Mpfuno Eku Boheni Ka Makungu Ya Vutlhari

ALICE u bohe kungu ra vuphukuphuku leri hundzukeke khombo. U pfumerile a ku: “Ndzi tihambanise na Yehova ni nhlengeletano ya yena.” Hambi leswi eku heteleleni a tlheleleke, swi n’wi tekele malembe lama tlulaka 13 ku endla tano—u ya vitane “malembe ya nhlomulo.”

Mukriste a nga fanelanga ku tsongahata khombo ro boha makungu ya vuphukuphuku malunghana ni ntirho wa yena eka Xikwembu. A hi yona mhaka leswaku makungu lama hoxeke ma bohiwa hi laha ku heleleke endzhaku ka ku xiyisisa timhaka leti twisisekaka. Minkarhi yin’wana ya bohiwa ntsena ehenhla ka swisekelo swa swiendlakalo swa rintumbuluko. Loko mintlhaveko yi swi kota ku humelela eka ku nonon’hwisa mhaka naswona mbilu leyi nga hetisekangiki yi hlohlotela nkucetelo lowu nga fanelangiki eka vuswikoti byo ehleketa, muxaka hinkwawo wa ku vaviseka ni nhlomulo wu nga humelela.

Hakunene, “mbilu yi ni mano e ku tlula hikwaŝo.” (Yeremia 17:9) Hambi swi ri tano, Bibele yi hi byela ndlela leyi hi nga tisirhelelaka ha yona. Yi ri: “Loko v̌utlhari byi ta nghena e mbilwini ya wena, ku tiv̌a ku ta ṭakisa moya wa wena.” (Swivuriso 2:10, 11) Kambe xana hi nghenisa vutlhari etimbilwini ta hina hi ndlela yihi?

Dyondza Eka Swilo Swa Khale

Ringeta leswi. Tiveke exiyin’weni xa malandza yo rhanga ya Xikwembu lawa ya langutaneke ni swiyimo leswi ringaka leswi fanaka ni swa wena. Hi xikombiso, a hi nge xiyimo lexi nga ebandlheni ra ka n’wina ra Vukriste xa ku khumba. Ringeta ku ehleketa hi xiyimo lexi fanaka lexi boxiweke eBibeleni.

Ku vuriwa yini hi bandlha ra Vukriste ra lembe xidzana ro sungula eKorinto? Titeki onge u xirho xa bandlha ra Korinto. U ve Mukriste hi malembe mambirhi kumbe manharhu. Mayana ntsako lowu ku veke wona loko u tive ntiyiso enkarhini wa ku tshama ka Pawulo ka 18 wa tin’hweti kwalaho! Kambe sweswi, swilo swi vonaka swi bihile.

Mboyamelo wo vumba mintlawa ni madzolonga wu vanga ku avana ebandlheni, wu xungeta vun’we bya rona. (1 Vakorinto 1:10, 11) Ku pfumelela mahanyelo ya vunghwavava swi nghenisa vumoya bya rona ekhombyeni. (1 Vakorinto 5:1-5) Ku tlakusiwa ka le rivaleni ka ku hambana exikarhi ka swirho swa bandlha emahlweni ka tihuvo ta misava ta nawu ku onha ndhuma ya rona leyinene.—1 Vakorinto 6:1-8.

Tlhela u tianakanya u ri eKorinto ya khale, wa khumbeka leswaku swirho swin’wana swa bandlha swi tshamela ku holovisana hi timhaka leti ti nga riki ta nkoka hakunene. (Ringanisa 1 Vakorinto 8:1-13.) U khomisiwa gome hi dzolonga, vukwele, ku hlundzuka ni mpfilu-mpfilu lowu u wu vonaka. (2 Vakorinto 12:20) Hakunene, u kavanyetiwa hi ntlawanyana wo tikukumuxa wa lava va endlaka leswaku ku hanya ka Vukriste ku nonon’hwa hi laha ku nga fanelangiki. (1 Vakorinto 4:6-8) U vavisiwa hi ku twa leswaku van’wana va kanakana hambi ku ri xiyimo ni matimba ya muapostola Pawulo, va endla swihehlo leswi nga lulamangiki, naswona va hleka ku kayivela ka yena vuswikoti byo vulavula tanihi xivulavuri. (2 Vakorinto 10:10; 12:16) Wa chava leswaku lava va kurisaka mianakanyo ya munhu hi xiyexe erivaleni va nga tsongahata ripfumelo ra bandlha eka dyondzo ya xisekelo.—1 Vakorinto 15:12.

