupele hi ku helela. Mavandlha ya Timbhoni ta Yehovha lama tlulaka 80 ma khumbekile eka xiendlakalo lexi. Hambiswiritano va kume mpfuno. Endzhaku ka masiku ma nga ri mangani ku fike ndhambi yin’wana, leyi a ku ri vatirhi va ku tirhandzela lava a va tele ku pfuna. Xana swi endlekise ku yini?

Vakulu lava nga Vakreste va mavandlha ya Timbhoni ta Yehovha ya le Houston va teke goza hi ku hatlisa, mati ya ndhambhi ma nga si hunguteka ni ku hunguteka. Nkulu un’wana u te: “Hi bele vamakwerhu riqingho hi tlhela hi va endzela. Kutani hi kambele ndlela leyi mati ma onheke ha yona, xisweswo hi Musumbhunuku June 11, hi tsale xiviko lexi heleleke, hi longoloxa mavito ya lava va khumbekeke, nhlayo ya makaya lama onhakeke ni ndlela leyi ma onhakeke ha yona. Kutani hi rhumele xiviko lexi eyindlu-nkulu ya Timbhoni ta Yehovha eBrooklyn, le New York.” Endzhaku ka masiku ma nga ri mangani, rhavi ra Timbhoni ta Yehovha ra le United States ri simeke komiti ya mphalalo, leyi a yi vumbiwa hi vakulu va nhungu lava nga Vakreste, va le Houston kutani yi rhumela mali ya mphalalo. Hi wihi ntirho wa komiti leyi? A ku ri ku pfuna lava weriweke hi khombo leswaku va kota ku langutana ni xiyimo lexi ni ku lunghisa makaya lama onhakeke ya Timbhoni—makaya lama tlulaka 700!

Swirho leswa ha ku vekiwaka swa Komiti ya Mphalalo ya Timbhoni ta Yehovha ta le Houston ya 2001 swi tivutise xivutiso lexi, ‘Xana hi ta wu sungula kwihi ntirho lowukulu swonghasi?’ Swi hete tiawara to tala nivusiku swi ri karhi swi ringeta ku kunguhata ndlela leyi swi nga ta endla ntirho lowu ha yona naswona swi kombele mpfuno eka mavandlha ya Timbhoni lama tlulaka 160 ya le Houston. Mutshama-xitulu wa komiti leyi u te: “Ndlela leyi ma anguleke ha yona a yi hlamarisa swinene. Timbhoni leti tlulaka 11 000 ti nyikele nkarhi wa tona ni vuswikoti bya tona hi ku tirhandzela.”

Vatirhi A Va Fanele Va Hatlisa Hikuva Swin’wana A Swi Ta Bola

Endzhaku ka masiku ma nga ri mangani ku ve ni ndhambi, vatirhi va ku tirhandzela va sungule ku tirha emakaya lama onhakeke, va susa mimete leyi tsakamaka, va lunghisa fuloro, makhumbi lama onhakeke, tikhabodo ni minyangwa ni hinkwaswo leswi onhiweke hi mati. Mutirhi un’wana wa ku tirhandzela u te: “A hi nga karhatekanga ntsena hi ku lunghisa makaya ya vamakwerhu kambe a hi lava ku sirhelela ni rihanyo ra vona.” Tanihi leswi mfurho lowu nga ni chefu a wu ta sungula ku mila endzhaku ka mapulanga ni le ndzeni ka tikhabodo, makaya lawa a ma fanele ma fafaziwa hi mirhi hi ku hatlisa.

Timbhoni to hlayanyana ti kombele ndzetelo wo endla ntirho lowu hi ndlela leyi hlayisekeke eka Federal Emergency Management Agency (FEMA), ku nga nhlangano wa hulumendhe lowu tirhanaka ni timhangu. Endzhaku ka sweswo, Mbhoni yin’wana ni yin’wana leyi leteriweke hi nhlangano wa FEMA, yi teke khume ra vatirhi va ku tirhandzela leswaku yi ya tirha na vona emakaya lama onhakeke, laha va fikeke va dyondzisiwa ku lwa ni mfurho hi ndlela leyinene. Hi siku leri landzelaka, un’wana ni un’wana eka lava ha ku leteriwaka va khume, u teke vatirhi van’wana va khume a ya va letela. Mutirhi un’wana wa ku tirhandzela u te: “Hi masiku ma nga ri mangani, a va tele lava tivaka ntirho lowu.” Mfurho lowu a wu nga ri na vuyo hikuva vatirhi va ku tirhandzela a va ri na wona exitikini! Lava tshikeke ntirho ni vantshwa lava swikolo swa vona a swi pfarile, a va tirha ninhlikanhi. Nivusiku, vatirhi van’wana a va teka laha lava va ninhlikanhi va vekeke kona. Ku nga si hela mavhiki ya tsevu, hinkwawo makaya ya Timbhoni lawa a ma ri ni mfurho a ma basisiwile naswona ma nga ha ri na khombo.

