Mhaka Ya Vutomi
Ku Tsundzuka Muvumbi Wa Hina Ku Sukela eVuntshweni
HI KU VULA KA DAVID Z. HIBSHMAN
“Loko lawa ku ri makumu ya vutomi bya mina, ndzi tshemba leswaku ndzi ta fa ndzi tshembekile eka Yehovha. Ndzi n’wi kombela leswaku a khathalela David wa mina. Ndza ku nkhensa Yehovha hi ku va u ndzi nyike yena, na hikwalaho ka vukati bya hina. Byi famba kahle, bya tsakisa!”
ANAKANYA ndlela leyi ndzi titweke ha yona endzhaku ka nkosi wa nsati wa mina hi March 1992, loko ndzi kuma marito lawa a ma tsaleke edayarini. Tin’hweti ta ntlhanu emahlweni ka rifu rakwe hi tlangele ku heta ka Helen malembe ya 60 a ri evutirhelini bya nkarhi hinkwawo.
Ndzi ri tsundzuka kahle siku leri Helen a tshame ekusuhi na mina hi 1931 entsombanweni wa le Columbus, Ohio, eU.S.A. Helen a a nga si hlanganisa malembe ya 14, kambe a wu tlangela nkoka wa xiendlakalo xolexo ku tlula na mina. Ku hisekela ka Helen vutirheli ku kombisiwe endzhakunyana ka kwalaho loko yena ni mana wa yena loyi se a ri noni va nghenele vuphayona, hilaha vavuri va evhangeli va nkarhi hinkwawo lava nga Timbhoni ta Yehovha va vitaniwaka hakona. Va siye kaya ra vona ra xiyimo xa le henhla leswaku va ya chumayela etindhawini ta le makaya edzongeni wa United States.
Ndzhaka Ya Mina Ya Vukreste
Hi 1910 vatswari va mina va rhurhile swin’we ni vana va vona vambirhi lavatsongo, va suka evuxeni bya Pennsylvania va ya eDorobeni ra Grove, evupela-dyambu bya ndhawu yoleyo. Kwalaho va fike va xava yindlu ya xiyimo xa le hansi, naswona va ve swirho leswi hisekaka swa Kereke ya Reformed. Endzhakunyana ka kwalaho va endzeriwe hi William Evans, Xichudeni xa Bibele, hilaha Timbhoni ta Yehovha a ti vitaniwa hakona hi nkarhi wolowo. Tatana, loyi hi nkarhi wolowo a ri ehenhlanyana ka malembe ya 20, naswona Manana, loyi a ri ntsongo eka yena hi malembe ya ntlhanu, va yingisele wanuna loyi wa xinghana wa le Wales ivi va n’wi rhamba leswaku a ta dya swakudya. Hi ku hatlisa va amukele ntiyiso wa Bibele lowu a va wu dyondza.
Leswaku a va ekusuhi ni vandlha, Tatana u rhurhise ndyangu wa yena wu ya kwalomu ka 40 wa tikhilomitara, edorobeni ra Sharon. Endzhaku ka tin’hweti ti nga ri tingani, hi 1911 kumbe 1912, Tatana na Manana va khuvuriwile. Charles Taze Russell, muungameri wo sungula wa Sosayiti ya Watch Tower, hi yena a nyikeleke nkulumo ya nkhuvulo. Mina ndzi velekiwe hi December 4, 1916, loko vatswari va mina se va ri ni vana va mune. Loko ndzi velekiwa ku tivisiwe leswi: “Makwenu un’wana loyi mi faneleke mi n’wi rhandza u velekiwile.” Hikwalaho vito ra mina ra David, ri vula “La Rhandzekaka.”
A ndzi ri ni mavhiki ya mune hi vukhale loko ndzi sungula ku ya entsombanweni. Emasikwini wolawo, tatana na vabuti va mina a va famba tikhilomitara to tala leswaku va ya eminhlanganweni ya vandlha, kasi Manana a a famba na mina na sesi wa mina hi tireme. Minhlangano a yi khomiwa nimixo ni hi ndzhenga. Hakanyingi, mabulo lawa a hi va na wona ekaya a ma sekeriwe eka Xihondzo xo Rindza ni le ka The Golden Age, khale ka vito ra Xalamuka!
