Vantshwa Va Vutisa . . .

Xana Xikhongelo Xi Nga Ndzi Pfuna Njhani?

“I xikhongelo lexi ndzi pfuneke leswaku ndzi tlhela ndzi hanya vutomi lebyinene.”—Brad.a

VANTSHWA vo tala va khongela—kumbexana ku tlula ndlela leyi u ehleketaka ha yona. Nkambisiso wa Vantshwa wa Gallup lowu endliweke eka vantshwa lava nga ni malembe ya13 ku ya eka 17 hi vukhale le United States wu kume leswaku 56 wa tiphesente ta vona va khongela loko va nga si dya. Nkambisiso lowu endliweke eka majaha ni tintombhi wu kombise leswaku 62 wa tiphesente ta vona va khongela siku ni siku.

Hambiswiritano, eka vantshwa vo tala, xikhongelo xo va mukhuva ntsena lowu nga vuliki nchumu. A va talanga vantshwa lava nga ni leswi Bibele yi swi vulaka ‘vutivi lebyi kongomeke bya Xikwembu.’ (Vakolosa 1:9, 10) Hikwalaho ka sweswo, Xikwembu a hi xa nkoka evuton’wini bya vona. Mukambisisi un’wana u vutise vana va kondlo-a-ndzi-dyi loko va tshame va kombela mpfuno eka Xikwembu loko va endla xiboho xa nkoka. Nhwanyana un’wana u hlamurile: “Minkarhi hinkwayo ndzi tshinela eka Xikwembu hi xikhongelo leswaku xi ndzi kongomisa ku hlawula ndlela leyinene ya vutomi.” Hambiswiritano, u pfumerile: “A ndzi tsundzuki ndzi lava nkongomiso eka xiboho xo karhi sweswi.” Kutani, a swi hlamarisi leswi vantshwa vo tala va nga tshembiki leswaku xikhongelo xi ni matimba kumbe leswaku xi nga va pfuna!

Nilokoswiritano, ku fana na Brad loyi a boxiweke eku sunguleni, vantshwa vo tala va swi vonile leswaku xikhongelo xi ni matimba. Na wena u nga swi vona! Xihloko lexi hundzeke xi kombise xivangelo lexi endlaka leswaku hi va ni ntshembo wa leswaku Xikwembu xi ta swi twa swikhongelo swa hina.b Xivutiso lexi tlakukaka sweswi hi lexi nge, Xana xikhongelo xi nga ku pfuna njhani? A hi sunguleni hi ku kambisisa ndlela leyi Xikwembu xi hlamulaka swikhongelo swa hina ha yona.

Ndlela Leyi Xikwembu Xi Hlamulaka Swikhongelo Ha Yona

Eminkarhini ya Bibele vanhu van’wana va ripfumelo va hlamuriwe swikhongelo swa vona hi ku kongoma—hambi ku ri hi masingita. Hi xikombiso, loko Hosi Hezekiya a xiye leswaku u vabyela ku fa, u kombele Xikwembu leswaku xi n’wi ponisa. Xikwembu xi hlamurile: “Xikhongelo xa wena ndzi xi twile. Mihloti ya wena ndzi yi vonile. Waswivo, ndza ku tshungula.” (2 Tihosi 20:1-6) Vavanuna ni vavasati van’wana lava chavaka Xikwembu na vona va pfuniwe hi Xikwembu.—1 Samuwele 1:1-20; Daniyele 10:2-12; Mintirho 4:24-31; 10:1-7.

Hambiswiritano, Xikwembu a xi nga tali ku nghenelela, hambi ku ri eminkarhini ya Bibele. Ku tlula kwalaho, Xikwembu xi hlamule swikhongelo swa malandza ya xona, ku nga ri hi singita, kambe hi ku va pfuna leswaku va “tala vutivi lebyi kongomeke bya ku rhandza ka xona hi vutlhari hinkwabyo ni ku twisisa ka moya.” (Vakolosa 1:9, 10) Ina, Xikwembu xi pfune vanhu va xona hi ku va tiyisa hi tlhelo ra moya ni ku va nyika matimba—xi va nyika vutlharhi ni vutivi leswaku va endla swiboho swa vutlharhi. Loko Vakreste va ri exiyin’weni lexo nonon’hwa, Xikwembu a xi wu susanga ndzingo. Ematshan’weni ya sweswo, xi va nyike “matimba lama tlulaka lama tolovelekeke” leswaku va tiyisela!—2 Vakorinto 4:7; 2 Timotiya 4:17.

Hilaha ku fanaka namuntlha, nhlamulo ya xikhongelo xa wena a yi nge katsi swilo swa xiviri. Kambe, hilaha xi endleke hakona eku sunguleni, Xikwembu xi nga ku nyika moya wa xona lowo kwetsima ni ku ku tiyisa leswaku u kota ku hlangavetana ni xiyimo xin’wana ni xin’wana. (Vagalatiya 5:22, 23) Hi xikombiso, a hi kambisiseni tindlela ta mune leti xikhongelo xi nga hi pfunaka eka tona.

