Langutelo Ra Bibele

Xana Vun’we Bya Vukreste Byi Lava Leswaku Va Fana Etimhakeni Hinkwato?

NAMUNTLHA vukhongeri byi vonaka byi avanile. Hambi ku ri exikarhi ka vanhu lava nghenaka kereke yin’we, va nga ha va ni mavonelo lama hambaneke loko swi ta etimhakeni ta tidyondzo ni mahanyelo. Mutsari un’wana u te: “Swa tika hambi ku ri ku kuma vanhu vambirhi lava pfumelaka eka Xikwembu xin’we. Masiku lawa, swi vonaka onge munhu un’wana ni un’wana u gandzela hi ndlela ya yena n’wini.”

Ku hambana ni leswi, muapostola Pawulo u khutaze Vakreste va lembe-xidzana ro sungula eKorinto leswaku va “vulavula hi ku twanana” ni ku “hlangana hilaha ku faneleke emianakanyweni yin’we ni le ndleleni yin’we ya ku ehleketa.” (1 Vakorinto 1:10) Namuntlha, vanhu van’wana va xi kaneta xitsundzuxo xa Pawulo. Va ri: ‘Vanhu a va fani naswona swi hoxile ku sindzisa leswaku Vakreste hinkwavo va anakanya kumbe ku endla swilo hi ndlela leyi fanaka.’ Kambe, xana Pawulo a a vula leswaku hi fanele hi fana ni tirhoboto? Xana Bibele ya va nyika vanhu ntshunxeko wa ku tihlawulela?

Vun’we, Hayi Ku Fana

Eka rin’wana ra mapapila yakwe, Pawulo u khutaze Vakreste leswaku va tirhela Xikwembu “hi matimba ya [vona] ya ku anakanya.” (Varhoma 12:1) Kutani ke, swi le rivaleni leswaku a a nga ringeti ku endla swirho swa vandlha ra le Korinto swi fana ni tirhoboto leti nga anakanyiki. Kambe ha yini a va byele leswaku va “hlangana hilaha ku faneleke emianakanyweni yin’we ni le ndleleni yin’we ya ku ehleketa”? Pawulo u nyikele ndzayo leyi hikwalaho ka leswi vandlha ra le Korinto a ri langutane ni xiphiqo lexikulu. Vandlha a ri pandzekile ri ri ni mintlawa yo hambana-hambana, lerova van’wana a va teka Apolosi a ri yena murhangeri wa vona kasi van’wana a va teka Pawulo kumbe Petro kumbe va teka Kreste ku ri yena murhangeri wa vona ntsena. Ku pandzeka loku a ku nga ri mhaka ya matlangwana, hikuva a ku xungeta ku rhula ka vandlha.

Pawulo a a lava leswaku Vakorinto va “hlayisa vun’we bya moya exibohweni lexi hlanganisaka xa ku rhula,” hilaha a va tsundzuxeke ha kona Vakreste va le Efesa. (Vaefesa 4:3) A a khutaza vamakwerhu leswaku va landzela Yesu Kreste hi vun’we, va nga pandzani va va mintlawa kumbe mimpambukwa. Hi ndlela leyi, va ta va ni vun’we exikongomelweni xin’we. (Yohane 17:22) Xisweswo, ndzayo ya Pawulo leyi yaka eka Vakorinto a yi ri ya ku va khutaza leswaku va va ni vun’we, hayi leswaku va fana.—2 Vakorinto 13:9, 11.

Vun’we nakambe i bya nkoka etimhakeni ta dyondzo. Valandzeri va minkondzo ya Yesu va swi xiya leswaku entiyisweni ku ni “ripfumelo rin’we,” tanihi leswi ‘Xikwembu lexi nga Tatana, xi nga xin’we.’ (Vaefesa 4:1-6) Hikwalaho, Vakreste va endla leswi nga ematimbeni ya vona ku tiyiseka leswaku leswi va swi pfumelaka swi pfumelelana ni ntiyiso lowu Xikwembu xi wu paluxeke eRitweni ra xona, malunghana na xona swin’we ni swikongomelo swa xona. Va ni vun’we eka leswi va swi pfumelaka malunghana ni leswaku Xikwembu i mani ni leswaku xi lava yini. Nakambe va hanya hi ku pfumelelana ni milawu ya mahanyelo leyi hlamuseriweke kahle eRitweni ra Xikwembu. (1 Vakorinto 6:9-11) Loko va endla leswi, Vakreste va tshama va ri ni vun’we emhakeni ya leswi va swi pfumelaka ni le mhakeni ya mahanyelo.

