Ntshembo Eka Lava Khomiweke Hi Vuvabyi Bya Mahlangano

“VUVABYI bya mahlangano a byi dlayi ngopfu ku fana ni vuvabyi bya mbilu ni bya khensa,” hi ku vula ka Dok. Fatima Mili, “kambe byi endla leswaku munhu a nga byi tsakeli vutomi.” Vuvabyi bya mahlangano byi nga kavanyeta vutomi bya munhu. Hi swihi swiphiqo swin’wana leswi welaka vanhu lava khomiweke hi vuvabyi bya mahlangano? Xana va nga swi kota ku langutana na swona?

Katia,a wa le Italiya, la nga ni malembe ya 28 hi vukhale, u ri: “Ku sukela loko ndzi kumeke ndzi ri ni vuvabyi bya mahlangano loko ndzi ri ni malembe ya 20, vutomi bya mina hinkwabyo byi cincile. Ndzi boheke ku tshika ntirho swin’we ni vutirheli bya nkarhi hinkwawo hikwalaho ka ku twa ku vava.” Vanhu hinkwawo lava khomiweke hi vuvabyi bya mahlangano va twa ku vava. Alan wa le Nghilandhi, la nga ni malembe ya 63 hi vukhale, u ri: “Miri wa wena hinkwawo wu tshama wu ri karhi wu vava, hambileswi minkarhi yin’wana wu nga vaviki ngopfu.” Ntlhontlho wun’wana i wa mafidzula. Sarah, la nga ni malembe ya 21 hi vukhale, u ri: “Hambiloko wo tiyisela ku vava loku ni ku pfimba, u khoma xo tika hikwalaho ko karhala.”

Ku Vaviseka eMintlhavekweni

Hi ku ya hi Setsuko wa le Japani, la nga ni malembe ya 61 hi vukhale, ku lwisana ni vuvabyi lebyi hambetaka siku ni siku swi nga ha “ku karharisa emintlhavekweni ni le miehleketweni.” Phela, ku tlakula xo tsala kumbe riqingho swi nga ha va ntirho lowukulu! Kazumi, la nga ni malembe ya 47, u ri: “Ndzi tsandzeka ni ku endla swilo leswi nga endliwaka hi n’wana.” Janice, la nga ni malembe ya 60 hi vukhale, loyi a nga ha swi kotiki ku yima nkarhi wo leha, u ri: “Swi twisa ku vava hikuva a ndza ha swi koti ku endla ni leswi a ndzi tolovele ku swi endla.”

Xiyimo xo tano xi nga endla leswaku munhu a pfilunganyeka naswona a nga ha tirhandzi. Gaku, i Mbhoni ya Yehovha leyi nga ni malembe ya 27 hi vukhale, u ri: “Leswi ndzi nga swi kotiki ku hlanganyela hi vutalo entirhweni wa vuevhangeli naswona ndzi nga swi kotiki ku endla swiavelo swa le vandlheni, ndzi tivona ndzi nga pfuni nchumu.” Francesca, loyi a khomeke hi vuvabyi bya mahlangano ku sukela loko a ri ni malembe mambirhi, u vula leswaku “u lo ndzondzoo, egomeni lerikulu.” Gome ro tano ri nga ha ku horisa emoyeni. Joyce, Mbhoni ya le Afrika Dzonga, u vula leswaku u sungule ku xwa eminhlanganweni ya Vukreste. Wa hlamusela: “A ndzi nga ri na ntiya-nhlana wo langutana ni vanhu.”

Nakambe muvabyi a nga ha vilela swinene hi vumundzuku bya yena—a chavisiwa hi leswaku a nge he swi koti ku famba kutani swi boha leswaku a titshega hi van’wana, a nga ha chava ku tikuma a nga ri na muhlayisi, a nga ha chava leswaku u ta wa a tshoveka, a nga ha chavisiwa hileswaku a nge he koti ku khathalela ndyangu wakwe. Yoko, la nga ni malembe ya 52, u ri: “Loko ndzi tivona ndzi khwanyana swirho, a ndzi chava swinene, ndzi anakanya leswaku swi ta ya swi khwanyana ngopfu.”

