Vito Ra Xikwembu Ri Pfuxa Njhekanjhekisano

HI MUTSARI WA XALAMUKA! LE NETHERLANDS

VAHUNDZULUXERI va Bibele leyintshwa ya Xidachi va pfuxe njhekanjhekisano exikarhi ka swichudeni swa Bibele ni le ka vanhu lava tolovelekeke. Ha yini? Xiboho xa vona xa ku hundzuluxela vito ra Xikwembu hi rito leri nge Heer, kumbe Hosi.

Hi December 1998, endzhaku ka mavhiki yo hlayanyana vahundzuluxeri va humese xikombiso xa vuhundzuluxeri bya vona, ntlawa wa vavasati va Kerk en Wereld (Kereke Ni Misava), ku nga nhlengeletano ya Protestente, va rhumele xivilelo xa vona hi papila. Xana a xi ri xihi xivangelo xa vona? A va teka rito leri nge “Hosi” ri “kombetela ngopfu eka vavanuna.” Hi ku hatlisa, mintlawa yin’wana—ya Khatoliki ni Protestente—yi hlanganyerile eka tsima rero ra ku vilela. Hi February 1999, swichudeni swinharhu swi phofule mavonelo ya swona hi ku vula leswaku ku tshikiwa tinhlanga ta mune ta Xiheveru ta vito ra Xikwembu ti nga hundzuluxeriwanga, ku nga YHWH. Endzhaku ka nkarhinyana, swichudeni swa Bibele, vahundzuluxeri swin’we ni vafundhisi va hlangane eAmsterdam leswaku va tlhuvutsa mhaka leyi. Endzhaku ko bula hi mhaka leyi, vanhu lava a va ri kona va komberiwe leswaku va vhotela vito leri va ri rhandzaka.

Ehansi ka nhloko-mhaka leyi nge “Hikwalaho Ko Xixima Xikwembu, Hi Nga Lwi Hikwalaho Ka Vito Ra Xikwembu,” phepha-hungu leri nge Nieuwsblad van het Noorden ri vike vuyelo bya kona: “Rito leri nge HOSI ri lo kuma tivhoti ta nkombo ntsena. Kambe ni marito laman’wana a swi nyawuli, leri nge Vito (1), Yena ntsena (3), wa Musa (6), Xikala-vito (7), La Hanyaka (10) ni leri nge La Nga Heriki (15). Naswona leri wineke hi leri nge . . . YHWH!” Hi March 15, 2001, Komiti leyi Languteleke vuhundzuluxeri bya Bibele leyintshwa yi endle xiboho xa ku tirhisa xithopo lexi nge HOSI (LORD) hi maletere lamatsongo leswaku xi yimela vito ra Xikwembu.

Njhekanjhekisano lowu wu kombisa kahle leswaku swichudeni swa pfumela leswaku Xikwembu xi ni vito, hambileswi va nga pfumelelaniki malunghana ni ndlela yo ri hundzuluxela hi Xidachi. Rito ra Xiheveru ri vumbiwe hi maletere mambirhi ya Xiheveru, ku nga, יהוה, kumbe YHWH. Xana vuhundzuluxeri byin’wana bya Bibele hi Xidachi, bya khale na bya sweswi, byi ri hlamusela njhani rito leri nge YHWH?

Hi 1762, Mudachi la vitaniwaka Nicolaas Goetzee u kandziyise vuhundzuluxeri bya Bibele leyi vuriwaka Staten. Eka tluka ra nhloko-mhaka ya yona yi te: “Hi ni swivangelo swa ntikelo ni leswi tivekaka, hi tlhele hi tshika Vito ra Xikwembu leri nga Xitsundzuxo, YEHOVHA, ri nga hundzuluxeriwanga.” Swichudeni swin’wana leswi nga ni ndhuma swa Madachi—swo fana na Profesa Nicolaas Beets na Petrus Augustus de Genestet—na swona swi tirhise vito leri nge Yehovha.

Lexi tsakisaka, nkarhi ni nkarhi Bibele ya Vuhundzuluxeri Bya Misava Leyintshwa Bya Matsalwa Yo Kwetsimaa yi tirhisa vito leri nge Yehovha. Xita-ndzhaku xa Vuhundzuluxeri Bya Misava Leyintshwa hi Xidachi xi ri “yi ya emahlweni yi tirhisa vito leri nge ‘Yehovha’ hikwalaho ka leswi vanhu va ri tirhiseke ni hi malembe-xidzana. Ku tlula kwalaho, yi hlayisa . . . maletere ya mune ya vito ra Xikwembu, YHWH.” Kutani Vuhundzuluxeri Bya Misava Leyintshwa byi pfune timiliyoni ta vanhu leswaku va tiva ntiyiso mayelana ni vito ra Xikwembu.

[Nhlamuselo ya le hansi]