Ndlela Leyi Bibele Yi Nga Va Pfunaka Ha Yona Lava Nga Ni Vuvabyi Bya Chukele

KU TIKHOMA ni ku va ni langutelo lerinene swi nga va pfuna ngopfu hi tlhelo ra rihanyo vanhu lava khomiweke hi vuvabyi bya chukele. Kambe leswaku vavabyi va kota ku hlakulela timfanelo teto, va fanele va seketeriwa nkarhi hinkwawo. Kutani mindyangu ni vanghana a va fanelanga va endla leswaku munhu la nga ni vuvabyi bya chukele a navela ku dya swakudya leswi nga fanelangiki, kumbexana hi ku vula leswaku, ‘Wo tlhavanyana kan’we, a swi nge ku endli nchumu.’ Harry loyi a nga ni vuvabyi bya mbilu ni bya chukele bya Type 2 u ri: “Nkatanga wa ndzi seketela. A nga veki swakudya leswi ndzi nga fanelangiki ndzi swi dya. Kambe van’wana a va yi twisisi mhaka leyi, naswona a va swi tivi leswaku swi tika njhani ku tshika swakudya u ri karhi u swi vona.”

Loko u tshama ni munhu la nga ni vuvabyi bya chukele, tsundzuka misinya yimbirhi ya nawu leyi landzelaka leyi kumekaka eBibeleni: “Un’wana ni un’wana a a hambete a lava leswaku ku pfuneka un’wana, hayi yena n’wini,” naswona “Rirhandzu a ri . . . lavi leswi vuyerisaka rona ntsena.”—1 Vakorinto 10:24; 13:4, 5.

Hinkwavo lava khathalaka hi rihanyo ra vona—loko va ri ni vuvabyi bya chukele kumbe va nga ri na byona—va fanele va tikhoma loko swi ta emhakeni ya swakudya. Bibele ya pfuna emhakeni leyi, hikuva yi hlamusela leswaku un’wana ni un’wana u fanele a tikhoma. Xana u tiyimisele ku hlakulele mfanelo leyi evuton’wini bya wena? (Vagalatiya 5:22, 23) Mpfuno wun’wana wu nga kumeka eswikombisweni swa le Bibeleni, swo kota swa muapostola la nga Mukreste Pawulo. Un’wana loyi a nga ni vuvabyi bya chukele u ri: “A a ri ni mutwa lowu nga sukiki enyameni, kambe a a hambeta a tirhela Xikwembu hi ku tshembekaka. Kutani na mina ndzi ta endla leswi fanaka!”

Ina, Pawulo a nga tikarhatanga hi xiyimo lexi a a nga ta kota ku xi cinca kambe u ye emahlweni a bindzula entirhweni wa vurhumiwa. (2 Vakorinto 12:7-9) Dustin la nga ni malembe ya 18, u tswariwe a ri bofu, naswona vuvabyi bya chukele byi n’wi khome a ha ri ni malembe ya 12. U tsarile: “Ndza swi tiva leswaku a nga kona loyi swilo hinkwaswo swi n’wi fambelaka kahle. Ndzi yi langutele hi mahlo ngati misava leyintshwa ya Xikwembu laha ku nga taka ku nga ri na loyi a nga ni vuvabyi bya chukele. Leswi, ko va vuvabyi bya nkarhinyana eka mina. Byi ngo ho teka nkarhi wo leha ku tlula mukhuhlwana, kambe eku heteleleni byi ta hela.”

Loko Dustin a vula sweswo, a a anakanya hi ntshembo wa le Bibeleni wa rihanyo leri hetisekeke emisaveni ya paradeyisi ehansi ka Mfumo wa Xikwembu. (Nhlavutelo 21:3, 4) Rito ra Xikwembu ri tshembisa leswaku ehansi ka vulawuri byebyo bya Xikwembu, “ku hava munhu la . . . nga ta ku: ‘Ndza vabya.” (Esaya 33:24; Matewu 6:9, 10) Xana u nga tsakela ku dyondza leswi engetelekeke malunghana ni xitshembiso lexi xi sekeriweke eBibeleni? Tsalela Timbhoni ta Yehovha ta laha u tshamaka kona, kumbe u tsalela vakandziyisi va magazini lowu eka adirese leyi faneleke eka leti longoloxiweke eka tluka 5.

[Xifaniso lexi nga eka tluka 12]

Ku tikhoma ni ku va ni langutelo lerinene i swa nkoka