Ku Vuyeriwa Eka Swikombiso Leswinene
Vandlha ra ka hina ri endzeriwe hi tiphiligrimi to tala, hilaha swivulavuri leswi famba-fambaka a swi vitaniwa hakona. Hakanyingi a va heta siku rin’we kumbe mambirhi va ri na hina. Xivulavuri xin’wana lexi ndzi nga xi rivaliki a ku ri Walter J. Thorn, loyi a tsundzukeke Muvumbi wa yena Lonkulu ‘emasikwini ya vuntshwa bya yena.’ (Eklesiasta 12:1) Loko ndza ha ri mufana, a ndzi famba na Tatana leswaku hi ya komba vanhu “Photo-Drama of Creation,” ku nga nkombiso wa swifaniso ni mhaka leyi rhekhodiweke leyi vulavulaka hi matimu ya vanhu.
Hambileswi Makwerhu Evans ni nsati wa yena, Miriam, a va nga ri na vana, va hundzuke vatswari va hina va moya ni vakokwa wa ndyangu wa ka hina. Minkarhi hinkwayo William a a vitana Tatana a ku i “N’wananga,” naswona yena na Miriam va nghenise moya wa evhangeli endyangwini wa ka hina. Eku sunguleni ka lembe-xidzana ra vu-20, Makwerhu Evans u teke maendzo yo tala a tlhelela eWales leswaku a ya twarisa ntiyiso wa Bibele eka vanhu lava nga endhawini leyi nga ekusuhi na Swansea. Kwalaho a tiviwa tanihi muchumayeri la humaka eAmerika.
Hi 1928, Makwerhu Evans u tshike ntirho ivi a sungula ku chumayela eswintshabyanini swa Virginia Vupela-dyambu. Vabuti va mina vambirhi, Clarence wa malembe ya 21 hi vukhale na Carl wa malembe ya 19 hi vukhale a va famba na yena. Hina vafana hi ri mune hi hete malembe yo tala hi ri evutirhelini bya nkarhi hinkwawo. Kahle-kahle, hinkwerhu hi ve valanguteri lava famba-fambaka va Timbhoni ta Yehovha loko ha ha ri vantshwa. Ku nga ri khale ndzisana ya xisati ya Manana, ku nga Mary, loyi sweswi a nga ni malembe ya kwalomu ka 90, u ndzi tsalele a ku: “Mawaku ndlela leyi hinkwerhu hi nkhensaka ha yona leswi Makwerhu Evans a hisekeleke vutirheli a tlhela a endzela Doroba ra Grove!” Mhani-ntsongo Mary na yena u tsundzuke Muvumbi wa yena ku sukela loko a ha ri muntshwa.
Ku Ya eMintsombanweni
I Tatana na Clarence ntsena lava koteke ku ya entsombanweni lowu nga rivalekiki ematin’wini, wa le Cedar Point, Ohio, hi 1922. Hambiswiritano, hi 1924 se a hi ri na movha, kutani ndyangu wa ka hina hinkwawo wu ye entsombanweni wa le Columbus, Ohio. Hina vana a hi languteriwe leswaku hi tirhisa mali ya hina leswaku hi tixavela swakudya entsombanweni wa masiku ya nhungu. Vatswari va hina a va lava leswaku swirho hinkwaswo swa ndyangu wa ka hina swi dyondza ku tikhathalela. Kutani hi fuwe tihuku ni mimpfundla, naswona a hi ri ni ndhawu ya tinyoxi leswaku hi kuma vulombe, kasi hina vafana a hi hamba hi yisela vanhu maphepha-hungu.