Ntsindza Wun’we Ni Swiyenge Swa Nkombo

Hi nkarhi lowu fanaka, komiti ya mphalalo yi xave tibodo to aka makhumbi ni swilo swin’wana swa ntsandza vahlayi leswi tirhisiwaka ku aka. Kambe a va ta swi veka kwihi? Muvulavuleri wa komiti ya mphalalo u te: “Loko mufambisi wa khampani a twa hi xiphiqo xa hina, u hi pfumelele leswaku hi tirhisa guxete yakwe mahala—yona a yi ri ni ndhawu leyi ringanaka 5 000 wa timitara matlhelo hinkwawo!” Guxete yoleyo a yi nga tirhisiwi ku hlayisa nhundzu ntsena, kambe a ku endliwe ni tihofisi endzeni ka yona. Ku nga ri kungani, ntirho wa ku phalala a wu hleriwa kwalaho, naswona vatirhi va ku tirhandzela va kwalomu ka 200 ku ya eka 300, a va tirha vusiku ni nhlikanhi swin’we ni hi mahelo-vhiki.

Tanihi leswi makaya lama onhakeke a ma nga ri ndhawu yin’we, ku hlawuriwe Tiholo ta Mfumo ta nkombo leswaku ti va tindhawu ta mphalalo emigangeni yin’wana. Hi mahelo-vhiki man’wana ni man’wana, a ku pfumala vuphelo bya marhi etindhawini leti. (Vona bokisi leri nge “Laha Ntirho A Wu Endliwa Kona.”) Vo tala va vona a va tshame va tirha swin’we eku akeni ka Tiholo ta Mfumo endhawini leyi. Kahle-kahle, vatirhi va ku tirhandzela lava nga ni vuswikoti bya ku aka lava humaka eka Tikomiti to Aka ta Xifundzha ta 11 eArkansas, eLouisiana, eOklahoma, ni le Texas, va pfunile.c Eka xiyenge xin’wana ni xin’wana, vavatli, lava pendaka, lava nghenisaka tiphayiphi ni vatirhi van’wana lava nga ni vutshila a va rhangela naswona a va letela van’wana.—Vona bokisi leri nge “Minongonoko Yo Letela.”

Ku Kunguhata Ntirho Hi Khompyuta

Vatirhi va ku tirhandzela a va landzela pulani leyi a yi famba hi swiyenge swo hambana-hambana swa nkombo. Nhundzu yo aka a yi tisiwa emakaya hi mintlawa yo hambana-hambana ya mune, naswona yindlu yin’wana ni yin’wana a yi fanele yi hetiwa hi mavhiki manharhu. Hi ndlela leyi, ntirho hinkwawo wa ku phalala a wu ta hela etin’hwetini ta kwalomu ka tsevu.

Leswaku pulani leyi yi tirha, komiti yi simeke tindzawulo ta 22, ku katsa ni ndzawulo ya ku kambela ntirho, ndzawulo ya ku xava, ya byetlelo ni ya ku rhwala nhundzu. Tindzawulo hinkwato a ti pfuniwa hi rungula leri a ri kumeka eka khompyuta leri a ri nghenisiwe hi vatirhi va ku tirhandzela. Vatirhi va ku tirhandzela va hete masiku ya khume va ri karhi va nghenisa rungula leri ntirho wa ku lunghisa miako wu nga si sungula. Xiviko xin’wana xa mahungu xi ri: “A ku ri ntirho lowukulu swinene ku nghenisa rungula leri.” Kambe, endzhaku ka masiku ya khume, a ku ri ni rungula ro tala leri pfunaka. Hi ku dlokolota khompyuta, a wu swi vona leswaku vatirhi lava va 11 000 va ta kumeka rini, vutshila lebyi va nga na byona nileswaku u nga tihlanganisa njhani na vona. Loko u dlokolota nakambe, a yi ku byela leswaku ntirho wu le xiyin’weni xihi, yi ku byela ni hi maphepha ya mpfumelelo wa ku aka lama lavekaka swin’we ni vuxokoxoko byin’wana hi tindlu leti onhakeke. Rungula leri ra khompyuta a ri ri “xiphemu xa nkoka eka mphalalo lowu.”

