Mintirho Yo Tala Ya Vamanana
4:50 nimpundzu. Alex, la nga xihlangi, wa rila naswona a byi si khoma kahle vurhongo, u khandziya erheveni ra mana wakwe, Helen. Vana lavan’wana vambirhi—Penny (5) na Joanna (12)—ni nuna wakwe Nick, va etlele. Helen u tlakula Alex kutani a n’wi an’wisa. U heleriwa hi vurhongo.
5:45 nimpundzu. Helen wa nyandlamela a nghena ekhixini, u endla kofi, kutani a sungula ku hlaya.
6:15–7:20 nimpundzu. Nick wa pfuka. Helen u pfuxa Penny na Joanna, u endla swakudya swo fihlula, u endla mintirho yin’wana ya le kaya. Hi 7:15, Nick wa huma u ya entirhweni, u hundza a siya Joanna exikolweni. Mana wa Helen wa fika leswaku a ta sala na Alex.
7:30 nimpundzu. Helen u siya Penny exikolweni xa tindzumulo. Loko a ri karhi a ya entirhweni, Helen u va ni nkarhi wo ehleketa hi ntirho wa ku va manana. U ri: “I ntirho wo tika ku tlula hinkwayo leyi ndzi tshameke ndzi yi tirha.”
8:10 nimpundzu. Helen u fika a kuma ntirho wu siva ni dyambu hi ku tala. U karhatekile, u ehleketa leswaku loko o tlhela a tika, u ta lahlekeriwa hi ntirho wakwe. Ndyangu wu lava mali leyi engetelekeke.
10:43 nimpundzu. Loko Helen a heta ku veka riqingho—riqingho leri a a ri bile malunghana ni vana vakwe—mutirhi-kulobye Nancy wa n’wi chavelela: “U va khathalela kahle swinene.” Mihloti ya Helen yi xiririka.
12:05 ninhlikanhi. Helen u teka swo khomisa nyoka kutani a ehleketa hi nkarhi lowu a a nga si va na n’wana. Hi nkarhi wolowo a a hlele swin’wana leswi a a ta swi endla hi nkarhi wakwe lowu “seleke.” U gimeta hi ku vula a ku: ‘A ndzi lorha hakunene!’
3:10 nindzhenga. Endzhaku ka ku va a bele riqingho ko hlayanyana ekaya ku twa hi ta Alex, Helen u hlamusela ndlela leyi a va rhandzaka ha yona vana vakwe: “A nga kona munhu loyi ndzi n’wi rhandzaka hi ndlela leyi ndzi va rhandzaka ha yona.” Rirhandzu lerikulu leri a va rhandzaka ha rona ri n’wi pfuna leswaku a hlula swiphiqo leswi a a nga swi langutelanga leswi a hlangavetaneke na swona.
5:10 nimadyambu. Loko Helen a vuya eku landzeni ka Joanna, u tsutsumela le na le. U bela Nick riqingho a n’wi tsundzuxa leswaku a landza Penny.
6:00–7:30 nimadyambu. Loko Helen a fika ekaya, u ntshunxa Kokwa wa ‘Alex entirhweni’ lowu a wu endleke, kutani a lunghiselela swakudya swo lalela. Loko a vutisiwa leswaku xihlangi xi karhata ku fikela kwihi, Helen u ririsa xileswi: “N’wana u lava mana wakwe hi ku helela: u lava mavoko yakwe, miri ni mafi yakwe, naswona u n’wi tsona vurhongo.”
8:30–10:00 nivusiku. Helen u pfuna Joanna hi mintirho ya xikolo kutani a an’wisa Alex. Hambileswi Nick a hlayelaka Penny tibuku ku ringana hafu ya awara, Helen yena u endla mintirho yo tala ya le kaya.
11:15 nivusiku. Loko Penny na Joanna se va ye eku etleleni, Alex yena a nga si etlela emavokweni ya mana wakwe, kambe u hetelela a rhongerile. “Ndzi ehleketa leswaku u lunghekele ku ya etlela,” Helen u byela Nick, loyi se vurhongo byi tlangaka ha yena.