Swirho swa ndyangu na swona swi nga ha va ni gome, loko swi langutana ni murhandziwa wa swona la xanisekaka. Vatekani van’wana va nga ha tikeriwa evukatini bya vona. Wansati la vitaniwaka Denise, wa le Nghilandhi, u ri: “Endzhaku ka malembe ya 15 hi tekanile, nuna wa mina u te, ‘A ndza ha swi koti ku tiyiselela vuvabyi bya wena bya mahlangano!’ Hiloko a ndzi siya mina ni n’wana wa hina la nga ni malembe ya ntlhanu.”

Xisweswo, vuvabyi bya mahlangano byi tisa ntlhontlho lowukulu eka lava byi va khomeke swin’we ni le ka mindyangu ya vona. Nilokoswiritano, vo tala va swi kota ku langutana na byona hilaha ku humelelaka! A hi voneni ndlela leyi van’wana va swi endlisaka xiswona.

Tiva Swipimelo Swa Wena

Loko u khomiwe hi vuvabyi bya mahlangano, i swa nkoka leswaku u wisa kahle, sweswo swi nga hunguta mafidzula. Kambe, leswi a swi vuli swona leswaku u fanele u lan’wa vutomi. Timothy wa hlamusela: “U fanele u tshama u ri karhi u gingiriteka leswaku u nga ta tshamela ku ehleketa hi vuvabyi lebyi, hikuva loko u nga gingiriteki, u ta tshama u yingisela ku vava loku.” William Ginsburg, mutivi wa sayense ya marhambu, wa le Tliliniki ya Mayo, u ri: “Swa tika ku vona ku hambana loku nga kona exikarhi ka vulolo ni ku gingiriteka ngopfu. Minkarhi yin’wana vanhu va boheka ku tsundzuxiwa leswaku va wisa, va tiyingisa emavabyini ya vona.”

Leswi swi nga ha lava u cinca ndlela leyi u langutaka swipimelo swa wena ha yona. Daphne, wa le Afrika Dzonga, u ri: “Ndzi boheke ku langutana ni ntiyiso, ndzi pfumela leswaku a ndzi nge he swi koti ku endla swo karhi; a ndzi boheka ku swi endla hakatsongo-tsongo. Ematshan’weni ya ku karhateka kumbe ku pfilunganyeka, ndzi endla switsongo hakatsongo-tsongo.”

Nakambe i swinene leswaku u tiva switirhisiwa leswi nga ku pfunaka, kumbexana u bula ni dokodela wa wena ha swona. Keiko u ri: “Hi nghenise lifiti ya le switepisini. A ndzi tivavisa enhlaneni loko ndzi pfula nyangwa, kutani hi cince xikhomo xo pfula ha xona. Sweswi ndza swi kota ku pfula tinyangwa hinkwato hi ku ti chovha hi nhloko. Hi hoxe tiphayiphi ta mati leti pfulekaka hi ku olova endlwini hinkwayo leswaku ndzi ta swi kota ku endla mintirho yo karhi ya le ndlwini.” Gail, loyi na yena a khomiweke hi vuvabyi bya mahlangano u ri: “Swilotlelo swa movha wa mina ni swa yindlu swi tlhomiwe eka nhonga yo leha, leswi endlaka leswaku swi ndzi olovela ku swi ndzuluta. Xikamu ni burachi ra mina swi ni swikhomo swo leha, naswona ndzi nga swi khoma hi tindlela to hambana-hambana loko ndzi tikama kumbe ndzi tiburacha.”