A Va Hlamarile Naswona Va Tate Marito Yo Vonga

Tindlu leti a ti nga ri na mfurho ni leti a ti omile ti endzeriwe hi vatirhi va ku tirhandzela lava nga ni vutshila etimhakeni ta ku aka ku ya vona leswaku va fanele va endla yini ku ti lunghisa. Muvulavuleri wa vona u te: “Vatirhi lava va ku tirhandzela a va kambisisa vuxokoxoko hinkwabyo, a va hlayela hambi ku ri swipikiri leswi lavekaka. A hi nga swi lavi ku tlanga hi mali kumbe swilo leswi nyikeriweke.” Hi nkarhi lowu fanaka, vatirhi van’wana va ku tirhandzela a va kuma mapapila ya mpfumelelo wa ku aka eka valawuri va doroba.

Endzhaku ka sweswo, mindyangu leyi weriweke hi mhangu leyi a yi rhambiwa leswaku yi ta eguxete yi ta hlawula eka mimete, tikhabodo ni swilo swin’wana leswaku swi ta siva leswi onhakeke. Lava va hlaseriweke hi ndhambhi a va tsake ngopfu naswona a va tala ku rila loko va vona swilo leswi va nyikiwaka swona. Vatirhi va ku tirhandzela lava nga ni vutshila etimhakeni ta ndzindza-khombo ni ta milawu ya hulumendhe a va nyika switsundzuxo ha swona. Kutani, ku endliwe xiyimiso xa makaya lama nga ta pfuxetiwa ivi tilori ti tisa swilo leswi a swi laveka hi siku ra kona. Nuna un’wana la nga riki Mbhoni loyi kaya rakwe ri pfuxetiweke, u byele nsati wakwe la nga Mbhoni a ku: “Swa hlamarisa leswi vamakwenu va swi endlaka. Loko ku suka lava, ku nghena van’wana. Va tirha ku fana ni vusokoti!”

Ntirho wo tala wa ku pfuxeta tindlu, a wu heta mavhiki manharhu ekaya ha rin’we. Mutshama-xitulu wa komiti leyi u te: “Kambe minkarhi yin’wana, a wu heta mavhiki ya ntlhanu hambi ku ri ya nhungu.” Loko va kwamula mapulanga man’wana, vatirhi lava va ku tirhandzela a va vona ni kun’wana laha ku onhakeke khale, xisweswo a va nga swi lavi ku gongondzela mapulanga lamantshwa va nga si lunghisa laha a ku onhake khale. Mutirhi un’wana wa ku tirhandzela la nga ni vutshila eku vatleni, u te: “Minkarhi yin’wana, hi lemuke leswaku timhandzi a ti hlaseriwa hi muhlwa, kutani hi wu dlaye hinkwawo muhlwa wolowo. Hi cince timhandzi to tala. Hi siye tindlu leti ti ri exiyin’weni lexinene.” Un’wana la hlaseriweke hi ndhambhi leyi, u boxa ndlela leyi vini vo tala va tindlu teto va titweke ha yona loko hi ntsako a byela muendzi a ku: “Sweswi yindlu ya mina yi le xiyin’weni xo antswa ku tlula lexi ndzi yi xaveke yi ri eka xona!”

Swakudya A Swi Swekiwa Hi Ku Hatlisa

Leswaku vatirhi va ku tirhandzela va kuma swakudya, ntlawa wa Timbhoni wu cince yindlu ya swingolongondzwana leyi nga endzhaku ka Holo ya Mfumo leswaku yi va ndhawu yo sweka ni ku phama swakudya. Timbhoni etikweni hinkwaro ti nyikele hi swigwitsirisi, michini yo hlantswa swibya, switofu ni swingolongondzwana swin’wana swa le khixini. Hi Mugqivela ni Sonto yin’wana ni yin’wana, vamakwerhu lava swekaka va 11 ni vatirhi va ku tirhandzela va 200 a va lunghiselela swakudya swo tala ngopfu kwalaho. Loyi a a langutela khixi rero u te: “Se hi ni malembe ya 19 hi ri karhi hi sweka swakudya laha ku akiwaka Tiholo ta Mfumo, kambe ntirho lowu hi wu endleke laha a wu ri wukulu eka hinkwayo leyi hi tshameke hi yi endla.”

Swakudya leswi a hi swi pake eka swibya leswikulu swa 120. A hi swi paka emimovheni ya 60, leyi a yi swi fambisa etindhawini to hambana-hambana ni le ntsindza. Hi nkarhi lowu fanaka, ntlawa ha wun’we lowu tirhaka emutini wo karhi a wu rhumela munhu un’we ku ya landza swakudya swa vatirhi hinkwavo laha swi fikelaka kona. Vatirhi lava a va dyela kwala va tirhelaka kona, loko va heta, va tlhelela entirhweni.

