Vantshwa Va Vutisa . . .

Xana Ndzi Nga Chumayela Njhani Eka Vadyondzi-kulorhi?

“A ndzi ri eku chumayeleni loko hi xitshuketa ndzi hlangana ni un’wana loyi ndzi n’wi tivaka. A ndzi khome hi rhumbu! Munhu loyi a ndzi chumayela na yena u nghenelerile kutani a ndzi vulavulela.”—Alberto.

“A ndzi swi tiva leswaku mudyondzi-kulorhi u tshama eka xitarata lexi, kutani ndzi kombele buti leswaku ku va yena la vulavulaka eka tiyindlu hinkwato leti a hi chumayela eka tona. Endzhaku buti u titwe a tikeriwa kutani a ndzi kombela leswaku ndzi vulavula eka muti lowu landzelaka. Ndzi gongondzile naswona—loko ndzi ku hahluu!—hi yena mufana loyi ndzi nghenaka na yena xikolo! A ndzi chave ngopfu!”—James.

VANTSHWA van’wana va ehleketa leswaku a swi “kahle” ku vulavula hi vukhongeri. Hambiswiritano, eka Vakreste va ntiyiso, vantshwa va tlangela nkarhi lowu Xikwembu xi va nyikeke wona wa leswaku va byela van’wana hi ta ripfumelo ra vona. Magidi ya vantshwa va Timbhoni ta Yehovha va hlanganyela eka ntirho wa yindlu ni yindlu. Kambe van’wana va tirha va ri karhi va chava ku hlangana ni un’wana loyi va n’wi tivelaka exikolweni. “Ndza ha chava ku hlangana ni lava ndzi ngheneke na vona xikolo,” ku vula Jennifer loyi se a nga ni malembenyana a pase ntangha khume.

Loko u ri muntshwa la nga Mukreste, nkarhi wun’wana na wena u nga ha titwa hi ndlela leyi fanaka. I ntiyiso leswaku hinkwerhu hi lava ku amukeriwa, hikwalaho a swi hlamarisi loko munhu a chava ku vulavula hi vukhongeri ni vadyondzi-kulobye.a Kambe a ku na xivangelo xa leswaku u hluriwa hi ku chava. Xana wa n’wi tsundzuka wanuna loyi Bibele yi n’wi vitanaka “Yosefa wa le Arimatiya”? A a ri ni ripfumelo eka swilo leswi a swi dyondzeke eka Yesu. Kambe Bibele yi hlamusela Yosefa tanihi “mudyondzisiwa wa Yesu wa le xihundleni hikwalaho ko chava Vayuda.” (Yohane 19:38) Xana u nga titwisa ku yini hi munghana loyi a lavaka leswaku vunghana bya n’wina byi va bya le xihundleni? (Luka 12:8, 9) A swi hlamarisi leswi Xikwembu xi lavaka leswaku Vakreste hinkwavo va “vula erivaleni” malunghana ni ripfumelo ra vona. (Varhoma 10:10) Leswi swi katsa ku vulavula ni vantshwa lava u dyondzaka na vona.

Yosefa wa le Arimatiya u hlule ku chava ka yena hi ku kombela mpfumelelo wa ku ya teka ntsumbu wa Yesu leswaku a ya wu lahla. Xana u nga ku hlurisa ku yini ku chava ka wena?

Ku Hlakulela Ku Hisekela Ku Chumayela

Muapostola Pawulo a a nga ri na tingana ku byela van’wana hi ripfumelo ra yena. Eka Varhoma 1:15, u tihlamusela tanihi loyi a hisekelaka ku vula rungula ra Bibele! I yini lexi vangeke ku hiseka koloko? U vula leswi tshahiweke eka ndzima 16: “A ndzi khomiwi hi tingana hi mahungu lamanene; entiyisweni, i matimba ya Xikwembu ya ku ponisa un’wana ni un’wana la nga ni ripfumelo.” Ku vuriwa yini hi wena? Xana u amukela ntiyiso wu va wa wena? (Varhoma 12:2) Xana wa khorwiseka leswaku rungula ra Bibele i “matimba ya Xikwembu ya ku ponisa”?

Ku ya ntsena eminhlanganweni ya Vukreste ni vatswari va wena a swi enelanga. Muntshwa la vuriwaka Deborah u vula leswaku, “Swa olova ku ya eminhlanganweni hikuva vatswari va wena va ku byela leswaku u endla tano. Kambe loko vanhu va ndzi vutisa swivutiso mayelana ni Bibele, a ndzi swi koti ku va hlamusela.” Muntshwa la vuriwaka Mi Young na yena wa pfumela: “Hi fanele hi swi amukela leswaku lowu i ntiyiso.”