Ku Langutana Ni Mavonelo Yo Hambana-hambana

Kambe, leswi a swi vuli swona leswaku Mukreste un’wana ni un’wana wa byeriwa leswaku u fanele a anakanya njhani ni leswaku u fanele a endla yini eka swiyimo hinkwaswo leswi a hlanganaka na swona evuton’wini. Timhaka to tala ti lava leswaku munhu a tihlawulela. Hi lexi xikombiso. Vakreste vo hlayanyana va le Korinto, va lembe-xidzana ro sungula, a va swi vona swi nga fanelanga ku dya nyama leyi humaka etempeleni yo gandzela swifaniso. Van’wana a va vula leswaku ku dya nyama yo tano swi fana ni ku hlanganyela evugandzerini bya mavunwa, kasi eka van’wana a ku nga ri mhaka yikulu leswaku nyama leyi yi huma kwihi. Loko a langutane ni mhaka leyi yo tika, Pawulo a nga vekanga nawu wo byela Vakreste lexi va faneleke va xi endla. Ematshan’weni ya sweswo, u pfumerile leswaku vanhu va nga ha hambana eku endleni ka swiboho emhakeni yo karhi.a—1 Vakorinto 8:4-13.

Namuntlha, Vakreste va nga endla swiboho leswi hambanaka ni swa Vakreste van’wana emhakeni ya ntirho wa ku tihanyisa, rihanyo, vuhungasi kumbe swilo swin’wana leswi lavaka leswaku munhu a tihlawulela. Minhlawulo yo tano yi nga karhata van’wana. Va nga ha anakanya leswaku ku hambana hi mavonelo ku nga ha endla leswaku ku va ni swicele kumbe ku avana evandlheni. Kambe, sweswo swi nga papalateka. Hi xikombiso: Vaqambhi va tinsimu va ni tinoto ti nga ri tingani ntsena, kambe va swi kota ku qambha vuyimbeleri byo hambana-hambana byo nandziha hi ku tirhisa tona. Hilaha ku fanaka, Vakreste va endla minhlawulo leyi nga lwisaniki ni misinya ya milawu ya Xikwembu. Hambiswiritano, va ni ntshunxeko wo karhi loko ku tiwa eka timhaka to karhi ta munhu hi xiyexe.

Xana swi nga kotekisa ku yini ku hlayisa vun’we bya Vukreste hi hala tlhelo hi ri karhi hi xixima mfanelo ya un’wana ni un’wana ya ku tihlawulela? Nchumu wa nkoka i rirhandzu. Ku rhandza Xikwembu swi hi susumetela ku hlayisa milawu ya xona swi suka embilwini. (1 Yohane 5:3) Ku rhandza vanhu-kuloni swi hi endla leswaku hi xixima mfanelo ya van’wana ya ku tihlawulela, hi ku landza ripfalo ra vona, etimhakeni ta munhu hi xiyexe. (Varhoma 14:3, 4; Vagalatiya 5:13) Pawulo u veke xikombiso lexinene emhakeni leyi hi ku yingisa huvo leyi fumaka ya lembe-xidzana ro sungula malunghana ni mhaka leyi khumbaka tidyondzo. (Matewu 24:45-47; Mintirho 15:1, 2) Hi nkarhi lowu fanaka, u khutaze un’wana ni un’wana leswaku a xixima ripfalo ra Mukreste-kulobye etimhakeni leti lavaka xiboho xa munhu hi xiyexe.—1 Vakorinto 10:25-33.

Kutani ke, a swi fanelanga leswaku munhu a soriwa loko a endle xiboho lexi nga lwisaniki ni misinya ya milawu ya Bibele. (Yakobo 4:12) Hi hala tlhelo, Vakreste lava tshembekaka a va nge sihalali va lwela timfanelo ta vona loko sweswo swi ta vavisa mapfalo ya van’wana kumbe loko swi ta endla leswaku vandlha ri pandzeka. Naswona a va nge vuli leswaku va ni ntshunxeko wo endla nchumu lowu swi nga erivaleni leswaku wu lwisana ni Rito ra Xikwembu. (Varhoma 15:1; 2 Petro 2:1, 19) Ku rhandza ka hina Xikwembu swi ta endla leswaku hi twananisa ripfalo ra hina ni mianakanyo ya Xikwembu. Leswi swi ta endla leswaku hi tshama hi ri ni vun’we ni vapfumeri-kulorhi.—Vaheveru 5:14.

[Nhlamuselo ya le hansi]