Loko ku fika nkarhi wa ku ya entsombanweni wa le Toronto, eCanada, hi 1927, se a hi ri na makwerhu wa xinuna wa tin’hweti ta tsevu la vitaniwaka Paul. Loko vatswari va mina va ye le Toronto ni vana lavan’wana, ndzi averiwe ku sala ekaya na mhani-ntsongo la tekiweke hi khathalela Paul. Ndzi hakeriwe hi tidolara ta khume (R40), leti ndzi ti tirhiseleke ku tixavela sudu leyintshwa. Minkarhi hinkwayo a hi leteriwa ku ambala kahle loko hi ya eminhlanganweni ni ku khathalela swiambalo swa hina.
Hi nkarhi wa ntsombano lowu nga rivalekiki wa le Columbus, Ohio, hi 1931, Clarence na Carl se a va tekile naswona a va phayona ni vasati va vona. Havumbirhi bya vona a va tshama etindlwini leti rhwalekaka, leti va tiendleleke tona. Carl u tekane na Claire Houston wa le Wheeling, le Virginia Vupela-dyambu, kutani hi yona mhaka leyi a ndzi tshame ekusuhi na ndzisana ya xisati ya Claire, ku nga Helen, entsombanweni wa le Columbus.
Vutirheli Bya Nkarhi Hinkwawo
Ndzi hete xikolo xa le henhla hi 1932 loko ndzi ri ni malembe ya 15, ivi hi lembe leri tlhandlamaka ndzi nyika buti wa mina Clarence movha lowu se wu tirhisiweke, yena a a phayona le Dzongeni wa Carolina. Ndzi tsarisele ntirho wa vuphayona ivi ndzi sungula ku phayona swin’we na Clarence ni nsati wa yena. Hi nkarhi wolowo Helen a a phayona le Hopkinsville, eKentucky, kutani a ku ri ro sungula ndzi n’wi tsalela papila. Loko a hlamula, u vutisile: “Xana u phayona?”
Eka papila ra mina—leri Helen a ri vekeke a kondza a fa endzhaku ka malembe ya kwalomu ka 60—ndzi te: “Ndzi phayona, naswona ndzi navela ku tshama ndzi ri rona.” Eka papila rolero, ndzi hlamusele Helen malunghana ni ku fambisela vafundhisi ni vatirhi va le hubyeni yo avanyisa xibukwana lexi nge The Kingdom, the Hope of the World, lava nga ensin’wini leyi a ndzi chumayela eka yona.
Hi 1933, Tatana u ndzi endlele tende leri nga ni mavhilwa—kharavhani leyi leheke 2,4 wa timitara, yi anama 2 wa timitara leyi a yi ri ni makhumbi ya maseyila ni mafasitere emahlweni ni le ndzhaku. Yoleyo yi ve yindlu ya mina ya xiyimo xa le hansi eka malembe ya mune lama landzeleke ndzi ri karhi ndzi phayona.
Hi March 1934, Clarence na Carl ni vasati va vona, Helen ni mana wa yena, ndzisana ya xisati ya nsati wa Clarence na mina—hi ri nhungu—hi kongome evupela-dyambu hi ya entsombanweni wa le Los Angeles, eCalifornia. Van’wana va fambe hi kharavhani ya mina va tlhela va etlela eka yona. Mina ndzi etlele emovheni, loko lavan’wana va hirhe tindhawu to etlela eka tona. Tanihi leswi movha wa hina a wu ri na xiphiqo, hi fike le Los Angeles hi siku ra vumbirhi ra ntsombano wa masiku ya tsevu. Kwalaho, mina na Helen hi hetelele hi kote ku kombisa ku tinyiketela ka hina eka Yehovha hi nkhuvulo wa mati, hi March 26.
Entsombanweni wolowo Joseph F. Rutherford, loyi a ri muungameri wa Sosayiti ya Watch Tower hi nkarhi wolowo, u vulavurisane hi ku kongoma ni maphayona hinkwawo. U hi khutazile, a vula leswaku hi valweri lava nga tinhenha ta ntiyiso wa Bibele. Hi nkarhi wolowo, ku endliwe malunghiselelo yo nyika maphayona mali leswaku ma ya emahlweni ni vutirheli bya wona.
