Xana Xikwembu Xa Ku Yingisa Loko U Khongela?

MULAWURI-NKULU hi yena a bohaka leswaku mhaka yi ta tameriwa hi van’wana kumbe yi tameriwa hi yena hi yexe. Hi laha ku fanaka, Mufumi Lonkulu wa vuako hinkwabyo wa hlawula leswaku u fanele a nghenelela ku fikela kwihi eka mhaka yin’wana ni yin’wana. Matsalwa ma dyondzisa leswaku Xikwembu xi hlawule ku tinghenisa hi xoxe eswikhongelweni swa hina ivi xi hi kongomisa leswaku hi swi byela xona.—Psalma 66:19; 69:13.

Nhlawulo wa Xikwembu emhakeni leyi wu paluxa ku tsakela ka xona swikhongelo swa malandza ya xona. Ematshan’wini yo heta vanhu va xona matimba leswaku va xi byela leswi va nga na swona ni leswi va karhataka, xa va khongotela, xi ku: “Mi nga tshiki ku khongela,” “mi chivirika eku khongeleni,” “nyiketa Yehova e timhaka ta wena,” “rhulani ku karhateka hinkwako ka n’wina eka [Xikwembu].”—1 Vatesalonika 5:17; Varhoma 12:12; Psalma 55:22; 1 Petro 5:7.

Loko Xikwembu a xi nga swi lavi ku yingisela swikhongelo swa malandza ya xona, a xi ta va xi nga yi endlanga ndlela yo tano yo ya eka xona xi tlhela xi khutaza leswaku yi tirhisiwa mahala. Hikokwalaho, nhlawulo lowu wa Xikwembu leswaku vanhu va xona va kota ku xi tshinelela, i xivangelo xin’wana xo tiyiseka leswaku xa yingisa hakunene. Ina, xa swi yingisa swikhongelo swin’wana ni swin’wana swa malandza ya xona.

A hi fanelanga hi honisa mhaka ya leswaku Bibele yi swi veka erivaleni leswaku Xikwembu xa swi yingisa swikhongelo. Hi xikombiso, muapostola Yohane wa tsala: “Ku tshemba loku hi nga na kona emahlweni ka Xikwembu, hileswaku loko hi kombela xilo xihi na xihi hilaha hi rhandzaka hakona, xa hi twa.” (1 Yohane 5:14) Hosi Davhida u vule leswaku Yehova Xikwembu hi loyi a “Yingisaka mikhongelo” kutani u vurile hi ntshembo, a ku: “[Xi] yingisa rito ra mina.”—Psalma 55:17; 65:2.

Kutani tanihi leswi xiendlo xo khongela handle ko kanakana xi vuyerisaka, Matsalwa ya kombisa leswaku ku katseka swo tala ngopfu loko munhu wo lulama a khongela. Ku na un’wana la yingiselaka. Muyingiseri yoloye i Xikwembu.—Yakobo 5:16-18.

Swikhongelo Leswi Twiweke

Bibele yi tele hi timhaka ta vanhu lava swikhongelo swa vona entiyisweni swi twiweke swi tlhela swi hlamuriwa hi Xikwembu. Mintokoto ya vona yi tiyisa kahle leswaku mimpfuno ya xikhongelo yo hlela ni ku phofula mianakanyo ya wena a yi pfuni ku tshungula ntsena. Yi tlula matshalatshala ya munhu hi yexe hi ku pfumelelana ni swikhongelo swa yena.

Hi xikombiso, Hosi Davhida loko a langutane ni xikhiri xa Abixalomu loko a lava ku teka vuhosi bya Israyele, Hosi Davhida u khongerile: “Yehova, wa nga hunḍuluša makungu ya Akitofel [mutsundzuxi wa Abixalomu]!” A ku nga ri xikombelo lexitsongo, tanihi leswi “timhaka le’ti v̌uriwaka i Akitofel a ti ringanisiwa ni rito ra Šikwembu. A ŝi ri tano ni makungu hikwawo ya Akitofel.” Endzhakunyana Abixalomu u ale kungu leri ringanyetiweke hi Akitofele ro teka vuhosi bya Hosi Davhida. Ha yini? “Yehova a a kanerile ku onha makungu la’manene ya Akitofel, leŝaku khombo ri tela Abšalom.” Swi le rivaleni leswaku, xikhongelo xa Davhida xi twiwile.—2 Samuel 15:31; 16:23; 17:14.

