Nkongomiso Lowu Tshembekaka Hi Vumundzuku

XANA ku nga tshembeki ka vungoma bya tinomboro ni mikhuva yin’wana ya ku hlahluva swi vula leswaku a hi na yona ndlela yo tiva hi vumundzuku? A swi tano!

Tinomboro leti nga twisisekiki a ti nge swi koti ku byela vanhu hi vumundzuku. Kambe “Xikwembu lexi hanyaka” lexi “vulaka ka ha ri eku sunguleni leswi nga ta humelela emakumu,” xi swi kotile ku va byela. Sweswo xi swi vula eRitweni ra xona, ku nga Bibele. (1 Timotiya 4:10; Esaya 46:10) Nakambe leswi vuriwaka hi Xikwembu lexi hanyaka, ku nga ri leswi swi vuriwaka hi vangoma va tinomboro, hi swona ‘leswi kotaka ku twisisa miehleketo ni makungu ya mbilu’ kutani swi nga endla leswaku u tiva leswi nga ku pfunaka ni leswi nga endlaka leswaku swilo swi ku fambela kahle.—Vaheveru 4:12.

Muvumbi wa hina, ku nga yena Mutsari wa Bibele, hi yena ntsena la nga vulaka hilaha ku pakanisaka leswaku ku ta endleka yini enkarhini lowu taka. Leswi swi vangiwa hileswi Xikwembu xi nga ni matimba hinkwawo, naswona xa tshembeka minkarhi hinkwayo. Yehovha Xikwembu u te: “Ndzi swi vurile; ndzi ta tlhela ndzi swi tisa.” (Esaya 46:11) Endzhaku ka loko Yoxuwa a rhangele Vaisrayele ku nghena eTikweni ra Xitshembiso, u vule marito lawa hi ku tiyiseka: “Ku hava xitshembiso lexi tsandzekeke eka switshembiso hinkwaswo leswinene leswi Yehovha a swi tshembiseke yindlu ya Israyele; hinkwaswo swi hetisekile.”—Yoxuwa 21:45; 23:14.

Bibele yi ni vuprofeta byo tala lebyi nga ta hetiseka enkarhini lowu taka. Byin’wana bya byona hi lebyi vulaka leswaku ku ta fika nkarhi lowu ha wona misava yi nga ta basisiwa, ku susiwa vubihi hinkwabyo kutani yi endliwa paradeyisi. (Pisalema 37:10, 11; Swivuriso 2:21, 22) Xana vumundzuku byo tano bya ku tsakisa? Xana wa kholwa leswaku Muvumbi wa hina u ni vutlhari ni matimba ya ku lulamisa swilo eka pulanete leyi ya hina? Loko swi ri tano, u ta tsakela ku tiva leswi Bibele yi swi tshembisaka hi vumundzuku bya misava leyi.a

Hikwalaho, tirhisa nkarhi wa wena hi vutlhari sweswi—u nga ringeti ku lava ku tiva vumundzuku bya wena hi ku kambisisa tinomboro, kambe lwela ku twisisa Bibele ni vuprofeta bya yona hilaha ku pakanisaka. Timbhoni ta Yehovha ti lunghekele ku ku pfuna leswaku u kuma vutivi lebyi engetelekeke hi vumundzuku hilaha byi paluxiweke hakona eRitweni ra Xikwembu, ku nga Bibele.

[Nhlamuselo ya le hansi]