Xa Pfuna Ku Endla Swiboho

Karen a a gangisana ni jaha leri a ri vonaka ri ri ni tipakani letinene ngopfu ta moya. U ri: “Minkarhi hinkwayo a a ndzi byela leswaku u lava ku va nkulu evandleni.” Leswi a swi twala swi ri leswinene. Kambe “a a vulavula ngopfu ni hi bindzu leri a a ri sungula ni swilo hinkwaswo leswi a a ta ndzi xavela swona. Ndzi sungule ku ka ndzi nga ha n’wi tshembi.” Karen u khongerile hi mhaka leyi. “Ndzi kombele Yehovha leswaku a ndzi pfula mahlo ni ku ndzi komba leswi ndzi faneleke ndzi swi tiva ha yena.”

Minkarhi yin’wana ku khongela swa pfuna, tanihi leswi swi nga ku pfunaka ku yima u ehleketa hi ku ya hi mavonelo ya Yehovha. Kambe Karen a a lava nkongomiso lowu nga n’wi pfunaka. Xana a a ta hlamuriwa hi ndlela ya singita? Xiya mhaka ya le Bibeleni malunghana na Hosi Davhida. Loko a lemuke leswaku munghana wakwe loyi a n’wi tshembaka Ahitofele a a pfuna Absalomu n’wana wakwe lowa muxengi, Davhida u khongerile: “Oho Yehovha, ndzi kombela u hundzula kungu ra Ahitofele ri va vuphukuphuku!” (2 Samuwele 15:31) Kambe Davhida na yena u endle hi ku pfumelelana ni xikhongelo xakwe. U nyike munghana wakwe Huxayi ntirho lowu: “Kutani u ta ndzi pfilunganyela kungu ra Ahitofele.” (2 Samuwele 15:34) Hilaha ku fanaka, Karen u endle hi ku pfumelelana ni xikhongelo xakwe hi ku vulavula ni nkulu la wupfeke wa Mukreste loyi a a tiva jaha leri a a rhandzana na rona. U n’wi tiyisile eka ku chava kakwe: Jaha leri a a rhandzana na rona a ri nga endli nhluvuko hi tlhelo ra moya.

Karen u ri: “Xiyimo xexo xi ndzi kombise kahle matimba ya xikhongelo.” Lexi vavisaka, jaha leriya a a rhandzana na rona ri hlongorise rifuwo ivi ri tshika ku tirhela Xikwembu. Karen u ri: “Loko a ndzi lo tekana na rona, a ndzi ta ya eminhlanganweni ya Vukreste ndzi ri ndzexe.” Xikhongelo xi pfune Karen leswaku a endla xiboho lexinene.

Xi Nga Ku Pfuna Leswaku U Lawula Mintlhaveko Ya Wena

Bibele yi vula leswi eka Swivuriso 29:11: “Xihunguki xi humesa moya wa xona hinkwawo, kambe lowo tlhariha u tshama a rhulile ku fika emakumu.” Xiphiqo lexi hi nga langutana na xona, hi leswaku vanhu vo tala namuntlha va tshama va tshikilelekile emintlhavekweni naswona hakanyingi va tsandzeka ku tikhoma—minkarhi yin’wana ku va ni vuyelo lebyi nga ni khombo. Brian lontsongo wa tsundzuka: “A ndzi tshamela ku tlulana milenge ni mutirhi-kulorhi. Siku rin’wana u humese mukwana.” Xana a wu ta va u endle yini? Brian u khongerile. U ri: “Yehovha u ndzi pfunile leswaku ndzi nga lwi, naswona ndzi vulavule ni mutirhi-kulorhi leswaku a nga wu tirhisi. U cukumete mukwana ivi a famba.” Brian u pfunekile leswaku a nga hlundzuki hi ku lawula mintlhaveko yakwe, kumbexana hi swona swi poniseke vutomi byakwe.

Hakanyingi a wu nge tikumi u kombeteriwe hi mukwana. Kambe ku ni swiyimo swo tala evuton’wini bya wena leswi nga ta lava leswaku u lawula mintlhaveko ya wena. Xikhongelo xi nga ku pfuna leswaku u tshama u rhurile.

Xi Nga Ku Pfuna Loko U Ri Ni Gome

Barbara u tsundzuka “nkarhi wun’wana lowu a nga tshama a langutana ni ndzingo” emalembeni lama hundzeke. U ri: “Entirhweni wanga, endyangwini, eka vanghana—hinkwaswo a swi famba ximatsi. A ndzi nga tivi leswaku ndzi nga endla yini.” Hi ku hatlisa Barbara u kombele mpfuno hi xikhongelo. Kambe a ku ri ni xiphiqo. U ri: “A ndzi nga xi tivi lexi ndzi nga xi kombelaka eka Yehovha. Eku heteleleni ndzi kombele leswaku ndzi va ni ku rhula ka mianakanyo. A ndzi kombela madyambu man’wana ni man’wana leswaku a ndzi pfuna leswaku ndzi nga vileli ha nchumu.”

