Ximhandzana Lexi Basisaka Meno

HI MUTSARI WA XALAMUKA! WA LE ZAMBIA

AFRIKA—tiko-nkulu ra vanhu va meno yo saseka kambe a ri na tikhampani to tala leti endlaka swihlukuhlu! Xana swi endlekisa ku yini sweswo? Eka vo tala, ku n’wayitela ko saseka ku titshege hi ximhandzana—ximhandzana lexi cakunyiwaka!

Ku cakunya swimhandzana a swi tirhisiwa hi Vababilona naswona endzhaku ka nkarhi hi Vaegipta, Vagriki ni Varhoma. Swimhandzana leswi swo “hlukuhla” a swi tirhisiwa ni hi Maislem ya le Arabiya. Ku cakunya swimhandzana swi lahlekeriwe hi nkoka eka vanhu va le Yuropa kwalomu ka malembe ya 300 lama hundzeke, kambe swa ha tolovelekile eswiphen’wini swo karhi swa Afrika, Asiya ni le Vuxa-xikarhi.

Le Vuxa-xikarhi, ximhandzana lexi cakunyiwaka xi vuriwa saltbush, xi tiveka hi vito ra murhi wo hlukuhla meno. Le Vupela-dyambu bya Afrika, ku tirhisiwa kalaka ni murhi wa lamula, kasi nsinya wa neem ku cakunyiwa wona swinene ematikweni ya Indiya. Kwalomu ka misinya leyi tlulaka 300 le Vuxeni bya Afrika ya tirhisiwa ku basisa meno. Xana ximhandzana xi basisa njhani meno?

Loko u ri karhi u cakunya, ximhandzana xa hlakateka, xi endla “burachi” yo tiyela. Loko u hambeta u cakunya swi susa swilo leswi tshameke exikarhi ka meno naswona swi tlhela swi endla ngati yi khuluka kahle eka maxinini. Naswona ku cakunya swi endla leswaku ku va ni marha yo tala, lama tirhaka tanihi xihlantswa nomu lexi susaka switsongwatsongwana ni ku endla leswaku swi fa.a

Kambe ku cakunya ximhandzana a swo pfuna ku hlantswa meno ntsena. Swirhabyana ni timitsu ta swimilana swin’wana swi ni tikhemikhali leti hungutaka ku bola ka meno. Swimhandzana swin’wana swi tshame swi kombiwa swi ri ni tikhemikhali leti lwisanaka ni switsongwatsongwana. Swiphemu swa swimhandzana swin’wana swi ni tikhemikhali leti lwisanaka ni switsongwatsongwana ni swilo leswi vangaka swilondza enon’wini. Le Namibia, ximhandzana xa murhi wo hlantswa meno lowu vuriwaka muthala, swi nga kavanyeta ku kula ka xitsongwatsongwana lexi vangaka ku bola ka meno, mavabyi ya maxinini ni ku vava ka mikolo. Murhi lowu wa ntumbuluko wu nga sivela timbhovo xikan’we ni ku tiyisa timitsu ta meno ni maxinini. Sweswi tikhampani tin’wana ti endla mirhi yo hlantswa meno leyi endliweke hi swiphemu leswi tekiweke eka misinya leyi.

Ina, van’wana va rhandza ku tirhisa xihlukuhlu xa ntolovelo. Hambi u hlawula ku tirhisa xihlukuhlu kumbe ximhandzana ku fana ni lava khale, mhaka leyi salaka hi leyi: Ku hlamba meno i nchumu wa nkoka wo hlayisa rihanyo ra wena.

[Nhlamuselo ya le hansi]

[Xifaniso lexi nga eka tluka 21]

Ku cakunyiwa swinene swimhandzana swa nsiyna wa Neem

[Xihlovo Xa Kona]

William M. Ciesla, Forest Health Management International, www.forestryimages.org