Nseketelo Wa Ndyangu —“Khokholo Ra Matimba”

Carla, wa le Brazil, u ri: “Nuna wa mina u ndzi seketele hi ndlela ya nkoka. Swi ndzi nyike xivindzi leswi a a famba na mina loko ndzi ya eka dokodela. Hi swi kume hi ri vambirhi leswaku vuvabyi lebyi byi wu khumba njhani miri wa mina, swikombiso swa byona swin’we ni vutshunguri lebyi ndzi nga byi tirhisaka. Ndzi titwe ndzi antswa hikuva a a swi twisisa leswi ndzi langutaneke na swona.” Ina, vavanuna kumbe vavasati lava va swi amukelaka leswaku vanghana va vona va vukati a va nge he swi koti ku endla swo karhi naswona va tiyimiseleke ku byi tiva kahle vuvabyi bya vanghana va vona va nga ha va xihlovo lexikulu xa matimba ni nseketelo.

Hi xikombiso, Bette, u sungule swikoropo swa ku basisa loko vuvabyi bya nuna wakwe bya mahlangano byi n’wi sindzise leswaku a nga ha tirhi tiawara hinkwato entirhweni wakwe wa ku aka. Nuna wa Kazumi a a nga n’wi ongoli ntsena, kambe a a tlhela a endla mintirho yin’wana ya le kaya leyi nsati wakwe a a nga ha swi koti ku yi endla. Nakambe, u dyondzise ni vana vakwe ku endla hinkwaswo leswi va nga swi kotaka leswaku va pfuna. Kazumi u ri: “Nuna wa mina u ve khokholo ra matimba. Handle ka mpfuno wakwe, a ndzi ta va ndzi ri exiyin’weni xo biha swinene.”

Wansati la vuriwaka Carol, wa le Australia u nyikela xilemukiso lexi: “Tivonele leswaku u nga endli mintirho yo tala ngopfu. Ndzi titwa ndzi nga pfuni nchumu loko ndzi nga swi koti ku endla leswi a ndzi swi endla eku sunguleni laha ndyangwini.” Loko ndyangu wu sekele munhu la vabyaka hi ndlela ya ku kombisa leswaku wa xi twisisa xiyimo xakwe naswona wa n’wi twela, nseketelo wolowo wu nga va khokholo ra matimba eka lava va vabyaka.

Mpfuno Wa Moya

Katia u ri: “Loko munhu a khomiwe hi vuvabyi byo fana ni lebyi, u vona onge a nga kona ni un’we la twisisaka xiyimo lexi a nga eka xona. Xisweswo, i swa nkoka leswaku a hundzukela eka Yehovha Xikwembu, hi ku tiva leswaku u swi twisisa kahle leswaku hi titwisa ku yini emirini ni le mintlhavekweni. (Pisalema 31:7) Hikwalaho ka leswi ndzi nga ni vuxaka lebyinene na yena, u ndzi nyike ku rhula ka mianakanyo leswaku ndzi swi kota ku langutana ni vuvabyi bya mina.” Hilaha ku faneleke, Bibele yi vitana Yehovha leswaku i “Xikwembu xa nchavelelo hinkwawo, lexi hi chavelelaka enhlomulweni wa hina hinkwawo.”—2 Vakorinto 1:3, 4.

Hikwalaho, xikhongelo xi nga va xihlovo lexikulu xa nchavelelo eka vanhu lava twaka ku vava lokukulu. Kazumi u ri: “Nivusiku loko ndzi tsandzeka ku etlela hikwalaho ka ku twa ku vava, ndzi phofule leswi nga embilwini ya mina eka Yehovha ndzi ri karhi ndzi rila, ndzi n’wi kombela leswaku a ndzi nyika matimba ya ku tiyiselela ku vava loku ndzi ku twaka swin’we ni vutlhari bya ku langutana ni swiphiqo swa mina hinkwaswo. Kunene Yehovha u ndzi hlamurile.” Francesca na yena u kume nseketelo wa Xikwembu wa rirhandzu. U ri: “Ndzi vone ku hetiseka ka marito ya Vafilipiya 4:13: ‘Eka swilo hinkwaswo ndzi ni ntamu hikwalaho ka loyi a ndzi nyikaka matimba.’”

