Kuma Rungula Leri Kongomeke
Swa tika ku kuma rungula leri kongomeke eka timhaka to hambana-hambana. Tihulumendhe ni tikhampani a ti boxi ntiyiso hinkwawo. Swi-haxa-mahungu swo tala hakanyingi swi tshembisa ku boxa ntiyiso hinkwawo loko swi vika, kambe a swi endli tano. Hakanyingi madokodela a ma hi hlamuseli hi ku helela ndlela leyi mirhi leyi ma hi nyikaka yona yi nga ha hi vavisaka ha yona. Xana yi kona ndlela yo kuma rungula leri u nga ri tshembaka?
Loko Internet yi fika yi hoyozeriwe hi vanhu vo tala tanihi ndlela yo kuma rungula leri tshembekaka leri humaka ematikweni hinkwawo ya misava. Sweswo swa koteka ntsena loko u tiva leswaku u ta pfula kwihi. “Loko yi tirhisiwa kahle, Internet yi nga dyondzisa vanhu vo tala hi ku hatlisa ku tlula nchumu hambi wu ri wihi. Loko yi nga tirhisiwi kahle, yi nga ha onha vanhu vo tala hi ku hatlisa ku tlula nchumu hambi wu ri wihi,” hi ku vula ka mutsari un’wana wa The New York Times.
Mutsari loyi u ya emahlweni a ku: “Hikuva Internet yi ni ‘thekinoloji’ leyi tsakisaka vanhu, vanhu lava nga dyondzekangiki va ri tshemba swinene rungula ra yona. A va swi xiyi leswaku loko Internet yi tirhisiwa hi ndlela yo biha, yo va thyaka rinene: fambiselo ra elektroniki leri tameleke rungula leri nga hlutiwangiki, leri nga riki rinene nikatsongo.” Khombo ra kona, hilaha mutsari a kombiseke hakona, a yi kona progreme ya khompyuta leyi nga tirhisiwaka ku sula rungula ro tano.
Un’wana ni un’wana a nga nghenisa rungula rin’wana ni rin’wana eka Internet, eka magazini kumbe ebukwini. Kutani, hi fanele hi tirhisa vutlhari naswona hi tidyondzisa leswaku hi nga tsutsumeli ku pfumela xin’wana ni xin’wana lexi hi xi hlayaka. Hina lava hi lavaka rungula leri kongomeke hi fanele hi kambisisa ku vona loko rungula ra kona ri huma eka xihlovo lexi tshembekaka. Leswi swi nga ha lava nkarhi wo leha. Kambe endzhaku ko kambisisa ni ku kuma vuxokoxoko hinkwabyo, hi ta va ni miehleketo leyi hlutekeke, hi ta endla swiboho leswi kongomeke naswona hi ta tiyiseka loko hi endla swiboho swa nkoka.