Dyondzo Leyi Nyikaka Vutomi
Loko hi vuya entsombanweni wa le Los Angeles, hinkwerhu hi avelane rungula ra Mfumo ni vanhu va le migangeni hinkwayo ya le Dzongeni wa Carolina, eVirginia, Virginia Vupela-dyambu na Kentucky. Endzhaku ka malembenyana Helen u tsale papila a vulavula hi ta nkarhi wolowo a ku: “A ku nga ri na vandlha leri a hi ta titshega hi rona, a ku nga ri na vanghana vo hi pfuna, hikuva hakunene a hi ri switaswifamba etikweni rimbe. Kambe sweswi se ndza swi tiva leswaku a ndzi dyondza swo karhi. A ndzi sungula ku fuwa.”
U vutisile: “Xana xinhwanyetana xi endla yini hi nkarhi wa xona loko xi ri ekule ni vanghana va xona ni kaya ra xona? A swi nga karhati. A ndzi tsundzuki ndzi titwa ndzi phirhekile. A ndzi hlaya swinene. A hi namarhela xiyimiso xa hina xa ku hlaya xikan’we ni ku dyondza tibuku ta Bibele. A ndzi tshama ndzi ri na manana, ndzi dyondza ku tirhisa mali leyi a hi ri na yona, ndzi ya xava swilo, ndzi cinca mavhilwa lama ponceke, ndzi sweka, ndzi rhunga ni ku chumayela. A ndzi tisoli naswona ndzi nga tlhela ndzi swi endla hinkwaswo hi ntsako.”
Helen ni mana wa yena a va enerisekile hi ku tshama ekharavhanini leyitsongo emalembeni wolawo, hambileswi mana wa yena a a ri ni yindlu yo saseka. Endzhaku ka ntsombano wa le Columbus, Ohio, hi 1937, mana wa Helen u sungule ku vabya swinene ivi a yisiwa exibedlhele. U fe a ri exiavelweni xa yena ePhilippi, le Virginia Vupela-dyambu, hi November 1937.
Ku Nghenela Vukati Ni Ku Ya eMahlweni Ni Vutirheli
Hi June 10, 1938, mina na Helen hi tekanile, hi endla xinkhubyana lexitsongo ekaya leri a velekeriweke eka rona le Elm Grove, ekusuhi ni le Wheeling, le Virginia Vupela-dyambu. Makwerhu Evans la rhandzekaka, loyi a dyondziseke ndyangu wa ka hina ntiyiso malembe yo hlayanyana mina ndzi nga si velekiwa, hi yena a nyikeleke nkulumo ya mucato. Endzhaku ka mucato, mina na Helen hi hlele ku tlhelela entirhweni wo phayona le vuxeni bya Kentucky, kambe lexi hi hlamariseke swinene, hi averiwe ku ya endla ntirho wa zoni. Ntirho lowu a wu katsa ku endzela mintlawa ya Timbhoni ta Yehovha le vupela-dyambu bya Kentucky ni swiphemu swa le Tennessee leswaku hi ya yi pfuna evutirhelini bya yona. Hi nkarhi wolowo a ko ho va ni vahuweleri va Mfumo va 75 ntsena etindhawini hinkwato leti hi ti endzeleke.
Enkarhini wolowo, vutiko a byi soholote mianakanyo ya vanhu vo tala, naswona a ndzi langutele leswaku ndzi ta khotsiwa hi ku hatlisa hikwalaho ka vukala-tlhelo bya mina bya Vukreste. (Esaya 2:4) Hambiswiritano, huvo yo tsarisa vanhu hi nkani leswaku va ya enyimpini yi ndzi pfumelele ku ya emahlweni ni vutirheli bya mina bya nkarhi hinkwawo hikwalaho ka xiviko xa mina xa ntirho wo chumayela.
