Vuthu Leri Gwirimbaka!

“Hi tshama eximutanini lexa ha hluvukaka xa Belize, lexi rhendzeriweke hi nhova. Siku rin’wana hi awara ya kwalomu ka kaye, kaya ra hina ri hlaseriwe hi vuthu. Vusokoti byi te hi vunyingi, byi nghena hi le hansi ka nyangwa ni hi mbhovo yin’wana ni yin’wana leyi nga kona, byi ri karhi byi hlota swakudya swa byona. A ku ri hava lexi hi nga xi endlaka loko ku nga ri ku byi rhurhela hina hi humela ehandle ku ringana awara yin’we kumbe timbirhi. Loko hi vuya, a ku pfumala ni ntshwati wa byona.”

EKA VANHU VO TALA lava tshamaka ematikweni lama hisaka yo kota Belize, leswi swi tolovelekile naswona a hi byi vengi ngopfu. Hi yona ndlela yo herisa switsotswana endlwini swo kota mahele ni tinhwala. Naswona ku sala ku basile laha byi hundzaka kona.

Vusokoti lebyi ku vulavuriwaka ha byona laha byi vuriwa vuthu ra vusosa, hi lebyi byi fambaka byi tele onge byo va vuthu.a Vusokoti lebyi bya madzana ya magidi a byi aki swisaka, kambe byi tshama byi ri ndleleni, byi dzima mixaxa swa xinkarhana, ivi byi hakana hi milenge leswaku byi sirhelela hosi ya byona ya xisati ni vana va yona. Kutani ku rhumeriwa ntlawa wa vusokoti byi fole layini byi ya lava swakudya, swakudya swa kona swi katsa switsotswana ni swivumbiwa leswitsongo swo kota minkolombyana. Varhangeri va ntlawa lowu hlaselaka va humesa swin’wana leswi vonakaka onge swa famba leswaku va ta wonga switsotswana leswi va swi lavaka. Leswi swi endleka loko ku nga ri na ndlela leyi byi nga yi landzelaka, lebyi byi rhangeleke entirhweni byi kanakana kutani byi yima. Vusokoti lebyi nga hala ndzhaku byi susumeta lebyi nga le mahlweni hi nkhinkhi, kutani layini yi petseka, ivi ku vonaka swin’wana onge swi le ku haheni hala tlhelo.

Mavuthu ya vusokoti ma teka masiku ya 36 ma ri karhi ma fambile, ma gwirima masiku ya 16 kutani ma yima masiku ya 20, hi nkarhi wolowo hosi ya wona ya xisati ya tshikela. Endzhaku ka sweswo ndlala yi endla leswaku byi nghena endleleni nakambe. Ntlawa lowu, minkarhi yin’wana wu vaka wu aname timitara ta khume, wu famba wu olela mapuma, swipame, swifufunhunu, machela ni minkolombyana, naswona wu heleketiwa hi swinyenyana leswi u kumaka swi dya swilo leswi ntlawa lowu wu swi oleleke endleleni.

Bibele eka Swivuriso 30:24, 25, yi vula leswaku vusokoti “hi ntumbuluko [byi] tlharihile,” i swivumbiwa leswi hlamarisaka.

[Nhlamuselo ya le hansi]

[Xifaniso lexi nga eka tluka 29]

Vuthu ra vusokoti

[Xihlovo Xa Kona]

© Frederick D. Atwood

[Xifaniso lexi nga eka tluka 29]

Byi endla buloho hi ku hakana hi milenge

[Xihlovo Xa Kona]

© Tim Brown/www.infiniteworld.org