Hi laha ku fanaka, Hezekiya u horile endzhaku ka loko a komberile eka Xikwembu leswaku xi n’wi pfuna evuvabyini bya yena lebyi a byi nga holi. Xana leswi a a swi ri vuyelo bya mianakanyo ntsena eka Hezekiya hikwalaho ka leswi a nga khongela? Doo, nikantsongo! Rungula ra Yehova leri yaka eka Hezekiya, hi laha ri nyikeriweke ha kona hi muprofeta Esaya, a a ri ku: “Nḍi yingisile šikhongelo ša wena, nḍi v̌onile mihloti ya wena, nḍi ta ku hanyisa.”—2 Tihosi 20:1-6.

Daniyele, loyi xikhongelo xa yena xi hlamuriweke endzhaku ka nkarhi wo tlula lowu a nga ha vaka a wu languterile, u tshembisiwile hi ntsumi ya Yehova: “Marito ya wena ma yingisiwile.” Swikhongelo swa van’wana, swo tanihi swa Hana, vadyondzisiwa va Yesu ni swa ndhuna ya nyimpi Korneliyo, swi hlamuriwe hi tindlela leti nga riki ta vuswikoti bya munhu ntsena. Hikokwalaho, Bibele yi dyondzisa kahle leswaku swikhongelo leswi pfumelelanaka ni ku rhandza ka Xikwembu swa amukeriwa, swa twiwa ni ku hlamuriwa hi Xikwembu.—Daniel 10:2-14; 1 Samuel 1:1-20; Mintirho 4:24-31; 10:1-7.

Kambe Xikwembu xi swi hlamula njhani swikhongelo swa malandza ya xona lama tshembekaka namuntlha?

Tinhlamulo Ta Swikhongelo

Swikhongelo leswi tshahiweke laha henhla swi hlamuriwe hi tindlela leti hlamarisaka, ni ta mahlori. Hambi swi ri tano, tsundzuka leswaku hambi ku ri eminkarhini ya Bibele, tinhlamulo ta swikhongelo ta xihatla swinene a ti nga xiyiwi hi ku olova. Hi mhaka ya leswi a ti fambelana ni ku tiyisiwa hi tlhelo ra mahanyelo ni ku tsundzuxiwa, ti endla leswaku malandza ya Xikwembu ma swi kota ku hlayisa ndlela yo lulama. Ngopfu-ngopfu eka Vakriste, tinhlamulo ta swikhongelo swa vona a ti katsa timhaka leti hakanyingi a a ti ri ta moya, hayi leti vhumbiwaka kumbe swiendlo swa matimba.—Vakolosa 1:9.

Hikwalaho u nga heli matimba loko swikhongelo swa wena swi nga hambi swi hlamuriwa hi ndlela leyi u yi languteleke kumbe hi ndlela leyi u rhandzaka ha yona. Hi xikombiso, ematshan’wini yo susa ndzingo, Xikwembu xi nga ha hlawula ku ku nyika ‘matimba lamakulu, lama tlulaka lama tolovelekeke’ leswaku u tiyisela. (2 Vakorinto 4:7; 2 Timotiya 4:17) A hi fanelanga hi honisa nkoka wa matimba yo tano, kumbe hi gimeta hi leswaku Yehova a nga swi hlamulanga swikhongelo swa hina nikatsongo.

Xiya mhaka ya N’wana wa Xikwembu, Yesu Kriste. Hi ku khumbeka hi leswaku a nga fi tanihi musandzi wa le rivaleni, Yesu u khongerile: “Tatana, loko u swi rhandza, xinwelo lexi xi tshinete kule na mina!” Xana xikhongelo lexi xi yingisiwe kahle hi Xikwembu? Ina, hi laha swi tiyisiwaka ha kona eka Vaheveru 5:7. Yehova a nga n’wi pfunanga N’wana wa yena eka xilaveko xa leswaku a fa emhandzini ya nxaniso. Ematshan’wini ya sweswo, “ntsumi yo huma etilweni yi humelel[e] eka yena, yi n’wi tiyisa.”—Luka 22:42, 43.

