The Bible’s Viewpoint

Xana Vakreste Va Ntiyiso Va Nga Langutela Ku Sirheleriwa Hi Xikwembu?

LESWAKU va kota ku yisa nhundzu ya mphalalo eka vagandzeri-kulobye, endzhaku ka ku khongela, Vakreste va fambe hi mimovha va longolokile va tsemakanya endhawini leyi ku nga ni nyimpi eka yona laha a swi ta endleka va dlayiwa. Va tsemakanye kahle va hlayisekile, leswi hlamariseke mavuthu lama lwaka swinene. Xana ntsumi ya Xikwembu yi lo va sirhelela?

Mpatswa wa Vakreste lava tirheke malembe yo tala va ri vatirheli wu file loko xihaha-mpfhuka xi wele ehansi laha a va vula evhangeli kona hi yindlu na yindlu. Ha yini enkarhini lowu ntsumi ya Xikwembu yi nga va kongomisanga kun’wana vona kumbe xihaha-mpfhuka?—Ringanisa Mintirho 8:26.

Loko hi ringanisa swiendlakalo leswi, hi nga ha tivutisa: Ha yini Vakreste van’wana va fa va ri karhi va endla ku rhandza ka Xikwembu, kasi van’wana, hakanyingi va ri eswiyin’weni swo chavisa swinene va pona? Xana Vakreste va nga langutela ku sirheleriwa hi Xikwembu, ngopfu-ngopfu “emasikwini ya makumu” lawa yo nonon’hwa?—2 Timotiya 3:1.

Xikongomelo Xa Nsirhelelo Wa Xikwembu

Yehovha Xikwembu u tshembise vanhu vakwe leswaku u ta va katekisa ni ku va sirhelela. (Eksoda 19:3-6; Esaya 54:17) Leswi u swi endle swi vonaka erivaleni eka lembe-xidzana ro sungula, loko vandlha ra Vakreste ra ha ri evutsongwanini. Mahlori ya tinxaka hinkwato a ya tele. Yesu u andzise swakudya leswaku a phamela magidi; yena ni valandzeri vakwe va tshungule mavabyi ni vulema bya tinxaka hinkwato, va hlongola mimoya leyi nga ni matimba yo tlula ya munhu eka vanhu lava ngheniweke hi mademona, hambi ku ri ku pfuxa vafi. Ehansi ka nsirhelelo wa Xikwembu vandlha leri a ro ho deya ri kurile ivi ri tiyisisiwa ri yima. Kambe, ku nga khathariseki nseketelo wolowo wa Xikwembu lowu nga erivaleni, Vakreste vo tala lava tshembekaka va weriwe hi leswi hi nga swi vitanaka ku fa nkarhi wa wena wu nga si fika.—Ringanisa Pisalema 90:10.

Anakanya timhaka ta Yakobo na Yohane, vana va Zebediya. Leswi a va hlawuriwe ku va vaapostola, vona swin’we na Petro, a va ri van’wana va vanghana lavakulu va Kreste.a Kambe Yakobo u dlayeriwe ripfumelo hi lembe ra 44 C.E., loko makwavo Yohane yena u hanye ku fikela eku heleni ka lembe-xidzana ro sungula. A swi ri erivaleni leswaku havambirhi a va endla ku rhandza ka Xikwembu. Ha yini Yakobo a tshikiwile a fa, kasi Yohane yena a hanya?

Xikwembu xa Matimba Hinkwawo kunene a xi ri ni matimba yo ponisa vutomi bya Yakobo. Entiyisweni, endzhaku ka ku dlayeriwa ripfumelo ka Yakobo, Petro u ponisiwe eku feni hi ntsumi ya Yehovha. Ha yini ntsumi yi nga n’wi ponisanga Yakobo?—Mintirho 12:1-11.

Wu Tirhiseriwa Ku Hetisisa Swikongomelo Swa Xikwembu

Leswaku hi twisisa xivangelo xa ku va ni nsirhelelo wa Xikwembu, hi fanele hi twisisa leswaku sweswo a swo endleriwa leswaku vanhu va hanya nkarhi wo lehanyana ntsena kambe swi endleriwa leswaku ku sirheleriwa nchumu wun’wana wa nkoka swinene, ku hetiseka ka xikongomelo xa Xikwembu. Hi xikombiso, ku pona ka vandlha ra Vukreste hinkwaro i xitiyisekiso hikuva ri fambisana swinene ni ku hetiseka ka xikongomelo xolexo. Hambiswiritano, Kreste u byele vadyondzisiwa vakwe erivaleni leswaku vona ha un’we-un’we a va ta fa hikwalaho ka ripfumelo ra vona. Endzhaku ko vula leswi, Yesu a nga kandziyisanga ku ponisiwa hi hlori, kambe ‘ku tiyisela ku fika emakumu.’ (Matewu 24:9, 13) Mhaka ya leswaku vanhu van’wana va sirheleriwile, kasi van’wana a va sirheleriwanga, a swi vuli leswaku Xikwembu xi ya hi nghohe. Entiyisweni Xikwembu xi tirhisa munhu loyi a nga exiyin’weni lexinene leswaku xi hetisisa xikongomelo xa xona, lexi eku heteleleni xi nga ta vuyerisa vanhu hinkwavo.