Ntirho Wu Herile!

Eku heteleleni, hi April 2002, vatirhi va ku tirhandzela lava ringanaka 11 700, va hete ntirho wa mphalalo lowu tekeke nkarhi wo leha ku tlula hinkwayo leyi tshameke yi endliwa hi Timbhoni ta Yehovha. Vatirhi lava va hete tiawara leti ringanaka 1 000 000 naswona va lunghise kumbe ku pfuxelela Tiholo ta Mfumo ta nhungu ni tindlu ta 723. Un’wana wa lava weriweke hi khombo ra ndhambhi u boxe ndlela leyi ni lavan’wana vo tala va titweke ha yona, loko a vula marito lawa a ri karhi a khapa-khapa mihloti ya ku tlangela ematihlweni: “Ndzi nkhensa Yehovha ni vatirhi va ku tirhandzela hi ndlela hinkwayo leyi va hi pfuneke ha yona. Swa chavelela swinene ku va ni vamakwerhu lava nga ni rirhandzu!”

[Tinhlamuselo ta le hansi]

[Bokisi/Xifaniso lexi nga eka tluka 15]

LAHA NTIRHO A WU ENDLIWA KONA

I Mugqivela hi awara ya 7:00 nimpundzu, ndhawu hi le Xiyengeni xa Vumune en’walungu-vuxa bya Houston. Vatirhi va ku tirhandzela va le Holweni ya Mfumo va dya mabulo, va hleka, va khula kofi ni ku dya mafeti. Van’wana va fambe mpfhuka wo leha swinene ku suka emakaya leswaku va ta fika laha. Kambe hi 7:30 nimpundzu, va tshika ku dya mabulo kutani mulanguteri wa xiyenge xexo u bula na vona hi ndzimana ya Bibele. U tlhela a tivisa leswaku Dyondzo ya Xihondzo xo Rindza yi ta khomiwa hi Sonto hi 7:30 nimpundzu vatirhi va ku tirhandzela va nga si sungula mintirho ya vona, naswona u khutaza hinkwavo leswaku va hlanganyela edyondzweni hi ku hlamula hi Xinghezi kumbe hi Xipaniya. U hundzisa marungula lama humaka eyindlu-nkulu ya Timbhoni ta Yehovha, lama amukeriwaka hi ku phokoteriwa lokukulu ka mavoko.

Endzhaku ka sweswo mulanguteri wa xiyenge xexo u va byela hi leswi se swi endliwaka entirhweni lowu wo phalala kutani a va nkhensa swinene vatirhi hi moya wa vona wa ku tirhandzela. Wa vutisa: “Xana u kona laha loyi a nga tiviki lomu a nga ta tirha kona ni ntirho lowu a faneleke a wu endla?” A ku na munhu la tlakulaka voko. “Hi fanele hi dya kangani?” Hiloko mavoko ma tlakuka hi ku hatlisa, kutani ku hlekiwa. Emakumu, ka khongeriwa, kutani vatirhi va ku tirhandzela va 250—vavanuna, vavasati, lavakulu ni lavatsongo—va kongoma emintirhweni ya vona, va lunghekele siku rin’wana ro leha.

Ku endleka leswi fanaka eswiyengeni leswin’wana swa tsevu ni le guxete. Hi nkarhi lowu fanaka, vatirhi van’wana va ku tirhandzela lava tirhaka ekhixini lerikulu va karhi va sweka—phela, ninhlikanhi vatirhi va ku tirhandzela lava twaka ndlala lava tlulaka 2 000 namuntlha eHouston hinkwayo va ta va va rindzele ku kuma swakudya leswa ha kufumelaka!

[Bokisi/Xifaniso lexi nga eka tluka 16]

MINONGONOKO YO LETELA

Hi nkarhi wa mphalalo, vatirhi va ku tirhandzela lava nga ni ntokoto va dyondzise vatirhi lava nga riki na vutshila mintirho yo karhi. Van’wana va dyondzisiwe ku dlaya switsongwa-tsongwana emakaya. Van’wana va dyondzisiwe ku aka makhumbi hi tibodo ni ku nghenisa tikhabodo ta swibya. Van’wana va dyondze ku plasitela ni ku penda. Tidyondzo leti ta Vatirhi lava nga ni Vutshila ti nghenisiwe eka vhidiyo naswona tivhidiyo ta kona ti tirhisiwe ku letela vatirhi van’wana va ku tirhandzela. Xirho xa mphalalo xi ri: “Hi tidyondzo leti, hi endle ntirho wa xiyimo xa le henhla wa ku lunghisa tindlu.”

