Ku Rhula Ka Misava A Ko Va Norho Ntsena!

LOKO Alfred Nobel o languta leswi humeleleke eka lembe-xidzana leri hundzeke, xana a a ta va ni ntshembo wa ku rhula ka misava? Handle ko kanakana, a ta tsaka ku tiva leswaku vanhu vo tala va endle matshalatshala lamakulu ya ku herisa nyimpi. Nilokoswiritano, a a ta sala a langutane ni ntiyiso wo vava. Profesa Hugh Thomas u wu katsakanya kahle: “Lembe-xidzana ra vu-20—hambileswi ri tiseke nhluvuko naswona ri kandziyiseke ndlela leyi hulumendhe yi va khathalelaka ha yona lava nga swisiwana—kambe ku tirhisiwe matlhari yo tala ya nyimpi, xihaha-mpfhuka xo jikijela tibomo lexi vuriwaka B-52, tibomo ta nyutliya swin’we ni tibomo leti bulukaka. Ku ve nkarhi wa tinyimpi leti dlayeke vanhu vo tala ku tlula hambi ku ri rini.” Thomas u engetela hi ku vula leswaku “hikwalaho ka sweswo, se swi to ya hi mavonelo ya munhu, leswaku u ri teka ri tise nhluvuko kumbe doo!”

Xana sweswi swi vonaka onge ku rhula ku le kusuhi ku tlula loko hi nghena eka lembe-xidzana ra vu-21? Doo! Loko yi kombetela eka nhlaselo wa vutherorisi lowu veke kona le Dorobeni ra New York ni le Washington, D.C., hi September 11, 2001, magazini wa Newsweek wu te: “Emisaveni leyi swihaha-mpfhuka swa 767 swi nga ha hundzuriwaka swi va matlhari, ku hava lexi nga taka xi nga endleki, naswona lexi endlekaka, xi nga ka xi nga siveriwi.”

Van’wana va vula leswaku ku fanele ku endleka swilo swimbirhi, hi kona ku nga ta va ni ku rhula ka misava: Xo sungula, vanhu va fanele va ri cinca ngopfu langutelo ra vona ni ndlela leyi va tikhomaka ha yona; xa vumbirhi, matiko hinkwawo ma fanele ma va ehansi ka hulumendhe yin’we. Bibele yi profete hi nkarhi lowu ku nga ta fikeleriwa ku rhula ha wona—kambe ku nga ri hi matshalatshala ya vanhu. Pisalema 46:9 yi vula leswi malunghana ni Muvumbi, ku nga Yehovha Xikwembu: “U herisa tinyimpi ku ya fika emakumu ya misava.” Xana Xikwembu xi ta swi endlisa ku yini leswi? Hi ku tirhisa Mfumo, lowu vanhu vo tala va wu khongeleleke hi timbilu ta vona hinkwato. Mfumo wolowo a hi xiyimo lexi nga twisisekiki xa mbilu, kambe i hulumendhe ya xiviri leyi ha yona Xikwembu xi nga ta simeka ku rhula emisaveni, ku suka emakumu man’wana ku ya emakumu man’wana. Esaya, muprofeta la huhuteriweke u profete leswaku vanhu lava nga ta fumiwa hi hulumendhe yoleyo “a va nge he dyondzi nyimpi.” (Esaya 2:4) Hi nongonoko wa misava hinkwayo wo dyondzisa, vanhu va ta dyondza ku hanya hi ku rhula kutani “va ta fula mabanga ya vona ma va swikomu ni mafumu ya vona ma va swikhutulo.”

Timbhoni ta Yehovha ti karhi ti endla leswi fanaka nisweswi. Ta ala ku lwa ni vanhu-kulobye, hambileswi ti humaka eka mintlawa ya tinxaka-xaka naswona ti tshamaka ematikweni yo hambana-hambana lama tlulaka 200. Leswi ti nga hlanganyeliki enyimpini hambiloko ti tshama emisaveni leyi nga ni nyimpi, i vumbhoni bya leswaku ku rhula a ko va Norho ntsena, kambe ku ta va kona hakunene.

Xana u nga swi tsakela ku dyondza leswi engetelekeke hi ntshembo lowu wa xiviri lowu seketeriweke eBibeleni? Hi kombela u tsalela vakandziyisi va magazini lowu, u tirhisa adirese leyi kumekaka eka tluka 5 leyi nga ekusuhi ni laha u tshamaka kona kumbe u tihlanganisa ni Timbhoni ta Yehovha endhawini ya ka n’wina.