Loko U Langutane Ni Kungu

Wa rila u ku: ‘Leswi a swi fanelanga ku va kona. Ha yini vakulu va nga lunghisi timhaka? Nchumu wun’wana wu hoxe ngopfu.’

Xana u ta tshika bandlha eKorinto, u kunguhata leswaku swa antswa u ya tirhela Xikwembu kun’wana? Kumbe kahle-kahle u ta kunguhata ni leswaku swa antswa ku tshika ku hlanganyela ni Vakriste-kuloni hi laha ku heleleke ke? Xana u ta pfumelela swiphiqo leswi leswaku swi tsongahata ntsako ni ntshembo wa wena wa leswaku Yehova Xikwembu na Yesu Kriste va lawula swilo? Xana u ta va ni moya wo xopa-xopa swihoxo, wo vilela, wu ku vangela ku kanakana minsusumeto ya Vakriste-kuloni? Xana u ta tsana entirhweni wo chumayela, u anakanya leswaku ku na yinhla yintsongo yo kongomisa vanhu lava tsakelaka ebandlheni ro tano?

Loko u languta xiyimo hi laha ku heleleke hi yinhla leyi pfunaka ya namuntlha, u nga ha swi kuma swi olova ku vula leswaku kungu ra wena a ri ta va leri tshembekaka leswaku u tshama ekusuhi ni bandlha ra Xikwembu, ku nga khathariseki ku nga hetiseki ka rona. Kambe loko u langutane ni xiyimo lexi fanaka namuntlha, xana u ta swi kota ku hlayisa mianakanyo leyinene ni mbilu leyi holeke? Xana u ta kunguhata namuntlha hi laha u ehleketaka leswaku a wu ta va u kunguhate ha kona loko a wu hanye enkarhini wolowo?

Ku Pfuneka Eka Ndzayo Ya Vutlhari

Vakriste va le Korinto lava va boheke kungu ra vutlhari hi lava va tshameke ekusuhi ni bandlha. Va titwe hi laha Petro a titweke ha kona emalembeni ya le ku sunguleni. Loko vadyondzisiwa van’wana va tshike ku hlanganyela na Yesu, Petro u te: “Hosi, hi nga ya ka mani xana? U ni marito ya vutomi lebyi nga heriki. Kutani hina hi ni ku pfumela, ni ku swi tiva leswaku hi wena Muhlawuleki wa Xikwembu.” (Yohane 6:68, 69) Entiyisweni, i ku tshama ekusuhi ni nhlengeletano ya Xikwembu ntsena laha hi nga pfunekaka eka xitsundzuxo xa yona.

Eka mabandlha lamantshwa, ku fana ni leri ra le ndzhaku eKorinto, swi tolovelekile leswaku ku tsana ka munhu ku vanga xiphiqo lexi nga lavaka ku nyikeriwa ka xitsundzuxo xa matimba. Kambe loko a tsundzuxa Vakriste va le Korinto, Pawulo u tsundzuke leswaku vunyingi lebyikulu bya vona a va ha ri lava “rhandzekaka.” (1 Vakorinto 10:14; 2 Vakorinto 7:1; 12:19) A nga rivalanga leswaku Yehova u hundzisela musa lowu nga fanelangiki ni ku rivalela eka lava amukelaka vukongomisi bya Yena.—Psalma 130:3, 4.

Kavula, tanihi leswi bandlha ra Vukriste ri kokaka tinxaka hinkwato ta vanhu, van’wana va teka nkarhi wo leha leswaku va amukela vukongomisi ku tlula van’wana. Leswi i ntiyiso hi swivangelo swo hambana-hambana. Ku hundzuka kun’wana ka nonon’hwa ku ku endla ku tlula kun’wana. Nakambe, vanhu hinkwavo va hambana hi xivumbeko xa nyama ni xa mianakanyo, matshamelo, xisekelo na swiyimo. Kutani i vutlhari swonghasi ku papalata ku va la xopa-xopaka ngopfu swihoxo ni ku tsundzuka leswaku “rirhandzu ri funengeta swidyoho leswo tala”! (1 Petro 4:8) Kahle-kahle, loko Yehova ni N’wana wakwe va rhandza ku tiyisela ku tsana ka vanhu ni ku nga kuli ebandlheni ra vona, xana a hi fanelanga ku kombisa moya lowu fanaka?—1 Vakorinto 13:4-8; Vaefesa 4:1, 2.