I yini lexi nga ku susumetelaka ku byela van’wana hi vutivi bya Bibele? I ku va ni dyondzo ya wena n’wini. Muntshwa la vuriwaka Sean u ri: “Loko u sungula ku dyondza Bibele, u sungula ku endla ntiyiso wu va wa wena. Dyondzo yoleyo yi ta pfuna wena n’wini.” I ntiyiso leswaku hi ntumbuluko, a hi vanhu hinkwavo lava rhandzaka ku hlaya. Shevon wa pfumela: “A ndzi swi rhandzi ku hlaya. Eku sunguleni a swi ndzi tikela ku hlaya Xihondzo xo Rindza ni Xalamuka! kumbe ku hlaya Bibele siku ni siku. Kambe hi ku famba ka nkarhi ndzi swi kotile.”

Xana hi byihi vuyelo bya ku tikarhatela ku dyondza? Muapostola Pawulo u ri: “Ripfumelo ri landzela leswi twiweke.” (Varhoma 10:17) Loko ntshembo ni ripfumelo ra wena swi ri karhi swi kula, ni mahanyelo ya wena ma ta cinca. Muntshwa wa le Brazil la vuriwaka Elisângela u ri: “Loko u ri Mukreste wa xiximeka, naswona sweswo a swi ku khomisi tingana.” Loko ripfumelo ra wena ri ya ri kula, u ta titwa u susumeteleka ku byela van’wana ha rona—ku katsa ni lava u dyondzaka na vona. Pawulo u te: “Hi kombisa ripfumelo hikokwalaho ha vulavula.” (2 Vakorinto 4:13) Handle ka swona, xana hi nga tikuma hi “basile engatini” ya vanhu van’wana loko hi va tsona vutivi lebyi nyikaka vutomi ku suka eka lavatsongo lava hi hlangana na vona siku ni siku?—Mintirho 20:26, 27.

Kambe, vantshwa van’wana va Vakreste va titwa va nga faneleki ku vulavula ni van’wana hi Bibele. Muntshwa la vuriwaka Joshua u ri: “Loko u nga swi tivi leswi u nga ta swi vula eka vanhu, ku chumayela ku hundzuka ndzhwalo.” Nakambe, ku va ni ku twisisa loku enteke hi Bibele swi ta ku pfuna leswaku u tamela rungula ra yona kahle. (2 Timotiya 2:15) Emavandlheni ya Timbhoni ta Yehovha, vantshwa va nga tshinelela vakulu va vandlha va kombela mpfuno wa ku antswisa vuswikoti bya vona byo dyondzisa. Muntshwa wa le Jarimani la vuriwaka Matthias u ri: “Loko ndzi sungule ku vulavula ni vanhu—a ndzi nga va nyiki ntsena tibuku leti vulavulaka hi Bibele—ndzi sungule ku tsakela ku chumayela.”

Xo hetelela, u nga khongela eka Xikwembu leswaku xi ku pfuna leswaku u vulavula hi xivindzi. (Mintirho 4:29) Muapostola Pawulo u kume mpfuno wa Xikwembu emhakeni leyi. Eka 1 Vatesalonika 2:2, u ri: “Mi tiva ndlela leyi hi kumeke vurhena ha yona hikwalaho ka Xikwembu xa hina, bya ku mi byela mahungu lamanene ya Xikwembu hi ku lwa lokukulu ngopfu.” Hi ku ya hilaha un’wana a swi vekeke hakona, marito lawa ma nga ha hundzuluxeriwa ma ku, “Xikwembu xi suse ku chava etimbilwini ta hina.” Kutani, hikwalaho ka yini u nga khongeli eka Xikwembu leswaku xi susa ku chava embilwini ya wena?

Titivise

Hi ku pfumelelana ni xikhongelo xexo, u nga teka goza ro tiya. Muntshwa wa le Britain la vuriwaka Chic u nyikela xitsundzuxo lexi: “Byela lava u dyondzaka na vona leswaku u Mukreste.” A wu fanelanga u va ‘mudyondzisiwa wa le xihundleni.’ Muntshwa la vuriwaka Rebecca wa pfumela leswaku na yena a a chava ku hlangana ni munhu loyi a n’wi tivaka loko a ri entirhweni wo chumayela. Kambe u xiye leswaku “loko u va byela leswaku u Mukreste naswona u famba hi yindlu ni yindlu, va nga ha ku vutisa leswaku, ‘Xana mi tshame mi nghena eka hina?’”

Hikwalaho ka yini u rindza kukondza u hlangana ni un’wana u nga swi langutelanga? Languta nkarhi lowu ku pfulekeleke leswaku u byela van’wana hi ta ripfumelo ra wena exikolweni. Tsundzuka swivutiso leswi vutisiweke hi muapostola Pawulo: “Va ta pfumerisa ku yini eka loyi va nga twangiki nchumu hi ta yena? Hilaha ku fanaka, va ta swi twisa ku yini loko ku nga ri na loyi a chumayelaka?” (Varhoma 10:14) U le ka xiyimo xa kahle xo pfuna lava u dyondzaka na vona leswaku va yingisa. Muntshwa la vuriwaka Iraida u xiye leswi: “Xikolo hi yona nsimu leyi nga fikeleriwaka hi swichudeni ntsena.” Vantshwa vo tala va vuyeriwa hi ku chumayela hi xitshuketa eka nsimu leyi.