Xana i nhlamulo leyi hlamarisaka, ya hlori? Eka un’wana ni un’wana wa hina, yi tano hakunene! Kambe eka Yehova Xikwembu, xihlovo xa matimba yo tano, a a ku nga ri hlori. Evuton’wini bya yena byo sungula etilweni, Yesu a a tolovelane ni swiendlakalo leswi hundzeke laha tintsumi a ti humelela evanhwini. Kutani nghohe ya ntsumi a yi nga ta n’wi hlamarisa ku fana na hina. Hambi swi ri tano, ntsumi leyi, leyi handle ko kanakana Yesu a a yi tiva ku sukela eka vukona bya Yena a nga si va munhu, yi N’wi tiyisile endzingweni lowu a wu ta.

Loko a hlamula swikhongelo swa malandza ya yena lama tshembekaka namuntlha, Yehova minkarhi hinkwayo u nyikela matimba lama lavekaka yo tiyisela. Mpfuno lowu wu nga ha ta hi xikhutazo lexi humaka eka vagandzeri-kulorhi lava hi hlanganaka na vona. Xana u kona loyi a nga alaka xikhutazo xexo, kumbe xana hi gimeta hi leswaku leswi malandza-kulorhi ma nga yi vonangiki miringo leyi fanaka ni ya hina, a ma nge swi koti ku hi tiyisa? Yesu a a ta va a ve ni langutelo rero eka ntsumi leyi humeleleke eka yena. Ku ri na sweswo, u amukele xikhutazo xexo tanihi nhlamulo ya Yehova ya xikhongelo xa yena, kutani u swi kotile ku hetisisa ku rhandza ka Tata wa yena hi ku tshembeka. Na hina hi fanele ku ma amukela hi malwandla matimba lawa Xikwembu xi hi nyikaka wona loko xi hlamula swikhongelo swa hina. Nakambe, tsundzuka leswaku minkarhi yoleyo yo tiyisela hi ku lehisa mbilu hakanyingi yi landzeriwa hi mikateko leyikulu.—Eklesiasta 11:6; Yakobo 5:11.

Tiyiseka Leswaku Xikwembu Xa Yingisa

U nga lahli ntshembo wa leswaku xikhongelo xa tirha loko u nga hlamuriwi xikan’we-kan’we. Tinhlamulo ta swikhongelo swin’wana, tanihi swa leswaku munhu hi yexe a pfuneka emaxangwini kumbe a va ni vutihlamuleri lebyi engetelekeke entirhweni wa yena wa Xikwembu, ti nga ha boheka ku rindzela nkarhi lowu Xikwembu xi tivaka leswaku wu lulamile naswona i wunene. (Luka 18:7, 8; 1 Petro 5:6) Loko u khongela malunghana ni mhaka leyi ku khumbaka hi vuenti, kombisa Xikwembu hi ku phikelela ka wena leswaku ku navela ka wena kukulu, nsusumeto wa wena wu tengile naswona i wa xiviri. Yakobo u kombise moya lowu endzhaku ko lwa ni ntsumi hi matimba, nkarhinyana, loko a ku: “Nḍi nga ka nḍi nga ku ṭhiki u famba, u nga si nḍi katekisa.” (Genesa 32:24-32) Hi fanele hi va ni ntshembo lowu fanaka wa leswaku loko hi hambeta hi kombela hi ta kuma nkateko hi nkarhi wa kona.—Luka 11:9.

Yinhla yin’wana yo hetelela. Ku kuma ndleve leyi yingisaka ya Hosi ya vuako hinkwabyo i lunghelo ra risima. Hi ku ya hi leswi, xana hi yingisa hi vukheta loko Yehova Xikwembu a hi byela swilaveko swa yena, hi ku tirhisa Rito ra yena? Tanihi leswi swikhongelo swa hina swi hi tshinetaka ekusuhi swinene ni Muvumbi wa hina, hi fanele hi swi yingisa hi vukheta hinkwaswo leswi a hi byelaka swona.

[Xifaniso lexi nga eka tluka 6]

Xikwembu xi yingisa swikhongelo. Xana ha xi yingisa hi Rito ra xona?