Loko a wu lo tshama u va ebandlheni eKorinto ya khale, u yingisela xitsundzuxo xa rirhandzu kambe xo tiya xa Pawulo a xi ta va xi ku tsundzuxe leswaku Kriste, tanihi nhloko ya bandlha ra Vukriste, u tsakela ngopfu ku tshamiseka ka rona. (Matewu 28:20) A xi ta va xi ake ntshembo wa wena eka xitshembiso xa Yesu xo hlayisa valandzeri va yena va ri ni vun’we loko va amukela mpfuno lowu lunghiseleriweke hi “nandza lowo tshembeka, lowa vutlhari.” (Matewu 24:45-47; Vaefesa 4:11-16) Ina, naswona marito ya Pawulo a ya ta va ya ku pfune ku hlayisa ntsako ni ku tiya hambi ku ri ehansi ka swiyimo leswi ringaka. A wu ta va u tshembile leswaku Xikwembu xi ta ku nyika matimba yo langutana ni ku nonon’hwa kun’wana ni kun’wana loku xi nga ha ku pfumelelaka leswaku ku humelela swa xinkarhana.

Leswi a swi vuli swona leswaku Mukriste a nga fanelanga ku endla nchumu loko xiyimo xo biha xi va kona ebandlheni. Le ndzhaku eKorinto, vavanuna lava vupfeke ku fana na Stefanasi, Fourtunato, Akayiko, ni van’wana lava humaka ekaya ra Klowe, va teke goza. Entiyisweni va tsundzuxe Pawulo hi xiyimo lexi. (1 Vakorinto 1:11; 5:1; 16:17) Kambe loko va endle sweswo, va tshike timhaka emavokweni ya yena hi ku tiyiseka. Ku chivirikela ku lulama a ku va vangelanga leswaku va lahlekela hi ntshembo eka vunhloko bya Kriste kumbe ku “hlunamela Yehova.”—Swivuriso 19:3.

Ku chivirikela ka hina ku lulama namuntlha ku ta hi sivela ni ku xiya mianakanyo yo tsongahata xiavelo xa hina lexi hi xi nyikiweke hi Xikwembu xo chumayela mahungu lamanene. Ku endla tano swi ta kombisa ku pfumala ku khathalela ku tshamiseka ka van’wana naswona a ku ta va ku tsandzeka ku endla leswi Kriste a lavaka leswaku hi swi endla. Pawulo u tsundzuxile a ku: “Hikwalaho, vamakwerhu lava rhandzekaka, tiyani swinene mi nga tsekatseki; yanani emahlweni swinene ku tirhela Hosi masiku hinkwawo, mi ri karhi mi swi tiva leswaku eHosini mintirho ya n’wina a yi nga weli ehansi.”—1 Vakorinto 15:58.

U Nga Honisi Marhengu Ya Sathana

Swihinga swa bandlha ku fana ni leswi swi humeleleke eKorinto minkarhi yin’wana swi nga ha nonon’hwa ngopfu ku swi tamela ku tlula nxaniso lowu kongomeke. Sathana u tirhisa swiyimo swo tano hi matshalatshala ya ku endla makungu lama hoxeke lawa ya nga ta hi hambukisa eka Yehova. Kambe ‘hi tiva makungu ya Sathana.’—2 Vakorinto 2:11.

Pawulo u byele Vakriste va le Korinto leswaku va nga pfuneka hi ku kambisisa rhekhodo ya malandza ya Xikwembu yo rhanga. Malunghana ni Vaisrayele u te: “Swilo leswi swi va humelerile ku endla xitsundzuxo; na swona swi tsariwile leswaku na hina hi tsundzuxiwa ha swona, hina lava hi nga emasikwini ya ku hetelela ka minkarhi.” (1 Vakorinto 10:11) Hi ku fanana, hina namuntlha hi nga pfuneka eka ku kambisisa rhekhodo ya Vakriste vo rhanga hi vukheta. Hi xikombiso, hi nga xiya leswi humeleleke eKorinto. Ku anakanyisisa ehenhleni ka ndlela leyi a hi ta va hi endle makungu lamanene ha yona enkarhini wolowo ku ta hi pfuna ku papalata ku boha makungu lama hoxeke sweswi.

Endzhaku ka 13 “wa malembe ya nhlomulo” a nga ri kona, Alice u vulavula hi nhlangano wa yena wo sungula eHolweni ya Mfumo a ku: “A ndzi chava ku vulavula leswaku ndzi nga rili. A ndzi ri ekaya—ekaya ra xiviri. A ndzi nga swi tshembi.” Kutani tiyimiseli, leswaku ku nga khathariseki swiphiqo leswi nga tlhekekaka, u khomelela eka kungu ra wena ra vutlhari leswaku u nga tshuki u tshika nhlengeletano ya Yehova! Mikateko ya wena ya ku hlangana ni vanhu va Xikwembu yi ta va leyo tala. Naswona yi nga ka yi nga heli.—Swivuriso 2:10-15, 20, 21.