[Xifaniso]

Vavatli va ri karhi va dyondzisa van’wana

[Bokisi leri nga eka tluka 18]

“NTIRHO WA XIVIRI WA XIKWEMBU”

Xirho xin’wana xa komiti ya mphalalo xi ri: “Tikhampani ta ndzindza-khombo ti vula leswaku timhangu ta ntumbuluko i swiendlo swa Xikwembu.” Xi engetele xi ku: “Kambe, vatirhi va ku tirhandzela lava tirheke laha etin’hwetini teto hinkwato, va kombise ntirho wa xiviri wa Xikwembu. Swa hlamarisa leswi endliwaka hi vamakwerhu!” Hi nkarhi lowu wa mphalalo, vatirhi va ku tirhandzela lava fikaka eka 2 500 ni ku tlula va tile hi mahelo-vhiki va ta pfuna. Mutshama-xitulu wa komiti leyi u te: “Vatirhi volavo lava nga hakeriwiki va tshike maendzo ya ku wisa lawa a va ma kunguhatile, va cinca swiyimiso swa mindyangu ya vona ni ku cinca masiku lama a va fanele va endla swilo swin’wana swa munhu hi xiyexe leswaku va ta pfuna entirhweni lowu lowukulu swonghasi lowu endliwaka hi Timbhoni ta Yehovha.”

Ntirho lowu wu heteke nkarhi wo leha a wu lava moya wa ku tinyiketela. Mutirhi un’wana wa ku tirhandzela la seketeleke ntirho lowu ku sukela eku sunguleni ku ya emakumu a a tirha 50 wa tiawara hi vhiki entirhweni wa ku tihanyisa. Kambe, u hete tiawara ta 40 vhiki ni vhiki entirhweni wa mphalalo. U te: “Yehovha u ndzi nyike matimba. Vanhu lava a va ndzi tiva a va ndzi vutisa va ku, ‘Xana wa hakeriwa?’ A ndzi va hlamula ndzi ku, ‘Hambi wo ndzi tshembisa mali yo tala ku fikela kwihi, a ndzi nge yi amukeli leswaku ndzi tirhisa xileswi.’” Hi mahelo-vhiki, endzhaku ko tirha vhiki hinkwaro entirhweni wa ku tihanyisa, ndyangu wun’wana lowu humaka eLouisiana wu fambe timayili ta 500 [tikhilomitara ta 800] ku ya ni ku vuya laha a ku tirhiwa kona. Van’wana a va sungula loko dyambu ri tlhava va ya chayisa loko ri pela, kutani va tlhelela emakaya. Ntlawa wun’wana wa vatirhi va ku tirhandzela lava nga ni vutshila, lava fambeke tiawara ta nkombo ku ya eka ta khume, va te: “A swi fanerile hakunene.” Mutirhi un’wana wa ku tirhandzela u chayise hi 3:30 nindzhenga kutani a endla ntirho lowu wa ku tirhandzela ehofisini leyikulu ku fikela ku ba awara ya 10:00 nivusiku. Naswona a a pfuna ni hi mahelo-vhiki. U te: “Ntirho lowu wu ku endla u titwa u enerisekile.”

Kunene, vatirhi lava va ku tirhandzela ni van’wana a va tiyimisele ku pfuna hikwalaho ka rirhandzu ra vona ra vumakwerhu—ku nga rona ri kombisaka leswaku i Vakreste va xiviri. (Yohane 13:35) Endzhaku ka loko a endzele laha ntirho a wu sukela kona, meyara wa le Houston u susumeteleke ku byela ntlawa wa Timbhoni, a ku: “Mi endla leswi Xikwembu xi hi byelaka leswaku hi swi endla. Mi endla leswi ripfumelo ra n’wina ri lavaka leswaku mi swi endla.”

[Laha Xifaniso Xi Humaka Kona eka tluka 13]

NOAA

[Xifaniso lexi nga eka tluka 14, 15]

Ndhambhi yi hlasela Houston, June 9, 2001

[Xihlovo Xa Kona]

© Houston Chronicle

[Xifaniso lexi nga eka tluka 15]

Magondzo lamakulu ma hundzuka milambu

[Xifaniso lexi nga eka tluka 15]

Mati ma nghena etindlwini

[Swifaniso leswi nga eka tluka 17]

Van’wana va Timbhoni ta magidi lava hlanganyeleke entirhweni wa ku tirhandzela

[Xifaniso lexi nga eka tluka 18]

Vatirhi va le khixini va sweke swakudya leswi endlaka kotara ya miliyoni!