Nkarhi wun’wana ku ni ntirho wa xikolo lowu mi nyikiweke wona, lowu nga ku pfunaka leswaku u byela van’wana hi mintiyiso ya Bibele. Nhwanyana wa le Britain la vuriwaka Jaimie u ri: “A hi vulavula hi timhaka ta hundzuluko eklasini ya sayense, hiloko ndzi vulavula hi leswi ndzi pfumelaka eka swona. Un’wana wa vafana u ndzi hlekurile a vula leswaku Timbhoni ta Yehovha i vanhu lava ehleketelaka endzhaku naswona a va faneriwi hi ku nghenela timhaka ta dyondzo. Kambe vadyondzi-kulorhi lavan’wana va lo namba va yima na mina.” Swi le rivaleni leswaku ndhuma yakwe ya ku va Mukreste la nga xikombiso yi ve ni vuyelo lebyinene. Jaimie u ya mahlweni: “Mbuyelo wa kona, ndzi hetelele ndzi fambise buku leyi nge Is There a Creator Who Cares About You? eka un’wana wa lava ndzi dyondzaka na vona eklasini.”b

Nhwanyana wa malembe ya 14 la vuriwaka Micu le Romania u vula ntokoto lowu fanaka: “Mudyondzisi wa hina u hi tivise leswaku hi ta bula hi timhaka ta xihoko, fole, ni swidzidzirisi. Kutani ndzi te na nkandziyiso wa Xalamuka! ya April 8, 2000, lowu nga ni nhloko-mhaka leyi nge, ‘Ndlela Leyi U Nga Tshikaka Ku Dzaha Ha Yona.’ Un’wana va vadyondzi-kulorhi u vone magazini lowu, kutani a wu teka, a ala ku ndzi vuyisela wona. Endzhaku ko wu hlaya, u vule leswaku se u tiyimisele ku tshika ku dzaha.”

A hi nkarhi hinkwawo laha u nga ta hlangana ni vanhu lava angulaka kahle. Kambe Eklesiasta 11:6 ya hi khutaza: “Byala mbewu ya wena nimixo, naswona u nga ri wisisi voko ra wena ku fikela nimadyambu; hikuva a wu swi tivi leswaku leswi swi ta lulama kwihi.” Hambiloko van’wana va nga anguli kahle, ku chumayela lava u dyondzaka na vona hi ripfumelo ra wena swi ta veka masungulo lamanene ya leswaku loko u hlangana na vona evutirhelini bya yindlu ni yindlu mi va ni bulo leri tsakisaka. Muntshwa wa le Britain la vuriwaka Jessica u ri: “Ku nyikela vumbhoni eka lava u dyondzaka na vona swa olova hikuva se u ni xinghana na vona.” U nga hlamala hilaha van’wana va lava u dyondzaka na vona va nga tsakelaka ku tiva hi ta ripfumelo ra wena.

I ntiyiso leswaku a hi hinkwavo lava nga ta ku amukela hi musa. Kambe Yesu u nyika xitsundzuxo: “Kun’wana ni kun’wana laha ku nga riki na munhu la mi amukelaka kumbe la yingisaka marito ya n’wina, loko mi huma endlwini yoleyo . . . phumunhani ritshuri emilengeni ya n’wina.” (Matewu 10:14) Hi marito man’wana, a wu fanelanga u karhateka ngopfu loko u nga amukeriwi. Kambe suka hi ku rhula, u ya emahlweni u lava munhu loyi a navelaka ku yingisa. Ku nga ri khale u nga ha kuma un’wana wa mbilu yo tshembeka loyi a nga ni ndlala ya ntiyiso naswona a navelaka ku dyondza. Xana a swi nge tsakisi loko un’wana wa vona, ku ri munhu loyi a wu dyondza na yena? Loko swi ri tano, u ta tsaka hikuva u hlule ku chava ku byela vadyondzi-kuloni hi ripfumelo ra wena.

[Tinhlamuselo ta le hansi]

[Marito lama tshahiweke exihlokweni lama nga eka tluka 16]

“Loko u sungula ku dyondza Bibele, u sungula ku endla ntiyiso wu va wa wena.”—Sean.

[Xifaniso lexi nga eka tluka 14]

U nga chavi ku titivisa leswaku u Mukreste

[Xifaniso lexi nga eka tluka 14]

Hakanyingi mintirho ya xikolo, ya pfuna leswaku u byela van’wana hi mintiyiso ya Bibele