Loko hi sungula vutirheli byo famba-famba, vanhu hinkwavo a va hlamala hi leswi a ha ha ri vatsongo. Le Hopkinsville, eKentucky, makwerhu wa xisati la nga Mukreste u xewete Helen ivi a n’wi vukarha a ku: “Wa ha ndzi tsundzuka xana?” Hi 1933, Helen a n’wi chumayerile exitolo xa tiko rolero lexi a xi fambisiwa hi nuna wa yena. A a ri mudyondzisi wa xikolo xa Sonto, kambe endzhaku ko hlaya buku leyi Helen a n’wi siyele yona, u yime emahlweni ka ntlawa lowu a a wu dyondzisa ivi a kombela ku rivaleriwa hikwalaho ka leswi a wu dyondziseke tidyondzo leti nga riki kona eBibeleni. Endzhaku ko tshika kereke, u sungule ku twarisa mintiyiso ya Bibele emutini wa ka vona. Mina na Helen hi tirhe le vupela-dyambu bya Kentucky ku ringana malembe manharhu, naswona hakanyingi a hi tshama ekaya ra makwerhu yoloye wa xisati swin’we ni nuna wa yena.
Emasikwini wolawo a hi va ni tinhlengeletano letitsongo, naswona A. H. Macmillan u nyikele nkulumo eka yin’wana ya tona. U tshame a rhurheriwa ekaya ra vatswari va Helen loko Helen a ha ri ntsongo, kutani hi nkarhi wa ntsombano, u hlawule ku tshama na hina ekaya ra hina leri rhwalekaka leri leheke ntlhanu wa timitara, laha a hi ri ni mubedo lowu a wu nga tirhisiwi. Na yena u tsundzuke Muvumbi wa yena Lonkulu emasikwini ya vuntshwa bya yena, hikuva u nyiketele vutomi bya yena eka Yehovha hi 1900, loko a ri ni malembe ya 23 hi vukhale.
Hi November 1941 ntirho wa vamakwerhu lava famba-fambaka wu yimisiwile swa xinkarhana, kutani ndzi averiwe ku va phayona le Hazard, eKentucky. Hi tlhele hi tirha na makwerhu Carl swin’we ni nsati wa yena Claire. Laha hi laha Joseph Houston, ku nga n’wana wa buti wa Helen, a teke a ta hi joyina kona ivi a sungula ku phayona. U hambete a ri evutirhelini bya nkarhi hinkwawo ku ringana malembe ya kwalomu ka 50, ivi a fa hi xitshuketa a dlayiwa hi vuvabyi bya mbilu hi 1992 a ri karhi a tirha hi ku tshembeka eyindlu-nkulu ya misava hinkwayo ya Timbhoni ta Yehovha le Brooklyn, eNew York.
Hi 1943 hi averiwe ku ya le Rockville, eConnecticut. Leyi a yi ri ndhawu leyi hi ndlela yo fanekisela a yi nga tolovelekanga eka mina na Helen hikuva a hi tolovele ku chumayela edzongeni. Le Rockville, Helen hakanyingi a a fambisa tidyondzo ta le kaya ta Bibele to tlula 20 hi vhiki. Eku heteleleni, hi qache kamara ra xiyimo xa le hansi leswaku ri va Holo ya Mfumo, kutani xolexo xi ve xisekelo xa vandlha leritsongo.
Loko ha ha ri eRockville, hi rhambiwe leswaku hi ya eka ntlawa wa vuntlhanu wa Xikolo xa Bibele xa Gilead xa Watchtower le South Lansing, eNew York. Lexi tsakisaka, hi kume leswaku Aubrey na Bertha Bivens, lava a va ri vanghana va hina loko ha ha phayona le Kentucky, va ta va na hina exikolweni.
