Langutelo Ra Bibele
Xana Vakreste Va Fanele Va Langutela Leswaku Xikwembu Xi Va Sirhelela?
Hakanyingi Bibele yi kombisa leswaku Xikwembu xi nga swi kota ku sirhelela vagandzeri va xona leswaku va nga vavisiwi. Hosi Davhida u te: “Oho Yehovha, ndzi ponise eka vanhu vo biha; onge u nga ndzi sirhelela ni le ka vanhu va swiendlo swa madzolonga.” (Pisalema 140:1) Namuntlha, malandza yo tala ya Xikwembu lama langutaneke ni madzolonga, vugevenga kumbe makhombo ya ntumbuluko ma swi kotile ku pona ku dlayiwa kumbe ku vavisiwa. Van’wana va tivutisile loko Xikwembu xi endle masingita yo va ponisa eka swiyimo swo tano, ngopfu-ngopfu tanihi leswi ku nga ni swiyimo swin’wana laha vanhu lava chavaka Xikwembu va nga ponisiwangiki eka swona kambe va langutaneke ni mahlomulo lamakulu, hambi ku ri ku fa hi ndlela ya tihanyi.
XANA ku ni vanhu lava Yehovha Xikwembu a va sirhelelaka ni lava a nga va sirheleliki? Xana namuntlha hi fanele hi langutela ku kutsuriwa hi singita eka madzolonga ni le makhombyeni?
Timhaka Leti Nga eBibeleni Ta Ku Sirheleriwa Ka Vanhu Hi Ndlela Ya Singita
Bibele yi ni marungula yo tala ya masingita lawa Xikwembu xi ma endleke ku sirhelela vagandzeri va xona. (Esaya 38:1-8; Mintirho 12:1-11; 16:25, 26) Matsalwa ma tlhela ma hlamusela swiyimo swin’wana, laha malandza ya Yehovha ma nga kutsuriwangiki ekhombyeni. (1 Tihosi 21:1-16; Mintirho 12:1, 2; Vaheveru 11:35-38) Kutani, swi le rivaleni leswaku Yehovha a nga sirhelela vanhu hikwalaho ka xivangelo kumbe xikongomelo xo karhi loko a swi lava. Kutani, loko Vakreste va nga sirheleriwi eka miringo yo karhi, a va fanelanga va ehleketa leswaku Xikwembu xi va tshikile. Hi fanele hi langutana ni ntiyiso wa leswaku makhombo ma nga ha wela hambi ku ri malandza lama tshembekaka ya Yehovha. Hikwalaho ka yini swi ri tano?
Lexi Endla Leswaku Malandza Yo Tshembeka Ya Xikwembu Ma Weriwa Hi Swilo Leswo Biha
Xivangelo xin’wana hileswi hinkwerhu hi nga ni ndzhaka ya xidyoho ni ku nga hetiseki loku humaka eka Adamu na Evha. Kutani, hi twa ku vava, ha xaniseka ni ku fa. (Varhoma 5:12; 6:23) Xivangelo xin’wanyana hileswi hi hanyaka emasikwini ya makumu. Bibele yi hlamusela vanhu lava hanyaka enkarhini wa hina tanihi “lava nga riki na xinakulobye xa ntumbuluko, lava nga laviki ntwanano hambi wu ri wihi, valumbeti, lava nga tikhomiki, lava nga ni tihanyi, lava nga rhandziki vunene.” (2 Timotiya 3:1-5) Vumbhoni bya leswi byi vonaka hileswi ku nga ni vanhu vo tala lava pfinyiwaka, lava dlayiwaka swin’we ni vugevenga byin’wana byo chavisa.
Malandza yo tala yo tshembeka ya Xikwembu ma tshama ni ku tirha ni vanhu lava rhandzaka madzolonga naswona minkarhi yin’wana ma hlaseriwa. Hi nga ha tikuma hi ri exiyin’weni lexi nga ni khombo swinene ntsena hikwalaho ko va hi ri endhawini yo biha hi nkarhi lowu nga fanelangiki. Ku tlula kwalaho, hi tokota ntiyiso lowu boxiweke hi Solomoni loko a vule leswaku “nkarhi ni xiendlakalo lexi nga languteriwangiki swa va wela hinkwavo.”—Eklesiasta 9:11.
