Xiviko Xa Vahuweleri Va Mfumo
Xikwembu Xa Kurisa Le Alaska
EHANSI ka gamboko ni ayisi, mbewu leyitsongo yi yimele nkarhi wo mila yi kula. Ku nga si hela tin’hweti tinharhu to koma leti endlaka ximumu xa le Alaska, mbewu ya khavichi leyi mpimo wa yona wu nga timilimitara tinharhu yi nga kula yi tika 40 wa tikhilogiramu! Ina, tiko leri vo tala va tshameke va ehleketa leswaku i kwandzasi, mananga lama titimelaka ri nga humesa mihandzu yo tala.
Leswi i ntiyiso ngopfu-ngopfu hi nsimu ya moya le Alaska. Etikweni rolero ra vuxika byo leha, Timbhoni ta Yehovha ti ya emahlweni ti byala mbewu ya Mfumo. Tanihi le swiphen’wini swin’wana swa misava, Xikwembu xi mirisa mbewu etimbilwini leti noneke.—1 Vakorinto 3:6, 7.
● Mbhoni leya ha riki muntshwa leyi vuriwaka Vanessa, loko yi ri ebazini ra xikolo yi xiye xichudeni-kulobye, Ann, loyi minkarhi hinkwayo a tshama a ri yexe. Ann a vonaka a ri ni gome, kutani Vanessa u vitane Ann leswaku a ta tshama na yena. A swi hlamarisi leswi Ann a ri na gome! Mana wa yena u dlayiwe hi vuvabyi bya mbilu, naswona endzhakunyana, tata wa yena a dlayiwa hi khensa. Hi yona mhaka Ann a tshama ni maxaka ya yena le Alaska.
Hi Mugqivela wun’wana loko a ri entirhweni wa nsimu, Vanessa u nghene ekaya ra munghana wa yena lontshwa ivi a n’wi siyela broxara leyi nge Xana Xikwembu Xa Hi Khathalela Hakunene? Ann u lave muntshwa yoloye wa Mbhoni exikolweni hi Musumbhunuku la landzeleke. Ann a ri ni swivutiso swo tala swa Bibele, leswi Vanessa a koteke ku swi hlamula. U vutisile a ku: “Minhlangano ya n’wina mi yi khomela kwihi?” Madyambu wolawo Ann u ve kona enhlanganweni wa yena wo sungula eHolweni ya Mfumo.
A swi n’wi tekelanga nkarhi wo leha n’wana loyi a feriweke hi vatswari wa malembe ya 17 hi vukhale ku kuma ‘vatatana’ na ‘vamanana’ vo tala, hilaha Yesu a tshembiseke hakona. (Matewu 19:29) A swi tsakisa swinene ku vona Ann la tsakeke ni la n’wayitelaka a kombisa ku tinyiketela ka yena eka Yehovha hi nkhuvulo wa mati eNtsombanweni wa Muganga wa “Varhumiwa Va Ku Rhula Ka Xikwembu”!
● Etindhawini ta le kule ta xifundzha lexikulu xa Alaskan Arctic—laha swimitana swi tsalanganeke hi madzana ya tikhilomitara emananga—xihaha-mpfhuka xa Sosayiti ya Watch Tower xa tinjhini timbirhi xi tirhisiwe ku byala mbewu ya Mfumo etindhawini ta 150. Kambe ku kula hi tlhelo ra moya loku endliwaka hi dyondzo ya nkarhi na nkarhi ya Bibele ku titshege hi ku tsalelana. Tanihi leswi vo tala va lolohaka ku tsala mapapila, mudyondzisi wa Bibele u fanele a va ni vuswikoti leswaku a ta endla ku tsakela ka xichudeni ku tshama ku ri kona. Xana leswi swi hetisisiwa hi ndlela yihi?
Kathy a a fambisa dyondzo ya Bibele leyi endlaka nhluvuko ya nkarhi na nkarhi na Edna, hambileswi a va tshama etindhawini leti nga ekule hi tikhilomitara ta 600, ku suka eka yin’wana ku ya eka yin’wana! Ematshan’weni yo kopa swivutiso eka buku yo karhi, Kathy a a tsala swivutiso eka phepha leri hambaneke ivi a siya ndhawu yo tsalela tinhlamulo eka yona. Loko Edna a ta va a tsale tinhlamulo, Kathy a a hlamula a tsala tinhlamuselo leti lavekaka leswaku a veka yinhla erivaleni. Kathy u ri: “A ndzi vekele etlhelo madyambu ya Ravunharhu leswaku ma va ya ‘dyondzo’ ya hina, naswona ndzi ringete ku namarhela eka wona hilaha a ndzi ta endla hakona eka dyondzo ya Bibele leyi vekeriweke nkarhi. A ndzi tlhela ndzi rhumelela Edna mvhilopho leyi nga ni adirese ya mina ni xitempe. Tanihi leswi papila a ri famba mavhiki mambirhi, ku dyondza hi ku tsalelana papila ku vonake ku hlwela.”
Anakanya ndlela leyi Kathy na Edna va tsakeke ha yona loko va hlangana entsombanweni wa muganga le Anchorage endzhaku ka tin’hweti ta khume va ri karhi va dyondza hi ku tsalelana mapapila! Timbhoni na tona a ti tsakile ku va swin’we ni swichudeni swa Bibele ni vanhu van’wana lava tsakelaka lava humaka eswimitanini swin’wana leswi nga swoxe swa le Alaska.
Hambileswi nkarhi wun’wana ku kula ku nga ha vonakaka ku hlwela, “swimilana” swin’wana swi kula hi ku hatlisa loko swi ri eku vonakaleni ka ntiyiso. Hi xiringaniso, vadzunisi va Yehovha lavantshwa lava tlulaka dzana va khuvuriwa lembe rin’wana ni rin’wana eAlaska! Hi ri, “Ha ku nkhensa Yehovha,” hi ku kurisa mbewu!