Xikolo Ni Xiavelo Xa Hina Lexintshwa
Hambileswi a ha ha ri vatsongo, vo tala va lava a hi ri na vona entlaweni a va ri vatsongo ni le ka hina. Ina, a va tsundzuka Muvumbi wa vona Lonkulu va ha ri vantshwa. Hi thwase hi July 1945, loko Nyimpi ya Vumbirhi ya Misava se yi ri kusuhi no hela. Loko ha ha yimele swiavelo swa hina swa vurhumiwa, hi tirhe ni Vandlha ra Flatbush le Brooklyn, eNew York. Eku heteleleni, hi October 21, 1946, hi fambe hi xihaha-mpfhuka hi ya ekaya ra hina lerintshwa eGuatemala City, le Guatemala, swin’we ni van’wana va tsevu lava a hi ri na vona entlaweni, ku katsa ni va ka Bivens. Enkarhini wolowo, a ku ri ni Timbhoni ta Yehovha leti nga ehansi ka 50 etikweni rolero hinkwaro ra Amerika Xikarhi.
Hi April 1949 hina varhumiwa hi nga ri vangani hi rhurhiseriwe le Quetzaltenango, ku nga doroba ra vumbirhi hi vukulu na hi ntikelo etikweni. Doroba leri ri le ka 2 300 wa timitara ehenhla ka vuandlalo bya lwandle, naswona moya wa le tintshaveni wa phyuphyisa naswona wu tengile. Helen u katsakanye ntirho lowu a hi wu endla laha, a tsala a ku: “A ku ri lunghelo ra hina ku chumayela emadorobeni ni le swimitanini swo tala. A hi pfuka hi awara ya mune nimixo ivi hi khandziya bazi (leri hakanyingi a ri ri ni maseyila lawa a ma pfariwa hi ku kokeriwa ehansi, ematshan’weni ya mafasitere manene) hi ya edorobeni ra le kule. Kwalaho a hi fika hi chumayela ku ringana tiawara ta nhungu ku fikela nimadyambu loko hi tlhelela endzhaku.” Namuntlha ku ni mavandlha eka to tala ta tindhawu leti, ku katsa na tsevu wa wona lama nga eQuetzaltenango.
Ku nga ri khale ku ve ni xilaveko xa varhumiwa leswaku va ya tirha le Puerto Barrios le Ribuweni ra Kharibiya, ku nga doroba ra vunharhu lerikulu le Guatemala. Vanghana va hina lava rhandzekaka, ku nga va ka Bivens, lava hi tirheke na vona malembe ya ntlhanu le Guatemala, a va ri van’wana va lava rhurheleke exiavelweni lexi lexintshwa. Ku hambana loku a ku vava naswona ku siye vangwa evuton’wini bya hina. Leswi a ku lo sala mina na Helen ekaya ra varhumiwa, hi rhurhele endlwini leyitsongo. Hi 1955, mina na Helen hi amukele xiavelo lexintshwa xo ya edorobeni ra le ndhawini leyi hisaka ra Mazatenango. Ndzisana ya mina Paul, swin’we ni nsati wa yena Dolores, lava thwaseke eGilead hi 1953, a va tirhela kwalaho emahlweninyana ka ku fika ka hina.
Hi 1958 a ku ri ni Timbhoni to tlula 700, mavandlha ya 20 ni swifundzha swinharhu le Guatemala. Mina na Helen hi tlhele hi endla ntirho wo famba-famba, hi endzela mintlawa leyitsongo ya Timbhoni ni mavandlha yo hlayanyana, ku katsa ni leri a ri ri eQuetzaltenango. Kutani, hi August 1959, hi rhambiwe ku tlhelela eGuatemala City, laha hi tshameke ehofisini ya rhavi. Ndzi averiwe ku tirha erhavini, kasi Helen u hambete ni ntirho wa vurhumiwa ku ringana malembe man’wana ya 16. Endzhaku ka sweswo na yena u sungule ku tirha ehofisini ya rhavi.
Mikateko Leyi Engetelekeke
Emalembeni lama hundzeke a swi vonaka onge minkarhi hinkwayo hi mina lontsongo wa kona eka lava tirhelaka Yehovha. Hakanyingi sweswi hi mina lonkulu wa kona, hilaha a swi ri hakona loko ndzi ya exikolweni xa rhavi le Patterson, eNew York, hi 1996. Tanihi leswi ndzi pfuniweke swinene hi vanhu lavakulu loko ndza ha ri muntshwa, eka makume ya malembe ya sweswinyana ndzi ve ni lunghelo ra ku pfuna vantshwa vo tala lava navelaka ku tsundzuka Muvumbi wa vona va ha tsakama.
