Ku Vulavurisana Loku Nyikaka Vutomi

EKA SWIVUMBIWA hinkwaswo swa laha misaveni, vanhu a vo lava ku vulavurisana hi xivona ntsena. Kambe va ni ku navela lokukulu ko vulavurisana ni munhu la tlakukeke, ku nga Xikwembu, ku nga khathariseki leswaku i va tiko rihi, va ni xiyimo xihi etikweni, i va rimbewu rihi kumbe va dyondze ku fika kwihi.

Xana sweswo ko va vukholwa-hava ntsena? Nikatsongo! Hilaha swi boxiweke hakona eka xihloko lexo rhanga, Xikwembu xi tumbuluxe vanhu hi xifaniso xa xona. Xi hi endle leswaku hi va ni vuswikoti byo twisisa swilo swa moya. Leswi swi katsa ku navela ka hina ko vulavurisana na xona leswi xi nga Tata wa hina wa le tilweni. (Genesa 1:27; Matewu 5:3) Entiyisweni, Xikwembu xi languta ku vulavurisana na xona ku ri ka nkoka swinene lerova xi vuriwa “Mutwi wa xikhongelo.”—Pisalema 65:2.

Mayana lunghelo ronghasi ro khongela eka Lowa Matimba Hinkwawo! Vanhu vo tala va swi teka ku ri lunghelo ku vulavula ni munhu la xiximekaka exihundleni, wo tanihi muungameri kumbe holobye-nkulu. Kambe, Yehovha Xikwembu hi yena munhu la tlakukeke evuakweni hinkwabyo! Naswona a swi kali swi lava hi xi byela ka ha ri emahlweni leswaku hi lava ku vulavula na xona rini. Hi nga khongela nkarhi wun’wana ni wun’wana, hambi hi ri kwihi. Hi nga khongela eka Xikwembu hambi hi mbilu, hi miyerile. (1 Samuwele 1:12-15) Hambiswiritano, Yehovha u lava leswaku hi tshembeka naswona hi n’wi yingisa. (Mikiya 6:8; Matewu 6:5-13) Kahle-kahle, mbulavurisano lowunene wu lava leswaku vanhu vambirhi va hlamulana, a swi tano ke?

Xana Wa Xi Yingisa Xikwembu?

Xana munhu u xi yingisa njhani Xikwembu? U xi yingisa hi ku hlaya ni ku hanya hi tidyondzo leti kumekaka eRitweni ra xona leri tsariweke, ku nga Bibele yo Kwetsima. (2 Timotiya 3:16; 2 Petro 1:20, 21) Yesu u te: ‘Munhu u fanele a hanya hi rito rin’wana ni rin’wana leri humaka enon’wini wa Yehovha.’ (Matewu 4:4) Xana wa xi yingisa Xikwembu hi ku hlaya ni ku hanya hi Rito ra xona leri tsariweke?

Lava vulavulaka na Yehovha minkarhi hinkwayo va amukeleka eka yena naswona va kuma “ku rhula ka Xikwembu loku tlulaka miehleketo hinkwayo.” (Vafilipiya 4:6, 7; Swivuriso 1:33) Naswona va ni ntshembo wo kuma vutomi lebyi nga heriki eparadeyisini ya le misaveni, laha ku nga taka ku nga ha ri na mivilelo ni ku xaniseka hinkwako loku nga kona namuntlha. (Pisalema 37:29; Yohane 17:3) Hakunene leyi yi ta va hakelo yo hlamarisa ya ku ri tirhisa kahle singita leri ra vuswikoti byo vulavurisana!

[Xifaniso lexi nga eka tluka 26]

Ku vulavurisana ni Xikwembu swi katsa ku hlaya Bibele ni ku khongela