Xana xikhongelo xexo xi n’wi pfune njhani? U ri: “Endzhaku ka masiku ma nga ri mangani, ndzi swi xiyile leswaku hambileswi swiphiqo swa mina a swa ha ri kona, a swi nga ha ndzi lawuli kumbe ku ndzi karhata.” Bibele ya tshembisa: “Tivisani Xikwembu swikombelo swa n’wina, kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”—Vafilipiya 4:6, 7.

Xikhongelo Xi Nga Ku Pfuna Leswaku U Tshinela Ekusuhi Ni Xikwembu

Xiya ntokoto wa muntshwa la vuriwaka Paul. U ri: “A ndza ha ku rhurha ndzi ya tshama ni maxaka ya ka hina. Siku rin’wana nimadyambu ndzi tikume ndzi ri ni gome lerikulu. Ndza ha ku thwasa exikolweni xa le henhla naswona ndzi tsundzuka vanghana va mina hinkwavo. Ndzi hume mihloti madyambu wolawo loko ndzi ehleketa minkarhi leyi a hi tiphina ha yona swin’we.” Xana Paul a a ta endla yini? A ku ri ro sungula a khongela hi mbilu hinkwayo. U ri: “Ndzi pfule mbilu ya mina ivi ndzi kombela Yehovha leswaku a ndzi tiyisa ni ku ndzi ha ku rhula ka mianakanyo.”

Vuyelo byi ve byihi? Paul u ri: “Mixo lowu landzelaka, loko ndzi pfuka a ndzi titwa ndzi ntshunxekile ku tlula hambi ku ri rini evuton’wini bya mina. Ndzi cince xiyimo xa mina xa mianakanyo lexi a ndzi ri eka xona xa gome kutani ndzi va ni ‘ku rhula ka Xikwembu loku tlulaka mianakanyo hinkwayo.’” Leswi se mbilu yakwe a yi rhurile, Paul a a swi kota ku languta timhaka a nga susumetiwi ngopfu hi mintlhaveko. Naswona hi ku hatlisa u swi xiyile leswaku ‘minkarhi liya ya khale’ a yi nga ri yinene nkarhi hinkwawo. (Eklesiasta 7:10) Entiyisweni, “vanghana” lava a a va tsundzuka ngopfu a va nga ri na nkucetelo lowunene eka yena.

Xa nkoka ngopfu, Paul u tokote nkhathalelo wa Yehovha hi ku kongoma. U vone ntiyiso wa marito ya Yakobo 4:8, lama nge: “Tshinelani eka Xikwembu, kutani xi ta tshinela eka n’wina.” Loku a ku ri ku cinca lokukulu eka Paul. U susumeteleke ku rhangisa Yehovha eka swilo hinkwaswo evuton’wini byakwe ni ku nyiketela vutomi byakwe eka yena.

Vulavula Ni Xikwembu!

Mintokoto leyi ya xiviri yi nyikela xitiyisekiso xa leswaku xikhongelo xi nga ku pfuna. Ina, leswi swi tano ntsena loko u tiyimisele ku tiva Xikwembu, ku hlakulela vunghana na xona. Khombo ra kona, vantshwa vo tala a va endli tano. Carissa u kuriseriwe endyangwini wa Vakreste. Kambe wa pfumela: “Ndzi ehleketa leswaku ndzi twisise nkoka wa vuxaka byo hlawuleka bya hina na Yehovha emalembeni ma nga ri mangani lama hundzeke.” Brad, loyi a boxiweke eku sunguleni, u kurisiwe tanihi Mukreste kambe u fularhele vugandzeri bya ntiyiso malembe yo hlayanyana. U ri: “Ndzi hundzukele eka Yehovha loko ndzi vona leswi ndzi lahlekeleke. Sweswi ndza swi tiva leswaku vutomi a byi na xikongomelo xa nchumu loko ndzi nga ri na byona vuxaka byebyo.”

Hambiswiritano, u nga rindzi khombo ri ku wela u nga si tshinela ekusuhi ni Xikwembu. Sungula ku vulavula na xona sweswi—nkarhi hinkwawo! (Luka 11:9-13) ‘Chulula mbilu ya wena emahlweni ka xona.’ (Pisalema 62:8) Ku nga ri khale u ta swi vona leswaku xikhongelo xi nga ku pfuna hakunene!

[Tinhlamuselo ta le hansi]

[Bokisi/Swifaniso leswi nga eka tluka 25]

Xikhongelo Xi Nga Ku Pfuna

● Ku endla swiboho swo antswa

● Ku tshama u rhurile hi minkarhi ya ntshikilelo

● Leswaku u nga karhateki

● Ku tshinela ekusuhi ni Xikwembu