Yehovha u hambeta a chululela vanhu va yena mikateko laha Guatemala. Hi 1999 a ku ri ni mavandlha yo tlula 60 le Guatemala City. En’walungwini, edzongeni, evuxeni ni le vupela-dyambu ku ni mavandlha man’wana yo tala swinene ni magidi ya vahuweleri va mahungu lamanene ya Mfumo wa Xikwembu. Vahuweleri va Mfumo lava a va ri ehansi ka 50 loko hi fika kwalomu ka malembe ya 53 lama hundzeke va andzile va tlula 19 000!
Swo Tala Leswi Ndzi Swi Nkhensaka
A nga kona munhu loyi a hanyaka a nga ri na swiphiqo, kambe minkarhi hinkwayo hi nga lahlela “ndzhwalo wa [hina] eka Yehovha.” (Pisalema 55:22) Hakanyingi wa hi tiyisa hi ku tirhisa nseketelo wa vanghana lava nga ni rirhandzu. Hi xikombiso, malembe ma nga ri mangani Helen a nga si fa, u ndzi nyike beji leyi tsariweke ndzimana ya Bibele ya Vaheveru 6:10: “Xikwembu a xi pfumali ku lulama lerova xi nga vi na mhaka ni ntirho wa wena ni rirhandzu leri u ri kombiseke eka xona hileswi u tirheleke vanhu va xona naswona wa ha va tirhela.”—Weymouth.
Swin’wana swa leswi a swi tsaleke hi leswi: “Xirhandzwa xanga, a ku na swin’wana leswi ndzi nga ku nyikaka swona handle ka RIRHANDZU RA MINA HINKWARO . . . Rungula leri ri ku fanerile swinene, naswona ndzi kombela leswaku u ri veka ehenhla ka desika ra wena, hayi hileswi ndzi ku nyikeke rona, kambe hikwalaho ka leswi ri tirhaka eka wena eka malembe ya wena ya ntirho yo tala.” Ku ta fikela namuntlha, beji leyi ya ha ri kona edisikini ra hofisi ya mina laha rhavini ra Guatemala.
Ndzi tirhele Yehovha ku sukela loko ndza ha ri muntshwa, naswona sweswi leswi se ndzi dyuhaleke, ndzi nkhensa Yehovha hikwalaho ka rihanyo lerinene leri ndzi pfumelelaka ku hetisisa swiavelo leswi ndzi averiweke swona. Loko ndzi ri karhi ndzi hlaya Bibele nkarhi na nkarhi, hakanyingi ndzi hlangana ni matsalwa lawa ndzi ehleketaka leswaku Helen wa mina la rhandzekaka a a ta va a ma khwatihatile eBibeleni ya yena. Sweswo swi humelele loko ndzi tlhela ndzi hlaya Pisalema 48:14: “Xikwembu lexi i Xikwembu xa hina hilaha ku nga riki na makumu, hi masiku. Xona xi ta hi kongomisa kukondza hi fa.”
Swa ndzi tsakisa ku byela van’wana hi xivono xa siku ra ku pfuxiwa ka vafi laha vanhu va matiko hinkwawo ya nkarhi lowu hundzeke, va nga ta amukela varhandziwa va vona lava pfuxiweke va ya emisaveni leyintshwa. Mawaku ntshembo wonghasi! Wa nga anakanya hi mihloti ya ntsako leyi nga ta humesiwa hi nkarhi wolowo loko hi tsundzuka leswaku Yehovha hakunene i Xikwembu “lexi chavelelaka lava tsongahatiweke”!—2 Vakorinto 7:6.
[Xifaniso lexi nga eka tluka 25]
Ku suka endzhaku eximatsini: Manana, Tatana, Mhani-ntsongo Eva na buti Carl na buti Clarence, hi 1910
[Swifaniso leswi nga eka tluka 26]
Ndzi ri na Helen hi 1947 na hi 1992