Tanihi leswi entirhweni wa Xikwembu, ku fa nkarhi wu nga si fika swi nga humelelaka, Vakreste va fanele va va ni langutelo leri ringaniseriweke ro kota ra Vaheveru vanharhu lavo tshembeka lava va gweveriweke rifu hikwalaho ko gandzela Xikwembu. Va byele hosi ya Babilona va ku: “Loko ŝi nga endleka leŝaku Šikwembu ša hina leši hi ši tirelaka, ši hi ponisa, ši ta hi ponisa e kheleni ra nḍilo lo’wo lev̌a ni v̌okweni ra wena, hosi. Ni loko ŝi nga ri ŝeŝo, tiv̌a, wena hosi, leŝaku hi nga ka hi nga tireli ŝikwembu ŝa wena, hi nga ka hi nga nkhinsami e mahlweni ka šifaniso ša nsuku leši u ši yimiseke.”—Daniyele 3:17, 18.

Yehovha u ponise vutomi bya Petro na Yohane hikwalaho ka xiphemu xa vona lexikulu eku hetisiseni ka xikongomelo xakwe. Petro u tirhisiwe ku “tiyisa” vandlha hi ku endla ntirho wa vurisi, lowu wu katseke ni ku tsala tibuku timbirhi ta Bibele leti huhuteriweke. (Luka 22:32) Yohane u tsale ntlhanu wa tibuku ta Bibele naswona a a ri ‘phuphu’ evandlheni ro sungula.—Vagalatiya 2:9; Yohane 21:15-23.

Leswaku Yehovha u wu hlawurisa ku yini nkarhi wo nghenelela ha wona ni ndlela yo nghenelela ha yona evuton’wini bya malandza yakwe, a swi koteki ku swi vona ka ha ri emahlweni. Leswi ntsena hi nga swi vulaka hi tiyisekile hi leswaku Kreste u tshembise valandzeri vakwe leswaku u ta va na vona “masiku hinkwawo, ku ko ku hela misava.” (Matewu 28:20) Entiyisweni, u ta va ‘na hina’ hi nkongomiso wa tintsumi entirhweni wo chumayela. (Matewu 13:36-43; Nhlavutelo 14:6) Handle ka tinhlamuselo leti to anama, a hi nge vuli hi ku kongoma leswaku mpfuno wa Xikwembu wu ta kombisisiwa ku yini ni leswaku i mani a nga ta sirheleriwa hi Xikwembu. Ku vuriwa yini hiloko Mukreste a anakanya leswaku u sirheleriwile ni ku kongomisiwa hi Xikwembu? Tanihi leswi ku nga riki na ndlela leyi tiyisekeke yo swi pfumela kumbe ku swi kaneta, ku hava munhu loyi a faneleke ku kaneta leswi munhu yoloye a swi vuleke hi mbilu ya yena hinkwayo.

Xana Xikwembu Xi Ni Tihanyi?

Xana mhaka ya leswaku Xikwembu xi pfumelela Vakreste va fa yi kombisa leswaku hi ndlela yo karhi a xi na ntwela-vusiwana? Nikatsongo. (Eklesiasta 9:11) Yehovha u endla matshalatshala yo hlayisa vutomi bya hina ku nga ri ntsena swa malembe kumbe makume ya malembe ma nga ri mangani ntsena, kambe hi laha ku nga heriki. Exiyin’weni xakwe xa le henhla laha a nga kona, u lawula swiendlakalo swa vuhlayiseki bya hilaha ku nga heriki bya munhu ha un’we loyi a n’wi rhandzaka kumbe loyi a taka eka yena. (Ringanisa Matewu 18:14.) Ku hetiseka ka xikongomelo xa xona swi ta vula ku suseriwa makumu ka nchumu wihi na wihi lowu wu hi dyiseke mbitsi emafambiselweni lawa ya swilo—hambi ku ri rifu. Maendlelo ya Xikwembu ya rharhanganile, naswona ya hetisekile swonghasi, lerova muapostola Pawulo u susumeteleke ku vula leswi: “Vukosi bya Xikwembu, ni vutlhari bya xona, ni vutivi bya xona, a hi ku enta ka swona! Makungu ya xona ma nga pimisiwa ku yini, ni tindlela ta xona ti nga twisisiwa ku yini xana?”—Varhoma 11:33.

Tanihi leswi ku nga riki na nchumu lowu nga hi hambanisaka ni rirhandzu ra Xikwembu, xivutiso lexi Mukreste un’wana ni un’wana a faneleke ku tivutisa xona hi lexi nge ‘Xana Xikwembu xi ta ndzi sirheleta ke?’ kambe u fanele ku tivutisa leswi ‘Xana Yehovha wa ndzi amukela ke?’ Loko a hi amukela, u ta hi nyika vutomi lebyi nga heriki—ku nga khathariseki leswaku ku humelela yini eka hina emafambiselweni lawa ya swilo. Loko maxangu wahi na wahi emafambiselweni lawa—hambi ri ri rifu—ma ringanisiwa ni vutomi lebyi nga heriki, lebyi hetisekeke, ma ta vonaka ma ri lama “nga riki na ku tika ngopfu, la[m]a ya nga ya nkarhinyana ntsena.”—2 Vakorinto 4:17.

[Tinhlamuselo ta le hansi]