Ku Tirhisa Xalamuka! Hi Ndlela Leyinene

VANESSA, loyi a nga Mbhoni ya Yehovha naswona a tshamaka eUnited States, loko a ri ni malembe ya 16, u boheke ku tsala xiviko xa xikolo hi nhloko-mhaka ya ku nyenya swakudya. U ri: “Ndzi endle ndzavisiso, kambe a ri nga nyawuli rungula leri ndzi ri kumeke. Ndzi bule ni vatswari va mina hi mhaka leyi, kutani va ringanyete leswaku ndzi kamba mhaka leyi eminkandziyisweni ya hina.”

Hi ku kambisisa eminkandziyisweni ya Timbhoni ta Yehovha, Vanessa u swi kotile ku kuma rungula ro tala ra xiviko xakwe. U ri: “Kambe ntirho lowu a ndzi nyikiwe wona a wu nga heleli laha. Nakambe a ndzi boheka ku bula hi mhaka leyi emahlweni ka mudyondzisi ni le mahlweni ka swichudeni swa 20!” Xana Vanessa a a ta langutana njhani ni ntlhontlho lowu?

Emisaveni hinkwayo Timbhoni ta Yehovha ta leteriwa eXikolweni xa Vutirheli bya le Tilweni, lexi khomeriwaka eTiholweni ta tona ta Mfumo, leswaku ti kota ku vulavula emahlweni ka vanhu, Vanessa na yena u leteriwa exikolweni xexo. Vanessa u ri: “Hikwalaho ka xikolo lexi, hi va hi lungheke kahle leswaku hi ya evutirhelini ni ku vulavula ni van’wana. Nakambe hi byeriwa leswi hi faneleke hi antswisa eka swona leswaku vanhu va ta hi twa kahle loko hi vulavula.” Ku tikarhata ka Vanessa emhakeni ya xiviko xakwe xa le xikolweni ku ve ni vuyelo byihi? U ri: “Ndzi nyikiwe timaraka to tala ku tlula hinkwavo.”

Vanessa i wun’wana wa vantshwa vo tala lava yi tirhisaka hi ndlela leyinene minkandziyiso ya hina leyi sekeriweke eBibeleni ni ndzetelo wa swilo swa moya. Vantshwa volavo va fanele va bumabumeriwa, hikuva va landzela xitsundzuxo xa Eklesiasta 12:1, lexi nge: “Sweswi tsundzuka Mutumbuluxi wa wena Lonkulu emasikwini ya vujaha bya wena.”