Hakanyingi, Yehovha Xikwembu wa hi seketela hi ku tirhisa vandlha ra Vukreste. Hi xikombiso, Gail u hlamusela hi mpfuno lowu a wu kumeke eka vamakwavo va moya va le vandlheni ra kwalaho ra Timbhoni ta Yehovha. Gail u ri: “Rirhandzu ra vona ri ndzi pfunile leswaku ndzi nga khomiwi hi gome.” Hi ku pfumelelana ni marito lawa, loko Keiko a tlhandlekiwa xivutiso lexi nge, “Xana xi kona evuton’wini lexi tshameke xi ku tsakisa lexi u xi tsundzukaka?,” u hlamule a ku: “Ina, ndzi tsundzuka rirhandzu ni ntwela-vusiwana hinkwawo lowu un’wana ni un’wana a ndzi kombiseke wona evandlheni!”

Emavandlheni ya Timbhoni ta Yehovha, valanguteri hi vona va rhangelaka eku nyikeleni ka mpfuno. Setsuko u ri: “Ku hava marito yo hlamusela ndlela leyi munhu la vabyaka a pfunekaka ha yona loko vakulu va n’wi yingisa ivi va n’wi chavelela.” Kambe, hilaha Daniel loyi a khomiweke hi vuvabyi bya mahlangano a hi tsundzuxaka hakona, “vamakwerhu va moya va nga hi pfuna loko hi va pfumelela leswaku va hi pfuna.” Hikwalaho i swa nkoka leswaku vanhu lava vabyaka va hamba va tihlanganisa ni Vakreste-kulorhi, va endla hinkwaswo leswi va nga swi kotaka leswaku va va kona eminhlanganweni ya vandlha. (Vaheveru 10:24, 25) Eminhlanganweni yoleyo, va nga kuma xikhutazo xa moya lexi lavekaka leswaku va tiyisela.

Maxangu Ma Ta Hela

Vanhu lava khomiweke hi vuvabyi bya mahlangano va tsaka hi nhluvuko lowu vativi va swa vutshunguri va wu endleke ku ta fikela sweswi. Kambe, hambi ku ri vutshunguri lebyinene ngopfu a byi swi koti ku tshungula vuvabyi lebyi. Xa nkoka, vanhu lava vabyaka va nga kuma nchavelelo lowukulu eswitshembisweni swa Xikwembu swa misava leyintshwa.b (Esaya 33:24; Nhlavutelo 21:3, 4) Emisaveni yoleyo “la khutaka u ta tlula kukota mhunti.” (Esaya 35:6) Mavabyi ya mahlangano swin’we ni mavabyi man’wana hinkwawo lama karhataka vanhu ma ta heriseriwa makumu! Peter, la hlaseriweke hi vuvabyi bya mahlangano elongweni, u ri: “Ndzi ni ntshembo wa leswaku siku rin’wana vuvabyi lebyi ndzi khomeke byi ta hela.” Hilaha ku fanaka, wansati un’wana la nga Mukreste la vitaniwaka Giuliana, u ri: “Siku rin’wana ni rin’wana loko ri pela, ndzi tivona ndzi hlurile, naswona ndzi ri vona ri tshinela siku leri vuvabyi lebyi byi nga ta hela ha rona!” Ina, nkarhi wa ku herisiwa ka vuvabyi bya mahlangano ni ku herisiwa ka maxangu hinkwawo wu le kusuhi!

[Tinhlamuselo ta le hansi]

[Swifaniso leswi nga eka tluka 10]

Ku ni switirhisiwa swo tala leswi nga pfunaka vanhu lava khomiweke hi vuvabyi lebyi leswaku va tsakela vutomi

[Xifaniso lexi nga eka tluka 12]

Nseketelo wa rirhandzu wu nga kumeka eminhlanganweni ya Vukreste