TINHLAMULO TA SWIVUTISO SWA BIBELE

Ha yini ku ri ni vuprofeta eBibeleni?

Bibele yi tamele vuprofeta lebyi nga ni vuxokoxoko byo tala. A ku na munhu loyi a nga hi byelaka hi ku kongoma leswaku ku ta endleka yini mundzuku. Kambe ku hetiseka ka vuprofeta lebyi nga eBibeleni swa hi tiyisekisa leswaku Bibele i Rito ra Xikwembu.—Hlaya Yoxuwa 23:14; 2 Petro 1:20, 21.

Vuprofeta byo tala lebyi se byi hetisekeke byi hi endla leswaku hi va ni ripfumelo eka Xikwembu. (Vaheveru 11:1) Nakambe bya hi tiyisekisa leswaku switshembiso swa Xikwembu hi vumundzuku lebyinene swi ta hetiseka. Vuprofeta bya le Bibeleni byi hi nyika ntshembo lowu tiyeke hakunene!—Hlaya Pisalema 37:29; Varhoma 15:4.

Vuprofeta lebyi nga Bibeleni byi hi pfuna njhani?

Vuprofeta byin’wana byi lemukisa malandza ya Xikwembu leswaku ma teka goza ro karhi. Hi xikombiso, loko Vakreste va khale va vona vuprofeta byo karhi byi hetiseka, va balekile eYerusalema. Endzhaku ka sweswo, loko muti wolowo wu lovisiwa hikwalaho ka leswi vanhu va kona vo tala va landzuleke Yesu, Vakreste a va ri ekule swinene endhawini leyi hlayisekeke.—Hlaya Luka 21:20-22.

Namuntlha vuprofeta lebyi se byi hetisekeke byi kombisa leswaku ku nga ri khale Mfumo wa Xikwembu wu ta herisa mimfumo ya vanhu leyi nga kona. (Daniyele 2:44; Luka 21:31) Hikwalaho, i swa nkoka leswaku un’wana ni un’wana a teka goza hi xihatla, a endla leswi nga n’wi pfunaka leswaku a amukeleka eka Hosi Yesu Kreste loyi Xikwembu xi n’wi hlawuleke.—Hlaya Luka 21:34-36.