I Mani La Nga Ta Tisa Ku Rhula Loku Nga Heriki?

HA YINI Xikwembu xi nga swi hlamulanga swikhongelo swa ku rhula swa varhangeri va vukhongeri byo hambana-hambana bya misava? Bibele yi nyikela nhlamulo leyi tsakisaka. A hi swona leswaku Xikwembu a xi na mhaka ni ku rhula—xi ku lava ngopfu ku rhula ku tlula vafundhisi lava khongelelaka ku rhula. Entiyisweni, Xikwembu ana se xi endle malunghiselelo lama faneleke ya ku rhula. Ana se xi teke magoza lama hetisekeke ya ku fikelela pakani yoleyo. Xi tivise vanhu hi makungu ya xona. Kambe, leswi twisaka ku vava, vukhongeri bya misava byi swi bakanyele ekule leswi Xikwembu xi swi vuleke.

Xikwembu xi tshembise “mbewu,” ku nga mufumi, loyi Bibele yi yaka emahlweni yi bula ha yena, naswona yi nyikela vuxokoxoko byo tala ha yena. (Genesa 3:15; 22:18; 49:10) Muprofeta Esaya, loyi a dumeke hi vuprofeta byakwe byo tala lebyi vulavulaka hi Mesiya, u tsale leswaku Murhangeri loyi ku profetiweke ha yena u ta va “Hosana ya Ku Rhula” emisaveni nileswaku ehansi ka mfumo wakwe, ‘ku rhula a ku nge vi na makumu.’ (Esaya 9:6, 7) Leswi a nga Mufumi wa le tilweni, u ta nghenelela leswaku a herisa vuhomboloki ni ku hundzula misava yi va paradeyisi, naswona ku pfumala vululami, vuvabyi, vusweti kumbe rifu, a swi nge he vi kona. Ku ta va ni ku rhula ni vutomi lebyi nga heriki. (Pisalema 72:3, 7, 16; Esaya 33:24; 35:5, 6; Daniyele 2:44; Nhlavutelo 21:4) Xana leswi swi ta endleka rini?

Ku Rhula Ka Misava Ku Le Kusuhi

Yesu u byele vadyondzisiwa vakwe leswaku ku hela ka fambiselo leri ro biha ra swilo ni ku sungula ka vandla lerintshwa ra vanhu swi ta rhangeriwa hi swiendlakalo leswi chavisaka emisaveni, leswi nga ta humelela hi nguva yin’we. (Matewu 24:3, 7-13) Swo tala swa swiendlakalo leswi—tinyimpi, ku kayivela ka swakudya, ku tsekatseka ka misava, loko hi boxa swi nga ri swingani ntsena—a swi endleka eka nguva yin’wana ni yin’wana. Kambe a swi si endleka hinkwaswo hi nkarhi wun’we emisaveni hinkwayo ku fana ni le nguveni ya hina. Naswona mimbuyelo ya makhombo wolawo yi vange makhombo lamakulu ku tlula hambi ku ri rini eku sunguleni, hikuva misava se yi ni vaaki vo tala ngopfu.

Xiendlakalo xin’wana lexi profetiweke hi Bibele i ku onheteriwa ka mbango loku yaka emahlweni. (Nhlavutelo 11:18) Tlhandlakambirhi, ku fanele ku endliwa ntirho wo lemukisa vanhu emisaveni hinkwayo, wa ku chumayeriwa ka ‘mahungu lamanene ya mfumo,’ makumu lama profetiweke ma nga si fika.—Matewu 24:14.

Ku hetiseka ka vuprofeta byebyo i mahungu lamanene eka vanhu lavo tshembeka. Misava leyintshwa ya ku rhula loku hetisekeke leyi ku profetiweke ha yona yi kwala nyongeni! Sweswo swi ta vula ku herisiwa ka rivengo ni vutherorisi. Bibele ya hlamusela: “A va nge endli swo biha kumbe ku onha entshaveni ya mina hinkwayo yo kwetsima; hikuva kunene misava yi ta tala hi ku tiva Yehovha kukota mati lama funengetaka lwandle.”—Esaya 11:9.

Swikhongelo Leswi Xikwembu Xi Swi Yingisaka

Ku khongela eka Xikwembu a hi vuhava kumbe nchumu lowu nga vuriki nchumu. EBibeleni, Yehovha u vitaniwa “Mutwi wa xikhongelo.” (Pisalema 65:2) Xisweswo, nkarhi hinkwawo u yingisa swikhongelo swo tala leswi khongeriwaka hi vanhu vo tshembeka emisaveni. Kambe, xana swi kona swilaveko leswi hi faneleke hi swi fikelela leswaku swikhongelo swa hina swi yingisiwa? Bibele yi ringanyeta leswaku vanhu va timbilu letinene lava dyondzaka ntiyiso malunghana ni Xikwembu va fanele va va “vagandzeri va ntiyiso,” lava xi gandzelaka “hi moya ni ntiyiso.” (Yohane 4:23) Swikhongelo swa lava va nga swi endliki leswi xi swi lavaka a swi yingisiwi: “Loyi a kendlusaka ndleve yakwe leswaku yi nga yingisi nawu [wa Xikwembu]—hambi ku ri xikhongelo xakwe i nchumu wo nyenyetsa.”—Swivuriso 28:9.

Khombo ra kona, namuntlha varhangeri vo tala va vukhongeri a va dyondzisi hambi ku ri ku khongela malunghana ni xikongomelo xa Xikwembu xa ku tisa ku rhula. Ematshan’weni ya sweswo, va khongelela tihulumendhe ta vanhu leswaku ti tlhantlha swiphiqo swo tano, kasi Rito ra Xikwembu ri swi veka erivaleni leswaku “munhu loyi a fambaka a nga ka a nga wu kongomisi nkondzo wa yena.”—Yeremiya 10:23.

Swi profetiwile leswaku “exiphen’wini xo hetelela xa masiku,” enguveni ya hina, vanhu lava rhandzaka ku rhula va ta khitikanela “entshaveni ya yindlu ya Yehovha” yo fanekisela—hileswaku, evugandzerini bya ntiyiso. Vanhu volavo a va ta cinca ndlela leyi va hanyaka ha yona: “Va ta fula mabanga ya vona ma va swikomu ni mafumu ya vona ma va swikhutulo. Tiko a ri nge tlakuseli tiko rin’wana banga, naswona a va nge he dyondzi nyimpi.”—Esaya 2:2-4.

Xana wu kona ntlawa wo karhi wa vagandzeri lowu ringetaka ku hanya hi ku landza marito wolawo? Kumbe, xana vukhongeri hinkwabyo byo vulavula ntsena hi ku rhula kasi hi hala tlhelo byi kondletela nyimpi? Enkarhini lowu taka loko u hlangana ni Timbhoni ta Yehovha, ha ku rhamba leswaku u bula na tona hi mhaka leyi ya ku rhula kutani u ta swi vona leswaku hi byihi vukhongeri lebyi dyondzisaka vanhu leswaku va kondletela ku rhula ni vanhu hinkwavo.