Ku engetela kwalaho, muapostola Pawulo u vule leswaku Vakreste va ta xanisiwa hikwalaho ka leswi va gandzelaka Xikwembu. U te: “Entiyisweni, hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Timotiya 3:12) Emalembeni ya sweswinyana leswi swi humelerile ematikweni yo tala.
Xisweswo, vanhu lava chavaka Xikwembu na vona va khumbeka hi madzolonga, vugevenga, makhombo ya ntumbuluko kumbe rifu leri nga languteriwangiki. Sathana u ringeta ku sindzisa leswaku Yehovha u sirhelela vanhu va Yena leswaku va nga langutani ni makhombo. (Yobo 1:9, 10) Wolowo a hi ntiyiso. Hambiswiritano, hi nga tiyiseka leswaku hambiloko Yehovha a nga va kutsuli vanhu vakwe hi singita eka xiyimo xo karhi, kambe wa va sirhelela.
Ndlela Leyi Yehovha A Sirhelelaka Vanhu Vakwe Ha Yona Namuntlha
Hi ku tirhisa Rito rakwe, Yehovha u sirhelela vanhu vakwe hi nkongomiso wa le tilweni. Vumoya ni vutivi bya Bibele swi hi pfuna ku endla swiboho leswinene ni ku va ni miehleketo leyi hlutekeke, leswi nga hi pfunaka ku papalata swihoxo leswi nga fanelangiki ni ku endla swiboho swa vutlhari. (Pisalema 38:4; Swivuriso 3:21; 22:3) Hi xikombiso, ku yingisa xitsundzuxo xa Bibele emhakeni ya rimbewu, makwanga, vukarhi ni madzolonga swi pfune Vakreste eka makhombo yo tala. Nakambe hi ku papalata ku endla xinghana ni vanhu vo biha, swi hunguta ku tikuma hi ri ekhombyeni—ku va endhawini yo biha hi nkarhi lowu nga fanelangiki. (Pisalema 26:4, 5; Swivuriso 4:14) Vanhu hinkwavo lava hanyaka hi misinya ya milawu ya Bibele va tsakela vutomi bya nkoka, naswona va tala ku va ni rihanyo lerinene hi tlhelo ra mianakanyo ni ra nyama.
Nchumu lowu chavelelaka ngopfu i vutivi bya leswaku hambiloko Xikwembu xi pfumelela swilo swo biha swi humelela, xi ta nyika vagandzeri va xona matimba lama faneleke leswaku va kota ku langutana na swona. Muapostola Pawulo wa hi tiyisekisa: “Xikwembu xa tshembeka, a xi nge mi tshiki mi ringiwa hi ndlela leyi tlulaka leswi mi nga swi tiyiselaka, kambe loko mi ringiwa xi ta mi nyika ndlela yo huma, leswaku mi kota ku swi tiyisela.” (1 Vakorinto 10:13) Nakambe Bibele yi tshembisa “matimba lama tlulaka lama tolovelekeke” lama nga ta hi pfuna ku tiyisela makhombo.—2 Vakorinto 4:7.
Xikwembu Xi Endla Hi Ku Landza Ku Rhandza Ka Xona
Xana Vakreste va fanele va langutela leswaku Xikwembu xi va ponisa hi singita eka khombo rin’wana ni rin’wana leri va nga langutanaka na rona? Rhekhodo ya Bibele a yi ri seketeli langutelo ro tano.
Ina, Yehovha Xikwembu a nga ha hlawula ku nghenelela hi ku kongoma leswaku a sirhelela hambi ku ri mani la nga nandza wa yena. Kutani loko un’wana a tshemba leswaku u pone khombo ro karhi hikwalaho ka nsirhelelo wa Xikwembu, a hi fanelanga hi n’wi kaneta. Kambe loko Yehovha a hlawula ku ka a nga ngheneleli, a hi fanelanga hi vona onge a nga hi rhandzi.
A hi tiyisekeni leswaku hambi ho langutana ni ndzingo kumbe xiyimo xa njhani, Yehovha u ta ma sirhelela malandza yakwe yo tshembeka, a nga ha swi endla hi ku bakanya xiyimo xexo, hi ku hi nyika matimba ya ku tiyisela kumbe, loko hi fa, a hi pfuxela evuton’wini lebyi nga heriki emisaveni leyintshwa.—Pisalema 37:10, 11, 29; Yohane 5:28, 29.